Iehova Ena Ura Idia Karaia

Iesu be Natudia ida Ia Noho

IESU be lagani toi mai kahana ia haroro bona hari unai nega ia ore gwauraia. Nega sisina murinai Ierusalema dekenai do ia vareai bona do ia mase mai hisihisi ida. Ia diba namonamo dahaka do ia vara, badina ena hahediba taudia dekenai ia gwau: “Taunimanima ena Natuna be taunimanima ese dohore idia dogoatao, [bona] idia alaia mase.”​—Mareko 9:​31.

Momokani, Iesu ia ura idia do noho dina ta ta, hora ta ta, bona miniti ta ta ibounai ia gaukaralaia namonamo. Ena hahediba taudia ia hadibaia noho be namo. Iesu ia itaia idia ese sisiba goadana do idia abia be namo, idia manau totona bona ma haida idia hahekwakwanaia lasi totona. (Mareko 9:​35-​37, 42-​48) Namona be headava, headava hadokoa karana, bona headava lasi maurina dekenai idia ia hadibaia. (Mataio 19:​3-​12) Iesu ia diba kahirakahira do ia mase, unai dainai ena hahediba taudia ia hereva henia neganai, hereva namodia amo mai ena karaharaga lalohadaina ida ia hereva henidia. Nega be mai anina bada​—unai dainai Iesu ia karaia karana ma ta be idau momokani.

Iesu ese Natudia Ia Abia Dae

Baibel ia gwau: “Natudia maragi idia mailaia Iesu dekenai, idia ura iena imana idia edia latanai ia atoa.” Hahediba taudia ese unai idia itaia neganai, karaharaga idia gwau unai be maoro lasi. Reana idia laloa Iesu be tau badana dainai eiava ia bisi bada dainai natudia do ia laloa lasi. To hahediba taudia idia hoa bada, badina Iesu ese idia ia badu henia! Idia ia hamaoroa: “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.” Bena Iesu be ma ia gwau: “Momokani lau hamaoroa umui, daika ese Dirava ena Basileia be natuna maragina bamona ia abia dae lasi, ia be do ia vareai lasi unuseni.”​—Mareko 10:13-​15.

Iesu ia itaia natudia edia kara momo be namo herea. Nega momo diba idia ura abia bona ma haida idia abidadama henia. Edia tamana bona sinana edia hereva idia abia dae bona natudia ma haida vairanai edia namo do idia gwauraia. Hereva bona diba idia abia dae dainai, Dirava ena Basileia lalonai idia ura idia vareai taudia ibounai ese edia kara idia tohotohoa be namo. Iesu ia gwau bamona, “idia bamona be Dirava ena Basileia taudia.”​—Mataio 18:​1-5 itaia.

To Iesu ese haheitalai totona sibona unai natudia ia gaukaralaia lasi. Unai sivarai ia hahedinaraia goevagoeva Iesu ia ura momokani idia ida ia noho. Mareko ia gwau, Iesu ese “maragidia ia rosia, bona iena imana ia atoa edia latanai, ia hanamoa.” (Mareko 10:16) Mareko ena sivarai sibona ese unai hereva namona, Iesu ese “maragidia ia rosia” herevana ia gwauraia. Unai taunimanima be natudia idia mailaia, Iesu ese ena “imana idia edia latanai ia atoa” sibona totona, to Iesu ese idia laloa lasi karadia momo ia karaia.

Iesu ese natudia edia latanai “iena imana ia atoa” ena anina be dahaka? Unai ese tomadiho karana ta, hegeregere bapatiso, ia hahedinaraia lasi. Ena be nega haida, imana idia atoa ta latanai ena anina be gaukara ta idia henia, to nega ma haida ia be hanamoa karana sibona. (Genese 48:14; Kara 6:6) Unai dainai reana Iesu ese unai natudia ia hanamoa.

To, Mareko ese hereva mai siahuna ia gaukaralaia “hanamoa” (ka·teu·lo·geʹo) ia hahedinaraia totona, unai ese siahu bada ia hahedinaraia. Ia hahedinaraia Iesu ese mai ena ura bada, mai ena kara namo, bona mai ena lalokau ida natudia ia hanamoa. Ia hedinarai goevagoeva, ia laloa lasi natudia be nega bada idia haorea kava maduna metauna.

Unai amo Ita Diba Gaudia

Iesu ese ia kara henidia neganai, natudia bona taunimanima badadia danu ia hagaria lasi bona idia ia laloa maragi lasi. Buka ta ia gwau: “Toana be ia kiri haraga bona mai ena moale ida.” Unai dainai ita hoa lasi taunimanima badadia bona natudia be ia ida idia noho namo. Iesu ena haheitalai ita laloa neganai, sibona ita nanadaia diba, ‘Ma haida idia laloa lau dekenai idia mai be auka lasi, a?’ ‘Toana be lau bisi bada herea dainai ma haida edia gaukara bona lalohisihisi gaudia lau laloa diba lasi, a?’ Bema taunimanima ita laloa bada, unai ese ita ia veria edia namo totona do ita hekwarahi, Iesu ia karaia bamona. Do idia mamia idia ita laloa bada bona do idia ura ita dekenai idia mai.​—Aonega Herevadia 11:25.

Mareko ena buka ia hahedinaraia hegeregerena, Iesu ia ura natudia ida ia noho. Toana be, nega ia atoa idia gadara neganai idia ia itaia totona, badina ena parabole ta dekenai edia kara ia herevalaia. (Mataio 11:16-​19) Reana Iesu ese ia hanamoa natudia haida idia maragi momokani dainai idia lalo-parara lasi ia be daika bona dahaka ia hadibaia. To Iesu ia laloa lasi unai dainai ena nega ia halusia kava. Ia be natudia ida ia noho badina ia lalokau henidia. Reana, Iesu ese ena haroro negana lalonai ia davaria natudia momo be gabeai ena lalokau dainai ena hahediba taudia ai idia lao.

Bema Iesu ese ena mauri ena dokona puradia mai edia anina bada lalonai natudia ida ia noho, momokani ita ese idia totona iseda bisi sediual dekenai nega ita atoa diba. Namona be edia dabu gaudia be momo natudia, hegeregere tamana be lasi memero bona kekeni, ita laloa bada. Momokani, natudia idia moale bada bema idia ita laloa, bona Iehova ia ura ita henia diba lalokau bona heduru be idia dekenai do ita henia.​—Salamo 10:14.