Iehova Ena Hahenamo Iseda “Tano” Dekenai

“Unai sinavai ia heau lao gabudia ibounai dekenai mauri gaudia idauidau be do idia vara momo.”​—⁠ESEKIELA 47:⁠9.

1, 2. (a) Edena dala ai ranu be mai anina bada gauna? (b) Esekiela ena matahanai ai sinavai ena ranu be dahaka ia laulaulaia?

RANU be hoa gauna ta. Mauri gaudia iboudiai dekenai ia be mai anina bada gauna. Do ita mauri daudau lasi bema ranu be lasi. Gau idauidau hagoevaia totona ita gaukaralaia danu, badina ranu ese miro ia hamanokaia bona ia huria oho diba. Unai dainai eda tauanina, eda dabua, bona eda aniani danu be ranu amo ita huria. Unai bamona ita karaia dainai sibona ita hamauria diba.

² Baibel lalonai, ranu be mauri hanaihanai abia totona Iehova ese ia henia lauma gaudia ia laulaulaia. (Ieremia 2:​13; Ioane 4:​7-​15) Unai gauna ta be Keriso ena mauri davalaia boubouna amo Iena taunimanima hagoevaia karana, bona Dirava ena diba, iena Hereva lalonai ia noho gauna danu. (Efeso 5:​25-​27) Esekiela ese dubu ia itaia ena matahanai lalonai, bona unai dubu amo sinavai ia aru lao ese mauri hanaihanai ena hahenamo idauidau ia laulaulaia. To unai sinavai be edena nega ai ia aru lao, bona hari inai negai ena anina ita dekenai be dahaka?

Ia Namo Lou Tanona ai Sinavai Ia Aru Noho

3. Esekiela 47:​2-​12 ese ia hahedinaraia bamona, Esekiela be dahaka ia itaia?

³ Esekiela ena bese taudia, Babulonia dekenai idia noho taudia unai, be Iehova ena heduru idia abia be gau badana. Unai matahanai lalonai Esekiela ese ranu ia itaia, dubu amo ia aru matamaia neganai, iena lalona ia hagoadaia momokani! Aneru ta be kiubit 1,000 ta ta ai sinavai ena bada ia hahetohoa. Ena dobu be aena ganagana amo ia daekau lao tuina, bena ia daekau lao koekoena dekenai, bena sinavai dobuna ai ia lao, unai dainai nahu sibona be hegeregere. Unai sinavai dainai mauri gaudia idia vara bona edia anina idia havaraia. (Esekiela 47:​2-​11) Aneru ese Esekiela ia hamaoroa, ia gwau: “Unai sinavai isena ena kahana kahana dekenai huahua audia idauidau ibounai do idia vara.” (Esekiela 47:​12a) Mase Davarana​—⁠gau ta ia mauri lasi davarana​—⁠dekenai sinavai ia aru lao neganai, mauri gaudia idia vara! Gwarume momo idia noho. Haoda gaukarana ia bada herea.

4, 5. Edena dala ai Ioela ese ia perovetalaia sinavaina be Esekiela ia itaia gauna hegeregerena, bona dahaka dainai unai be mai anina bada?

⁴ Unai peroveta hereva namona dainai, Babulonia dekenai idia noho Iuda taudia ese lagani handred rua bamona gunanai idia perovetalaia herevana ma ta idia laloa lou. Ia gwau: “Dubu Helaga dekena amo be ranu do ia heau mai, bona Akasia [Audia] ena Koura dekenai ranu do ia henia.”a (Ioela 3:​18) Ioela ena peroveta herevana be Esekiela ena hegeregerena, ia gwau Dirava ena ruma, dubu helaga, amo sinavai ta do ia heau lao, bona mauri lasi gabuna dekenai mauri do ia havaraia.

⁵ Gima Kohorona be nega daudau lalonai ia gwau unai peroveta herevana be iseda nega lalonai ia guguru noho.b Oibe, Esekiela ena matahanai ena anina be unai bamona ia guguru noho danu. Hari inai nega lalonai, Dirava ena taunimanima edia tano, ia namo lou tanona ai, Iehova ese ia henia hahenamo be momo herea, idaunegai Israela dekenai ia vara bamona.

Hahenamo Momo Idia Aru Mai

6. Matahanai lalonai pata latanai rara negea karana dainai Israela taudia be dahaka do idia laloa lou diba?

⁶ Dirava ena taunimanima, idia namo lou taudia, edia hahenamo idauidau be edeseni amo idia mai? Mani oi laloa, ranu be Dirava ena dubu amo ia aru lao. Unai hegeregerena, hari inai negai, hahenamo be Iehova ena lauma dubuna badana​—⁠ia haginia tomadiho goeva dalana​—⁠amo ia mai. Esekiela ena matahanai lalonai, mai anina bada gauna ma ta ia hedinarai. Lalona kahana ena ariara lalonai, sinavai be boubou patana ena saut kahana amo ia aru hanai. (Esekiela 47:⁠1) Unai boubou patana be unai dubu ena huana korikori ai. Iehova ese Esekiela dekenai pata bona pata latanai rara do idia negea totona ia henia hahegani ia herevalaia namo herea. (Esekiela 43:​13-​18, 20) Unai pata be mai anina bada Israela taudia ibounai dekenai. Idia edia gwauhamata Iehova ida be idaunegai Mose ese Sinai Ororona ena badina dekenai pata ta latanai rara ia negea neganai idia hamomokania. (Esodo 24:​4-8) Unai dainai unai boubou patana latanai rara negea karana ese idia ia hadibaia lou, edia tano, ia namo lou gauna, dekenai idia giroa lou neganai, Iehova ena hahenamo momo herea do idia abia bema unai gwauhamata idia laloa bada noho.​—⁠Deuteronomi 28:​1-​14.

7. Hari inai negai pata ia laulaulaia gauna ena anina Keristani taudia dekenai be dahaka?

⁷ Unai hegeregerena, hari inai nega lalonai Dirava ena taunimanima be gwauhamata ta​—⁠gwauhamata matamatana, bona namo hereana​—⁠amo hahenamo momo idia abia. (Ieremia 31:​31-​34) Unai gwauhamata danu be idaunegai rara amo ia momokani, Iesu Keriso ena rarana unai. (Heberu 9:​15-​20) Hari inai negai, ena be ita be horoa taudia, gwauhamata karaia taudia unai, eiava ita be “mamoe idaudia” taudia, gwauhamata ena hahenamo abia taudia unai, to pata ia laulaulaia gauna be mai anina bada ita ibounai dekenai. Pata ese ia laulaulaia gauna be Keriso ena boubou gauna ena anina Dirava ena ura lalonai. (Ioane 10:16; Heberu 10:10) Lauma dubuna ena huana korikori ai unai pata ia laulaulaia gauna ia gini hegeregerena, Keriso ena boubou gauna be mai anina bada gauna tomadiho goevana lalonai. Unai gauna dainai Dirava ese iseda dika ia gwauatao bona ia dainai vaira negana totona ita naria gaudia do idia guguru. (1 Ioane 2:⁠2) Unai dainai ita hekwarahi, gwauhamata matamatana dekenai ia hakapua taravatuna, “Keriso ena taravatu,” hegeregerena ita noho. (Galatia 6:⁠2) Bema unai bamona ita karaia noho, Iehova ese mauri hanaihanai totona ia henia gaudia momo amo, namo do ita abia.

8. (a) Matahanai ai lalona kahana ena ariara dekenai dahaka ia noho lasi? (b) Matahanai ai hahelaga taudia be dahaka amo sibodia idia hagoevaia diba?

⁸ Unai hahenamo ta be Iehova vairanai ita goeva. Dubu ena matahanai lalonai, lalona kahana ena ariara ena gau ta ia noho lasi, to unai gauna be palai dubuna ena ariara bona Solomona ena dubu dekenai ia noho. Unai be disi bada hereana ta, gabeai ladana idia gwauraia davara, bona hahelaga taudia be unuseniai idia digu. (Esodo 30:​18-​21; 2 Sivarai 4:​2-6) Vadaeni, Esekiela ena matahanai lalonai, hahelaga taudia be dahaka idia gaukaralaia, sibodia idia hagoevaia totona? Lalona kahana ena ariara amo ia aru hanai sinavaina, ani? Oibe, Iehova ese idia do ia hanamoa bena ia vairanai do idia goeva, o idia helaga.

9. Hari inai negai horoa taudia bona hutuma bada herea taudia be edena bamona Iehova vairanai idia goeva diba?

⁹ Unai hegeregerena, hari inai negai Iehova ese horoa taudia ia hanamodia bona ia vairanai idia goeva. Iehova ena matanai, idia be helaga, bona ia gwauraidia kara maoromaoro taudia. (Roma 5:​1, 2) Hutuma bada herea taudia, hahelaga lasi iduhudia ese idia laulaulaia taudia unai, be edena bamona? Idia be murimuri kahana ena ariara dekenai idia tomadiho, bona sinavai be unai kahana amo ia aru hanai danu. Unai dainai, aposetolo Ioane ese hutuma bada herea ia itaia, lauma dubuna ena ariara ai idia tomadiho bona dabua goeva bona kurokuro idia karaia, be maoro! (Apokalupo 7:​9-​14) Herevana inai tanobada dikana dekenai taunimanima ese edena bamona idia kara henidia, to idia diba bema Keriso ena mauri davalaia boubouna idia abidadama henia, Iehova ese do ia gwauraidia namo bona goeva. Edia abidadama be edena bamona idia hahedinaraia? Iesu ena aena gabudia dekenai idia raka noho, bona mauri davalaia boubouna idia abidadama henia karana amo idia hahedinaraia.​—⁠1 Petero 2:​21.

10, 11. Ranu ese ia laulaulaia gauna ena kahana badana ta be dahaka, bona unai ena anina sinavai ia bada ia lao karana dekenai be dahaka?

¹⁰ Hereva ena matamana ai ia hedinarai hegeregerena, ranu ese ia laulaulaia gauna ena kahana badana ma ta ia noho​—⁠unai be diba. Idia hanamoa lou tanona, Israela dekenai, Iehova ese Revareva Helagadia amo ena taunimanima ia hadibadia, bona hahelaga oreana amo unai hahenamo ia henia. (Esekiela 44:23) Unai hegeregerena hari inai negai, Iehova ese ena Hereva momokani ena hakaua hereva momo amo ena taunimanima ia hanamodia, bona “pavapava bona hahelaga taudia” oreana amo unai ia henia. (1 Petero 2:⁠9, NW) Inai dina gabedia lalonai, Iehova Dirava sivaraina, iena ura taunimanima totona, bona Iesu Keriso bona Mesia Basileia sivaraina dekenai, diba bada herea idia halasia noho. Unai lauma aniani bada herea, ranu dobuna bamona, ita abia be namo herea!​—⁠Daniela 12:⁠4.

¹¹ Aneru ese ia hahetohoa sinavaina ia dobu ia lao hegeregerena, Iehova ese mauri hanaihanai ita abia totona ia henia hahenamodia be idia bada idia lao noho, lauma tanona ai idia vareai noho taudia momo herea durua totona. Hanamoa lou karana ia perovetalaia herevana ma ta ia gwau: “Oiemu ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau ese inai kara do lau havaraia haraga. Lau inai Lohiabada!” (Isaia 60:22) Unai hereva ena anina ia vara momokani​—⁠taunimanima milioni momo idia mai bona tomadiho goevana lalonai ita idia bamoa! Iehova ese ia dekenai idia mai taudia dekenai “ranu” bada herea ia henia. (Apokalupo 22:17) Dala ia karaia iena tanobada oreana ese gado handred momo ai Baibel bona Baibel herevalaia bukadia do idia hariharilaia tanobada ena kahana ibounai lalonai. Unai hegeregerena, Keristani hebou maragidia bona badadia be tanobada hegegemadai idia karaia, unai amo ita ibounai be hereva momokani ena ranu diaridiarina ita abia diba. Unai heduru gaudia be edena dala ai taunimanima idia durua?

Ranu ese Mauri Ia Havaraia!

12. (a) Dahaka dainai Esekiela ena matahanai ai idia noho audia be unai dala idauna ai edia huahua idia atoa? (b) Unai huahua idia atoa audia be inai nega dokona ai dahaka idia laulaulaia?

¹² Esekiela ena matahanai lalonai unai sinavai be mauri bona goada ia havaraia. Esekiela ia diba au be sinavai ena kahana kahana ai do idia vara neganai, aneru ese ia hamaoroa, ia gwau: “Edia rauraudia do idia kakoro lao lasi, bona edia huahua do idia moru kava lasi. . . . Inai au edia huahua be aniani gaudia bona edia rauraudia ese taunimanima edia gorere do idia hanamoa.” Dahaka dainai unai au be hoa dalana ai edia huahua idia atoa? “Badina Dubu Helaga dekena amo ia heau mai sinavai ese ranu momo ia henidia noho dainai.” (Esekiela 47:12b) Unai au ese Dirava ia henia gaudia idia laulaulaia, unai gaudia be taunimanima do idia durua Iesu ena boubou gauna dainai do idia goevadae totona. Hari inai nega lalonai, tanobada ai horoa orena taudia ese lauma dalana ai aniani henia bona gorere hanamoa karana idia gunalaia. Horoa taudia 144,000 ese edia guba ahuna idia abia murinai, Keriso ida do idia lohia, bona edia hahelaga gaukarana ena namo idauidau be vaira negana ai do idia hedinarai noho, ela bona Adamu ena amo ia vara masena be do ia ore vaitani.​—⁠Apokalupo 5:​9, 10; 21:​2-4.

13. Edena gorere hanamoa karana be iseda nega lalonai ia vara noho?

¹³ Unai matahanai lalonai sinavai be Mase Davarana dekenai ia aru lao bona ena ranu ese ia abia gaudia ibounai ia hanamoa. Davara ese lauma dalanai ia mase noho gabuna ia laulaulaia. To unai sinavai “ia heau lao gabudia ibounai dekenai” mauri ia havaraia. (Esekiela 47:⁠9) Unai hegeregerena, dina gabediai, mauri ena ranu ia lao gabudia ibounai dekenai, taunimanima be lauma dalana ai idia mauri. Idia mauri lou taudia ginigunadia be horoa taudia. Lagani 1919 ai unai ia vara. Idia be lauma dalana ai mase, o gaukara lasi, amo idia mauri lou. (Esekiela 37:​1-​14; Apokalupo 11:​3, 7-​12) Lauma dalana ai idia mase taudia ma haida be unai ranu idia abia, bona ia hamauridia bona idia be mamoe idaudia taudia hutuma bada herea ai idia lao. Idia be Iehova idia lalokau henia bona ena hesiai gaukara idia karaia. Kahirakahira, unai heduru gauna be toreisi lou taudia momo herea ese do idia abia danu.

14. Mase Davarana ena kone gabuna ai haoda gaukarana ia bada herea be hari inai nega lalonai dahaka ia laulaulaia?

¹⁴ Lauma dalana ai idia goada taudia be anina bada idia havaraia. Guna mauri gaudia idia noho lasi davarana ena kone gabudia ai, haoda gaukarana ia bada herea ese unai ia laulaulaia namo herea. Iesu ese ia murinai idia raka taudia ia hamaorodia, ia gwau: “Taunimanima haoda henia totona taudia do lau halaoa umui.” (Mataio 4:​19) Nega dokona ai, haoda gaukarana be horoa taudia oredia idia gogoa karana amo ia matamaia. To unai sibona lasi. Iehova ena lauma dubuna amo ia mai mauri ranuna, diba maoromaoro ena hahenamo danu, be bese iboudiai dekenai taunimanima ia durua. Unai sinavai ia aru lao gabudia ibounai dekenai, lauma dalana ai mauri ia havaraia.

15. Dahaka ese ia hahedinaraia haida be Dirava ese mauri hanaihanai totona ia henia gaudia do idia abia dae lasi, bona dokonai idia dekenai dahaka do ia vara?

¹⁵ Momokani, ita gwau lasi hari inai negai taunimanima iboudiai ese mauri ena sivarai do idia abia dae. Eiava ita gwau lasi Keriso ena Lagani 1,000 Lohia Negana ai idia toreisi taudia iboudiai ese do idia abia dae. (Isaia 65:20; Apokalupo 21:⁠8) Aneru ia gwau davara ena kahana haida idia namo lou lasi. Unai gohu maragi gabudia, gau ta ia mauri lasi gabudia, edia “damena be do ia noho.” (Esekiela 47:11) Iseda nega lalonai Iehova ena mauri ranuna idia mamia taudia haida be unai ranu idia abia dae lasi. (Isaia 6:​10) Aramagedono dekenai, lauma dalana ai mase bona gorere taudia bamona do idia noho totona edia lalona idia hadaia taudia edia damena do ia noho, anina be, do idia mase ore. (Apokalupo 19:​11-​21) To, mai edia kamonai ida unai ranu idia inua noho taudia be edia hahemauri idia naria diba bona unai peroveta herevana ena guguru negana badana do idia itaia.

Paradaiso Lalonai Sinavai Ia Aru Noho

16. Edena nega ai bona edena dala ai Esekiela ese dubu ia itaia ena matahanai ena anina do ia guguru momokani?

¹⁶ Hanamoa lou karana idia perovetalaia herevadia ma haida hegeregerena, Esekiela ese dubu ia itaia ena matahanai ena anina be Lagani 1,000 Lohia Negana lalonai do ia guguru momokani. Unai neganai hahelaga oreana taudia be tanobada dekenai do idia noho lasi. “Idia be Dirava bona Keriso edia hahelagaia taudia. Bona lagani 1,000 lalonai Keriso danu do idia lohia.” (Apokalupo 20:⁠6) Unai hahelaga taudia guba dekenai, be Keriso ida do idia gaukara Keriso ena mauri davalaia boubou gauna ena namo ibounai idia henia totona. Unai amo, kara maoromaoro taudia do idia hamauria, idia be do idia goevadae!​—⁠Ioane 3:​17.

17, 18. (a) Apokalupo 22:​1, 2 dekenai mauri ia henia sinavaina be edena bamona ia gwauraia, bona unai matahanai ena anina do ia guguru negana badana be edena nega? (b) Paradaiso lalonai, mauri ranuna ena sinavai be dahaka dainai do ia bada herea momokani?

¹⁷ Unai ena anina be Esekiela ese ia itaia sinavaina dekenai mauri ranuna hereadaena do ia aru lao. Unai be Apokalupo 22:⁠1, 2 ai ia noho peroveta herevana ena anina do ia vara negana badana, ia gwau: “Aneru ese mauri ranuna ena sinavai lau dekenai ia hedinaraia. Ia be galasi bamona ia diaridiari, bona iena ranu be Dirava bona Mamoe ena Natuna edia helai gabuna badana dekena amo ia heau lao. Inai sinavai be hanua ena ariara badana ena huanai ia heau lao. Sinavai ena kahana kahana be mauri audia idia gini. Inai mauri auna ese lagani ta lalonai huahua ia atoa nega 12, hua ta ta ibounai lalonai huahua ia atoa. Inai au ena rauna ese bese idauidau idia hanamoa noho.”

¹⁸ Lagani 1,000 Lohia Negana lalonai, gorere ibounai​—⁠tauanina, kwarana, bona hemami goreredia​—⁠be do idia hanamoa. Unai au amo “bese idauidau idia hanamoa” ese unai ia laulaulaia namo herea. Keriso bona 144,000 taudia ese idia henia heduru gaudia dainai, ‘noho taudia ta do ia gwau lasi, “Lau gorere.” ’ (Isaia 33:24) Unai nega lalonai sinavai be do ia bada herea momokani. Ena lababa do ia bada bona do ia dobu danu, toreisi lou taudia milioni momo, eiava reana bilioni momo, ese unai mauri ranuna goevana do idia inua totona. Matahanai lalonai, sinavai ese Mase Davarana ia hanamoa, unai dainai ranu ia aru lao gabudia ibounai dekenai mauri ia havaraia. Paradaiso lalonai, tatau bona hahine be mauri korikorina do idia abia. Adamu ena amo idia abia masena be idia dekena amo do ia ore bema mauri davalaia boubouna ena namo do idia abia dae mai abidadama ida. Apokalupo 20:12 ia gwau unai nega lalonai “buka haida” do idia kehoa, idia lalonai lalo-parara herevadia ma haida idia noho, bona idia amo toreisi lou taudia be namo do idia davaria. To madi, Paradaiso lalonai danu, haida do idia ura lasi namo idia davaria. Unai gwau-edeede taudia be “damena do idia abia noho,” anina be do idia mase ore.​—⁠Apokalupo 20:​15.

19. (a) Paradaiso ai tano haria karana be edena dala ai do ia guguru? (b) Paradaiso lalonai dahaka be hanua ese ia laulaulaia? (c) Hanua ia noho gabuna be dubu amo ia daudau ese dahaka ia hahedinaraia?

¹⁹ Unai nega lalonai, Esekiela ia itaia tanona idia haria gaukarana danu be do ia guguru momokani. Esekiela ia itaia, tano be idia haria namonamo; unai hegeregerena, namona be abidadama Keristani taudia ta ta idia diba idia ta ta be mai edia gabu, o mai edia ahuna, Paradaiso dekenai. Iseda ura be sibona eda ruma ta ai do ita noho bona ita naria namonamo; toana be unai ura be dala namona ai do ia guguru. (Isaia 65:21; 1 Korinto 14:33) Esekiela ese ia itaia hanuana be Iehova ese tanobada matamatana naria totona ia hegaegaelaia dalana ia laulaulaia namo herea. Horoa hahelaga taudia be unai nega lalonai taunimanima ida do idia noho lasi. Unai matahanai lalonai hanua be “helaga lasi” tanona ai ia noho bona dubu be unai gabu amo ia daudau ese unai ia hahedinaraia. (Esekiela 48:15) To, 144,000 taudia be Keriso ida guba ai idia lohia noho lalonai, King be mai ena gwaukau taudia tanobada dekenai danu. Iena siahu henunai idia noho tanobada taudia be unai lohia taudia oreana edia hakaua bona naria dalana mai lalokau ida amo namo do idia davaria. To, gavamani ia lohia gabuna korikorina be tanobada dekenai lasi, to guba dekenai. Tanobada dekenai do idia noho taudia ibounai, lohia oreana taudia danu, be unai Mesia Basileiana henunai do idia noho.​—⁠Daniela 2:44; 7:​14, 18, 22.

20, 21. (a) Dahaka dainai unai hanua dekenai idia henia ladana be ia maoro? (b) Esekiela ena matahanai ena anina ita lalo-pararalaia dainai ita sibona dekenai dahaka henanadai ita henia be namo?

²⁰ Esekiela ena peroveta herevana ena hereva ginigabena mani oi itaia, ia gwau: “Inai hanua badana ena ladana be do idia atoa, ‘Lohiabada Ia Noho Gabuna.’ ” (Esekiela 48:35) Unai hanua ia noho ena badina be taunimanima ese siahu eiava ladana bada idia abia totona lasi; eiava taunimanima ta ena ura hagugurua totona do ia noho lasi. Lasi, unai be Iehova ena hanua, iena lalohadai bona lalokau bona hebogahisi dalana ai gau ibounai ia karaia toana, do ia hahedinaraia noho. (Iamesi 3:​17) Unai ese ita ia hadibaia goevagoeva, Iehova ese ia haginia “tanobada matamata” oreana taudia do ia hanamodia ela bona hanaihanai.​—⁠2 Petero 3:⁠13.

²¹ Unai helaro namona dainai ita moale, ani? Vadaeni, ita ta ta sibona be inai bamona ita henanadai be namo: ‘Esekiela ena matahanai lalonai idia hedinarai hahenamo namodia dainai, dahaka lau karaia? Mai egu abidadama ida naria taudia mai edia lalokau, hegeregere horoa taudia bona lohia oreana taudia ai do idia lao diba taudia, idia karaia gaukarana lau durua, a? Egu mauri lalonai tomadiho goevana be gau bada hereana ai lau halaoa vadaeni, a? Hari ia aru badabada noho mauri ranuna ena namo ibounai lau abia, a?’ Namona be Dirava ia gwauraia mauri dalana ita moalelaia noho ela bona hanaihanai!

[Footnotes]

Edena Bamona Do Oi Haere?

◻ Dubu amo ia aru lao ranuna be dahaka ia laulaulaia?

◻ Sinavai ia laulaulaia gauna amo Iehova ese edena hanamoa karana ia havaraia noho, bona dahaka dainai sinavai ranuna ia bada ia lao?

◻ Sinavai ena isena kahana kahana ai idia noho audia be dahaka idia laulaulaia?

◻ Lagani 1,000 Lohia Negana lalonai, hanua be dahaka do ia laulaulaia, bona dahaka dainai idia henia ladana ia maoro?

[Picture on page 23]

Sinavai ese hahemauri totona Iehova ia henia gaudia ia laulaulaia