Dirava Ena Hereva Hadibaia Taudia Idia Hagoadaia Edia Gaukara Do Idia Hagugurua
HADIBAIA taudia tausen handred momo be vanegai hua lalodiai hadibaia herevadia idia abia totona idia hebou. Vanegai May ai, tanobada hegegemadai “Dirava Ena Hereva Hadibaia Taudia” edia Distrik Hebouheboudia handred momo dekenai idia hebou matamaia. Idia lao taudia idia hagoadaia, sibona idia hadibaia, diba ma haida idia abia, bona edia hadibaia gaukarana idia hagugurua totona.
Oi be unai hebouhebou ta oi lao henia, a? Bema oibe, reana oi be unai gabu dekenai Dirava momokanina, Iehova, tomadiho henia totona idia halasia lauma aniani namona oi laloa bada. Mani unai hebouhebou ena program lalonai ita dibaia gaudia ita riviulaia hebou.
Dina Ginigunana—Lauma Helaga amo Idia Vara Herevadia be mai Edia Namo Hadibaia Totona
Hebouhebou ena seamani ese inai hereva “Umui Dirava Ena Hereva Hadibaia Taudia e, Hadibaia Herevadia Umui Abia Dae” amo idia lao taudia ia welkam henia. Iesu Keriso be Hadibaia Tauna Badana ai ia lao badina Hadibaia Tauna Hereadaena, Iehova, ena amo diba ia abia. (Isaia 30:20; Mataio 19:16) Bema ita ura Dirava ena Hereva hadibaia taudia namodia ai ita lao, namona be ita danu be Iehova ese ia hadibaia.
Unai murinai inai hereva “Basileia Hadibaia Gaukarana ese Huahua Namona Ia Havaraia” idia henia. Idia manada vadaeni Dirava ena Hereva hadibaia taudia idia henanadai henia karana amo hahediba taudia halaoa gaukarana ena moale bona hahenamo idia hahedinaraia.
Bena lalona hagoadaia herevana ladana “ ‘Dirava Ena Hoa Gaudia’ ese Eda Kudouna Idia Hamarerea” idia henia. Aposetolo taudia edia negai, Dirava ena Basileia ena “hoa gaudia” idia herevalaia karana amo taunimanima edia kudouna idia hamarerea, kara ta idia karaia totona. (Kara 2:11) Ita danu ese “hoa gaudia” bamona Baibel ena hahediba herevadia, hegeregere mauri davalaia boubouna, toreisi lou, bona taravatu matamatana, amo taunimanima ita hagoadaia diba, kara ta idia karaia totona.
Hereva gabena ese iboudiai ia hagoadaia, ‘Iehova Ena Kara Maoromaoro Dekenai Moale Idia Davaria’ totona. (Salamo 35:27) Ita ia durua, namo ita ura henia bona dika ita inai henia karana ita dibaia amo, Baibel ita stadilaia karana amo, lauma dalanai ita idia hadikaia diba gaudia ita dadaraia goadagoada karana amo, bona manau karana ita hahedinaraia karana amo, kara maoromaoro do ita tahua. Unai karadia ese hebamo dikadia amo, tanobada ena kohu laloa bada karana amo, bona matabodaga bona dagedage gadara karadia amo ita do idia gimaia.
Hebouhebou ena hereva badana, ladana “Gau Ibounai Ita Abia Hegaegae Dirava Ena Hereva Hadibaia Totona,” ese ita ia hadibaia Iehova be ena Hereva, ena lauma helaga, bona ena tanobada oreana amo ita ia durua, haroro taudia namodia ai ita lao totona. Dirava ena Hereva gaukaralaia karana dekenai hereva henia tauna ia gwau: “Iseda tahua gauna be Baibel ena hereva be idia printaia pepana amo ita abia bona kamonai taudia edia kudouna lalonai ita atoa bamona.”
Hebouhebou dekenai sinado tamona henunai idia henia hereva toi ginigunadia edia sinado be “Ma Haida Ita Hadibaia Lalonai Sibona Ita Hadibaia.” Hereva ginigunana ese ia hahedinaraia namona be ma haida dekenai ita hadibaia Keristani kara maoromaoro taravatudia ita badinaia. Hereva iharuana ese ita ia hagoadaia ‘hereva momokani do ita hadibaia maoromaoro’ totona. (2 Timoteo 2:15) Herevana lagani hida Dirava ita hesiai henia, to sibona ita hadibaia totona, gau badana be ita sibona eda Baibel stadi ita karaia hanaihanai. Hereva toi amo hereva dokona ese ia hahedinaraia Diabolo ese iseda kara ia tahua hekokoroku, gwau-edeede karana, sibona laloa bada karana, mama, ura dikadia, badu, bona kerere tahua karadia ia davaria totona. To, bema mai eda goada ibounai ida Diabolo ita koua, ita dekena amo do ia heau boio. Ia ita koua totona, namona be Dirava kahirakahira do ita lao.—Iamesi 4:7, 8.
Hari mai anina bada herevana, “Tanobada Ena Matabodaga Sivarai Bona Laulau Negea Momokani,” ese lauma dalanai ita dekenai dika do idia havaraia gaudia ita dadaraia daladia ia hahedinaraia. Peroveta tauna Habakuku ese Iehova ia herevalaia, ia gwau: “Oiemu matana idia goeva momokani dainai dika oi itaia be hegeregere lasi; bona kara kerere oi raraia diba lasi.” (Habakuku 1:13, NW ) Namona be ‘dika do ita negea momokani.’ (Roma 12:9) Tama sina idia hagoadaia edia natudia be Internet o televisen dekenai idia raraia gaudia idia sekea namonamo. Hereva henia tauna ia gwau, matabodaga sivarai eiava laulau idia ura henia taudia ese lauma dalanai ia lo turana ta ena heduru idia tahua be namo. Namona be inai bamona siri ita lalohadailaia bona ita laloatao be namo, hegeregere Salamo 97:10; Mataio 5:28; 1 Korinto 9:27; Efeso 5:3, 12; Kolose 3:5; bona 1 Tesalonika 4:4, 5.
Hereva gabena, “Dirava Ena Maino ese Oi Ia Gimaia be Namo,” ese ita ia hagoadaia badina ia hahedinaraia lalo-hekwarahi ese ita ia hametaua neganai, Iehova dekenai iseda metau ita henia diba. (Salamo 55:22) Bema guriguri ai iseda kudouna dekenai idia noho gaudia ita gwauraia hedinarai, Iehova ese ita dekenai “Dirava ena maino,” ia ida iseda turana karana namona amo ia vara lalo-maino bona laga-ani mamina do ia henia.—Filipi 4:6, 7.
Dina ginigunana be moale herevana, “Iehova be Diari amo Ena Taunimanima Ia Hahairaia,” amo ia ore, ia ese Isaia karoa 60 ia guguru herevana ia hahedinaraia. Hari inai negai tanobada ena dibura lalonai, “idau bese taudia”—mamoe bamona taudia edia hutuma bada herea—ese horoa Keristani taudia ida Iehova ena diari idia moalelaia. Hereva henia tauna ese siri 19 bona 20 ia herevalaia neganai, ia gwau: “Iehova be dina bamona do ia ‘diho’ lasi, eiava hua bamona ena diari do ia ‘maragi’ ia lao lasi. Iena taunimanima hadiaria karana amo idia do ia hahairaia noho. Inai diari lasi tanobadana ena dina gabedia lalonai ita noho dainai, unai hereva ese ita ia hagoadaia momokani!” Hereva ena dokona kahanai, hereva henia tauna ese Isaiah’s Prophecy—Light for All Mankind, Volium 2 ia halasia. Unai buka matamatana oi duahia ore, eiava?
Dina Iharuana—Ita Hegeregere Ma Haida Hadibaia Totona
Dina iharuana ena dina ena siri idia herevalaia murinai, mai ura bada ida hebouhebou dekenai sinado tamona henunai idia henia hereva ma toi ita kamonai, edia sinado be “Hesiai Taudia amo Ma Haida be Abidadama Taudia ai Idia Lao.” Unai hereva toi idia henia taudia ta ta ese taunimanima be abidadama taudia ai idia lao totona idia ita durua daladia toi idia hahedinaraia—Basileia ena sivarai ita harorolaia, edia ura ita habadaia, bona kamonai taudia ita hadibaia Keriso ia hagania herevadia idia badinaia totona. Henanadai henia bona ekspiriens idia haheitalaia karana amo, ma haida be hahediba taudia ai idia lao totona idia ita hadibaia daladia ita itaia.
Hereva ma ta ena sinado be “Emu Haheauka Dekenai Dirava Badinaia Karana Oi Hakapua.” Hereva henia tauna ia gwau ‘ita haheauka ela bona dokona’ be gau badana. (Mataio 24:13) Namona be Dirava ese ia henia gaudia ibounai—guriguri, sibona eda stadi, hebou, bona haroro gaukara—ita gaukaralaia Dirava badinaia karana ita habadaia totona. Namona be inai tanobada ena ura bona kara ita koua, Dirava badinaia karana idia hamanokaia eiava idia hadikaia lasi totona.
Edena dala ai tauanina manokamanoka bona gaukara metau taudia ese laga-ani idia abia? Inai hereva, “Keriso Ena Huaia Auna Henunai Laga-Ani Ita Abia,” ese unai ia haerelaia. Iesu be ena murinai idia raka taudia ia boiria ena huaia auna henunai idia mai bona ia amo diba idia abia. (Mataio 11:28-30) Ita be Iesu ena huaia auna henunai ita mai totona, ia hegeregerena gau momo laloa lasi mauri namona ita noholaia. Unai hereva ena kahana badadia be edia mauri lalonai gau momo idia tahua lasi taudia idia henanadai henia karana amo idia hahedinaraia goevagoeva.
Iehova ena Witnes taudia edia hebou badadia dekenai mai anina bada gauna be Dirava ena gwauhamata hesiai taudia matamatadia edia bapatiso. “Bapatiso ese Hadibaia Gaukara Badana Dekenai Ita Ia Hakaua” herevana ia henia tadikaka ese bapatiso idia abia gwauraia taudia ia welkam henidia bona ia boiridia hesiai gaukara ena hahenamo badadia do idia moalelaia. Idia bapatiso matamata Dirava ena Hereva hadibaia taudia idia hegeregere neganai, kongregesen lalonai gaukara idauidau do idia karaia diba.
Adorahi kahanai hereva ginigunana ena sinado be “Hadibaia Tauna Badana Tohotohoa.” Lagani bilioni momo lalonai, guba dekenai, Iesu ese ena Tamana ena kara ia itaia namonamo bona ena haheitalai ia tohotohoa karana amo Hadibaia Tauna Badana ai ia lao. Tanobada ai ia noho neganai, hadibaia dala namodia, hegeregere henanadai namodia bona auka lasi bona mai anina bada haheitalai, ia gaukaralaidia. Iesu ena hadibaia hereva be Dirava ena Hereva amo bona mai ena ura bada, hebogahisi, bona mai ena siahu ida ia hereva. Unai ese ita ia veria Hadibaia Tauna Badana ita tohotohoa totona, ani?
Lalona veria herevana ma ta, “Mai Emu Ura ida Ma Haida Oi Hesiai Henia, A?,” ese ita ia hagoadaia, Iesu ena haheitalai ita tohotohoa bona ma haida ita hesiai henia totona. (Ioane 13:12-15) Hereva henia tauna ese idia hegeregere tatau ia hagoadaia, Timoteo bamona dala ia noho neganai ma haida do idia durua. (Filipi 2:20, 21) Tama sina ia hagoadaia, Elikana bona Hana edia haheitalai idia tohotohoa bona edia natudia be ful-taim hesiai gaukarana idia karaia totona do idia durua. Bona matamata taudia ia hagoadaia, Iesu Keriso bona mero matamata Timoteo edia haheitalai do idia tohotohoa bona mai edia ura ida sibona idia henia, ma haida idia durua totona. (1 Petero 2:21) Bona dala idia davaria neganai ma haida idia hesiai henia taudia edia hereva ita kamonai dainai ita moale danu.
Bena ita kamonai hereva toi edia sinado be “Tiokratik Edukeisen amo Namo Bada Oi Abia.” Hereva henia tauna ginigunana ese ia hahedinaraia iseda kamonai karana ita habadaia be gau badana. Unai ita karaia totona, sibona eda stadi kwadogina amo ita matamaia bona do ita halataia toho. Danu, ia ese kamonai taudia ia hagoadaia siri idia kehoa bona hebou lalonai hereva idia torea. Hereva henia tauna iharuana ese ita ia hagoadaia, “hereva momokani” do ita dogoatao momokani. (2 Timoteo 1:13, 14) Tanobada ai idia halasia matabodaga laulau bona sivarai, taunimanima edia aonega, Baibel idia tahua bona hakoikoia toho karana, bona hereva momokani idia negea taudia edia hadibaia herevadia amo, ita sibona ita gimaia totona, sibona eda stadi bona hebou lao henia karana totona nega ita hoia be namo. (Efeso 5:15, 16) Unai hereva toi edia hereva ginigabena ia henia tauna ia hahedinaraia ita dibaia gaudia ita badinaia be namo, unai amo tiokratik edukeisen amo namo bada do ita abia.—Filipi 4:9.
Mai moale ida “Gau Matamatadia, Lauma Dalanai Ita Goada Ita Lao Totona” herevana ita kamonai! Ita moale badina buka matamata ladana Tiokratik Haroro Sikuli amo Heduru Oi Abia bukana be kahirakahira do idia halasia. Hereva ia henia tauna ese buka lalonai idia noho gaudia ia hahedinaraia neganai ita ura bada unai buka ita abia. Unai buka lalonai hereva hanamoa sisiba idia noho kahana ia herevalaia neganai, ia gwau: “Inai sikuli buka matamatana be tanobada ena sikuli bukadia bamona idia torea lasi. Ia lalonai duahiduahi, hereva henia, bona hadibaia karadia hanamoa totona idia henia sisiba 53 be Baibel ena hakaua herevadia hegeregerena idia torea.” Unai buka ese peroveta taudia, Iesu, bona ena hahediba taudia edia hadibaia daladia ia hahedinaraia. Oibe, unai buka bona Tiokratik Haroro Sikuli lalonai do ita karaia gau matamatadia ese ita do idia durua, Dirava ena Hereva hadibaia taudia namodia ai ita lao totona.
Dina iharuana ai, hebouhebou taudia ese namo bada gauna ma ta idia abia. Unai be Daniela Ena Peroveta Herevana Oi Laloa Namonamo! bukana Hiri Motu bona New Guinea Pidgin gado ai. Unai buka matamatana ese Daniela ena peroveta herevadia ia herevalaia bona iseda laloa bada karana Dirava ena hereva dekenai do ia habadaia, bona ita do ia durua Baibel ena peroveta herevadia, idia momo idia guguru vadaeni herevadia, ita lalo-pararalaia totona. Danu, Daniela ena peroveta herevadia bona idia guguru daladia ita laloa namonamo karana amo, ita ta ta idia durua gaudia momo do ita dibaia diba.
Dina Ihatoina—Umui be Hadibaia Taudia Vadaeni be Namo
Hebouhebou ena dina dokona ena dina ena siri idia herevalaia murinai, ibounai ese hebouhebou ai sinado tamona henunai idia henia hereva toi ginigabedia, “Malaki Ena Peroveta Herevana ese Ita Ia Hegaegaelaia Iehova Ena Dina Totona,” idia kamonai namonamo. Malaki be lagani handred bamona Iuda taudia be Babulonia amo idia giroa murinai ia peroveta. Idia ese kara dika idia karaia bona tomadiho momokani idia negea lou, bona Iehova ena taravatu maorodia idia laloa lasi bona matakepulu, aena dika, bona gorere animal be boubou gaudia totona idia abia lao karana amo Iehova ena ladana idia hadikaia. Danu, edia matamata negana ai idia adavaia hahinedia idia rakatania, reana idau bese hahinedia idia adavaia totona.
Malaki ena peroveta herevana ena karoa ginigunana amo ita diba momokani Iehova ese ena taunimanima ia lalokau henidia. Ia hahedinaraia, namona be Dirava ita gari henia mai hemataurai ida bona helaga gaudia ita laloa bada. Iehova ia ura iseda gau namodia ita henia ia dekenai, sibona eda namo ita tahua lasi to mai lalokau ida ia ita tomadiho henia. Iseda hesiai gaukara helagana be ita karaia kava karana sibona lasi, bona Dirava vairanai iseda kara ena badina do ita hahedinaraia.
Hereva toi amo hereva iharuana ia henia tauna ese Malaki ena karoa iharuana be iseda nega ai ia guguru dalana ia herevalaia neganai, ia henanadai: “Iseda hereva ita naria namonamo, iseda uduna be ‘kerere dalana’ ai ita gaukaralaia lasi totona, a?” (Malaki 2:6) Namona be hadibaia gaukarana idia karaia bada taudia idia hamomokania edia hahediba herevana ena badina aukana be Dirava ena Hereva. Koikoi karana, mai maoro lasi ida headava hamakohia karana, ita inai henia be namo.—Malaki 2:14-16.
Hereva toi amo ginigabena ia henia tauna ese “Daika ese Iehova Ena Dina amo Do Ia Roho Mauri?” ia herevalaia neganai, ita ia durua, Iehova ena dina badana totona do ita hegaegae. Hereva henia tauna ia gwau: “Iehova ena hesiai taudia idia diba Malaki karoa 3, siri 17, ena guguru negana badana be idia dekenai ia vara dainai, idia ia durua bada!” Ia gwau: “Bona Siahu Ibounai Lohiabada ia gwau, ‘Inai taudia be lauegu taunimanima momokani. Bona unai Dina, lau ese kara ta do lau karaia dinana dekenai, idia be lau sibona egu. Bona lau ese idia do lau hamauria, tau ta ese iena natuna, iena ura ia karaia merona, ia hamauria bamona.’ ”
Hebouhebou dekenai ia vara namo bada gauna ta be drama ladana “Iehova Ena Siahu Matauraia,” unai ese Kora ena natudia ia hahedinaraia. Ena be edia tamana be Mose bona Arona ia gwau-edeede henia, idia ese Iehova bona ia atoa siahu taudia idia badinaia. Kora bona ena murinai idia raka taudia idia mase, to Kora ena natudia idia roho mauri. Unai murina herevana, “Dirava Ena Lohia Siahuna Oi Badinaia mai Kamonai Ida,” ese drama ena lalonai idia noho gaudia edia anina ita dekenai ia hahedinaraia. Hereva henia tauna ese Kora bona ena murinai idia raka taudia idia moru daladia 6 ia sisibalaia: mai kamonai ida Iehova ena siahu idia badinaia lasi; hekokoroku, dagi bada tahua karana, bona mama idia koua lasi; Iehova ese ia abia hidi taudia edia kerere idia laloa bada; idia maumau; edia hesiai gaukara idia moalelaia lasi; bona edia turadia eiava ruma bese taudia idia badinaia to Iehova idia badinaia lasi.
Pablik tok ena ladana be “Daidia ese Bese Iboudiai Dekenai Hereva Momokani Idia Hadibaia?” Unai idia herevalaia hereva momokani be idia momokani herevadia idauidau lasi, to ia be Iesu Keriso ese ia harorolaia hereva momokanina Iehova ena ura dekenai. Hereva henia tauna ese hereva momokani ita abia dae hahediba herevadia, hereva momokani tomadiho henia daladia, bona hereva momokani iseda kara dekenai ia hahedinaraia. Keristani taudia ginigunadia be hari inai negai Iehova ena Witnes taudia ida ia hahegeregerea dainai ita diba momokani ‘Dirava be ita huanai ia noho.’—1 Korinto 14:25.
Unai wiki ena Gima Kohorona ena hereva badadia idia herevalaia murinai, idia noho Dirava ena hereva hadibaia taudia ibounai be hereva ginigabena “Karaharaga Iseda Hadibaia Gaukarana Ita Hagugurua” dainai, idia ura kara haida idia karaia. Hereva kwadogina amo program ena hereva riviulaia karana ese hadibaia gaukarana lalonai Baibel ita gaukaralaia ena anina bada, hadibaia taudia namodia ai do ita lao daladia, bona namona be ita diba momokani ma haida dekenai ita hadibaia gaudia be hereva momokani ia hahedinaraia. Hereva henia tauna ese ita ia hagoadaia, ‘iseda goada do idia itaia, ia bada ia lao noho’ bona ‘ita sibona eda kara bona iseda hadibaia hereva ita naria namonamo’ totona.—1 Timoteo 4:15, 16.
“Dirava Ena Hereva Hadibaia Taudia” edia Distrik Hebouhebouna dekenai lauma ariana ita moalelaia! Ma haida dekenai Dirava ena hereva ita hadibaia lalonai, iseda Hadibaia Tauna Hereadaena, Iehova, bona iseda Hadibaia Tauna Badana, Iesu Keriso, ita tohotohoa be namo.
[Box/Pictures on page 28]
Buka Matamatadia Idia Halasia
“Dirava Ena Hereva Hadibaia Taudia” edia Distrik Hebouhebou dekenai idia lao taudia ese mai edia ura bada ida gau hani idia abia, idia do idia durua Baibel ena hereva momokani be taunimanima dekenai idia hadibaia totona. Pepapepa ladana Oi Lalonai Mase Diba Lasi Laumana ta Ia Noho, A? be heduru gauna namona edia gado ese “souli” bona “lauma” edia idau ia hahedinaraia lasi tanodia ai herevahereva dalana kehoa totona. Unai pepapepa matamatana ese ia hahedinaraia goevagoeva lauma siahuna be idau bona lauma taudia be idau, bona taunimanima idia mase neganai lauma taudia ai idia lao lasi. Pepapepa ma ta ladana Oi Ura Baibel Do Oi Diba Namonamo, A? idia halasia danu. Unai pepapepa ese Witnes lasi taudia dekenai iseda davana lasi Baibel stadi karana ia hahedinaraia, bona Baibel stadi idia herevalaia be auka pablisa taudia haida do ia durua diba. Saturday dekenai English gado buklet matamatana ta idia halasia, ena ladana be, “A Satisfying Life−How to Attain It.”
Buklet ladana Iehova Ena Witnes Taudia—Idia be Daidia? Dahaka Idia Abia Dae? be hebouhebou ena dina ihatoina dekenai Hiri Motu bona New Guinea Pidgin gado ai idia halasia. Unai buklet ese Iehova ena Witnes taudia idia abia dae herevadia bona edia orea idia hakaua dalana ia hahedinaraia. Danu, nega momo taunimanima ese idia henia henanadai idauidau ia haerelaia. Oi ese emu haroro gaukara lalonai unai buka matamatadia oi gaukaralaia vadaeni, a?
[Pictures on page 26]
Milan, Italy dekenai, bona tanobada hegegemadai hebouhebou idauidau dekenai, handred momo idia bapatiso
[Picture on page 29]
Drama ladana “Iehova Ena Siahu Matauraia” ese kamonai taudia edia lalona ia hamarerea bada