Edena Dala ai Ia “Boio” Natuna Umui Durua Diba?

“Do ita moale . . . badina ia boio, to ita davaria vadaeni.”​—LUKA 15:32.

1, 2. (a) Matamata taudia haida edia lalohadai Keristani hereva momokani dekenai be dahaka? (b) Unai bamona ia vara neganai, tama sina bona natudia edia hemami be reana edena bamona?

“HEREVA momokani lau rakatania!” Dirava idia gari henia tama sina, idia hekwarahi Keristani mauri dalana dekenai edia natudia idia hakaua, ese unai bamona hereva edia natuna amo idia kamonai neganai idia lalohisihisi bada! Matamata taudia ma haida be edia ura idia hahedinaraia lasi, to idia raka “boio” sibona. (Heberu 2:1) Idia momo be Iesu ena parabole lalonai ia gwauraia boio merona bamona, ena tamana ena ruma ia rakatania bona gabu daudau dekenai ena ahuna ia haorea.​​—Luka 15:​11-​16.

² Ena be Iehova ena Witnes taudia momo be unai bamona hekwakwanai idia davaria lasi, to idia davaria taudia edia lalohisihisi be hagoadaia herevana ta ese ia kokia vaitani lasi. Bona ia gwau-edeede mero eiava kekeni ese ia mamia lalohisihisi ita laloaboio be namo lasi. Ena kudouna ai, reana ena lalona ena mamina dainai ia lalo-hekwarahi. Iesu ena parabole lalonai, ia boio merona ena “lalona ia kehoa,” bona unai ese ena tamana ia hamoalea. Edena dala ai tama sina bona ma haida kongregesen lalonai ese idia boio natudia idia durua diba edia ‘lalona idia kehoa’ totona?​​—Luka 15:17.

Haida ese Hereva Momokani Idia Rakatania Ena Badina

3. Edena badina haida dainai matamata haida ese Keristani kongregesen idia rakatania?

³ Matamata taudia handred tausen momo be mai moale ida Keristani kongregesen lalonai Iehova idia hesiai henia. To, dahaka dainai matamata taudia ma haida ese hereva momokani idia rakatania? Reana idia mamia tanobada ese ia henia gauna ta idia reaia. (2 Timoteo 4:​10) Eiava idia laloa Iehova ese ia naria mamoe oreana be taravatu momo ia atoa. Reana mero eiava kekeni ta ese lalona ena mamina dikana, mero eiava kekeni ta dekenai ena ura goadana, eiava turadia ese idia abia dae urana dainai Iehova ena mamoe oreana ia rakatania. Eiava Dirava hesiai henia karana ia rakatania, badina ena tama sina eiava Keristani tauna ma ta ena koikoi karadia ia itaia.

4. Nega momo matamata taudia idia raka oho ena badina badana be dahaka?

⁴ Nega momo natuna ena gwau-edeede karana ese ia hahedinaraia lauma dalanai ia manoka, ena kudouna lalonai idia noho gaudia ia hahedinaraia. (Aonega Herevadia 15:13; Mataio 12:34) Herevana dahaka badina dainai matamata ta ia raka oho, nega momo unai hekwakwanai ena badina be ia ese “hereva momokani” ena diba maorona ia abia dae momokani lasi. (2 Timoteo 3:​7) Iehova tomadiho henia karana be hanaihanai ita karaia kava gauna ta sibona lasi, to matamata taudia ese edia hetura karana Iehova ida idia hagoadaia be gau badana. Dahaka ese idia do ia durua, unai bamona idia karaia totona?

Dirava Kahirakahira Oi Lao

5. Matamata tauna ese Dirava ida hetura karana ia abia totona, dahaka be mai anina bada?

⁵ Hahediba tauna Iamesi ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:8) Matamata tauna ta be unai bamona ia karaia totona, Dirava ena Hereva ura henia karana dekenai heduru ia abia be namo. (Salamo 34:8) Guna “rata” ia abia be namo​​—Baibel ena hereva badadia unai. To Dirava ena Hereva dekenai moale ia davaria bona “aniani korikori”​​—lauma hereva dobudia​​—ia ura henia matamaia neganai, lauma dalanai lo tauna ai do ia lao diba. (Heberu 5:​11-​14; Salamo 1:2) Matamata tauna ta ia gwau tanobada ena mauri dalana ia badinaia momokani, to gabeai lauma gaudia ia laloa bada matamaia. Dahaka ese ia durua ena kara gunana ia rakatania totona? Ta ese ia hagoadaia Baibel ibounai do ia duahia, bona hanaihanai Baibel duahia sediual ia badinaia. Oibe, Iehova ida hetura karana oi abia totona, Dirava ena Hereva oi duahia hanaihanai be gau badana.

6, 7. Tama sina ese edena dala ai edia natudia idia durua diba Dirava ena Hereva idia ura henia totona?

⁶ Tama sina ese edia natudia idia durua, Dirava ena Hereva idia ura henia totona be gau badana! Ena be kekeni matamata ta be hanaihanai ruma bese stadi lalonai ia noho, to gwau-edeede memero kekeni ia bamodia. Ena ruma bese stadi ia herevalaia neganai, ia gwau: “Tamana ese henanadai ia henia neganai, buka amo haere lau duahia sibona, ena vairana lau itaia lasi.” Ruma bese ena stadi dekenai aonega tama sina ese gau ta idia stadilaia haraga sibona lasi, to idia hadibaia namonamo. (2 Timoteo 4:2) Matamata ta ese stadi ia moalelaia totona, namona be mamina ia abia unai stadi be mai anina bada ia dekenai. Ena lalona idia tahua henanadai umui henia bona unai amo ena lalohadai ia gwauraia hedinarai diba be namo, ani? Matamata tauna umui hagoadaia umui stadilaia gauna do ia badinaia totona.a

⁷ Ma danu, ia hesiku lasi dalanai Baibel umui herevalaia. Bema hegeregere, matamata taudia ese Baibel drama idia karaia diba. Umui durudia edia lalona ena matana amo umui herevalaia gaudia idia vara gabuna bona tano ena toana idauidau idia itaia totona. Reana mapu bona unai bamona gaudia ma haida umui gaukaralaia diba. Oibe, unai bamona lalohadai idauidau amo ruma bese ena stadi be hesiku ia havaraia lasi bona hanaihanai dala tamona ai umui karaia lasi. Tama sina danu ese edia hetura karana Iehova ida idia tahua be namo. Idia be Iehova kahirakahira idia lao neganai, edia natudia idia durua diba, unai bamona idia karaia totona.​​—Deuteronomi 6:​5-7.

8. Edena dala ai guriguri ese ta ia durua, Iehova kahirakahira ia lao totona?

⁸ Guriguri danu ese ta ia durua, Iehova kahirakahira do ia lao. Kekeni matamata ta be Keristani mauri dalana bona unai dala idia badinaia lasi turadia ida ena hetura karana ese idia veria. (Iamesi 4:​4) Dahaka ia karaia? Ena kara ia gwauraia hedinarai, ia gwau, “Unai be egu nega ginigunana, egu hemami korikorina be Iehova dekenai guriguri amo lau gwauraia.” Ia gwau Iehova ese ena guriguri ia haerelaia, badina Keristani kongregesen lalonai ia abidadama henia diba turana ta ia davaria. Mamina ia abia Iehova ese ia hakaua, bona Dirava ida ena hetura karana ia haginia matamaia. Tama sina ese edia natudia idia durua dalana ta be idia ese sibodia edia guriguri idia hanamoa. Ruma bese ida idia guriguri neganai, tama sina ese edia kudouna lalonai idia noho gaudia idia herevalaia diba, bona unai amo natudia ese edia tama sina edia hetura karana Iehova ida do idia itaia.

Umui Haheauka Bona Umui Goada

9, 10. Iehova ese gwau-edeede Israela taudia ia kara henia neganai, edena dala ai haheauka karana ia haheitalaia?

⁹ Matamata tauna be ia raka siri matamaia neganai, reana ia ura sibona ia noho bona ena tama sina be lauma gaudia ia dekenai idia herevalaia karana do ia dadaraia. Unai bamona hekwakwanai ia vara neganai, tama sina ese dahaka idia karaia diba? Iehova ese idaunegai Israela taudia ia kara henia dalana mani oi laloa. Iehova be lagani 900 mai kahana lalonai unai “hekokoroku” Israela taudia edia kara ia haheaukalaia murinai sibona edia gwau-edeede dalana dekenai ia rakatanidia. (Esodo 34:9; 2 Sivarai 36:​17-​21; Roma 10:21) Ena be Iehova ‘idia tohoa lou lou’ to idia dekenai ia “hebogahisi.” “Nega momo ia ese iena badu ia hakerua, bona iena badu ena siahu momokani ia havaraia lasi.” (Salamo 78:​38-42) Dirava be idia ia kara henia lalonai ia kerere lasi. Lalokau tama sina be Iehova idia tohotohoa bona natuna ese maoromaoro edia heduru ia abia dae lasi neganai, idia haheauka.

¹⁰ Tau ta be ia haheauka ena anina ta be ia dika ia lao hetura karana do ia namo lou ena helaro ia haboioa lasi. Haheauka karana dekenai Iehova ese haheitalai namona ia hahedinaraia. Ia ese Israela taudia ia kara namo henia bona idia dekenai ena hereva idia gwauraia taudia “ia siaia” lou lou. Iehova ese ‘ena bese ia hebogahisi henia’ ena be “idia ese Dirava ena hesiai taudia idia kirikirilaia, bona edia hereva idia negea.” (2 Sivarai 36:​15, 16) Israela taudia ia noia, ia gwau: “Emui lalodia do umui giroa, umui ta ta ibounai emui kara dika bona kerere do umui rakatania.” (Ieremia 25:​4, 5) To, Iehova ese ena hakaua hereva maorodia ia utua lasi. Dirava ese Israela taudia ia hadibaia ia bona ena taravatudia dekenai do idia “giroa” lou.

11. Edena dala ai tama sina ese ia raka siri natuna idia kara henia lalonai idia haheauka bona idia goada?

¹¹ Tama sina ese Iehova ena haheauka karana idia tohotohoa diba bona ia raka siri natuna dekenai idia hesiku haraga lasi. Edia helaro idia haboioa lasi, bona idia gaukara goada, edia natudia ida idia herevahereva dalana ia namo noho totona eiava idia haginia lou totona. Hakaua hereva maorodia idia badinaia noho lalonai, edia natuna idia noia lou lou hereva momokani ena dala dekenai ia giroa totona.

Bema Ia Do Bada Lasi Natuna be Kongregesen amo Idia Atoa Siri

12. Kongregesen amo idia atoa siri ia do bada lasi natuna be ena tama sina ida ia do noho neganai, edia maduna be dahaka ia dekenai?

¹² Edena bamona bema ia do bada lasi bona ena tama sina ida ia noho natuna ta be kara dika badana ia karaia bona ena helalo-kerehai lasi karana dainai kongregesen amo idia atoa siri? Unai natuna be ena tama sina ida ia do noho dainai, idia be mai edia maduna Dirava ena Hereva hegeregerena ia idia hadibaia bona matahakani henia totona. Unai be edena bamona idia karaia diba?​​—Aonega Herevadia 6:​20-​22; 29:17.

13. Tama sina be edena dalana ai ia kerere natuna ena kudouna idia hamarerea toho diba?

¹³ Reana ia hegeregere​​—oibe, ia namo herea—bema natuna ida stadi idia karaia neganai ia idia hadibaia bona matahakani henia. Tama eiava sina ese natuna ena gwau-edeede karana sibona ia laloa lasi be namo, to ena kudouna lalonai idia noho gaudia ia dibaia toho be namo. Dahaka dainai lauma dalanai ia gorere? (Aonega Herevadia 20:5) Ena kudouna ia hamarerea diba, a? Edena siri ia gaukaralaia namonamo diba? Aposetolo Paulo ese ita ia hagoadaia, ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Heberu 4:12) Tama sina ese edia natuna idia hamaoroa unai kara dika do ia karaia lou lasi, to unai sibona lasi. Namona be iena kara ia hanamoa karana idia hamatamaia bona idia durua toho.

14. Ia kerere matamata tauna ese dahaka ia karaia guna be namo, ena hetura karana Iehova ida ia hanamoa lou totona, bona tama sina ese edena dala ai natuna idia durua diba, unai bamona ia karaia totona?

¹⁴ Ia kerere matamata tauna be ena hetura karana Iehova ida ia hanamoa lou be namo. Ia karaia be namo gauna ginigunana be “ena lalona ia giroa” bona ‘ena dala do ia rakatania.’ (Kara 3:19; Isaia 55:​6, 7) Tama sina ese ruma dekenai natuna idia durua ia helalo-kerehai lalonai, namona be idia ese ‘Dirava ena dala do idia hadibaia namonamo, mai edia manau danu.’ (2 Timoteo 2:​24-26) Baibel ese ia herevalaia hegeregerena ia idia “sisiba henia.” Greek gado herevana idia hahanaia “sisiba henia” idia hahanaia dalana ta be “anina korikori hahedinaraia.” (Apokalupo 3:19; Ioane 16:8) Unai dainai, tama sina ese natuna idia sisiba henia neganai, natuna be ena kara dika ia abia dae totona hamomokania gaudia idia hahedinaraia. Momokani, unai be mai ena hekwarahi. Bema mai dalana, tama sina ese Baibel ena hereva hegeregerena idia maoro daladia ibounai idia gaukaralaia diba, ena kudouna idia hamarerea totona. Namona be ia idia durua ‘kara dika do ia ura henia lasi, to kara namo do ia ura henia.’ (Amosa 5:15) Reana do ia ‘laloa maoromaoro, bona Satani ena koikoi dekena amo do ia roho mauri.’

15. Ia kerere tauna ese ena hetura karana Iehova ida ia hanamoa lou lalonai guriguri be edena bamona ia ia durua diba?

¹⁵ Ta ese Iehova ida ena hetura karana ia hanamoa lou neganai, guriguri be gau badana. Momokani, guna Keristani kongregesen ia bamoa to hari mai ena helalo-kerehai lasi ida hehuni lasi dalanai kara dika ia karaia noho tauna totona ita “noinoi” lasi. (1 Ioane 5:​16, 17; Ieremia 7:​16-​20; Heberu 10:​26, 27) To, tama sina ese Iehova idia noia diba idia dekenai aonega do ia henia, unai hekwakwanai idia hanamoa totona. (Iamesi 1:5) Bema murimuri ai idia atoa matamata tauna ese helalo-kerehai ena toana ia hahedinaraia to ‘Dirava ena vairanai ia raka kahirakahira garina ia gari,’ reana tama sina do idia guriguri bema Dirava ese badina ta ia davaria unai natuna ena kerere ia gwauatao totona, Iena ura do ia guguru be namo. (1 Ioane 3:​21) Matamata tauna ese unai bamona guriguri ia kamonai neganai, unai ese do ia durua bena do ia diba Iehova be hebogahisi Diravana.b​​—Esodo 34:​6, 7; Iamesi 5:​16.

16. Idia atoa siri natudia edia ruma bese taudia be edena bamona ita durua diba?

¹⁶ Bema ia bapatiso vadaeni matamata tauna be idia atoa siri, kongregesen taudia be ‘ia danu do idia turana karaia lasi.’ (1 Korinto 5:​11; 2 Ioane 10, 11) Reana unai ese ia do ia durua, bena ena “lalona ia kehoa” bona Dirava ena mamoe oreana dekenai do ia giroa lou. (Luka 15:17) To, herevana ia giroa lou o lasi, idia atoa siri matamata tauna ena ruma bese be kongregesen taudia ese idia hagoadaia diba. Ita ibounai ese dala idauidau ita tahua diba, ‘idia dekenai durua do ita henia’ bona ita “hebogahisi” henidia totona.​—1 Petero 3:​8, 9.

Ma Haida ese Heduru Idia Henia Diba Dalana

17. Kongregesen taudia ese ia manoka matamata tauna ta idia durua gwauraia neganai, dahaka idia laloa be namo?

¹⁷ To edena bamona bema matamata tauna ta be Keristani kongregesen amo idia atoa siri lasi, to ena abidadama dekenai ia manoka? Aposetolo Paulo ia gwau: “Kahana ta do ia hisihisi neganai, kahana ibounai ese unai hisihisi ena mamina do idia abia.” (1 Korinto 12:26) Ma haida ese unai matamata tauna dekenai edia laloa bada karana idia hahedinaraia diba. To momokani, ita naria namonamo be namo, badina lauma dalanai ia gorere matamata tauna ese matamata taudia ma haida ia hadikaia diba. (Galatia 5:​7-9) Kongregesen ta lalonai, edia ura be maoro taudia idia ura lauma dalanai idia manoka matamata taudia haida idia durua, unai dainai idia boiridia miusiki do idia gadaralaia hebou. Ena be unai matamata taudia idia mai bona unai nega idia moalelaia, to edia hebamo bona lalo-ani karadia dainai gabeai kongregesen idia rakatania vaitani. (1 Korinto 15:33; Iuda 22, 23) Lauma dalanai heduru ia henia lasi hebamo karana ese lauma dalanai ia gorere natuna do ia durua lasi, to lauma gaudia dekenai ena ura ia habadaia hebamo karana ese ia hanamoa diba.c

18. Edena bamona ita ese Iesu ena parabole lalonai ia boio merona ena tamana ena kara ita tohotohoa diba?

¹⁸ Kongregesen ia rakatania matamata tauna ese Kingdom Hall eiava hebouhebou ta dekenai ia mai neganai, ena hemami mani oi laloa. Iesu ena parabole lalonai ia boio merona ena tamana ena heabidae karana ita hahedinaraia be namo, ani? (Luka 15:​18-​20, 25-​32) Keristani kongregesen ia rakatania bona gabeai distrik hebouhebou dekenai ia lao matamata tauna ta, ia gwau: “Lau laloa taunimanima ibounai ese lau bamona tauna do idia dadaraia, to tadikaka bona taihu be lau dekenai idia mai bona lau idia welkam henia. Unai ese egu lalona ia hamarerea bada.” Baibel ia stadilaia matamaia bona gabeai bapatiso ia abia.

Umui Hesiku Lasi

19, 20. Dahaka dainai ia boio natuna dekenai lalohadai namona ita dogoatao noho be namo?

¹⁹ Haheauka be gau badana ia “boio” natuna be “ena lalona ia kehoa” totona durua karana lalonai, bona ia be mai ena hekwarahi tama sina bona ma haida dekenai. To umui hesiku lasi. “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Baibel ese ita ia hadibaia, Iehova ia ura taunimanima idia helalo-kerehai bona idia mauri. Ia ese dala ia karaia taunimanima be ia ida maino ai idia noho totona. (2 Korinto 5:​18, 19) Ena haheauka karana dainai taunimanima milioni momo be edia lalona idia kehoa vadaeni.​​—Isaia 2:​2, 3.

²⁰ Unai dainai, tama sina be Baibel ese ia herevalaia dala ibounai idia gaukaralaia be namo edia boio natuna idia durua, ia be ena lalona do ia kehoa totona, a? Iehova oi tohotohoa bona emu natuna be Iehova dekenai ia giroa totona dala namodia ai ia oi durua lalonai oi haheauka. Baibel ena hakaua herevadia oi badinaia goadagoada, bona Iehova ena heduru totona oi noinoi neganai, iena lalokau, hahemaoro maoromaoro, bona aonega karadia oi hahedinaraia. Gwau-edeede taudia momo ese Iehova ena lalokau boiboina idia abia dae bona ia dekenai idia giroa lou hegeregerena, emu boio mero o kekeni be Dirava ena orea dekenai ia giroa lou diba.​​—Luka 15:​6, 7.

[Footnotes]

Oi Laloatao, A?

• Matamata taudia ese kongregesen idia rakatania ena badina badana be dahaka?

• Edena dala ai matamata taudia ita durua diba, Iehova ida hetura karana idia abia totona?

• Dahaka dainai tama sina ese ia boio natuna idia durua neganai idia haheauka bona idia goada be namo?

• Kongregesen taudia ese edena dala ai ia boio matamata tauna idia durua diba ia giroa lou totona?

[Picture on page 15]

Dirava ena Hereva ita duahia be gau badana Iehova ida hetura karana ita abia totona

[Picture on page 15]

Tama sina be mai edia kudouna ibounai ida idia guriguri karana ese natudia ia durua diba idia ese tama sina edia hetura karana Iehova ida idia itaia totona

[Picture on page 17]

Ia boio natuna be “ena lalona ia kehoa” neganai, ia oi abia dae

[Picture on page 18]

Dala namodia ai emu natuna oi durua Iehova dekenai ia giroa lou totona