Dirava Ena Kara Maoromaoro Dekenai Iseda Abidadama Ita Hagoadaia

‘Iehova oi abidadama henia totona oi lau hadibaia noho.’—AONEGA HEREVADIA 22:19.

1, 2. (a) Dahaka dainai Iehova ena Witness taudia ese Iehova dekenai abidadama idia hahedinaraia? (Aonega Herevadia 22:​19) (b) Dahaka ese ia hahedinaraia haida ese edia abidadama Iehova dekenai idia hagoadaia be namo?

KERISTANI taudia momokanidia edia hahenamo ta be Iehova bona ena ura idia diba maoromaoro. “Hesiai tauna mai ena kamonai, bona mai ena kara maoromaoro” oreana ese nega korikori ai idia dekenai lauma “aniani” ia henia. (Mataio 24:45) Idia abia dibana ese badina aukana ia henia edia abidadama Dirava dekenai idia haginia totona. Unai dainai, Iehova ena Witness taudia edia orea ese Iehova bona ena kara maoromaoro dekenai abidadama goadana idia hahedinaraia.

² To, toana be Witness taudia haida ese sibodia edia abidadama idia hagoadaia be gau badana. Nega haida taunimanima ese Society dekenai revareva idia siaia bona Society ena bukadia dekenai idia hedinarai herevadia dainai edia daradara idia hahedinaraia. Reana unai daradara ia vara badina Society ese sibona ena lalohadai ia hamaoromaoroa, eiava hereva haida be mai anina bada revareva torea tauna dekenai, reana hemami goadana ia havaraia.​—Ioane 6:​60, 61 itaia.

3. Iehova ena kamonai hesiai taudia dekenai danu dahaka ia vara diba, bona dahaka dainai?

³ Iehova ena hesiai taudia momokanidia danu ese Hadibaia Tauna 9:​11 ena hereva idia hamomokania diba, ia gwau: “Ma gau ta lau diba inai: Inai tanobada lalonai, heau helulu dekenai, heau haraga taudia be guna lasi, bona tuari lalonai, goada taudia idia kwalimu lasi. Aonega taudia ese aniani idia abia lasi, diba momo taudia ese kohu momo idia davaria lasi, bona gaukara bada taudia be do idia hanamoa lasi. Badina ibounai ese nega dika idia davaria noho, bona inai dika ia vara kava noho.” Dala idauna, eiava lauma dalana dekenai edena bamona unai ia momokani? Reana ita ese Keristani taudia haida ita diba, guna idia ese Baibel ena sisiba idia badinaia haraga, hereva momokani ena maoro idia hamomokania mai edia goada ida, aonega dalanai Baibel ena hakaua herevadia idia badinaia, bona diba maorona idia tahua goadagoada. To, “dika ia vara kava” dainai, reana idia haida be aksiden idia davaria eiava idia buruka idia lao dainai idia laloa guna idia kara bamona hari idia kara diba lasi. Reana idia daradara, idia laloa do idia mase guna bena gabeai Dirava ena tanobada matamatana do ia mai, eiava lasi.

4, 5. Dahaka dainai Keristani taudia ese Iehova ena kara maoromaoro dekenai edia abidadama idia haboioa be anina lasi?

⁴ Keristani tauna ta ena adavana ia mase neganai, anina bada gauna ia boio mamina bona hisihisi be idia bada. Reana idia ruaosi be lagani momo herea lalonai Iehova idia hesiai henia hebou. Ia do mauri noho tauna ia diba mase ese headava ia hadokoa.a (1 Korinto 7:​39) Vadaeni, namona be ena hemami ia biagua namonamo ena abidadama do ia manoka garina.​—Mareko 16:⁠8 itaia.

⁵ Iseda adavana, tama o sina, natuna, eiava Keristani turana namona ia mase neganai, aonega karana be ita laloa unai ese dala ia kehoa Iehova ena kara maoromaoro dekenai abidadama ita hahedinaraia totona! Iseda lalokau tauna ia mase neganai, ita diba momokani Iehova ena kara ibounai be maoromaoro. Ita diba momokani mauri hanaihanai​—roho mauri eiava toreisi lou amo​—idia abia taudia ibounai do idia moale. Salamo torea tauna ese Dirava ia herevalaia, ia gwau: “Oi be emu imana oi kehoa noho bena mauri gaudia ibounai edia ura oi hagugurua noho.” (NW) “Lohiabada ena kara ibounai be maoromaoro, bona ia ese taunimanima ibounai dekenai ia bogahisihisi henia noho. Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho. Ia dekenai idia gari taudia dekenai, idia ura henia gaudia ia henia noho. Edia taitai ia kamonai, bona ia ese idia ia hamauria noho.”​—Salamo 145:16-19.

Hisihisi Ita Davaria Kava Ena Mamina Ita Abia Neganai

6, 7. (a) Dahaka dainai guna hisihisi idia davaria Witness taudia haida edia lalohadai be hari ia idau? (b) Dahaka dainai ita laloa lasi Iehova ese guna unai bamona hisihisi ia koua lasi dainai ena kara be maoromaoro lasi?

⁶ Guna, Witness taudia haida ese edia lalona ena mamina dainai gaukara ta idia dadaraia bena hisihisi idia davaria, to hari edia lalona ia hegeregere unai kara tamona idia karaia. Hegeregere, reana guna idia laloa, ami gaukara idia karaia lasi taudia dekenai gavamani ese ia henia gaukara idauna danu idia karaia diba lasi. Reana hari tadikaka ta ia laloa ena lalona ena mamina ia hegeregere unai gaukara ia karaia bona unai gaukara ese inai tanobada amo Keristani gini siri karana ia hadikaia lasi.

⁷ Hari unai gaukara ia karaia bona ia dekenai dika ia vara lasi, to guna ia dadaraia dainai hisihisi ia davaria. Ena anina be Iehova ena kara be maoromaoro lasi badina ena hisihisi ia koua lasi, a? Idia dekenai unai ia vara taudia momo be unai bamona idia laloa lasi. To, idia moale badina guba bona tanobada ena lohia siahuna ena hepapahuahu lalonai idia gini goada bona taunimanima vairanai unai idia hahedinaraia goevagoeva diba. (Iobu 27:5 itaia.) Ta ese ena lalona ena mamina ia badinaia dainai Iehova ena kahana ai ia gini goada karana ia lalohisihisilaia be anina lasi, ani? Mai edia kamonai ida Keristani hakaua herevadia idia lalo-pararalaia hegeregerena eiava edia lalona ena mamina idia badinaia karana amo idia hamomokania idia hegeregere Iehova ena turana ai idia lao. Momokani, edia lalona ena mamina ia hadikaia karana ta eiava ma haida ia hamorua karana ta idia dadaraia be aonega dalana. Namona be ita ese aposetolo Paulo ia hahedinaraia haheitalaina ita laloa.​—1 Korinto 8:​12, 13; 10:31-​33.

8. Dahaka dainai Iuda Keristani taudia, guna Taravatu idia badinaia taudia, ese Iehova ena kara maoromaoro idia henanadailaia be anina lasi?

⁸ Iehova idia hamoalea totona, Iuda taudia ese Taravatu 10 bona ma taravatu idauidau 600 bamona idia badinaia be gau badana. Gabeai, Keristani dalanai Iehova idia hesiai henia totona, idia, Iuda taudia korikoridia danu, be unai taravatu idia badinaia lasi. Unai anina lasi taravatu haida be kopina utua karana, Sabati badinaia karana, animal bouboulaidia, bona aniani taravatudia haida. (1 Korinto 7:​19; 10:25; Kolose 2:​16, 17; Heberu 10:​1, 11-​14) Keristani taudia ai idia lao Iuda taudia​—aposetolo taudia danu​—be guna Taravatu gwauhamata henunai taravatu momo idia badinaia to hari idia be unai taravatudia henunai lasi. Vadaeni, idia maumau Dirava ena kara be maoromaoro lasi badina guna Taravatu henunai idia noho to hari ia ese ia ruhadia, a? Lasi, idia moale sibona badina hari Iehova ena ura idia diba namonamo dainai.​—Kara 16:​4, 5.

9. Dahaka ia momokani Witness taudia haida dekenai, to dahaka dainai unai idia lalohisihisilaia be anina lasi?

⁹ Hari iseda negai, Witness taudia haida ese sibodia dekenai taravatu aukadia idia atoa, dahaka idia karaia o dahaka idia karaia lasi totona. Unai dainai ma haida ese hisihisi idia davaria lasi neganai, hisihisi idia abia. Gabeai, edia diba ia bada ia lao neganai edia lalohadai idia idau danu. To guna edia lalona ena mamina hegeregerena idia kara dainai hisihisi idia davaria be idia lalohisihisilaia be anina lasi. Idia ita hanamoa, badina idia hahedinaraia mai edia ura ida hisihisi idia ania Iehova idia kamonai henia bona ‘sivarai namona dainai kara ibounai idia karaia’ totona. Iehova ese unai bamona Dirava badinaia karana ia hanamoa danu. (1 Korinto 9:​23; Heberu 6:​10) Aposetolo Petero be mai ena aonega ida ia gwau: “Bema umui kara namo, vadaeni hisihisi umui abia neganai, Dirava ena vairanai umui be namo.”​—1 Petero 2:20.

Iona amo Diba Ita Abia

10, 11. Edena dala ai Iona ia hahedinaraia Iehova ia abidadama henia lasi (a) Iehova ese Nineva dekenai ia siaia neganai? (b) Dirava ese Nineva taudia ia hadikaia ore lasi neganai?

¹⁰ Iehova ese Nineva dekenai Iona ia siaia neganai, Iona ia hahedinaraia Iehova ena abidadama ia dekenai ia laloa bada lasi. Iona ia kamonai lasi, bona dika ia davaria murinai, ia laloa namonamo, ena kerere ia itaia, tano idauna dekenai gaukara ia abia dae, bona Nineva taudia ia hadibaia dika idia davaria gwauraia. Bena ia laloa lasi gauna ia vara: Nineva taudia ese edia kara dika amo idia helalo-kerehai dainai, Iehova ese idia ia hadikaia ore lasi.​—Iona 1:​1–​3:⁠10.

¹¹ Iona be dahaka ia karaia? Ia badu bona guriguri dekenai Dirava dekenai ia maumau. Inai bamona ia maumau: ‘Lau laloa unai bamona do ia vara. Unai dainai guna lau ura lasi Nineva dekenai lau mai. Hari, lau davaria gaudia ibounai, hegeregere gwarume badana ese lau ia hadonoa neganai lau gari bona lau hemarai, bona Nineva taudia lau hadibaia totona lau hekwarahi murinai, inai ia vara! Egu gaukara bona hisihisi ibounai be anina lasi! Namona be lau mase!’​—Iona 4:​1-3.

12. Iona dekenai idia vara gaudia amo dahaka ita dibaia diba?

¹² Iona ese badina maorona dainai ia maumau, a? Iehova ena kara be maoromaoro lasi badina idia helalo-kerehai taudia ia hebogahisi henia, a? Namona be Iona ia moale dikadika; taunimanima tausen momo do idia mauri noho! (Iona 4:​11) To mai ena hemataurai lasi ida ia maumau dainai ita diba ia ese Iehova ena kara maoromaoro dekenai abidadama ia hahedinaraia lasi. Ia ese sibona ia laloa bada bona ma haida ia laloa maragi. Namona be Iona amo diba ita abia bena sibona, bona sibona eda hemami ita laloa bada lasi. Namona be ita abia dae momokani, Iehova kamonai henia karana, ena orea amo ita abia sisiba badinaia karana, bona ia abia hidi gaudia ita abia dae karana be kara maorodia. Ita diba momokani, “Dirava idia gari henia taudia be do idia namo.”​—Hadibaia Tauna 8:12.

Hari be Nega Namona Iseda Abidadama Hagoadaia Totona!

13. Edena dala ai ita ibounai ese eda abidadama Iehova dekenai ita hagoadaia diba?

¹³ Iseda abidadama Iehova dekenai ita hagoadaia be aonega karana. (Aonega Herevadia 3:​5-8) Momokani, abidadama totona Iehova ita noia sibona be hegeregere lasi. Bema diba maoromaoro be eda abidadama ena badina, abidadama be do ia goada, unai dainai namona be dina ta ta ai sibona eda Baibel stadi ita karaia bona Baibel bona Baibel idia herevalaia bukadia ita duahia. Hanaihanai Keristani hebouhebou dekenai ita lao, ita karaia diba hegeregerena ita hegaegae bona ita haere danu, be mai anina bada. Hanaihanai ma haida dekenai Baibel ena hereva momokani ita hadibaia bona dala namona ai haida edia koua herevadia ita hanaia neganai danu, iseda abidadama Iehova bona ena Hereva dekenai ia goada ia lao. Unai daladia amo dina iboudiai ia ida ita raka hebou karana be ia namo ia lao.

14. Dahaka dainai Dirava ena taunimanima ese kahirakahira, Iehova dekenai abidadama goadana do idia hahedinaraia, guna idia karaia bamona lasi?

¹⁴ Kahirakahira, taunimanima ese idia davaria hisihisi bada hereana be karaharaga do ia vara. (Mataio 24:21) Unai ia vara neganai, gau badana be Dirava ena hesiai taudia ese Iehova ena kara maoromaoro bona ena orea amo ia henia sisiba idia abidadama henia. Unai negana ai, lauma dalanai idia ese mai edia abidadama ida Dirava ena sisiba do idia badinaia, ia gwau: “Egu bese taudia e, emui ruma dekenai do umui raka vareai, bona emui iduara do umui koua. Nega sisina lalonai do umui hunia, ia lao bona Dirava ena badu do ia ore.” (Isaia 26:20) Idia ese tano 232 ai idia noho kongregesen 85,000 lalonai idia vareai vadaeni, heduru idia abia totona. Unai hereva “emui ruma dekenai do umui raka vareai” edia anina ma haida ita diba lasi, to ita diba momokani Iehova ese ita do ia durua unai hereva ita badinaia totona.

15. Edena dala ai lagani 1998 lalonai abidadama idia gwauraia loulou, bona dahaka dainai unai be maoro?

¹⁵ Gau badana be hari iseda abidadama ita hagoadaia. Bema iseda Keristani tadikaka, Iehova ena orea, bona unai ia hereaia gauna, Iehova, ita abidadama henia lasi, do ita roho mauri diba lasi. Unai dainai lagani 1998 lalonai, tanobada hegegemadai Iehova ena Witness taudia edia lagani ena siri ena hereva, “heduru totona Iehova ena ladana idia boiboilaia taudia ibounai be mauri do idia davaria,” ese idia ia hadibaia loulou be namo! (Roma 10:13, NW) Unai siri ena hereva ita abidadama henia noho be namo. Bema ita davaria iseda abidadama be sisina ia manoka ia lao, namona be hari, oibe, hari dina ai do ita hekwarahi, iseda abidadama ita hagoadaia totona.

Iehova Ena Hahemaoro be Do Ia Maoromaoro

16. Bema abidadama ita hagoadaia lasi dahaka ia vara diba, bona edena bamona unai ita koua diba?

¹⁶ Heberu 3:​14 ese horoa Keristani taudia ia sisiba henia, ia gwau: “Guna Keriso ita abidadama henia. Vadaeni namona be inai abidadama do ita badinaia noho, ela bona ita mase. Bema inai bamona ita karaia neganai, ita be Keriso ena taudia korikori.” Unai hereva be mai anina tanobada maurina ena helaro idia abia taudia dekenai danu. Ita abia vadaeni abidadama be do ia manoka diba, bema ia ita hagoadaia lasi. Unai dainai gau badana be diba maoromaoro ita tahua noho, bena unai amo iseda abidadama ena badina ita hagoadaia!

17. Dahaka dainai ita diba momokani, Iesu ese mai maoro ida roho mauri taudia do ia abia hidi?

¹⁷ Kahirakahira Keriso ese bese ibounai do ia tahua namonamo “ia ese idia do ia hapararaia, mamoe naria tauna ese mamoe bona nanigosi ia hapararaia bamona.” (Mataio 25:31-33) Ita diba momokani, Keriso ese mai ena kara maoromaoro ida roho mauri taudia do ia abia hidi. Iehova ese ia dekenai aonega, lalo-parara, bona mai anina bada karadia ma haida ia henia “tanobada ibounai do ia kota henia mai maoromaoro danu” totona. (Kara 17:30, 31) Namona be iseda abidadama be Aberahamo ena abidadama bamona, ia gwau: “Kara maoromaoro taudia bona kara dika taudia nega tamona do oi [Iehova] alaia lasi, a? Kara maoromaoro taudia bona kara dika taudia, bema edia davana be tamona, be hegeregere lasi. Unai bamona be oiemu kara lasi. Tanobada ibounai ena kota biaguna be kara maoromaoro do ia karaia lasi, a?”​—Genese 18:⁠25.

18. Dahaka dainai hari ita diba lasi gaudia ita lalo-hekwarahilaia lasi be namo?

¹⁸ Iehova ena kara maoromaoro ita abidadama henia momokani dainai, inai bamona henanadai edia haere ita abia totona ita hekwarahi lasi: ‘Edena dala ai beibi bona natuna maragidia do ia kota henia? Aramagedono ia mai neganai, reana taunimanima momo herea ese sivarai namona idia do kamonai lasi, a? Kwarana gorere idia abia taudia be edena bamona? Edena bamona . . . ?’ Momokani, reana hari ita diba lasi Iehova be edena bamona unai gaudia do ia karaia. To, ita diba momokani, kara maoromaoro dalanai mai hebogahisi ida do ia karaia. Namona be nega ta unai ita daradaralaia lasi. Oibe, reana do ita hoa bona ita moale bada badina do ita itaia, guna ita laloa lasi dalana namona ai unai gaudia do ia karaia.​—Iobu 42:3; Salamo 78:11-​16; 136:​4-9; Mataio 15:31; Luka 2:​47 itaia.

19, 20. (a) Dahaka dainai henanadai namodia ita gwauraia be kerere lasi? (b) Edena negai Iehova ese haere maorodia do ia henia?

¹⁹ Iehova ena orea taudia ese henanadai namodia idia koua lasi, dagedage taudia haida idia laloa kerere bamona. (1 Petero 1:​10-​12) To, Baibel ese ita ia sisiba henia, henanadai kavakavadia ita gwauraia lasi totona. (Tito 3:9) Henanadai namodia ita gwauraia bona Dirava ena Hereva bona Keristani bukadia ita tahua Baibel ena haere ita davaria totona ese iseda diba maoromaorona ia habadaia bona unai dala ai iseda abidadama Iehova dekenai ia hagoadaia. Iehova ena orea ese Iesu ena haheitalai ia badinaia. Iesu ese henanadai haida ia haerelaia lasi badina haere ena nega maorona ia do ginidae lasi. Ia gwau: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi.” (Ioane 16:12) Ma danu, ia gwau unai nega ai ia danu ese gau haida ia diba lasi.​—Mataio 24:36.

²⁰ Iehova ese gau momo do ia halasia diba. Aonega dalana be ia ita naria, bona ita abia dae ia ese nega maorona ai ena ura do ia hahedinaraia. Ita diba momokani Iehova ia abia hidi negana ia ginidae neganai, do ita moale badina ena dala do ita lalo-pararalaia namonamo. Oibe, davana namona do ita abia, bema Iehova bona ia gaukaralaia oreana ita abidadama henia momokani. Aonega Herevadia 14:26 ese ita ia hagoadaia, ia gwau: “Lohiabada ia gari henia tauna ese, abidadama goada tauna do ia lao, bona unai abidadama dainai, unai tau ena natuna do idia noho namo, mai maino danu.”

[Footnote]

Dahaka Oi Laloa?

◻ Dahaka dainai iseda hemami ita biagua lasi ela bona idia ese iseda abidadama Iehova dekenai idia hamanokaia be aonega karana lasi?

◻ Iona dekenai idia vara gaudia amo dahaka ita dibaia diba?

◻ Dahaka dainai Baibel stadi bona hebou lao henia karana be mai anina bada?

[Picture on page 16]

Iseda lalokau tauna ia mase neganai, ita diba momokani Iehova ena kara ibounai be maoromaoro

[Pictures on page 18]

Oi diba momokani bema Iehova oi abidadama henia, a?