Dirava ida Ita Raka—Ela Bona Hanaihanai
“Ita ese Lohiabada, iseda Dirava do ita tomadiho henia, bona kamonai henia, ela bona hanaihanai.”—MIKA 4:5.
1. Dahaka dainai Iehova ita gwauraia diba “King ela bona hanaihanai”?
IEHOVA DIRAVA be matamana lasi. Ia idia gwauraia “Mauri Noho Hanaihanai Tauna” be maoro, badina ena noho be mai ena matamana lasi. (Daniela 7:9, 13) Danu, Iehova be do ia noho ela bona hanaihanai. Ia sibona be “King ela bona hanaihanai.” (Apokalupo 10:6; 15:3, NW) Ia vairanai, lagani 1,000 be “dina tamona sibona bamona. Idia ore haraga, varani bamona. Idia ore lao, hanuaboi ena hora tamona bamona.”—Salamo 90:4.
2. (a) Dirava ena ura kamonai taudia totona be dahaka? (b) Iseda ura bona palani idauidau lalonai dahaka ita laloa be namo?
2 Mauri Henia Tauna be ia noho hanaihanai dainai, taunimanima ginigunadia ruaosi, Adamu bona Heva, dekenai Paradaiso lalonai mauri hanaihanai idia abia diba helarona ia henidia diba. To, Adamu ia gwau-edeede dainai, mauri hanaihanai ia abia diba ena maoro ia haboioa, bona kara dika bona mase be ena bese taudia dekenai ia henia. (Roma 5:12) To, Adamu ena gwau-edeede karana ese Dirava ena ura ginigunana ia haidaua lasi. Iehova ena ura be kamonai taudia do idia mauri noho ela bona hanaihanai, bona ena ura do ia hamomokania, gau ta ese do ia koua lasi. (Isaia 55:11) Unai dainai, iseda ura bona palani idauidau lalonai, namona be ita laloa Iehova ena hesiai gaukara do ita karaia ela bona hanaihanai. “Dirava ena Dina” ita laloa noho lalonai, gau badana be ita laloatao iseda tahua gauna be Dirava ida do ita raka ela bona hanaihanai.—2 Petero 3:12.
Iehova be Ena Nega Korikori ai Kara Ia Karaia
3. Edena dala ai ita diba Iehova be ena ura hagugurua “ena nega” ia atoa?
3 Ita be Dirava ida ita raka dainai, ita ura dikadika iena ura do ita hagugurua. Ita diba Iehova be Nega Naria Tauna Badana, bona ita diba momokani ena nega korikori ai iena ura hagugurudia karana dekenai ia moru diba lasi. Hegeregere, “nega korikori ia ginidae neganai, Dirava ese sibona ena Natuna ia siaia.” (Galatia 4:4) Dirava ese Aposetolo Ioane ia hamaoroa, peroveta dalana ai ia itaia toa gaudia edia anina be “ena nega” ai do idia guguru. (Apokalupo 1:1-3) “Mase taudia edia kota henia nega” ia noho danu. (Apokalupo 11:18) Lagani 1,900 bamona gunanai, aposetolo Paulo be Dirava ena lauma ena siahu amo ia gwau “Dirava ese dina ta ia abia hidi vadaeni, unai dina dekenai iena abia hidi Tauna ese tanobada ibounai do ia kota henia mai maoromaoro danu.”—Kara 17:31.
4. Edena dala ai ita diba Iehova ia ura inai tanobada ena oromana dikana do ia haorea?
4 Iehova ese inai tanobada ena oromana dikana do ia haorea, badina inai tanobada taudia ese iena ladana idia hadikaia. Kara dika taudia idia momo idia lao. (Salamo 92:7) Edia hereva bona kara amo Dirava idia hadikaia, bona iena hesiai taudia idia gwau henidia bona idia dagedage henidia karana ia itaia neganai, ena lalona ia hisihisi. (Sekaraia 2:8) Unai dainai ita hoa lasi, Iehova ia hereva vadaeni, kahirakahira Satani ena orea ibounai do ia haorea vaitani! Dirava ese unai do ia vara negana ia abia hidi vadaeni, bona Baibel ena peroveta herevadia idia guguru ese idia hahedinaraia goevagoeva hari ita be unai “dokona negana” ai ita noho. (Daniela 12:4) Kahirakahira ia idia lalokau henia taudia hanamoa totona kara ta do ia karaia.
5. Lota bona Habakuku ese edia noho gabudia dekenai idia vara gaudia be edena bamona idia laloa?
5 Iehova ena hesiai taudia gunadia idia ura dikadika kara dika ia ore. Kara maoromaoro tauna Lota be “lebulebu taudia edia kara dainai iena lalona be ia metau.” (2 Petero 2:7) Peroveta tauna Habakuku be idia vara gaudia ia lalohisihisilaia dainai, ia noinoi, ia gwau: “Lohiabada e, nega momo oi dekenai lau boiboi vadaeni. Edena negai lauegu boiboi do oi kamonai, bona oi ese ai do oi durua, vadaeni inai dagedage dainai dika do ai davaria lasi? Lau ese taunimanima edia metau bona hisihisi bada lau itaia noho. Badina dahaka inai bamona hisihisi oi koua lasi? Badina dahaka oi ese inai hisihisi bona metau oi itaia noho, to hanamoa kara ta oi karaia lasi? Kahana ibounai dekenai lau itaia, taunimanima ese idia heatu bona heai henia noho, bona taunimanima edia kohu idia hadikaia noho.”—Habakuku 1:2, 3.
6 Iehova ena haere lalonai, Habakuku ia hamaoroa ia gwau: “Inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” (Habakuku 2:3) Dirava ese ia hahedinaraia, ena “nega” ai kara ta do ia karaia. Ena be toana be ia mai haraga lasi, to Iehova ese ena ura do ia hagugurua—do ia moru lasi!—2 Petero 3:9.
Ita Gaukara Noho mai Eda Ura Goadana Ida
7 Mai eda ura ida Iehova ida ita raka goada totona, do ia karaia karadia edia nega ita diba be gau badana, a? Lasi. Mani haheitalai haida oi laloa. Iesu be tanobada dekenai Dirava ena ura do ia vara, guba dekenai ia vara bamona, ena nega ia laloa bada. Momokani, Keriso ese ena hahediba taudia ia hadibaia inai bamona do idia guriguri: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:9, 10) Ena be Iesu ia diba unai noinoi ena haere do idia abia, to do idia vara gaudia edia nega korikori ia diba lasi. Iena peroveta hereva badana ai, inai nega dokona ia herevalaia neganai, ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” (Mataio 24:36) Dirava ena ura hagugurua karana lalonai Iesu Keriso be mai anina bada tauna dainai, ena guba Tamana ena inai taudia hamasea ore karana do ia karaia. To, Iesu be tanobada dekenai ia noho neganai, ia diba lasi edena nega ai Dirava ese kara ta do ia karaia. Unai ia diba lasi dainai Iehova ena hesiai gaukarana lalonai ena ura ia goada lasi, a? Lasi momokani! Iesu be mai ena ura goadana ida dubu ia hagoevaia neganai, “iena diba tahua taudia ese Buka Helaga ena hereva idia laloa, inai bamona ia torea, ia gwau: ‘Dirava e, oiemu Ruma lau lalokau henia bada, inai lalokau be egu lalona dekenai ia siahu, lahi bamona.’ ” (Ioane 2:17; Salamo 69:9) Iesu be Dirava ese ia siaia bena do ia karaia gaukarana ia karaia, bona mai ena ura goadana ida ia karaia. Iena ura be Dirava ena hesiai gaukara do ia karaia ela bona hanaihanai.
8 Keriso ena hahediba taudia danu be unai bamona idia laloa. Iesu be guba dekenai ia daekau gwauraia neganai, idia ida ia hebou. Unai sivarai ia gwau: “Aposetolo be Iesu danu idia hebou neganai, idia nanadaia, idia gwau, ‘Lohiabada e, inai negana be, basileia do oi henia lou Israela taudia dekenai, a?’ ” Edia Biaguna hegeregerena, idia ura Basileia do ia mai. To, Iesu ese ia haere henidia, ia gwau: “Egu Tamana sibona ena siahu dekenai ia laloa dina bona nega, umui be diba lasi. To, umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”—Kara 1:6-8.
8, 9. Hahediba taudia be Basileia henia lou negana idia henanadailaia neganai, Iesu ese dahaka ia hamaorodia, bona unai dainai dahaka idia karaia?
9 Unai sivarai ia hahedinaraia lasi aposetolo taudia be unai haere dainai idia lalo-manoka. Lasi, to mai edia ura bada ida haroro gaukara idia karaia goadagoada. Pura haida sibona lalonai, edia hahediba hereva amo Ierusalema idia hahonua. (Kara 5:28) Lagani 30 murinai, edia haroro gaukarana idia habadaia momokani dainai, Paulo ia gwau diba sivarai namona be “tanobada ibounai dekenai” idia harorolaia vadaeni. (Kolose 1:23) Ena be Iesu ese Basileia be ‘Israela dekenai ia henia lou’ lasi, hahediba taudia idia laloa kerere bamona, bona edia nega lalonai Dirava ese guba dekenai ia do haginia lasi, to idia ura Iehova idia hesiai henia goadagoada noho ela bona hanaihanai.
Iseda Ura Korikori Ita Tahua Namonamo
10. Dirava ese Satani ena tanobada do ia hadikaia ore negana ita diba lasi ese dala ia kehoa dahaka ita hahedinaraia totona?
10 Iehova ena hesiai taudia hari inai negai danu be idia ura inai nega dikana do ia ore. To, ita laloa bada gauna be Dirava ena gwauhamata tanobada matamatana lalonai do ita vareai karana lasi. Lasi, ita ura Iehova ena ladana do ia hahelagaia bona ena lohia siahuna do ia hamomokania karana ita itaia. Unai dainai, ita moale diba Dirava ese Satani ena tanobada do ia hadikaia ore negana ena ‘dina eiava hora’ be ita ia hamaoroa lasi. Unai ese ita dekenai dala ia kehoa bena ita hamomokania iseda lalona ita hadaia, Dirava ida do ita raka ela bona hanaihanai badina ia ita lalokau henia, to nega sisina lalonai sibona eda ura gaudia ita abia dainai lasi.
11, 12. Edena dala ai Satani ese Iobu ena Dirava badinaia karana ia tohoa, bona edena dala ai unai samani herevana be mai anina ita dekenai?
11 Dirava ita badinaia noho neganai, ita hamomokania Diabolo ena samani herevana be maoro lasi. Ia gwau kara maoromaoro tauna Iobu—bona ia bamona taudia—be sibodia edia ura ta dainai Dirava idia tomadiho henia. Iehova ese ena hesiai tauna Iobu be kerere lasi, kara maoromaoro, bona Dirava gari henia tauna ia gwauraia neganai, Satani ese ia gwauraia dika, ia gwau: “Bema Iobu ese gau ta oi dekena amo ia abia lasi, oi dekenai do ia gari, a? Oi be nega ibounai oi ese ia bona iena famili oi naria noho. Oi ese ia biagua gaudia ibounai danu oi naria noho. Oi ese Iobu ena kara ibounai oi hanamoa, bona iena boromakau ese tano idia hahonua momokani. To, bema iena kohu, bona ia biagua gaudia ibounai oi kokia neganai, ia ese oiemu ladana do ia hadikaia momokani!” (Iobu 1:8-11) Hahetoho lalonai Iobu ese ena Dirava badinaia karana amo ia hamomokania, unai dagedage hereva dikana be koikoi.
12 Unai bamona Dirava badinaia karana amo, Satani ena samani herevadia do ita hakoikoia diba. Ia gwau Dirava ita hesiai henia ena badina tamona be ita diba kahirakahira ahuna namona do ita abia. Dirava ese kara dika taudia edia davana dikana do ia henia ena nega korikorina ita diba lasi dainai, ita be mai eda dala do ita hamomokania Iehova ita lalokau henia momokani bona ita ura iena dala ai do ita raka ela bona hanaihanai. Ia hahedinaraia Dirava ita badinaia noho bona ita be mai eda abidadama iena gaukara karaia dalana dekenai. Danu, unai dina bona hora ita diba lasi ese ita ia durua ita gima bona lauma dalanai ita noga noho totona, badina ita diba dokona be nega ta ai do ia ginidae, hanuaboi ai henaoa tauna ia mai bamona. (Mataio 24:42-44) Dina ta ta Iehova ida ita raka karana amo iena lalona ita hamoalea bona Ia ia samania tauna, Diabolo, dekenai haere ta ita henia.—Aonega Herevadia 27:11.
Mauri Hanaihanai Totona Palani Karaia!
13. Vaira negana totona palani karaia karana dekenai Baibel be dahaka ia hahedinaraia?
13 Dirava ida idia raka taudia idia diba vaira negana totona palani namona idia karaia be aonega karana. Taunimanima momo be hekwakwanai bona buruka negana ena metau idia lalo-pararalaia dainai, edia matamata negana bona goada idia gaukaralaia namonamo, unai amo edia buruka negana lalonai moni dalana ai do idia hegeregere. To, mai anina bada gauna, lauma dalana ai iseda vaira negana, be edena bamona? Aonega Herevadia 21:5 ia gwau: “Mai haheauka danu ia gaukara noho tauna ena laloa, ese anina ia havaraia bada noho, to laloa haraga taudia be do idia ogogami.” Mauri hanaihanai totona palani karaia ena namo be bada herea. Ita diba lasi edena dina ai inai nega ena dokona do ia mai dainai, namona be iseda vaira negana ita laloa danu. To namona be ita laloa namonamo bona iseda mauri lalonai Dirava ena ura ita atoa guna. Abidadama lasi taudia be reana do idia gwau Dirava ena ura laloa bona atoa guna be lalo-parara karana lasi. Unai be momokani, a?
14, 15. (a) Vaira negana totona palani karaia karana dekenai Iesu be edena haheitalai ia gwauraia? (b) Iesu ena haheitalai lalonai, dahaka dainai ita gwau diba taga tauna be vaira negana ia laloa lasi?
14 Iesu ese unai gauna dekenai lalo-diari ia havaraia haheitalaina ta ia gwauraia. Ia gwau: “Kohu momo tauna ena uma aniani be momo herea. Vadaeni inai bamona ia laloa, ia gwau, ‘Lau be edena bamona do lau karaia? Badina be egu uma aniani ibounai be haboua gabuna lasi.’ Ma ia gwau, ‘Inai bamona do lau karaia, egu aniani haboua ruma do lau kokia, badadia haida do lau haginia, vadaeni egu uma aniani bona egu kohu ibounai unuseni do lau haboua. Vadaeni egu laumana dekenai do lau hamaoroa, do lau gwau: Egu laumana e, oiemu kohu be momo herea, lagani momo ena hegeregerena. Do oi laga-ani, do oi aniani, do oi inuinu, do oi moale.’ To Dirava ese ia hereva henia ia dekenai, ia gwau, ‘Kavakava tauna! Hari hanuaboi oiemu laumana oi dekena amo do lau kokia, vadaeni inai oi haboua kohudia be daika ese do ia abia?’ Iena kohu sibona dekenai ia haboua, to Dirava dekenai ia be gau momo ia henia lasi tauna be unai bamona.”—Luka 12:16-21.
15 Iesu ia hahedinaraia hereva badana be vaira negana ai tauanina dalana ai unai taga tauna ia hegeregere totona, ia gaukara goada be namo lasi, a? Lasi, badina Baibel ese ita ia hagoadaia ita gaukara goada totona. (2 Tesalonika 3:10) Unai taga tauna ena kerere be ‘Dirava dekenai gau momo ia haboua’ lasi. Ena be reana lagani momo lalodiai ena kohu ia moalelaia diba, to gabeai do ia mase. Ia be vaira negana ia laloa lasi, mauri hanaihanai ia lalohadailaia lasi.
16. Dahaka dainai vaira negana namona abia totona ita diba momokani Iehova ese ita do ia durua?
16 Iehova ida do ita raka ela bona hanaihanai ita laloa be kara namona bona vaira negana laloa karana. Unai be vaira negana ena palani karaia dalana namo hereana. Sikuli, moni gaukara, bona ruma bese ena maduna idauidau totona palani namona ita karaia be aonega karana, to namona be hanaihanai ita laloatao Iehova ese ena kamonai hesiai taudia do ia rakatania lasi. King Davida be ane ia abia, ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Salamo 37:25) Iesu ese ita ia hamaoroa danu, Dirava ese Basileia idia tahua guna bona Iehova ena kara maoromaoro daladia ai idia raka taudia ibounai edia mauri durua gaudia do ia henia.—Mataio 6:33.
17. Edena bamona ita diba dokona ia kahirakahira?
17 Ena be Dirava ena hesiai gaukara do ita karaia ela bona hanaihanai ita laloa, to Iehova ena dina ita laloa noho danu. Baibel ena peroveta herevadia idia guguru noho ese ia hamomokania unai dina ia kahirakahira. Idia hanaia laganidia 90 bamona lalonai, tuari, gorere, tano mareremarere, hitolo, bona Keristani taudia momokanidia dagedage henia karadia idia vara bona tanobada hegegemadai Dirava ena Basileia sivarai namona idia harorolaia. Unai gaudia ibounai be inai tanobada ena oromana dikana ena nega dokona ai do idia vara gaudia. (Mataio 24:7-14; Luka 21:11) Inai tanobada dekenai taunimanima momo be ‘edia ura sibona idia tahua, moni idia mataganigani henia, idia hekokoroku bona heagi. Idia hereva dika, edia tamana bona sinana idia kamonai henia lasi, tanikiu henia kara idia diba lasi, bona helaga karadia idia negea. Idia be lalokau idia diba lasi, idia bogahisihisi lasi, haida edia ladana idia hadikaia kava, idia lebulebu, idia dagedage, kara namodia idia ura henia lasi. Edia turana idia samania henia, idia kara kava. Idia gwau idia be tau badadia momokani, vadaeni lebulebu karadia idauidau idia ura henia bada, to Dirava idia ura henia maragi.’ (2 Timoteo 3:1-5) Hari inai nega dokona ena metau negadia lalonai, ita Iehova ena hesiai taudia eda mauri ia auka. Ita ura dikadika Iehova ena Basileia ese kara dika ibounai do ia kokia negana ia vara! Unai ita naria lalonai, namona be eda lalona ita hadaia Dirava ida do ita raka ela bona hanaihanai.
Hesiai Gaukara Ita Karaia Lalonai Mauri Hanaihanai Ita Laloa
18, 19. Dahaka ese ia hahedinaraia abidadama taudia gunadia edia lalohadai be Dirava ena hesiai gaukara do idia karaia ela bona hanaihanai?
18 Iehova ida ita raka lalonai, namona be Abela, Enoka, Noa, Aberahamo, bona Sara edia abidadama ita laloa. Paulo ese idia ia herevalaia murinai, ia gwau: “Edia abidadama lalonai, inai tau gunadia ibounai idia mase. Dirava ena gwauhamata ena anina idia do davaria lasi. To daudau herea dekena amo, unai gwauhamata gaudia idia itaia, bona idia moale bada, idia gwau, ‘Ai be gabu idau taudia bamona inai tano dekenai ai noho. Ai be inai tanobada dekenai do ai noho daudau lasi.’ ” (Heberu 11:13) Unai abidadama taudia “idia ura korikori tanona sibona idia laloa, inai be guba [ena].” (Heberu 11:16) Unai taudia be mai edia abidadama ida Dirava ena Mesia Basileiana ena lohia henunai noho gabuna namona idia naria. Ita diba momokani Dirava ese unai gabu namona—Basileia ena lohia henunai tanobada Paradaisona—dekenai mauri hanaihanai do ia henidia.—Heberu 11:39, 40.
19 Iehova ena orea taudia ese edia lalona idia hadaia Dirava do idia tomadiho henia ela bona hanaihanai bona peroveta tauna Mika ese unai ia hahedinaraia. Ia gwau: “Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese Lohiabada, iseda Dirava do ita tomadiho henia, bona kamonai henia ela bona hanaihanai.” (Mika 4:5) Mika be mai ena kamonai ida Iehova ena hesiai gaukara ia karaia ela bona ia mase. Tanobada matamatana ai do ia toreisi lou neganai, ita daradara lasi, unai peroveta tauna be Dirava ida do ia raka noho ela bona hanaihanai. Hari inai nega ena dokona momokani ai ita noho taudia dekenai ia be haheitalai namona!
20. Namona be iseda lalona do ita hadaia dahaka ita karaia totona?
20 Iehova be iena ladana dainai ita hahedinaraia lalokauna ia laloa bada. (Heberu 6:10) Dirava ia diba Diabolo ese ia biagua noho tanobadana dekenai Ia ita badinaia noho be auka. To “tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17; 5:19) Iehova ena heduru ia noho dainai, namona be eda lalona ita hadaia dina ta ta ita davaria hahetoho ita haheaukalaidia totona. Namona be iseda lalohadai bona mauri dalana ai iseda guba Tamana lalokauna ese ia gwauhamatalaia hahenamo namodia ita laloa. Unai gaudia do ita davaria bema iseda lalohadai be Dirava ida do ita raka noho ela bona hanaihanai.—Iuda 20, 21.
Edena Bamona Do Oi Haere?
◻ Dirava ena ura kamonai taudia totona be dahaka?
◻ Dahaka dainai Iehova be kara ta ia do karaia lasi Dirava diba lasi tanobadana ia haorea totona?
◻ Dahaka dainai Dirava ese kara ta do ia karaia negana ita diba lasi be iseda ura goadana do ia haorea lasi be namo?
◻ Dirava ida do ita raka ela bona hanaihanai lalohadaina ita abia ena hahenamo haida be dahaka?
6. Iehova ena haere Habakuku ena guriguri dekenai be edena bamona, bona unai amo dahaka ita diba?
7. Ena be Iesu ia diba lasi edena nega korikori ai Iehova ena dina do ia mai, to ena gaukara be edena bamona ia karaia?
[Picture on page 17]
Dirava ida ita raka ena anina be mai eda lalo-goada ida iena hesiai gaukara ita karaia, Keriso ena hahediba taudia ginigunadia idia karaia bamona