Namona be Iehova Ita Abidadama Henia
‘Iehova oi abidadama henia.’—AONEGA HEREVADIA 3:26.
1. Ena be momo idia gwau Dirava idia abidadama henia, to dahaka ese ia hahedinaraia reana idia karaia lasi?
INAI hereva “Dirava Ita Abidadama Henia” be United States of America ena moni dekenai ia hedinarai. To, unai tano eiava tano ma haida ai, unai moni idia gaukaralaia taudia ibounai ese Dirava idia abidadama henia momokani, a? Eiava moni idia abidadama henia bada? Unai tano eiava tano ma haida edia moni, bona siahu ibounai Diravana mai ena lalokau, dala maorona ai ena siahu ia gaukaralaia Diravana mai mataganigani lasi, be nega tamona ita abidadama henia be hegeregere lasi. Oibe, Dirava ia hahedinaraia goevagoeva mataganigani karana ia ura henia lasi.—Efeso 5:5.
2. Keristani taudia momokanidia edia lalohadai kohu ena siahu dekenai be dahaka?
2 Keristani taudia momokanidia ese Dirava idia abidadama henia, kohu mai ena siahu koikoina idia abidadama henia lasi. (Mataio 13:22, NW) Idia lalo-parara moale habadaia totona bona hahemauri abia totona moni ena siahu be mai hetoana. To Siahu Ibounai Diravana ena siahu be idau. (Sepanaia 1:18) Unai dainai, inai sisiba be aonega herevana: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani’ ”!—Heberu 13:5.
3 Aposetolo Paulo ese Heberu Keristani taudia dekenai unai hereva ia torea neganai, ia ese Mose be kahirakahira ia mase neganai, Israela taudia dekenai ia henia haheganina ia gwauraia. Mose ia gwau: “Do umui goada, emui lalona do umui ha-aukaia, bona idia dekenai do umui gari henia lasi. Badina be Lohiabada, emui Dirava ese umui dekenai do ia noho. Ia ese umui do ia negea lasi, ia ese umui do ia rakatania lasi.” (Deuteronomi 31:6) Unai karoa ena siri ma haida idia hahedinaraia Mose ese idia ia hagoadaia Iehova idia abidadama henia, tauanina gaudia totona sibona lasi, to ma gau haida totona danu. Edena dala amo?
4. Dirava ese edena dala ai Israela taudia dekenai ia hamomokania ia idia abidadama henia diba?
4 Israela taudia be lagani 40 lalonai tano gagaena dekenai idia loaloa neganai, Dirava ese edia mauri durua gaudia ia henidia noho. (Deuteronomi 2:7; 29:5) Ia ese idia ia hakaua danu. Unai ia hedinarai dalana ta be dina ai ori amo bona hanuaboi ai lahi amo “aniani namodia gabuna” dekenai idia ia hakaua lao. (Esodo 3:8; 40:36-38) Gwauhamata Tanona ai idia vareai gwauraia neganai, Iehova ese Iosua ia abia hidi Mose ena gabu ia abia totona. Reana unai tano taudia ese edia dala do idia koua toho. To Iehova be lagani momo lalonai ena taunimanima ida ia raka vadaeni dainai idia gari be anina lasi. Badina namodia dainai Israela taudia idia diba Iehova Dirava idia abidadama henia diba!
5. Hari inai negai Keristani taudia bona Gwauhamata Tanona dekenai idia vareai gwauraia Israela taudia edia mauri be edena bamona idia hegeregere?
5 Hari inai negai Keristani taudia be tano gagaena bamona tanobadana dikana ai idia loaloa, Dirava ena tanobada matamatana dekenai idia raka lao totona. Idia haida be lagani 40 ma haida lalonai unai dala idia badinaia vadaeni. Hari idia be Dirava ena tanobada matamatana ena hetoana dekenai idia gini. To, edia inai taudia ese edia dala idia do koua toho, idia ura rata bona hani amo ia honu idaunegai Gwauhamata Tanona do ia hereaia gabuna do idia vareai taudia do idia hahekwakwanaia. Unai dainai, hari inai negai Keristani taudia dekenai Paulo ena hereva, Mose ena hereva ia gwauraia lou herevana, be mai anina, ia gwau: “Lau ese umui do lau negea lasi, bona umui do lau rakatania lasi. Lasi bona lasi momokani”! Idia goada bona idia gari lasi taudia, mai kamonai ida Iehova idia abidadama henia noho taudia ibounai, idia diba davana namona do idia abia.
Diba Bona Turana Karana amo Ia Vara Abidadama
6, 7. (a) Dahaka ese Aberahamo ena abidadama Iehova dekenai ia tohoa? (b) Aberahamo be Isako do ia bouboulaia gabuna dekenai ia raka lao neganai, reana dahaka ia laloa?
6 Nega ta Israela taudia edia tubuna Aberahamo be hahegani ia abia, ena natuna mero Isako be lahi dekenai ia bouboulaia totona. (Genese 22:2) Dahaka ese unai lalokau tamana ia durua, Iehova ia abidadama henia momokani, bona maoromaoro mai ena ura ida ia kamonai henia totona? Heberu 11:17-19 ia haere, ia gwau: “Abidadama dainai Aberahamo ese iena natuna Isako ia abia, boubou gauna bamona Dirava dekenai ia henia. Unai be, Dirava ese Aberahamo ena abidadama ia tohoa neganai. Oibe, Aberahamo ia diba Dirava ese iena gwauhamata ia henia, to iena natuna tamona be boubou gauna bamona do ia alaia gwauraia. Dirava ese guna ia hereva henia, ia gwau, ‘Isako dekena amo oiemu bese do ia vara.’ To Aberahamo ia daradara lasi, ia laloa, ‘Bema Isako ia mase, Dirava be mai ena siahu do ia hatorea isi lou.’ To inai bamona ita herevalaia diba, ani? ‘Aberahamo ese Isako ia abia lou mase dekena amo.’ ”
7 Mani oi laloa Aberahamo bona Isako be dina toi idia raka murinai, boubou do idia karaia gabuna dekenai idia ginidae. (Genese 22:4) Nega bada ia noho Aberahamo ese ia abia haheganina ia laloa lou totona. Ena hemami ita lalo-pararalaia diba, a? Isako ia vara be guna idia laloa lasi gauna, to idia moalelaia bada. Aberahamo bona ena adavana Sara, guna natuna ia havaraia diba lasi hahinena, idia diba Dirava dainai natuna idia abia bona unai ese edia lalokau Dirava dekenai ia habadaia. Momokani unai murinai edia mauri lalonai, Isako bona ena natudia edia vaira negana idia laloa momo. To, Dirava ese hari ia noia gauna dainai edia ura gaudia be do idia guguru lasi, a? Toana be unai bamona.
8 To, Aberahamo ena abidadama be turadia namodia ese ta ta dekenai idia diba gaudia amo ia vara. Aberahamo be “Dirava ena turana” bona “Dirava ia abidadama henia, bona iena abidadama dainai Dirava ia gwau ia be maoromaoro vadaeni.” (Iamesi 2:23) Aberahamo ia abia dae momokani Dirava ese Isako ia hatorea isi lou diba, to unai sibona lasi. Ena be gau ibounai ia diba lasi, to ia abia dae momokani Iehova ese ia noia gauna ia karaia be maoro. Iehova ese mai ena kara maoromaoro ida unai gauna ia noia bona Aberahamo ia laloa ia ese unai ia henanadailaia be mai badina lasi. Bena, Iehova ena aneru ese Isako hamasea bona bouboulaia karana ia koua dainai, Aberahamo ena abidadama ia goada ia lao.—Genese 22:9-14.
9 Aberahamo ese lagani 25 bamona gunanai danu unai bamona abidadama Iehova ena kara maoromaoro dekenai ia hahedinaraia. Sodoma bona Gomora be dika do idia davaria ia kamonai neganai, ia ese unuseniai idia noho kara maoromaoro taudia, ena kakana ena natuna mero Lota danu, edia namo ia laloa momo. Aberahamo ese Dirava ia hereva henia, ia gwau: “Kara maoromaoro taudia bona kara dika taudia nega tamona do oi alaia lasi, a? Kara maoromaoro taudia bona kara dika taudia, bema edia davana be tamona, be hegeregere lasi. Unai bamona be oiemu kara lasi. Tanobada ibounai ena kota biaguna be kara maoromaoro do ia karaia lasi, a?”—Genese 18:25.
9, 10. (a) Edena negai Aberahamo ese Iehova dekenai abidadama ia hahedinaraia vadaeni? (b) Aberahamo amo ita abia dibana namona be dahaka?
10 Bese kwarana tauna Aberahamo ia diba momokani Iehova ena kara ibounai be maoromaoro. Gabeai salamo torea tauna ia gwau: “Lohiabada ena kara ibounai be maoromaoro, bona ia ese taunimanima ibounai dekenai ia bogahisihisi henia noho.” (Salamo 145:17) Namona be sibona ita nanadaia: ‘Iehova ese ia koua lasi gau dikadia idia vara neganai, idia lau abia dae sibona bona ena kara maoromaoro lau daradaralaia lasi, a? Lau abia dae momokani, ia koua lasi gaudia ibounai ese gabeai lauegu namo bona ma haida edia namo danu do idia havaraia, a?’ Bema ita haere diba ‘Oibe,’ Aberahamo amo diba namona ita abia vadaeni.
Iehova ese Ia Abia Hidi Taudia Ita Abidadama Henia
11, 12. (a) Dirava ena hesiai taudia ese edena dala badana ta ai edia abidadama idia hahedinaraia? (b) Reana nega haida ita hekwarahilaia gauna be dahaka?
11 Iehova idia abidadama henia taudia idia hahedinaraia idia be mai edia abidadama Iehova ese ena ura hagugurua totona ia abia hidi taudia dekenai danu. Israela taudia dekenai unai ena anina be Mose bona gabeai ena gabu ia abia tauna Iosua idia abidadama henia. Keristani taudia ginigunadia dekenai ena anina be aposetolo taudia bona Ierusalema kongregesen ena elda taudia idia abidadama henia. Hari inai negai ita dekenai ena anina be “hesiai tauna mai ena kamonai, bona mai ena kara maoromaoro” oreana, nega korikori ai lauma “aniani” henia gaukarana ia abia oreana unai, bona unai orea taudia haida, Hakaua Oreana lalonai idia gaukara taudia, ita abidadama henia.—Mataio 24:45.
12 Momokani, Keristani kongregesen idia hakaua taudia ita abidadama henia karana amo ita ese namo do ita davaria. Paulo ese ita ia hamaoroa, ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui [souli] idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. . . . Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”—Heberu 13:17.
Iehova ese Ia Abia Hidi Taudia Idia Hegeregere Lasi Lalohadaina Dadaraia
13. Gaukara idia gunalaia taudia ita abidadama henia diba ena badina be dahaka?
13 Baibel ese ita ia durua Iehova ena orea lalonai gaukara idia gunalaia taudia dekenai abidadama maorona ita hahedinaraia totona. Reana sibona ita nanadaia: ‘Mose ia kerere lasi, a? Aposetolo taudia ese Iesu ia ura henia Keristani karadia idia hahedinaraia hanaihanai, a?’ Haere ita diba vadaeni. Iehova ese ia idia badinaia taudia ia abia hidi ena taunimanima idia hakaua totona, herevana idia be goevadae lasi taudia. Unai hegeregerena, ena be hari inai negai elda taudia be goevadae lasi, to namona be ita abia dae ‘lauma helaga ese orea naria taudia ai ia halaoa, Dirava ena ekalesia idia ubua’ totona. Iseda heduru bona hemataurai idia dekenai do ita henia be namo.—Kara 20:28.
14. Iehova ese Arona o Miriama ia abia hidi lasi to Mose ia abia hidi dainai, dahaka ita laloa bada be namo?
14 Mose be lagani toi Arona murinai ia vara, to idia ruaosi be edia taihuna, Miriama, murinai idia vara. (Esodo 2:3, 4; 7:7) Bona Arona ena hereva dalana be haraga to Mose ena hereva dalana be metaira dainai, Dirava ese Arona ia abia hidi ena tadina ena gwaukau tauna ai ia lao totona. (Esodo 6:29–7:2) To, Israela taudia ia hakaua totona, Iehova ese ia vara guna natuna, Miriama, eiava ia hereva haraga tauna, Arona, ia abia hidi lasi. Iehova ese unai negai idia vara gaudia ibounai ia diba namonamo dainai, ia ese Mose ia abia hidi. Nega ta, Arona bona Miriama ese unai lalohadai maorona idia laloaboio, idia maumau: “Lohiabada be Mose sibona mo ena uduna dekena amo ia hereva, a? Sedira ai danu aiemai hereva dekena amo Lohiabada ia hereva vadaeni.” Reana Miriama ese unai lalohadai ia havaraia bona Iehova ese ia panisia badina ia ese Iehova ia abia hidi tauna ia matauraia lasi. Namona be ia bona Arona idia diba Mose be “tanobada taudia ibounai edia huanai ia sibona be manau herea.”—Numera 12:1-3, 9-15.
15, 16. Edena dala ai Kaleba ese ia hamomokania ia ese Iehova ia abidadama henia?
15 Mose ese Gwauhamata Tanona dekenai spai taudia 12 ia siaia neganai, idia 10 ese sivarai dikana idia mailaia. Idia gwau Kanana “taudia be goada herea” bona unai hereva amo idia ese Israela taudia edia kudouna dekenai gari mamina idia havaraia. Bena, unai dainai, Israela taudia ese “Mose bona Arona dekenai idia maumau.” To spai taudia ibounai ese Mose bona Iehova abidadama henia karana idia rakatania lasi. Ita duahia: “Vadaeni Kaleba ese Mose idia hagegea taudia edia maumau hereva ia hadokoa, ia gwau, ‘Harihari unai tano ita tuari henia be namo, badina ita be mai goada, unai tano ita abia diba.’ ” (Numera 13:2, 25-33; 14:2) Kaleba bona ena spai turana, Iosua, ruaosi idia gini goada. Idia ruaosi idia hahedinaraia Iehova idia abidadama henia badina idia gwau: “Bema Lohiabada ese ita dekenai ia laloa namo neganai, ia ese unai tano dekenai ita do ia hakaua. Oibe, ia ese unai tano, rata bona hani dekenai ia honu tanona ita dekenai do ia henia. To . . . unai tano taudia do umui gari henia lasi . . . Lohiabada be ita dekenai ia noho, to idia be durua diravana ta lasi. Unai dainai do umui gari lasi.” (Numera 14:6-9) Iehova idia abidadama henia dainai davana namona idia abia. Unai negana ai idia noho tatau bona hahine badadia amo, Kaleba, Iosua, bona Levi taudia haida sibona be Gwauhamata Tanona dekenai idia vareai.
16 Lagani haida murinai Kaleba ia gwau: “To lau ese Lohiabada egu Dirava lau badinaia momokani. . . . To harihari oi itaia, Lohiabada be unai bamona Mose dekenai ia hereva ia mai bona hari be lagani 45. Unai be Israela ese tano kaukau idia raka hanaia neganai, bona Lohiabada ese lau ia hamauria noho ia mai bona hari, iena gwauhamata hegeregerena. Oi itaia, harihari egu mauri lagani be 85. Bona hari dina dekenai egu goada be do noho, Mose ese lau ia siaia dinana hegeregerena.” (Iosua 14:6-11) Kaleba ena lalohadai namona, ena kamonai karana, bona ena tauanina ena goada mani oi laloa. To, Iehova ese Kaleba ia abia hidi lasi Mose ena gabu ia abia totona. Unai hahenamo be Iosua ese ia abia. Ita diba momokani Iehova be mai badina namodia dainai Iosua ia abia hidi, bona unai be abia hidi hereadaena.
17. Dahaka dainai haida idia laloa Petero be ia hegeregere lasi maduna ia abia totona?
17 Aposetolo Petero ese nega toi ena Biaguna ia gorea. Danu, ia laloa namonamo lasi dainai sibona ena hemami ia badinaia bona hahelaga tauna badana ena hesiai tauna ena taiana ia utua oho. (Mataio 26:47-55, 69-75; Ioane 18:10, 11) Reana haida idia gwau Petero be laloa namonamo lasi gari tauna, bona ia hegeregere lasi hahenamo badadia do ia abia. To, daika ese Basileia ena ki ia abidia, orea toi dekenai guba maurina abia diba dalana ia kehoa totona? Tauna be Petero.—Kara 2:1-41; 8:14-17; 10:1-48.
18. Dahaka kerere, Iuda ese ia gwauraia gauna, be ita ura ita dadaraia?
18 Unai haheitalai ese idia hahedinaraia namona be ita naria namonamo ta ena toana hegeregerena ia ita kota henia garina. Bema Iehova ita abidadama henia, ia abia hidi taudia do ita henanadailaia lasi. Ena be ena tanobada kongregesen taudia be goevadae lasi taudia, bona idia gwau diba lasi idia be kerere lasi taudia, to ia ese dala badana ai idia ia gaukaralaia. Iuda, Iesu ena tadina, ese Keristani taudia ginigunadia ia sisiba henia ia gwau haida be “Dirava ena siahu idia gwauraia be anina lasi. Idia ese danu [hairai] taudia idia hereva dika henia.” (Iuda 8-10) Idia bamona ita kara be namo lasi.
19. Dahaka dainai Iehova ese ia abia hidi taudia be idia hegeregere lasi lalohadaina ita abia lasi be namo?
19 Toana be Iehova ese gaukara haida totona taunimanima ia abia hidi badina edia kara haida dainai idia hegeregere unai negai Iehova ia ura dalana ai ena taunimanima do idia hakaua. Namona be ita hekwarahi unai lalohadai ita abia dae totona, ita laloa lasi Dirava ese ia abia hidi taudia be hegeregere lasi, to Iehova ese ita ta ta ia atoa gabuna dekenai mai manau bona moale ida ita gaukara. Unai kara amo ita hahedinaraia ita ese Iehova ita abidadama henia.—Efeso 4:11-16; Filipi 2:3.
Iehova Ena Kara Maoromaoro Ita Abidadama Henia
20, 21. Dirava ese Mose ia kara henia karana amo dahaka ita dibaia diba?
20 Bema nega haida, sibona ita abidadama henia bada to Iehova ita abidadama henia maragi, namona be Mose amo diba ita abia. Ena mauri lagani be 40 neganai, sibona ena lalohadai hegeregerena Aigupito ena igui amo Israela taudia ia ruhaia toho. Reana mai ena ura namona ida ia karaia, to Israela taudia ia ruhaia diba lasi, bona sibona ena mauri ia hanamoa lasi. To, unai kara dainai Aigupito amo ia heau mauri. Lagani 40 lalonai tano idauna dekenai mai hekwarahi ida diba ia abia murinai sibona, guna ia ura ia karaia gauna ia karaia totona ia hegeregere. Vadaeni ia diba momokani Iehova ese iena kara do ia durua badina hari ia ese Iehova ena ura hegeregerena bona Ia abia hidi negana ai ia karaia.—Esodo 2:11–3:10.
21 Ita ta ta be sibona ita nanadaia diba: ‘Nega haida Iehova bona kongregesen dekenai ia abia hidi elda taudia lau kamonai henia lasi badina lau ura gau haida be idia heau haraga eiava sibona egu dala ai idia vara, a? Lau idia abia hidi lasi neganai lau lalohisihisi lasi bona lau abia dae hari be egu nega diba lau abia totona, a?’ Anina be, Mose amo diba namona ita abia vadaeni, a?
22. Ena be Mose ese hahenamo badana ia haboioa, to edena bamona ia laloa Iehova dekenai?
22 Ma danu, Mose amo ma gau ta ita dibaia diba. Numera 20:7-13 ese Mose ia karaia kererena bona ia abia davana ia herevalaia. Ia ese Gwauhamata Tanona dekenai Israela taudia ia hakaua hahenamona ia haboioa. Ia laloa Iehova ese ia kara henia dalana be maoro lasi, a? Ia gini siri bona ia badu badina Dirava ese ia kara dika henia, a? Unai murinai Mose ese Iehova ena kara maoromaoro ia abidadama henia lasi, a? Mose ena mase be kahirakahira neganai, Israela taudia dekenai ia gwauraia herevadia amo haere ita abia. Mose ese Iehova ia herevalaia, ia gwau: “Iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 32:4) Mose ese Iehova ia abidadama henia ela bona dokona. To ita be edena bamona? Ita ta ta ese dala ita tahua sibona eda abidadama Iehova bona ena kara maoromaoro dekenai ita hagoadaia totona, a? Edena bamona unai ita karaia diba? Mani do ita itaia.
Edena Bamona Do Oi Haere?
◻ Badina be dahaka Israela taudia ese Iehova idia abidadama henia diba?
◻ Aberahamo amo dahaka ita dibaia diba abidadama karana dekenai?
◻ Dahaka dainai Iehova ese ia abia hidi taudia be idia hegeregere lasi lalohadaina ita dadaraia be namo?
3. Paulo ese Deuteronomi 31:6 ia gwauraia lou, unai karoa ena siri ma haida ese edena bamona ita idia durua Paulo ena hereva ita lalo-pararalaia namonamo totona?
8. Aberahamo ia abia dae momokani Dirava ese Isako ia hatorea isi lou diba sibona lasi, to dahaka danu ia abia dae?
[Picture on page 13]
Iehova ita abidadama henia karana ta be kongregesen lalonai gaukara idia gunalaia taudia ita matauraia