Lalo-Hekwarahi Momo Lasi

“UMUI emui lalona do idia hekwarahi lasi kerukeru totona. Badina be kerukeru ese sibona ena metau do ia huaia. Bema umui laloa momo vaira dinadia totona, unai dina edia hekwarahi do umui habadaia sibona.” (Mataio 6:34) Iesu Keriso ese unai sisiba ia henia bona ia be mai anina ita ibounai dekenai, badina hari inai negai ita bisi bada herea bona lalo-hekwarahi idia havaraia gaudia be momo.

To, mai momokani ida ita gwau diba, iseda hekwakwanai, abia hidi, bona maduna idauidau do ita lalo-hekwarahilaia lasi, a? Taunimanima milioni momo idia daradoko, idia lalohisihisi, bona idia lalo-metau. Unai dainai hemami idia koua muramuradia idia karaia bisinesi ese moni bada idia abia.

Laloa Maoromaoro Dalana be Dahaka?

Iseda maduna, gaukara, abia hidi, bona hekwakwanai idauidau dainai palani ita karaia bona idia totona ita hegaegae be namo​—herevana idia be harihari ita karaia gaudia eiava gau ma haida. Baibel ese ita ia hagoadaia gau badadia ita karaia gwauraia neganai, ‘ita helai bona davana ita laloa’ guna. (Luka 14:28-30) Unai ena anina be unai gauna do ita karaia dalana idauidau, unai kara dainai do idia vara gaudia, bona do ita haboioa nega, goada, bona moni ita laloa namonamo.

Ena be do idia vara gaudia ita laloa namonamo guna be namo, to do idia vara diba gaudia ibounai ita laloa diba lasi bona ita laloa toho ese namo ia havaraia lasi. Hegeregere, ruma bese ena namo oi laloa neganai, reana oi laloa dahaka do umui karaia bema lahi ese ruma ia araia gwauraia. Reana kwalahu idia bonaia diba masinidia bona lahi habodoa gaudia oi hoia bona ruma dekenai oi atoa. Reana ruma ena kahana idauidau amo do umui heau mauri daladia oi palanilaia bona umui tohoa. To mai aonega ida palani namona karaia karana bona lalo-hekwarahi bada karana edia idau be dahaka? Do idia vara diba gaudia idauidau momo herea oi laloa momo, oi laloa loulou bona oi laloa kava neganai, lalo-hekwarahi bada ia matamaia. Lalohadai metaudia ese oiemu lalona idia biagua, bena oi laloa gau ta oi laloaboio eiava oi karaia diba gaudia ibounai oi do karaia lasi oiemu ruma bese oi naria totona. Oi sibona ese unai bamona lalo-hekwarahi oi havaraia neganai, reana oiemu lalona do ia metau momokani, bena oi mahuta diba lasi.

Mose, Farao Ena Vairanai

Iehova Dirava ese ena peroveta tauna Mose dekenai gaukara aukana ia henia. Gau ginigunana be, Mose be Israela taudia edia vairanai ia hedinarai bona edia lalona ia veria, bena idia abia dae Iehova ese Mose ia abia hidi Aigupito amo idia ia ruhaia totona. Gau iharuana be, Mose be Farao ena vairanai ia hedinarai bona ia noia Farao ese Aigupito amo Israela taudia do ia ruhaia. Gau ginigabena be, Mose ese taunimanima milioni momo be tano kaukauna ia hakaua hanai ela bona dagedage taudia idia noholaia tanona dekenai. (Esodo 3:​1-​10) Reana unai gaudia ibounai ese gari idia havaraia diba, to Mose be unai maduna dainai ia lalo-hekwarahi kava, a?

Ita diba, Mose ese gau idauidau ia laloa momo. Iehova ia henanadai henia, ia gwau: “Lau be dohore lau lao Israela taudia dekenai. Do lau hamaoroa idia dekenai, lau gwau, ‘Umui emui tamadia ena Dirava ese lau ia siaia umui dekenai,’ vadaeni dohore idia henanadaia lau dekenai, idia gwau, ‘Iena ladana be daika?’ Lau be edena bamona dohore lau haere idia dekenai?” Iehova ese ia haere henia. (Esodo 3:​13, 14) Danu, Mose ia laloa dahaka do ia vara bema Farao ese iena hereva do ia abia dae lasi. Vadaeni, Iehova ese unai peroveta tauna ia haere henia lou. Hekwakwanai ginigabena be​—Mose ia gwau ‘hereva dekenai ena malana be ia haraga lasi.’ Iehova be edena dala ai unai ia hanamoa diba? Ia ese Arona ia henia, Mose ena hereva ia gwauraia totona.​—Esodo 4:​1-5, 10-​16.

Mose ese ena henanadai edia haere ia abia bona Dirava ia abidadama henia noho, bena Iehova ena hahegani ia badinaia matamaia. Mose ese ia idia hagaria diba lalohadai, hegeregere Farao ena vairanai ia gini neganai dahaka do ia vara, ia laloa lasi, to “Lohiabada ese ia hamaorodia hegeregerena” ia kara. (Esodo 7:6) Bema lalo-hekwarahi gaudia ia koua lasi, reana idia ese ena abidadama bona gari lasi karana idia hamanokaia bena ena gaukara ia karaia diba lasi.

Mose be ena gaukara ia karaia dalana ese Paulo ia herevalaia “laloa maoromaoro” karana ia haheitalaia namonamo. (2 Timoteo 1:7, NW; Tito 2:​2-6) Bema Mose ia laloa maoromaoro lasi, reana do ia karaia gaukarana ena bada ese ena lalona ia hametaua momokani, bena ena gaukara ia abia dae lasi.

Oiemu Lalohadai Oi Biagua

Dina ta ta lalonai emu abidadama idia tohoa gaudia eiava hahetoho idauidau oi davaria neganai, edena bamona oi kara? Idia vara diba hekwakwanai oi lalohadailaia dainai oi laloa daradara, a? Eiava idia oi laloa maoromaoro? Haida idia gwau bamona, ‘Ia do vara lasi gauna oi laloa momo lasi.’ Reana oi laloa momo gauna do ia vara lasi! Vadaeni, bema gau ta be reana do ia vara lasi, hari oiemu lalona oi hahisia be anina lasi, ani? Baibel ia gwau: “Laloa metau ese oiemu moale do ia koua.” (Aonega Herevadia 12:25) Nega momo unai dainai ta ese ena lalona ia hadaia lasi, ia rakatania ela bona ia leiti vadaeni.

Gau dikana ta be, lalo-hekwarahi ese lauma dalanai ta ia hadikaia diba. Iesu Keriso ese ia hahedinaraia reana ta ese “Basileia ena sivarai” ia kamonai, to kohu ura henia dikadika karana bona “tanobada ena laloa metau idauidau” ese unai idia koua diba. (Mataio 13:19, 22) Tubutubu gauna be ava ginigini dainai ia tubu lasi bona anina ia havaraia lasi hegeregerena, lalo-hekwarahi bada herea ese ita ia koua diba bona lauma dalanai ita goada ita lao lasi bena Dirava hanamoa totona anina do ita havaraia lasi. Idia sibona ese idia havaraia lalo-hekwarahi dikana ese haida ia koua bena Iehova dekenai edia mauri idia gwauhamatalaia lasi. Idia laloa momo bona idia gwau, ‘Edena bamona bema egu gwauhamata do lau hagugurua diba lasi?’

Aposetolo Paulo ese ita ia hamaoroa iseda lauma tuarina lalonai, ita ese sibona eda ‘laloa ita guia noho, Keriso do ia kamonai henia totona.’ (2 Korinto 10:5) Iseda inai tauna badana, Satani Diabolo, ia moale bada bema iseda lalo-hekwarahi ia gaukaralaia diba bena do ita lalo-metau bona iseda hemami, bona tauanina bona lauma dalanai iseda mauri do ia hadikaia diba. Ia ese daradara ia gaukaralaia idia naria namonamo lasi taudia ia veria haraga totona. Unai dainai Paulo ese Keristani taudia ia sisiba henia ‘Satani ena dala do idia kehoa lasi.’ (Efeso 4:​27) Satani be “inai tanobada ena dirava” bona ‘abidadama lasi taudia edia lalona ia koua.’ (2 Korinto 4:4) Namona be iseda lalona ia biagua toho karana ita koua!

Heduru Ita Abia Diba

Hekwakwanai ia davaria neganai, natuna ta be ena tamana lalokauna dekenai ia lao diba bona tamana ese do ia hakaua bona hagoadaia. Unai hegeregerena, iseda guba Tamana, Iehova, dekenai iseda hekwakwanai ita herevalaia diba. Momokani, Iehova ia ura iseda lalo-metau bona lalo-hekwarahi gaudia be ia dekenai ita henia. (Salamo 55:22) Tamana ese ena natuna ia hagoadaia murinai, natuna ese ena hekwakwanai ia lalo-hekwarahilaia lasi hegeregerena, ita ese iseda lalo-metau gaudia be Iehova dekenai ita henia sibona lasi, to ia dekenai ita rakatania danu.​—Iamesi 1:6.

Iseda lalo-hekwarahi gaudia be edena bamona Iehova dekenai ita henia? Filipi 4:​6, 7 ia haere, ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” Oibe, ita guriguri bona ita noinoi loulou dainai, Iehova ese lalo-maino ita dekenai ia henia diba bona unai ese iseda lalona ia gimaia bena lalo-hekwarahi kava karana ese iseda lalona do ia hahisia lasi.​—Ieremia 17:​7, 8; Mataio 6:​25-​34.

To, iseda guriguri hegeregerena ita kara totona, namo lasi tauanina dalanai eiava laloa dalanai taunimanima amo ita gini siri. (Aonega Herevadia 18:1) Namona be iseda hekwakwanai idia herevalaia Baibel ena hakaua herevadia ita lalohadailaia, bena sibona eda diba do ita abidadama henia lasi. (Aonega Herevadia 3:​5, 6) Gau ta idia abia hidi eiava hekwakwanai idia davaria neganai, matamata taudia bona taunimanima badadia be Baibel bona Watch Tower Society ena buka idauidau amo heduru bada idia abia diba. Danu, Keristani kongregesen lalonai, hahenamo ita davaria badina elda taudia mai edia aonega bona diba, bona lo Keristani taudia ma haida ese nega ibounai ita ida do idia herevahereva mai edia ura ida. (Aonega Herevadia 11:14; 15:22) Iseda hekwakwanai idia lalo-hekwarahilaia lasi bona Dirava ena lalohadai unai gauna dekenai idia diba taudia be nega momo heduru namona idia henia diba, iseda hekwakwanai be dala idauna ai ita laloa totona. Bona ena be idia ese iseda abia hidi idia karaia lasi, to ita idia hagoadaia bona durua bada diba.

Dirava Ena Heduru Naria

Ta ese ia gorea diba lasi dina ta ta ibounai ita davaria hekwakwanai korikoridia hanaia dalana ita tahua be mai ena hekwarahi bada, namo lasi iseda lalona ai ita havaraia kava hekwakwanai laloa momo karana amo unai gaudia ita habadaia. Bema do idia vara diba gaudia ita lalo-hekwarahilaia dainai ita daradara bona ita gari, namona be Iehova dekenai ita guriguri bona ita noinoi. Namona be ena Hereva bona ena orea amo heduru, aonega, bona laloa maoromaoro ita tahua. Do ita davaria, herevana edena hekwakwanai idia vara iseda mauri lalonai, to heduru ita abia diba ita hanaia totona.

Salamo torea tauna ia lalo-metau bona ia lalohisihisi bena inai ane ia abia: “Badina dahaka lauegu lalona ia hisihisi bada noho? Badina dahaka lauegu kudouna ia metau noho? Lau ese Dirava do lau abidadama henia, bona iena durua do lau naria, badina ia be lauegu hamauria Tauna bona lauegu Dirava. Unai dainai lau ese iena ladana do lau hanamoa lou.” (Salamo 42:11) Namona be unai be iseda lalohadai danu.

Oibe, do idia vara diba gaudia totona palani oi karaia, bona oi laloa diba lasi gaudia be Iehova ena imana dekenai oi atoa. “Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.”​—1 Petero 5:7.

[Picture on page 23]

Davida bamona, oiemu lalo-metau bona lalo-hekwarahi gaudia be Iehova ena imana dekenai oi atoa, a?