Hari Inai Negai “Dubu Helaga” Bona Lohia Tauna
“Taunimanima do idia raka vareai neganai, king [“lohia tauna,” “NW”] danu be idia danu do ia raka vareai, bona do idia raka murimuri neganai king [“lohia tauna,” “NW”] danu do ia raka murimuri lao.”—ESEKIELA 46:10.
1, 2. Edena hereva momokani badana ese ita ia durua Esekiela ena matahanai ena anina ita diba namonamo totona?
IDAUNEGAI rabi taudia haida be Esekiela bukana dekenai idia daradara. Talmud bukana ia gwau, idia haida idia laloa Revareva Helagadia amo do idia kokia. Dubu ena matahanai idia lalo-hekwarahilaia bada bona idia gwau taunimanima ese do idia lalo-pararalaia diba lasi. Baibel tahua taudia haida danu be Esekiela ese Iehova ena dubu ia itaia ena matahanai dainai idia daradara. Ita be edena bamona?
2 Tomadiho goevana haginia lou negana amo, Iehova ese ena taunimanima ia hanamodia, bona nega momo lauma dalana ai edia lalona ia hadiaria. Ena anina ia hedinarai goevagoeva gauna ta be Dirava ena lauma dubuna—Iehova ese tomadiho goevana totona ia haginia dalana.a Unai hereva momokani badana ese ita ia durua Esekiela ese dubu ia itaia ena matahanai ena anina ita diba namonamo totona. Namona be unai matahanai ena kahana hani ita laloa namonamo—dubu, hahelaga taudia, lohia tauna, bona tano. Hari inai negai edia anina be dahaka?
Dubu Helaga Bona Oi
3. Dubu ena vareai gabudia ai guhi be ataiai bona haba dekenai idia koroa laulaudia ese dahaka idia hadibaia ita dekenai?
3 Mani oi laloa ita be unai matahanai dekenai ia noho dubuna ena kahana idauidau dekenai ita lao. Ita raka lao bena vadavada mai ena pata 7 amo ita raka daekau ikoukou badana ta dekenai. Unai vareai gabuna lalonai, mai hoa danu atai kahana ita itaia. Ena guhi be mita 30 bamona ataiai! Unai ese ita ia hadibaia lou Iehova ese tomadiho goevana totona ia haginia dalana ai ita vareai neganai, ita badinaia taravatudia be ataiai. Uindo amo diari ia vareai bona pama audia, Baibel lalonai kara maoromaoro idia laulaulaia gaudia unai, edia laulau haba dekenai ia hadiaria. (Salamo 92:12; Esekiela 40:14, 16, 22) Unai gabu helagana be lauma dalanai bona tauanina dalanai idia raka maoromaoro taudia totona. Unai hegeregerena, iseda ura be ita kara maoromaoro noho bena Iehova ese iseda tomadiho karana do ia abia dae.—Salamo 11:7.
4. Daidia be dubu dekenai do idia vareai lasi, bona unai amo dahaka ita dibaia?
4 Vareai gabuna ena kahana kahana ai, gima gabudia toi idia noho. Gima taudia ese ita do idia koua bena dubu lalonai do ita vareai lasi, a? Iehova ese Esekiela ia hamaoroa, idau bese tauna bema ena ‘kudouna dekenai ia abidadama lasi’ be do ia vareai lasi. (Esekiela 40:10; 44:9) Unai ena anina be dahaka? Dirava ese iena taravatu idia ura henia bona idia badinaia taudia sibona ia abia dae, ia idia tomadiho henia totona. (Ieremia 4:4; Roma 2:29) Unai bamona taudia ia abia dae iena kalaga, iena tomadiho rumana dekenai. (Salamo 15:1-5) Lagani 1919 amo tomadiho goevana idia haginia lou neganai, Iehova ena tanobada oreana ese iena taravatu ia abidia isi bona edia anina ia hahedinaraia namonamo noho. Mai edia lalona ibounai ida idia ura lasi idia kamonai taudia be iena taunimanima idia bamoa noho diba lasi. Hari inai negai, Baibel ena hereva hegeregerena, kara dika idia karaia bona idia helalo-kerehai lasi taudia be murimuri ai idia atoa dainai, iseda tomadiho karana ia namo bona goeva noho.—1 Korinto 5:13.
5. (a) Esekiela ena matahanai bona Ioane ena matahanai Apokalupo 7:9-15 ai ia torea gauna dekenai, dahaka gau haida idia hegeregere? (b) Esekiela ena matahanai lalonai, murimuri kahana ena ariara ai idia tomadiho iduhu 12 be daidia idia laulaulaia?
5 Vareai gabuna be murimuri kahana ena ariara dekenai ia lao, unuseniai taunimanima be Iehova idia tomadiho henia bona hanamoa. Unai kara dainai aposetolo Ioane ena matahanai ita laloa lou. Unai matahanai lalonai “hutuma bada herea” (NW) taudia, be ‘dina bona hanuaboi Dirava ena dubu helaga lalonai’ Iehova idia tomadiho henia. Matahanai ruaosi lalonai pama audia idia noho. Esekiela ena matahanai ai, vareai gabuna ena haba dekenai edia laulau idia koroa. Ioane ena matahanai ai, Dirava tomadiho henia taudia edia imana dekenai pama au raurau idia dogoatao. Unai ese mai moale ida Iehova idia hanamoa bona edia King Iesu idia hanamoa karana ia laulaulaia. (Apokalupo 7:9-15) Esekiela ena matahanai lalonai, Israela ena iduhu 12 ese “mamoe idaudia” taudia idia laulaulaia. (Ioane 10:16; mani Luka 22:28-30 itaia.) Oi danu be Iehova ena Basileia harorolaia karana amo ia oi hanamoa mai moale ida, a?
6. Murimuri kahana ena ariara dekenai aniani daiutudia idia noho ena badina be dahaka, bona unai dainai mamoe idaudia taudia be edena hahenamo idia laloa lou?
6 Murimuri kahana ena ariara dekenai ita raka loaloa lalonai, aniani daiutudia 30 ita itaia, unuseniai taunimanima be edia boubou gaudia idia ania. (Esekiela 40:17) Hari inai negai, mamoe idaudia taudia be animal idia bouboulaia lasi, to lauma dubuna dekenai idia mai neganai, imana kavakava idia mai lasi. (Esodo 23:15 itaia.) Aposetolo Paulo be inai ia torea: “Unai dainai namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. . . . Kara namodia do umui laloaboio lasi, bona kohu lasi taudia danu, umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.” (Heberu 13:15, 16; Hosea 14:2) Momokani, unai bamona boubou gaudia Iehova dekenai ita henia be hahenamo badana.—Aonega Herevadia 3:9, 27.
7. Dubu hahetohoa karana ese ita dekenai dahaka ia hadibaia momokani?
7 Matahanai ai, Esekiela ese aneru ta ia itaia, dubu ena bada ia hahetohoa noho. (Esekiela 40:3) Unai hegeregerena, aneru ta ese aposetolo Ioane ia hamaoroa, ia gwau: “Oi lao, Dirava ena dubu helaga bona pata helagana edia bada do oi hahetoho karaia. Bona dubu helaga lalonai idia tomadiho noho taudia do oi duahia.” (Apokalupo 11:1) Unai hahetohoa karana ena anina be dahaka? Matahanai ruaosi dekenai unai kara be gwauhamata toana bamona, idia hahedinaraia gau ta ese Iehova do ia koua diba lasi, to iena ura tomadiho goevana totona do ia hagugurua. Unai hegeregerena, hari inai negai namona be ita diba momokani gau ta ese tomadiho goevana haginia lou karana do ia koua lasi—gavamani goadadia edia dagedage bada karana danu be hegeregere lasi.
8. Daidia be ikoukou amo lalona kahana ena ariara dekenai idia lao, bona unai ikoukou dainai dahaka ita laloa lou?
8 Murimuri kahana ena ariara amo ita raka hanai neganai, ikoukou toi ita itaia, lalona kahana ena ariara dekenai idia hanaia lao daladia; lalona kahana ena ikoukou bona murimuri kahana ena ikoukou edia bada be tamona bona idia hahegeregerea namonamo. (Esekiela 40:6, 20, 23, 24, 27) Hahelaga taudia sibona be lalona kahana ena ariara lalonai idia vareai diba. Lalona kahana ena ikoukou ita laloa neganai, ita laloatao namona be horoa taudia be Dirava ena taravatu hegeregerena do idia noho, to unai taravatu danu ese Keristani momokanidia ibounai idia hakaua. To hahelaga taudia edia gaukara be dahaka, bona hari inai negai ena anina be dahaka?
Hahelaga Taudia
9, 10. “Pavapava bona hahelaga taudia” oreana, Esekiela ena matahanai ai hahelaga oreana ese ia laulaulaia taudia, be edena bamona lauma dalana ai ma haida idia hadibaia?
9 Keristani taudia edia nega ia do mai lasi neganai, hahelaga taudia be dubu dekenai idia gaukara goadagoada. Idia ese boubou animal idia hamasea, pata dekenai idia bouboulaia, bona hahelaga taudia oredia bona taunimanima edia hesiai gaukara idia karaia, bona unai gaukara dainai edia goada bada herea idia henia. To mai anina bada gaukaradia ma haida idia karaia danu. Iehova ese hahelaga taudia ia haganidia, ia gwau: “Hahelagaia taudia ese egu bese taudia do idia hadibaia, gau helagadia bona gau helagadia lasi edia idau be dahaka, bona Dirava ena taravatu bona oda dekenai, dahaka be goeva, bona dahaka be goeva lasi.”—Esekiela 44:23; Malaki 2:7.
10 Tomadiho goevana dainai “pavapava bona hahelaga taudia” oreana edia gaukara goadagoada bona mai edia manau ida idia karaia hesiai gaukarana oi laloa bada, a? (1 Petero 2:9, NW) Idaunegai Levi hahelaga taudia hegeregerena, idia ese lauma dalana ai hadibaia gaukarana idia gunalaia, taunimanima idia durua, dahaka be goeva bona Dirava ese ia abia dae, bona dahaka be goeva lasi bona ia abia dae lasi do idia lalo-pararalaia totona. (Mataio 24:45) Unai hadibaia hereva be Baibel herevalaia bukadia bona Keristani hebou badadia bona maragidia amo idia halasia, bona unai ese taunimanima milioni momo ia durudia Dirava ida maino idia karaia totona.—2 Korinto 5:20.
11. (a) Esekiela ena matahanai ese edena dala ai ia hahedinaraia momokani hahelaga taudia idia goeva be gau badana? (b) Dina gabedia ai, horoa taudia be edena bamona lauma dalana ai idia hagoevaia?
11 To, hahelaga taudia be taunimanima do idia goeva totona idia hadibadia sibona lasi; idia danu do idia goeva be namo. Unai dainai, Esekiela ese Israela ena hahelaga oreana do idia hagoevaia karana ia itaia. (Esekiela 44:10-16) Unai hegeregerena, lagani 1918 ai, Iehova be “hamanadaia bona hagoevaia” tauna bamona iena lauma dubuna dekenai ia helai, bona iena horoa hahelaga oreana taudia ia itaia. (Malaki 3:1-5) Lauma dalanai idia goeva taudia eiava edia kaivakuku tomadiho henia karadia amo idia helalo-kerehai taudia be iena lauma dubuna ai hesiai gaukara namona idia karaia noho diba. To, taunimanima iboudiai bamona, horoa taudia ta ta be lauma dalana ai bona tauanina dalana ai idia miro diba. (Esekiela 44:22, 25-27) Idia gaukara goada “tanobada ena kara mirodia dekena amo” idia siri totona.—Iamesi 1:27; mani Mareko 7:20-23 itaia.
12. Dahaka dainai horoa taudia edia gaukara ita laloa bada be namo?
12 Ita ta ta ita henanadai diba, ‘Lagani momo lalodiai horoa taudia ese mai abidadama ida hesiai gaukara idia karaia ena haheitalai namona lau laloa bada, a? Edia abidadama lau tohotohoa, a?’ Namona be mamoe idaudia taudia idia laloatao, horoa taudia be idia ida tanobada dekenai do idia noho lasi ela bona hanaihanai. Iehova ese Esekiela ena matahanai lalonai idia noho hahelaga taudia ia gwauraidia, ia gwau: “Kohu ta [o tano taina] Israela dekenai [be hahelaga taudia] do umui henidia lasi, badina be edia kohu be lau.” (Esekiela 44:28) Unai hegeregerena, horoa taudia be tanobada dekenai do idia noho hanaihanai lasi. Idia be mai edia ahuna guba dekenai, bona hutuma bada herea taudia idia laloa tanobada ai horoa taudia idia noho lalonai idia durudia bona hagoadadia be hahenamo badana ta.—Mataio 25:34-40; 1 Petero 1:3, 4.
Lohia Tauna—Ia be Daika?
13, 14. (a) Dahaka dainai lohia tauna be mamoe idaudia taudia amo? (b) Lohia tauna be daidia ia laulaulaia?
13 Hari henanadai ta ia vara. Lohia tauna be daika ia laulaulaia? Ia be tau tamona bona orea ta bamona idia herevalaia dainai, ita gwau diba ia be tatau orea ta ia laulaulaia. (Esekiela 44:3; 45:8, 9) To daidia? Momokani unai be horoa taudia lasi. Matahanai lalonai, ia be hahelaga oreana ida ia gaukara hebou, to ia be idia ta lasi. Ia be hahelaga taudia amo ia idau, ia be mai ena ahuna tano dekenai. Unai dainai inai tano ai do ia noho, guba dekenai lasi. (Esekiela 48:21) Danu, Esekiela 46:10 ia gwau: “Taunimanima [hahelaga lasi iduhu taudia] do idia raka vareai [murimuri kahana ena ariara ai] neganai, [lohia tauna] danu be idia danu do ia raka vareai, bona do idia raka murimuri neganai [lohia tauna] danu do ia raka murimuri lao.” Lalona kahana ena ariara dekenai ia vareai lasi to murimuri kahana ena ariara dekenai ia tomadiho. Ia be taunimanima ida dubu lalonai idia raka vareai bona idia raka lasi hebou. Unai gaudia ese idia hamomokania unai lohia tauna be ia roho mauri mamoe idaudia taudia hutuma bada herea edia huanai ia noho.
14 Ia hedinarai goevagoeva, Dirava ena taunimanima edia huanai unai lohia tauna be mai ena maduna haida. Murimuri kahana ena ariara lalonai ia be Ist Kahana ena Ikoukou dekenai ia helai. (Esekiela 44:2, 3) Unai be naria gaukarana ia hahedinaraia, idaunegai Israela tatau badadia be hanua ena ikoukou dekenai idia helai bona hahemaoro gaukarana idia karaia hegeregerena. (Ruta 4:1-12; Aonega Herevadia 22:22, NW) Hari inai negai mamoe idaudia taudia huanai daidia be naria dagina idia abia? Tanobada ai do idia noho helarona idia abia bona lauma helaga ena hakaua dalana amo idia abia hidi elda taudia. (Kara 20:28) Unai dainai lohia oreana be diba ia abia noho gabeai tanobada matamatana lalonai naria gaukarana do ia karaia totona.
15. (a) Edena dala ai Esekiela ena matahanai ese horoa elda taudia bona elda taudia hutuma bada herea taudia amo idia kara heheni dalana ia hahedinaraia? (b) Horoa elda taudia be edena dala ai Iehova ena orea lalonai hakaua gaukarana idia karaia?
15 To, hari inai negai horoa hahelaga oreana bona naria gaukara idia karaia lo tatau, hutuma bada herea taudia huanai, be edena bamona idia kara heheni? Esekiela ena matahanai ia hahedinaraia, hutuma bada herea oreana lalonai idia noho elda taudia be durua gaukarana idia karaia, to horoa taudia ese lauma dalana ai gaukara idia gunalaia. Edena dala ai? Oi laloatao, matahanai lalonai hahelaga taudia be maduna idia abia, taunimanima dekenai lauma gaudia idia hadibaia totona. Idia hamaorodia, kerere ia vara neganai hahemaoro gaukarana do idia karaia. Danu, Levi taudia be “naria gaukaradia” (NW) do idia karaia dubu ena ikoukou dekenai. (Esekiela 44:11, 23, 24) Ia hedinarai goevagoeva, lohia tauna be hahelaga taudia edia gaukara bona hakaua henunai mai ena manau ida ia noho. Unai dainai, iseda nega lalonai horoa taudia ese tomadiho goevana lalonai ita idia hakaua be maoro. Hegeregere, Iehova ena Witness taudia edia Hakaua Oreana taudia be idia edia huana amo idia abia hidi. Unai horoa elda taudia mai edia abidadama be lagani momo herea lalonai lohia oreana taudia ai do idia lao diba taudia idia hadibaia noho. Unai taudia idia hegaegaelaia Dirava ena tanobada matamatana lalonai edia siahu ibounai do idia abia bena gaukaralaia totona.
16. Isaia 32:1, 2, ena hereva bamona, namona be elda taudia ibounai edia kara be edena bamona?
16 Lohia oreana taudia ai do idia lao bona maduna bada do idia abia diba taudia be edena bamona naria taudia? Isaia 32:1, 2 dekenai ia noho peroveta herevana ia gwau: “Kamonai! Dina ta be king ta ese kara maoromaoro momokani dekena amo iena taunimanima do ia gunalaia. Lohia taudia danu ese taunimanima do idia kota henia mai maoromaoro danu. Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” Unai peroveta herevana be hari inai negai ia guguru noho, badina Keristani elda taudia—horoa taudia bona mamoe idaudia taudia amo—be nega ibounai idia hekwarahi “guba bada ia toa,” hegeregere dagedage bona lalo-manoka amo, mamoe taudia idia naria.
17. Namona be Keristani mamoe naria taudia edia lalohadai idia sibona dekenai be edena bamona, bona mamoe taudia edia lalohadai idia dekenai be edena bamona?
17 Heberu gado dekenai unai hereva “lohia tauna” be taunimanima abia isi totona idia gaukaralaia dagi ladana lasi. Lasi, ia be Dirava ena mamoe naria totona unai tatau ese do idia huaia maduna ia herevalaia. Iehova be sisiba hereva ia henia, ia gwau: “Umui Israela ena [lohia taudia] e, egu bese taudia umui dagedage bona hisihisi henidia karadia do umui hadokoa. Kota maoromaoro, bona kara maoromaoro danu do umui karaia.” (Esekiela 45:9) Namona be hari inai nega lalonai, elda taudia iboudiai ese unai sisiba idia laloatao. (1 Petero 5:2, 3) Mamoe oreana taudia idia diba danu, mamoe naria taudia be Iesu ese ia henia “harihari gaudia.” (Efeso 4:8) Unai maduna totona idia hegeregere taudia idia badinaia herevadia be Dirava ena Hereva lalonai ia torea. (1 Timoteo 3:1-7; Tito 1:5-9) Unai dainai Keristani taudia ese elda taudia edia hakaua dalana idia badinaia.—Heberu 13:7.
18. Lohia oreana taudia ai idia lao diba taudia edia maduna haida hari inai negai be dahaka, bona edia maduna vaira negana ai be dahaka?
18 Baibel negadia ai, lohia taudia haida edia siahu be bada, haida edia be bada lasi. Hari inai negai, hutuma bada herea lalonai idia noho elda taudia edia maduna be idauidau. Haida be kongregesen tamona lalonai idia gaukara; ma haida be loaloa naria taudia bona kongregesen haida totona idia gaukara; haida be Brens Komiti taudia bona unai tano ibounai totona idia gaukara; haida be Hakaua Oreana ena komiti idauidau idia durua. Tanobada matamatana ai, Iesu ese “tanobada kahana ibounai dekenai lohia taudia” do ia abia hidi, Iehova idia tomadiho henia taudia idia gunalaia totona. (Salamo 45:16, NW) Momokani, unai taudia momo be hari inai negai idia noho elda taudia mai edia abidadama amo do ia abia hidi. Unai tatau be hari idia hamomokania idia hegeregere dainai, vaira negana ai lohia oreana ena gaukara tanobada matamatana ai do ia hahedinaraia neganai, ia ese idia momo dekenai gaukara namodia momo do ia henia.
Hari Inai Nega Lalonai Dirava Ena Taunimanima Edia Tano
19. Esekiela ena matahanai ai tano be dahaka ia laulaulaia?
19 Esekiela ena matahanai lalonai, idia hanamoa lou Israela tanona ia hedinarai danu. Matahanai lalonai unai kahana be dahaka ia laulaulaia? Hanamoa lou karana idia perovetalaia herevadia haida idia gwau unai tano, Israela, be Eden bamona, paradaiso ta ai do ia lao. (Esekiela 36:34, 35) Hari inai negai, idia hanamoa lou tanona ta ita moalelaia, bona dala ta ai ia danu be Eden bamona. Unai hegeregerena, nega momo ita ese iseda lauma paradaisona ita herevalaia. Gima Kohorona ia gwau iseda “tano” be Dirava ena taunimanima edia “gaukara gabuna.”b Herevana Iehova ena hesiai tauna ta be edeseniai, to bema ia be Iesu ena aena gabudia dekenai ia raka bena unai dala amo mai ena ura ida tomadiho goevana ia abia isi, ia be idia hanamoa lou tanona ai ia noho.—1 Petero 2:21.
20. Esekiela ena matahanai ai “tano helagana” idia henia karana amo edena hakaua herevana ita dibaia, bona edena bamona unai hakaua herevana ita badinaia diba?
20 To tano ena kahana ta idia gwauraia “tano helagana” be edena bamona? Unai tano be taunimanima ese idia henia, hahelaga oreana bona hanua durua totona. Unai hegeregerena, “tano taudia ibounai” ese tano taina do idia henia lohia tauna totona. Unai ena anina hari inai negai be dahaka? Dirava ena taunimanima ese gunalaia taudia edia davana idia henia lasi. Lasi, unai be metau gauna badana. (2 Tesalonika 3:8) To elda taudia durua dalana badana be lauma dalana ai. Unai ena anina be hari ia noho gaukarana idia durua, bona idia hahedinaraia idia ura idia gaukara hebou bona hereva idia kamonai. To, Esekiela ena nega hegeregerena, unai harihari gauna be Iehova dekenai idia henia, taunimanima dekenai lasi.—Esekiela 45:1, 7, 16.
21. Esekiela ena matahanai ai tano idia hapararaia karana amo dahaka ita dibaia?
21 Lohia tauna bona hahelaga oreana be mai edia kahana idia hanamoa lou tanona dekenai, to idia sibona lasi. Unai tano idia hapararaia dalana ese ia hahedinaraia iduhu ta ta ibounai 12 be mai edia ahuna korikori. (Esekiela 47:13, 22, 23) Unai dainai hutuma bada herea taudia be mai edia gabu lauma paradaisona lalonai. To unai sibona lasi, Dirava ena Basileia henunai tanobada dekenai ahuna idia abia neganai, tano taina do idia abia danu.
22. (a) Esekiela ena matahanai ai hanua be dahaka ia laulaulaia? (b) Hanua ena kahana kahana ibounai dekenai ikoukou idia noho dainai dahaka ita dibaia?
22 Danu, matahanai lalonai ia noho hanuana be dahaka ia laulaulaia? Unai be guba hanuana ta lasi, badina be “helaga lasi” tanona lalonai ia noho. (Esekiela 48:15-17) Unai dainai ia be tanobada gauna ta ia laulaulaia. Vadaeni, unai hereva hanua ena anina be dahaka? Unai hereva dainai ita laloa gauna be, orea tamona bamona taunimanima idia haboua bona gabu ta idia haginia bona haheaua, ani? Oibe. Unai dainai, toana be unai hanua ese tanobada gaukarana haheaua karana ia laulaulaia. Ia be kara maoromaoro tanobadana ai do idia noho taudia ibounai edia namo ia havaraia. Kahirakahira do ia mai “tanobada matamata” ai, do ia gaukara goevagoeva momokani. (2 Petero 3:13) Kahana ibounai dekenai hanua ena ikoukou, iduhu ta ta totona, idia noho ese idia hahedinaraia unai hanua ia kehoa. Hari inai negai, Dirava ena taunimanima be hunia dalana ta henunai idia gaukara lasi. Maduna idia abia taudia oi hereva henia diba; unai taudia idia hakaua taravatudia be taunimanima ibounai idia diba. Iduhu iboudiai amo idia mai taudia be hanua durua totona idia henia tanona idia birulaia. Unai kara dainai mamoe idaudia edia kara ita laloa, edia kohu amo danu, tanobada hegegemadai Dirava ena taunimanima edia gaukara haheaua karana idia durua.—Esekiela 48:19, 30-34.
23. Hereva gabena ai dahaka do ita herevalaia?
23 To, dubu helaga amo sinavai ia aru lao be edena bamona? Hari inai nega amo ela bona gabeai dahaka ia laulaulaia be inai hereva ibounai ena kahana ihatoina bona ginigabena ai do ita herevalaia.
[Footnotes]
a Watchtower Bible and Tract Society of New York, Inc. ese ia halasia bukana, Apokalupo—Ena Hagugurua Negana Ia Kahirakahira!, rau 64, paragraf 22, itaia.
Inai Oi Laloa Lou
◻ Esekiela ena matahanai ai dubu be dahaka ia laulaulaia?
◻ Dubu dekenai hesiai gaukara idia karaia hahelaga taudia be daidia idia laulaulaia?
◻ Lohia taudia oreana be daidia, bona edia maduna haida be dahaka dahaka?
◻ Esekiela ena matahanai ai tano be dahaka, bona iduhu 12 edia huanai idia hapararaia ena anina be dahaka?
◻ Hanua ese dahaka ia laulaulaia?
[Diagram/Map on page 15]
(For fully formatted text, see publication)
Esekiela ena matahanai ai tano idia hapararaia dalana
IDUHU 12
Davara Badana
Galilea Gohuna
Ioridane Sinavaina
Damena Davarana
DANO
ASERE
NAPATALI
MANASE
EPARAIMA
RUBENA
IUDA
LOHIA TAUNA
BENIAMINA
SIMEONA
ISAKARA
SEBULUNO
GADO
[Diagram]
HELAGA TANONA ENA TOANA AI HABADAIA
A. ‘Iehova Ia Noho Gabuna’ (Iehova- Shammah); B. Hanua Ena Aniani Havaraia Tanona
Levi Taudia Edia
Iehova Ena Dubu Helaga
Hahelaga Taudia Edia
B A B