Iseda Lalona Ita Hadaia Dirava Ia Gwauraia Mauri Dalana Ita Badinaia Totona
“Dirava Ia Gwauraia Mauri Dalana” Hebouheboudia ese Dirava idia ura idia hesiai henia taudia dekenai gau momo idia hadibaia! Hebouhebou dekenai ia lao taihu ta ese unai hebouhebou ia gwauraia “diba, goada, bona lalo-diari abia negana namona.”
HEBOUHEBOU dekenai ia lao tadikaka ta ia gwau “ita moalelaia, ita laloa dobu, bona ita abia dae diba gaudia momo herea be unuseniai ai kamonai.” Hari unai program mani ita laloa.
Iesu Keriso—Dala be Ia, Hereva Momokani be Ia, Bona Mauri Danu be Ia
Unai be hebouhebou ena dina ginigunana ena sinado. (Ioane 14:6) Hereva ginigunana ese hebouhebou dekenai ita lao ena badina ia hahedinaraia: mauri dalana hereadaena, Dirava ia gwauraia dalana, ita diba totona ita hebou. Iehova ese ena orea taudia ia hadibaia ena dala ai idia raka diba totona. Ia ese Baibel, “hesiai tauna mai ena kamonai, bona mai ena kara maoromaoro” oreana, bona lauma helaga amo unai ia karaia. (Mataio 24:45-47; Luka 4:1; 2 Timoteo 3:16) Guba bona tanobada edia Siahu Bada Lohiana ese ita ia hadibaia be hahenamo badana!
Unai dina ena sinado hegeregerena, hebouhebou ena hereva badana be “Keriso Ena Boubou—Dirava Ena Hahemauri Dalana.” Dirava ia gwauraia mauri dalana ita badinaia totona, gau badana be Iesu Keriso ena kara Iehova ena ura lalonai ita lalo-pararalaia. Hereva henia tauna ia gwau: “Bema Iesu Keriso ena mauri davalaia boubouna be lasi, herevana dahaka ia abia dae o edena gaukara ia karaia, to tau ta lasi ese Dirava amo mauri hanaihanai do ia abia diba.” Bena ia ese Ioane 3:16 ena hereva ia gwauraia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Keriso ena mauri davalaia boubouna ita abidadama henia totona, hereva momokani ita diba namonamo be gau badana. Danu, gau badana be iseda mauri ita gwauhamatalaia Iehova dekenai, ranu bapatiso amo unai ita hahedinaraia, bona Iesu Keriso ia hahedinaraia haheitalai hegeregerena ita mauri noho.—1 Petero 2:21.
Adorahi ena program ia hamatamaia herevana ena sinado be “Lalokau Ena Dala Ia Doko Diba Lasi.” Paulo ese 1 Korinto 13:4-8 dekenai lalokau ia herevalaia, bona hereva henia tauna ese unai siri ta ta ia herevalaia. Ia ese helai taudia ia hadibaia Keristani taudia edia toana korikorina be sibona edia ura dadaraia lalokauna bona Iehova ia abia dae tomadihona lalonai Dirava bona dekena taudia lalokau henia karana be gau badana.
Bena hereva toi idia henia, edia sinado tamona be “Tama Sina e—Emui Natudia Dekenai Dirava Ena Dala Umui Hadibaia Goada.” Tama sina ese Dirava ena Hereva duahia bona stadilaia karana dekenai haheitalai namona idia hahedinaraia neganai, edia natudia idia durua diba Dirava idia tomadiho henia totona. Edia natudia dekenai hereva momokani idia hadibaia goada bema famili stadi idia karaia hanaihanai, bona ruma bese ena hekwakwanai idauidau idia durua gaudia idia stadilaia. Danu, gau badana be natudia idia durua kongregesen gaukara idauidau bona haroro gaukara idia karaia totona. Ena be hari inai tanobada dikana lalonai natudia ese Dirava do idia gari henia totona idia hadibaia be mai ena hekwarahi, to unai idia karaia dainai davana namona do idia abia.
Unai hereva toi murinai, hereva ta, “Dala Oi Kehoa Iehova ese Emu Kara Do Ia Hanamoa mai Anina Bada Gaukarana Oi Karaia Totona,” idia henia. Uro karaia tauna ese raro ena toana ia haidaua hegeregerena, Dirava ese idia ura ia idia hesiai henia taudia edia lalona ia haidaua. (Roma 9:20, 21) Ena Hereva dekenai bona ena orea amo sisiba ia henia unai ia karaia totona. Iehova ese ita do ia durua iseda diba ita gaukaralaia namonamo totona, bema sibona ita henia, ia kehoa daladia ita gaukaralaia, bona ia gwauraia raka dalana ita badinaia mai eda ura ida.
Bena program ena kahana namona—“Misinari Gaukara Idia Karaia”—idia henia. Hari tano 148 dekenai, Keristani hesiai gaukara idia karaia taudia 2,390 ese misinari dagina idia abia. Idia ese badinaia karana bona gaukara goadagoada karana dekenai haheitalai namo hereana idia hahedinaraia bona tano idaudia dekenai hesiai gaukara idia karaia diba ena hahenamo idia laloa bada. Unai kahana lalonai, intenesenel hebouhebou edia program lalonai, misinari taudia ese misinari gaukara ena hekwarahi bona moale idia herevalaia.
Dina ginigunana ena hereva ginigabena ena sinado be “Mase Murinai, Mauri Ia Noho, A?” Lagani tausen momo lalonai, taunimanima ese unai henanadai idia lalohadailaia. Bese iboudiai taudia ese unai henanadai idia daradaralaia. Taunimanima edia haere be momo herea. Idia idau momokani, unai haere idia henia taudia edia mauri daladia bona edia tomadiho daladia idia idau hegeregerena. To, taunimanima ese hereva momokani idia dibaia be gau badana.
Unai dainai, hereva henia tauna ese buklet ta, ia be mai ena kala idauidau bona ena rau be 32 buklet, ladana Ita Mase Neganai Dahaka Ia Vara Ita Dekenai? ia halasia. Unai buklet ese mase diba lasi soulina hadibaia herevana be edena dala ai ia hamatamaia bona hari inai negai tanobada dekenai idia noho tomadiho kahirakahira iboudiai edia hahediba hereva badana ai ia lao dalana ia hahedinaraia. Ia ese hereva goevadia bona lalona veria herevadia amo Baibel ena hereva souli dekenai, dahaka dainai ita mase, bona ita mase neganai dahaka ia vara ita dekenai ia herevalaia. Danu, unai buklet ese ia hahedinaraia edena helaro ia noho mase taudia bona mauri taudia totona. Gabu iboudiai dekenai, unai buklet be hahenamo badana hereva momokani idia tahua taudia dekenai!
Emui Kara Do Umui Naria Namonamo
Unai be sinado namona hebouhebou ena dina iharuana totona! (Efeso 5:15) Daba ena program ese haroro bona hahediba taudia halaoa gaukarana ia herevalaia. Dina ena siri idia herevalaia murinai, program lalonai hereva ta, “Taunimanima Ita Durudia Mauri Ia Lao Henia Dalanai Idia Raka Totona,” idia henia. Unai anina bada gaukarana ita karaia neganai, namona be mai moale ida ita karaia, bona namona be ita lalo-parara hereva momokani be ma haida dekenai ita hahedinaraia be hahenamo ta bona maduna ta. Keristani taudia ginigunadia edia negai, taunimanima momo ese Dirava ena Hereva idia dadaraia. To haida be ‘mauri hanaihanai idia ura kudou-maoro taudia bona abidadama taudia ai idia lao,’ (NW) herevana dagedage idia davaria. (Kara 13:48, 50; 14:1-5) Hari inai nega be unai hegeregerena. Ena be momo ese Baibel ena hereva momokani idia dadaraia, to hereva momokani idia ura henia taudia ita tahua noho.—Mataio 10:11-13.
Murina herevana ese ma haida dekenai mauri sivaraina harorolaia gaukarana ena hekwarahi ia herevalaia. Hari taunimanima be edia ruma dekenai ita davaria be auka dainai, namona be dala idaudia ai ita haroro goadagoada bona ita karaia namonamo, Basileia sivaraina be taunimanima momo dekenai ita harorolaia totona. Tano momo dekenai, telefon amo bona bisinesi teritori dekenai idia haroro, idia davaria haraga lasi taudia idia davaria totona, bona unai amo anina namona idia havaraia.
Hereva ta, ena sinado be “Hahediba Taudia Dekenai Iesu Ena Hahegani Ibounai Hadibaia,” ese ia hahedinaraia iseda haroro gaukara ita karaia namonamo be gau badana. Ma haida ida ita gaukara neganai bona kongregesen heboudia dekenai idia hahedinaraia daladia ita badinaia neganai, hadibaia namonamo dalana ita dibaia. Iseda hadibaia gaukarana ia namo ia lao neganai, Baibel ena hereva momokani idia diba totona taunimanima ita durua neganai, moale bada ita abia.
Daba ena program ena hereva ginigabena ese gwauhamata bona bapatiso edia anina ia herevalaia. Hereva henia tauna ia gwauraia hereva badana ta be, bema Dirava ita abidadama henia momokani bona mai eda momokani ida ena ura ita badinaia, ia ese ita ia hanamoa bona durua. Aonega tauna ia gwau: “Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aonega Herevadia 3:6) Bapatiso karana mai moalena be hebouhebou ena kahana badana, ia hahedinaraia taunimanima momo ese Dirava ia gwauraia mauri dalana idia badinaia matamaia.
Dina tubu ena aniani negana murinai, hereva ta, “Dirava Oi Hesiai Henia Mauri Hanaihanai Helarona Ida,” ese adorahi ena program ia hamatamaia. Dirava ena ura, abidadama taudia be tanobada dekenai ia do idia hesiai henia ela bona hanaihanai, be do ia guguru. Unai dainai ia namo momokani bema iseda lalohadai, palani, bona helaro lalonai ita hahedinaraia Iehova hesiai henia hanaihanai karana ita laloa! Ena be “Dirava ena Dina” ita laloa noho be namo, to gau badana be ita laloatao ita tahua gauna be ia do ita hesiai henia ela bona hanaihanai. (2 Petero 3:12) Iesu ese Dirava ena hahemaoro do ia henia negana ita diba lasi dainai, ita gaukara goadagoada bona dina ta ta ibounai ita hamomokania diba ita ese sibona eda ura gaudia abia totona Iehova ita hesiai henia lasi.
Unai murinai hereva rua ese Paulo ena revareva Efeso taudia dekenai, ena karoa 4, idia herevalaia. Idia gwauraia gaudia ta be hahenamo ita abia, “harihari gaudia taunimanima dekenai” ita abia. Lauma dalana ai idia be tadikaka goadadia bona lauma helaga ese idia ia abia hidi. Unai elda taudia ese sisiba bona hakaua herevadia idia henia, lauma dalanai namo ita abia totona. Danu, lauma helaga ena siahu henunai Paulo ia torea revarevana ese Keristani taudia ia hagoadaia “mauri matamata” do idia atoa. (Efeso 4:8, 24) Dirava ena kara ia tohotohoa tauna be hebogahisi, kara namo, lalo-manau, manada, haheauka, bona lalokau ia hahedinaraia.—Kolose 3:12-14.
Sibona eda kara ita naria namonamo ena anina ta be tanobada ena kara mirodia dekena amo ita gini siri—hereva gabena ese unai ia herevalaia. Iseda moale karadia, iseda hebamo, bona ita karaia bisinesi karadia ita naria namonamo be namo. Iamesi 1:27 ena sisiba, tanobada ena kara mirodia dekena amo ita gini siri sisibana, ita badinaia neganai, Dirava vairanai ita goeva bona iseda lalona ena hemami ia namo. Danu, iseda mauri be mai ena badina bona maino ita abia, lauma dalana ai ita noho namo, bona hebamo namona ita moalelaia.
Bena hereva toi idia henia, edia sinado tamona be “Matamata Taudia e—Dirava Ena Dala Umui Badinaia.” Matamata taudia idia diba Dirava ese ia lalokau henidia bona tomadiho goevana idia abia isi toho karadia ia laloa bada, unai dainai namona be edia lalona idia hadibaia, mai abidadama ida ia idia hesiai henia totona. Iseda lalona ita hadibaia dalana ta be dina ta ta ibounai Dirava ena Hereva ita duahia bona ita laloa dobu. Bema unai ita karaia, Iehova ena dala ita dibaia diba. (Salamo 119:9-11) Danu, lalona ita hadibaia diba bema tama sina, elda taudia, bona Society ena buka bona magasin edia sisiba namodia ita abia dae. Matamata taudia ese dala maorona ai edia lalona idia hadibaia dainai, idia ese kohu ura henia karana, hereva mirodia, bona moale karadia karaia hanaihanai karana, Dirava idia diba lasi taudia ese idia karaia karana, idia dadaraia diba. Dirava ia gwauraia mauri dalana idia badinaia neganai, matamata taudia bona taunimanima badadia ese moale momokani idia davaria diba.
Unai dina ena hereva ginigabena be “Havaraia Tauna—Iena Kara Bona Iena Dala Idauidau.” Taunimanima bilioni momo be Havaraia Tauna idia diba lasi be hereva henia tauna ese ia hahedinaraia murinai, ia gwau: “Havaraia Tauna, iseda Dirava, iena kara idauidau oi diba, bona iena dala oi badinaia neganai, emu mauri lalonai badina korikorina oi davaria. . . . Iseda tanobada bona tauanina gaudia haida oi herevalaia amo taunimanima do oi durua, Havaraia Tauna idia abia dae bena edia mauri lalonai badina korikorina idia davaria totona.” Bena hereva henia tauna ese Havaraia Tauna mai ena aonega bona lalokau ia noho idia hamomokania gaudia ia hahedinaraia. Unai hereva ena kahana badana be hereva henia tauna ese buka matamata—Is There a Creator Who Cares About You?—ia halasia.
“Dala be Inai, Ia Dekenai Do Umui Raka Lao”
Unai be hebouhebou ena dina ihatoina ena sinado. (Isaia 30:21) Program ia matamaia neganai, hereva namodia toi idia henia, idia ese Esekiela ena dubu matahanaina idia herevalaia. Unai matahanai be mai anina bada Dirava ena taunimanima dekenai hari, badina hari iseda nega lalonai ia be mai ena anina tomadiho goevana dekenai. Unai matahanai ita lalo-pararalaia dalana be inai: Iehova ena lauma dubuna badana ese ena tomadiho goevana ia laulaulaia. Unai matahanai ena kahana idauidau idia herevalaia neganai, hereva idia kamonai taudia idia laloa, edena dala ai naria taudia, horoa orena taudia unai, mai edia lalokau bona lohia oreana taudia ai idia lao diba taudia, edia gaukara idia durua diba.
Gabeai, daba lalonai, Baibel drama namona idia karaia bona karaia taudia be dabua idaudia idia atoa. Drama ena sinado be “Ruma Bese Taudia e—Emui Mauri Lalonai Dina Ta Ta Baibel Umui Duahia!” Ia ese Heberu memero toi, Babulonia ena King Nebukanesa ese ia haginia golo kaivakukuna idia tomadiho henia lasi taudia, edia abidadama bona gari lasi karana ia hahedinaraia. Unai drama ese ia hahedinaraia Baibel be idaunegai histori bukana sibona lasi to hari inai nega lalonai ena sisiba be mai anina bada matamata taudia bona taunimanima badadia dekenai.
Adorahi ena kahana ai pablik tok idia henia, ena sinado be “Mauri Hanaihanai Ia Lao Henia Dalana Tamona.” Taunimanima be kara dika bona mase idia davaria sivaraina ia hahedinaraia murinai, hereva henia tauna ese inai lalona veria herevadia ia gwauraia: “Hari dina, inai hebouhebou ena Baibel siri badana be Isaia karoa 30, siri 21, bona ia gwau: ‘Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, “Dala be inai, ia dekenai do umui raka lao.” ’ Edena dala ai unai gadona ita kamonai? Dirava ena Hereva, Buka Helagana, ena hereva amo bona iseda Hadibaia Tauna Badana, Iehova Dirava, ena Keristani oreana ia henia hahekau ita badinaia amo. Momokani, unai be mauri hanaihanai ia lao henia dalana tamona.”
Unai pura ena Gima Kohorona stadi ena hereva badadia idia gwauraia murinai, hebouhebou ena hereva ginigabena idia henia, ena sinado be “Iehova Ena Dala Dekenai Ita Raka Noho.” Ena kahana ta lalonai, program ena hereva badadia ia riviulaia. Bena hereva henia tauna ese lalo-tamona herevana ia gwauraia, unai lalo-tamona herevana ese ia hahedinaraia iseda lalona ita hadaia Dirava ena dala do ita badinaia noho.
Unai lalo-tamona herevana ena kahana ginigabena ai, ia gwau: “Ita diba momokani Baibel ena hakaua herevadia bona ena sisiba badinaia karana be mauri dalana hereadaena hari bona badina namona ia haginia vaira negana totona, unai dala ai ita ese mauri korikorina do ita abia diba. Bona gau badana be, inai lalo-tamona herevana ita gwauraia, badina Iehova Dirava ita lalokau henia mai eda kudouna, soulina, lalona, bona goadana ibounai ida!” Idia noho taudia ibounai ese unai idia abia dae dainai mai edia goada ida idia gwau oibe!
[Box/Picture on page 8]
Oi Ia Laloa Havaraia Tauna Ia Noho, A?
Unai be buka matamata ena sinado, ia ese Havaraia Tauna, Iehova, ia noho idia hamomokania gaudia namodia ia hahedinaraia, bona ena kara idauidau ia herevalaia danu. Unai buka idia karaia edukeisen badana idia abia to Dirava idia abidadama henia lasi taudia totona. Danu, unai rau 192 bukana ese Dirava idia abidadama henia taudia edia abidadama ia hagoadaia, Iena kara bona dala idauidau laloa bada karana ia habadaia.
Is There a Creator Who Cares About You? bukana idia torea taudia idia laloa lasi duahia tauna ese Dirava ia abidadama henia. To, unai buka ese ia hahedinaraia vanegai saiens taudia idia davaria gaudia bona edia lalohadai matamatadia ese edena bamona idia hamomokania Havaraia Tauna ia noho. Ena karoa haida edia sinado be “Dahaka ese Oiemu Mauri ai Badina Ia Havaraia?,” “Edena Dala ai Hisiu Oreadia Edia Oromana Ia Vara?—Ena Hepapahuahu,” bona “Gau Ma Ta be Oi Hegeregerena Lasi!” Karoa ma haida idia hahedinaraia dahaka dainai ita abia dae diba Dirava ese ena lauma amo Baibel ia havaraia. Unai buka matamatana ese Baibel ena anina ibounai ia herevalaia danu, unai amo Havaraia Tauna ena kara bona dala idauidau ia hahedinaraia. Unai buka ese Dirava be dika ia do haorea lasi ena badina ia hahedinaraia sibona lasi, to ia hahedinaraia edena dala ai do ia haorea momokani.
[Picture on page 7]
Taunimanima momo be bapatiso idia abia
[Picture on page 7]
A. D. Schroeder, Iehova ena Witness taudia edia Hakaua Oreana tauna ta, ese buklet matamata ia halasia
[Picture on page 8, 9]
Drama namona ese ita ia hagoadaia dina ta ta ibounai Baibel ita duahia totona