Oiemu Mauri Oi Gaukaralaia Namonamo

TAMANA be ruma lalonai ia noho, mahuta patana dekenai ia hekure, kensa gorerena amo ia mase gwauraia. Ena natuna be gaukara rumana ai ena tamana ena kamuta gaukara ena tulu ia atodia namonamo. Tulu ia dogoatao neganai, ena tamana ese idia amo ia karaia gaudia namodia ia laloa. Ena be unai gaukara rumana be ruma badinai ia noho, ia diba ena tamana be unai ruma dekenai do ia vareai lou lasi, bona guna ia gaukaralaia namonamo tulu do ia gaukaralaia lou lasi. Unai nega ia ore vadaeni.

Natuna be Hadibaia Tauna 9:10 ena hereva ia laloa, ia gwau: “Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” Unai siri ia diba namonamo. Nega momo ia gaukaralaia ma haida dekenai Baibel ena hereva momokanina ia hadibaia neganai, ia gwau mase be gaukara ta karaia lasi hegeregerena. Hari Solomona ena hereva ena siahu be ena kudouna ia botaia bamona​—namona be iseda mauri dinadia ita gaukaralaia namonamo bona mauri ita moalelaia diba neganai ita moale be namo, badina mauri ita moalelaia diba lasi negana do ia ginidae.

Mauri Oi Moalelaia

Hadibaia Tauna bukana ena kahana momo lalonai, aonega tauna King Solomona ese unai buka idia duahia taudia ia hagoadaia mauri idia moalelaia totona. Hegeregere, karoa 3 dekenai ia gwau: “Unai dainai lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.”​—Hadibaia Tauna 3:​12, 13.

Dirava ese ena lauma amo Solomona ia hasiahua inai hereva ia torea lou totona: “To inai dala tamona lau itaia, ia be namo bona hegeregere: Dirava ese mauri dina momo lasi taunimanima dekenai ia henia. To tau ta be do ia aniani, do ia inuinu, bona iena gaukara dekena amo ia abia gaudia do ia moalelaia, badina iena ahuna korikori be unai.”​—Hadibaia Tauna 5:⁠18.

Unai hegeregerena, matamata taudia ia hagoadaia danu, ia gwau: “Uhau [eiava ulato] tauna e, oiemu eregabe dinadia lalonai do oi moale. Oiemu eregabe dinadia lalonai oiemu kudouna ese oi do ia hamoalea. Oiemu ura gauna do oi karaia, oiemu kudouna ena ura danu.” (Hadibaia Tauna 11:9a) Matamata taudia ese edia goada idia moalelaia badabada be gau namona!​—Aonega Herevadia 20:⁠29.

‘Oi Ia Karaia Diravana Oi Laloa’

To, momokani, namo lasi ita laloa Solomona ena hereva ena anina be iseda kudouna ena ura iboudiai ita tahua. Lasi. (1 Ioane 2:16 itaia.) Murinai ia torea herevana ese unai ia hahedinaraia goevagoeva, ia gwau: “To do oi laloaboio lasi, inai kara ibounai [emu ura idia hamoalea diba karadia] dainai Dirava ese oi do ia kota henia.” (Hadibaia Tauna 11:9b) Herevana ita matamata eiava buruka, namona be ita laloatao Dirava ese iseda mauri dekenai ita karaia karadia ia itaia bona idia hegeregerena ita do ia kota henia.

Namo lasi ita laloa iseda mauri lalonai sibona eda ura do ita tahua bena ita buruka neganai Dirava do ita hesiai henia! Ita diba lasi negana ai iseda mauri ia doko diba. Ena be reana unai ia vara lasi, to ita buruka neganai Dirava ita hesiai henia be mai hekwarahi. Unai ia abia dae dainai, Solomona ia gwau: “Oi be eregabe neganai, ia ese oi ia karaia Dirava do oi laloa. Badina be nega dika dinadia do idia ginidae, bona unai neganai do oi gwau, ‘Lauegu mauri dekenai lau moale lasi.’ ”​—Hadibaia Tauna 12:⁠1.

Buruka be mai ena hekwarahi. Solomona ese buruka negana ai idia vara gaudia ia herevalaia. Ta ena imana idia heudeheude, aena idia manoka, bona isena be tamona tamona sibona. Ena huina be idia kurokuro bona idia moru. Ia mahuta namonamo lasi dainai manu ena ane ese ia hanogaia. Ena itaia karana, kamonai karana, dogoatao karana, bonaia karana, bona mamia karana idia manoka idia lao. Tauanina ia manoka dainai dala dekenai ia raka neganai, moru garina bona ma gau haida dainai ia gari. Dokonai ia mase.​—Hadibaia Tauna 12:​2-7.

Ia matamata neganai ‘ia ia karaia Diravana ia laloa’ lasi tauna dekenai buruka negana be do ia dika momokani. Ena mauri ia gaukaralaia namonamo lasi dainai, ia buruka neganai do ‘ia moale lasi.’ Dirava laloa lasi karadia ese buruka negana ai idia vara hekwakwanai bona hisihisi idia habadaia diba. (Aonega Herevadia 5:​3-11) Madi, unai bamona taudia be vaira negana idia laloa neganai, mase gurina idia itaia sibona.

Buruka Negana Ai Oi Moale

Namo lasi ita laloa ena anina be buruka taudia be mauri idia moalelaia diba lasi. Lasi. Baibel lalonai ia gwau, Dirava ena hahenamo ese ‘mauri dinadia idia halataia.’ (Aonega Herevadia 3:​1, 2) Iehova ese ena turana Aberahamo ia hamaoroa: “Oi buruka momokani neganai, do idia guria oi.” (Genese 15:15) Ena be Aberahamo ese buruka negana ena hisihisi ia davaria, to ia buruka neganai maino bona noho namo ia davaria danu, badina ena mauri lalonai Iehova ia hesiai henia karana be mai moale ida ia laloa diba. Danu, ia be mai abidadama ida ‘hanua mai ena nadi badina aukana, bona mai goadana,’ Dirava ena Basileia ia naria noho. (Heberu 11:10) Unai dainai, ia buruka bona iena lalona ia hegeregere neganai ia mase.​—Genese 25:⁠8, NW.

Unai dainai Solomona ia hereva goadagoada, ia gwau: “Tau ta ena mauri dinadia bema idia momo, ia ese idia ibounai do ia moalelaia.” (Hadibaia Tauna 11:⁠8) Herevana ita matamata eiava ita buruka, ita moale momokani totona, Dirava tura henia karana be gau badana.

Unai matamata tauna ese gaukara rumana ai ena tamana ena tulu ia atodia namonamo neganai, unai gaudia ia laloa. Ia ese ia diba taudia ia laloa, edia mauri dinadia idia gaukaralaia namonamo toho, to idia moale lasi badina idia ia karaia Diravana idia tura henia lasi. Solomona be mauri dekenai ita moale totona ita ia hagoadaia murinai, ena hereva dokona be maoro, ia gwau: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona”!​—Hadibaia Tauna 12:⁠13.