Paradaiso Lau Tahua

PASCAL STISI ESE IA SIVARAILAIA

Ia be hanuaboi momokani vadaeni, bona France ena saut kahanai, Béziers taoni ena dala dekenai taunimanima be lasi. Vanegai sibona ena haba idia penia tomadiho bukadia idia hoihoilaia sitoa ta ai davaria, bona lau bona egu turana be haba dekenai leta badadia amo Germany ena aonega tauna Nietzsche ena hereva be peni koremana amo ai torea, ia gwau: ‘Dirava idia mase vadaeni. Goada bada taudia do idia mauri daudau!’ To, dahaka be ia vara guna dainai unai bamona lau karaia?

LAU be lagani 1951 ai lau vara, Katolik ruma besena lalonai France dekenai, to egu tubudia be Italy taudia. Lau maragi neganai, holide totona Italy ena saut kahana dekenai ai lao. Unuseniai, hanua ta ta be mai edia Virgin Mary ena kaivakuku ta. Egu tubuna tau ida lau be ororo gabudia ai unai kaivakuku badadia mai edia dabua namodia murinai idia loaloa taudia bogaraginai ai raka​—to idia lau abidadama henia lasi. Jesuit taudia ese idia hadibaia tomadiho sikulina dekenai egu sikuli lau haorea vadaeni. To, bema Dirava dekenai abidadama hagoadaia herevana ta lau kamonai, lau laloatao diba lasi.

Montpellier ena iunivesiti dekenai medikol gaudia lau stadilaia neganai, mauri ena anina lau lalohadailaia matamaia. Egu tamana be tuari lalonai bero ia abia dainai, hanaihanai doketa taudia ese ia idia naria. Tuari ita haorea ena namo ese ia lalonai dika idia abia taudia hanamoa totona nega ita atoa bona ita hekwarahi bada ena namo ia hereaia, ani? To, unai negai Vietnam Tuarina idia karaia goadagoada noho. Lau laloa baragi ai kensa gorerena hanamoa dalana namona be unai gorere ia havaraia gauna badana​—kuku​—ita kokia momokani. Bona ogogami tanodia ai aniani be lasi dainai idia vara goreredia bona taga tanodia ai aniani bada dainai idia vara goreredia be edena bamona? Unai dika idia havaraia gaudia ita kokia ena namo ese unai gorere hanamoa toho ena namo ia hereaia, ani? Dahaka dainai tanobada taudia ese hisihisi bada idia ania? Lau laloa inai tanobada, sibona ia hamasea toho tanobadana, dekenai mauri ia dika momokani, bona lau laloa unai be gavamani edia kerere.

Lau ura henia bada bukana be siahu ibounai dadaraia tauna ta ese ia torea, bona haba idauidau dekenai ia amo sentens haida lau torea hanai. Metairametaira lau danu be siahu dadaraia tauna ai lau lao, lau be mai egu abidadama lasi bona kara maoromaoro taravatudia lau badinaia lasi, bona Dirava eiava biaguna ta lau ura lasi. Lau laloa, taga taudia mai edia siahu ese Dirava bona tomadiho idia havaraia, taunimanima oredia idia biagua bona hadikaia totona. Toana be idia gwau, ‘Tanobada dekenai ai totona do umui gaukara goadagoada, bena guba dekenai paradaiso ai davana namona do umui abia.’ To dirava edia siahu negana be ia ore vadaeni. Namona be taunimanima be unai do idia diba. Graffiti be dala ta, idia ai hadibaia totona.

Unai dainai, egu sikuli lau laloa bada lasi. Unai nega lalonai lau be Montpellier ena iunivesiti ma ta dekenai, geography bona ecology lau stadilaia matamaia. Unuseniai siahu ibounai dadaraia taudia be momo. Ecology lau stadilaia neganai, iseda tanobada hairaina hadikaia karana lau badulaia.

Lagani ta ta ai, siahu negana ena holide negana lalonai, taunimanima edia motuka ai lau guia bona Europe ena kahana idauidau dekenai kilomita tausen momo lau loaloa. Lau laolao bona taria taudia handred momo ida lau herevahereva neganai, taunimanima edia mauri idia hadikaia gaudia be sibona egu matana amo lau itaia. Nega ta, paradaiso lau tahua noho lalonai, Crete ena motumotu ta dekenai kone namo hereadia lau itaia, to oela ese ia koudia. Lau lalohisihisi bada. Tanobada ena kahana ta dekenai paradaiso gabuna ta ia do noho, a?

Biru Tauna ai Lau Lao

France dekenai, ecology taudia idia gwau bema taunimanima iboudiai be biru taudia ai idia lao, unai ese taunimanima edia mauri hadikaia gaudia do ia hanamoa. Lau ura egu imana lau gaukaralaia. France ena saut kahana dekenai, Cévennes Ororodia edia ororo maragidia ai, hanua maragina ta dekenai nadi amo idia haginia ruma maragina ta lau hoia. Ena iduara dekenai lau torea “Paradaiso Hari,” unai be America ena hippi taudia idia gaukaralaia herevana. Unai hanua dekenai ia laolao Germany kekenina ta be egu turana ai ia lao. Lau ura lasi taoni naria tauna badana, gavamani ena siahu tauna ta, vairanai ai headava. Bona dubu dekenai? Lasi momokani!

Nega momo aena kavakava ai raka, bona lauegu huina be lata herea bona adena huina be lau naria namonamo lasi. Uma aniani hatubua gaukarana ese egu lalona ia veria. Siahu negana ai guba ia bulu bona cicada manumanudia be ane idia abia. Palaoapalaoa edia bonana ia goada, bona ai hatubua Mediterranean huahuadia​—vain bona fig​—edia mamina be namo herea momokani! Toana be ai ese emai gabu korikorina paradaiso lalonai ai davaria vadaeni!

Dirava Lau Abidadama Henia Matamaia

Iunivesiti dekenai, lau ese sel, bogana lalonai idia tubu natudia, bona tauanina edia kahana idauidau lau stadilaia, bona unai gaudia idia gaukara hebou namonamo daladia lau laloa bada. Hari, dina iboudiai mauri gaudia lau itaia bona lau laloa namonamo neganai, edia hairai bona diba lau hoalaia. Dina ta ta ai unai mauri gaudia ese lau idia hadibaia buka ta ena rau ta ta ese lau idia hadibaia hegeregerena. Dina ta ai, nega daudau lalonai ororo maragidia dekenai lau raka loaloa bona mauri lau lalohadailaia murinai, egu lalona dekenai lau diba momokani Havaraia Tauna ia noho. Egu lalona lau hadaia Dirava do lau abidadama henia. Guna, egu kudouna dekenai dabu mamina lau abia, bona ia dainai lau lalohisihisi. Dirava lau abidadama henia matamaia dinana ai, sibona dekenai lau gwau: ‘Pascal, oi be sibona do oi noho lasi.’ Unai hemami be idau momokani.

Nega sisina murinai, egu turana bona lau be kekeni maragina ai abia​—Amandine. Ia lau lalokau henia bada. Hari Dirava lau abidadama henia dainai, lau dibaia kara maoromaoro taravatudia haida lau matauraia matamaia. Henaohenao bona koikoi karana lau hadokoa, bona nega sisina murinai lau itaia unai dainai lau kahirakahira idia noho taudia ida hekwakwanai momo lau davaria lasi. Oibe, hekwakwanai ai davaria, bona egu paradaiso be egu ura korikorina hegeregerena lasi. Unuseniai vain umadia naria taudia ese manumanu bona tubutubu gaudia maragidia idia hamasea muramuradia idia gaukaralaia bona unai ese egu uma aniani lalonai idia vareai danu. Kara dika ena badina be guna lau henanadailaia bona ena haere lau do abia lasi. Danu, ena be ruma bese maurina idia herevalaia bukadia momo lau duahia, to unai ese lau bona egu turana huanai idia vara hepapahuahu ia koua lasi. Emai turadia be haida sibona, bona unai turadia haida be turadia koikoi; idia haida ese egu turana idia veria toho idia ida ia mahuta hebou totona. Unai paradaiso ia hereaia gabuna ta ia noho be namo.

Egu Guriguri Edia Haere

Sibona egu dala ai, nega momo Dirava lau guriguri henia, mauri lalonai lau ia hakaua totona. Sunday daba ta ai, kara namo hahinena ladana Irène Lopez bona ena mero maragina be egu iduara dekenai idia mai. Ia be Iehova ena Witness hahinena ta. Ena hereva lau kamonai bona lau gwau do ia giroa lou diba. Tatau rua idia mai lau idia itaia totona. Emai herevahereva amo gau rua lau laloatao​—Paradaiso bona Dirava ena Basileia. Unai lalohadai be egu kudouna dekenai lau hunia, bona idia hanaia huadia lalonai, lau lalo-parara dina ta ai Dirava vairanai egu mauri do lau hamaoromaoroa be namo, bema lau ura egu lalona ena mamina do ia namo bona moale korikorina do lau davaria.

Emai mauri lalonai Dirava ena Hereva ai badinaia totona, egu turana ia ura lau ia adavaia. To gabeai turadia dikadia ia bamoa matamaia, bona idia ese Dirava bona ena taravatu idia kirikirilaidia. Siahu negana ia matamaia lalonai, adorahi ta ai ruma dekenai lau giroa neganai, lau hoa dikadika. Ruma dekenai ta ia noho lasi. Egu turana ese lau ia rakatania, bona emai mauri laganina toi kekenina ia abia lao danu. Dina momo lalonai lau naria do idia giroa totona​—to idia giroa lasi. Lau laloa lasi unai be Dirava ena kerere, to ia lau guriguri henia lau do ia durua totona.

Nega daudau lasi murinai, Baibel lau abia, egu fig auna henunai lau helai, bona lau duahia matamaia. Momokani, ena hereva lau inua bamona. Ena be taunimanima edia hemami edia badina idia tahua doketa taudia bona lalona bona kara idia tahua doketa taudia ese idia torea buka momo lau duahia, to guna unai bamona aonega lau davaria lasi. Momokani, unai buka be Dirava ena lauma amo ia vara. Iesu ena hadibaia herevadia bona taunimanima edia mauri ia lalo-pararalaia karana lau hoalaia bada. Salamo bukana ese lau ia hagoadaia, bona Aonega Herevadia bukana ena aonega lau hoalaia. Lau lalo-parara haraga, ena be mauri gaudia stadilaia karana ese ta ia veria lao diba Dirava kahirakahira dekenai, to ia ese “iena sivarai ena kahana maragina sibona” ia hahedinaraia.​—Iobu 26:⁠14.

Witness taudia ese Mauri Ia lao Henia Hereva Momokanina bona Emu Ruma Bese Hamoalea Dalana bukadia be lau dekenai idia rakatania danu.a Idia lau duahia dainai egu lalona ia parara. Hereva Momokani bukana ese lau ia durua bena lau lalo-parara dahaka dainai taunimanima be davara bona hodahoda idia hamiroa, idia tuari, idia dagedage, bona niuklia tuarina ese tanobada ia hadikaia garina idia gari. Bona egu uma gabu amo lau itaia guba kakakakana ese ia hahedinaraia kerukeru be dina namona hegeregerena, unai gaudia idia hamomokania Dirava ena Basileia be kahirakahira. Bona lau ura dikadika Ruma Bese bukana be egu turana dekenai lau hahedinaraia bona lau ura ia lau hamaoroa do ai moale diba, bema Baibel ena sisiba do ai badinaia. To unai lau karaia diba lasi.

Lauma Dalanai Lau Tubu

Lau ura egu diba lau habadaia, unai dainai Robert, Witness tauna ta, lau noia lau do ia vadivadi henia. Ia hoa bada, badina lau hamaoroa lau ura bapatiso lau abia, bena Baibel stadi ai hamatamaia. Maoromaoro, lau dibaia gaudia be ma haida dekenai lau herevalaia, bona Kingdom Hall ai lau abia buka bona magasin lau hariharilaia matamaia.

Tauanina durua gaudia abia totona, biriki gaukaralaia kosina lau karaia. Lau diba Dirava ena Hereva ese tau ta ia durua bada diba, unai dainai, dala ia kehoa neganai maoromaoro stiuden taudia bona tisa taudia lau haroro henidia. Adorahi ta ai, daiutu edia murimuri ai Serge lau davaria. Ia ese magasin haida ia dogoatao ena imana dekenai. Lau gwau: “Lau itaia duahiduahi karana oi ura henia.” “Oibe, to inai gaudia lau hesikulaia.” Lau nanadaia: “Oi ura buka namodia haida oi duahia, a?” Dirava ena Basileia ai kikilaia namo herea, bona murinai Baibel buka bona magasin haida ia abia dae. Pura gabena ai, lau ida Kingdom Hall dekenai ia mai, bona Baibel stadi ia hamatamaia.

Dina ta, Robert lau nanadaia bema ruma-ta-ruma-ta gaukara lau karaia diba. Iena kabodi ia kehoa bona dabua namodia ia davaria lau totona. Murina Sunday ai, ia ida egu haroro gaukarana lau hamatamaia. Gabeai, March 7, 1981 ai, Iehova Dirava dekenai egu mauri lau gwauhamatalaia lau hahedinaraia totona bapatiso lau abia.

Daradoko Neganai Heduru Lau Abia

Unai gaudia idia vara lalonai, tano idauna dekenai Amandine bona ena sinana idia noho gabuna lau davaria. Madi, ena sinana​—ia noholaia tanona ena taravatu hegeregerena​—ese egu natuna kekeni lau itaia dalana ia koua. Lau lalohisihisi bada. Amandine ena sinana ia headava, bona lau daradoko bada badina lau idia hadibaia ena adavana ese egu natuna kekeni be ena natuna ai ia halaoa​—unai karaia totona egu gwaumaoro idia tahua lasi. Egu natuna ena mauri lalonai, lau be siahu lasi. Ena be kota dekenai lau lao, to vadivadi gwaumaorona lau abia lasi. Egu lalohisihisi ia bada dainai, egu mamina be kilogram 50 bamona be egu doruna dekenai lau huaia noho.

To dala momo amo Iehova ena Hereva ese lau ia hagoadaia. Dina ta lau daradoko bada herea neganai, Aonega Herevadia 24:10 ena hereva lau gwauraia loulou, ia gwau: “Bema hekwakwanai neganai oi manoka neganai, oiemu goada be maragimaragi momokani.” Unai siri ese lau ia durua lau manoka lasi totona. Ma nega ta ai, egu kekeni lau davaria toho to idia koua murinai, haroro gaukara dekenai lau lao, bona egu baege lau dogoatao auka masemase. Unai nega aukadia lalonai, lau davaria Salamo 126:6 ena hereva be momokani, ia gwau: “Io, momokani, uhe idia abia lao neganai idia tai noho taudia, be mai moale danu do idia giroa mai, bona anina idia mailaia neganai ane do idia abia.” Lau dibaia gauna badana be inai, hahetoho badadia oi davaria neganai, idia oi hamaoromaoroa totona oi karaia diba gaudia ibounai oi karaia murinai, emu murina kahanai oi atodia bona mai emu lalo-goada ida Iehova ena hesiai gaukara oi karaia. Unai be oi moale noho dalana tamona.

Gau Namona ta Lau Tahua

Egu mauri lalonai lau haidaua gaudia be egu lalokau tama sina ese idia itaia neganai, idia ura heduru idia henia iunivesiti dekenai egu sikuli do lau karaia lou totona. Lau tanikiu henidia, to hari gau idauna ta lau tahua. Hereva momokani ese taunimanima edia aonega, babalau karadia, bona hisiu edia toa amo diba tahua karadia amo lau ia ruhaia. Hari turadia momokanidia lau abia, tuari lalonai ta ta do idia hamasea lasi taudia unai. Bona tanobada dekenai ia noho hisihisi ena badina lau henanadailaia ena haere lau abia. Dirava lau tanikiu henia dainai, lau ura egu goada ibounai ida ia lau hesiai henia. Iesu ese ena mauri ibounai lalonai Dirava ena gaukara ia karaia, bona lau ura ena haheitalai lau tohotohoa.

Lagani 1983 ai, egu biriki gaukara bisinesi lau hadokoa bona ful-taim haroro gaukarana lau hamatamaia. Iehova ese egu guriguri ia haerelaidia, bona tauanina durua gaudia abia totona pat-taim gaukara be loaloa uma gabuna dekenai lau davaria. Lau moale bada badina Serge ida painia sikuli dekenai lau lao, ia be guna biriki gaukaralaia sikulina dekenai lau haroro henia tau matamatana! Lagani toi lalonai regula painia gaukara lau karaia murinai, lau ura egu gaukara Iehova ena hesiai gaukara lalonai lau habadaia. Unai dainai, lagani 1986 ai, lau idia siaia Provins dekenai, ia be taoni mai hairaina Paris kahirakahira, bona unuseniai spesel painia gaukara lau karaia. Nega momo, adorahi ai ruma dekenai lau giroa neganai, lau tui diho bona guriguri amo Iehova lau tanikiu henia, badina dina namona lalonai taunimanima dekenai ia lau herevalaia diba. Momokani, egu mauri lalonai lau moalelaia bada gaudia rua be Dirava dekenai lau herevahereva bona Dirava lau herevalaia.

Lau moale bada danu, badina egu sinana, Cébazan hanua maragina, France ena saut kahana dekenai, be ena mauri lagani 68 lalonai bapatiso ia abia. Sinagu be Baibel ia duahia matamaia neganai, lau ese Gima Kohorona bona Awake! ena sabskripsen be ia dekenai lau siaidia. Ia be laloa maoromaoro hahinena, bona nega daudau lasi murinai ia lalo-parara ia duahia gaudia be hereva momokani.

Betele​—Lauma Paradaiso Namona

Watch Tower Society ese spesel painia taudia edia namba ia hamaragia neganai, lau ese Hesiai Gaukara Hadibaia Sikulina bona Betele, Iehova ena Witness taudia edia brens opesi France dekenai, vareai totona aplikeisen lau henia. Lau ura Iehova ese ia lau hesiai henia namonamo diba dalana do ia abia hidi. Hua haida murinai, December 1989 ai, lau idia boiria Betele dekenai, ia be Louviers, France ena notwest kahana dekenai. Unai be namo herea, badina Betele ena noho gabuna be kahirakahira dainai lau ese egu tadina bona nakimi lau durua bona egu tama sina idia gorere neganai lau naridia diba. Unai lau karaia diba lasi, bema misinari gaukara lau karaia totona kilomita tausen momo gabuna ta ai lau noho.

Nega momo egu sinana ese Betele dekenai lau ia vadivadi henia. Ena be ia ura ia kahirakahira lau noho to unai ura ia koua bona nega momo lau ia hamaoroa: “Natugu, Betele dekenai do oi noho. Lau moale bada badina inai dala ai Iehova ena hesiai gaukara oi karaia.” Madi, egu tama sina ruaosi be hari idia mase vadaeni. Lau naria noho paradaiso korikorina ai do ia lao tanobadana lalonai idia do lau itaia lou!

Lau laloa momokani, bema hari ruma ta ita gwauraia diba “Paradaiso Hari,” unai ruma be Betele​—“Dirava Ena Ruma”—badina paradaiso korikorina ena anina badana be lauma dalana dekenai ia guguru, bona lauma dalanai idia goada taudia momo be Betele dekenai idia noho. Dala ia kehoa lauma helaga ena huahua ai goadalaia totona. (Galatia 5:​22, 23) Dina ta ta ibounai lalonai ai karaia Baibel siri herevalaia karana bona Gima Kohorona be Betele famili ida ai stadilaia karana ese lauma dalanai lau idia hagoadaia Betele gaukara lau karaia totona. Ma danu, lauma gaudia idia laloa bada tadikaka bona taihu, lagani momo herea lalonai mai edia abidadama ida Iehova idia hesiai henia taudia, lau bamoa diba dainai, lau laloa Betele be gabu idauna bona ia lalonai lauma dalanai lau tubu diba. Ena be egu natuna kekeni be lagani 17 lalonai lau itaia lasi, lau ese Betele dekenai lalo-goada matamata taudia momo lau davaria, bona lau laloa idia be egu natudia bamona, bona lauma dalanai idia goada idia lao dainai lau moale bada. Idia hanaia laganidia 8 lalonai, gaukara idauidau 7 lau karaia. Ena be nega haida unai be sisina auka, to unai amo lau dibaia gaudia be mai anina bada vaira negana totona.

Guna lau ese bini ta lau hatubua, ia be anina handred ia havaraia gauna. Unai hegeregerena, egu mauri lalonai lau itaia bema kara dika oi hadoa, unai kara dika ena davana be nega handred do ia bada ia lao​—bona unai be nega momo do ia vara. Mauri lalonai oi davaria gaudia be sikuli bamona, edia davana be bada herea. Lau laloa namona be guna unai sikuli dekenai lau vareai lasi, to, Iehova ena dala dekenai lau idia hadibaia be namo. Keristani tama sina ese idia hadibaia natudia be hahenamo badana idia abia! Lau daradara lasi, gau namona be Iehova ena hesiai gaukara lalonai gau namona oi hadoa bona nega handred ai ia habadaia maino bona moale do oi abia.​—Galatia 6:​7, 8.

Painia gaukara lau karaia neganai, nega haida guna ena haba dekenai siahu ibounai idia dadaraia taudia edia lalohadai herevana ai penia, tomadiho bukadia ia hoihoilaia sitoa lau itaia. Lau vareai danu bona ena biaguna dekenai ia mauri noho Diravana bona ena ura lau herevalaia. Oibe, Dirava ia mauri noho! Danu, Iehova, Dirava momokanina tamona, be abidadama Tamana, bona ena natudia ia rakatania diba lasi. (Apokalupo 15:4) Namona be bese idauidau iboudiai amo taunimanima hutuma bada ese ia mauri noho Diravana, Iehova, idia hanamoa bona ia idia hesiai henia karana amo lauma paradaisona idia davaria hari​—bona do ia vara lou Paradaisona danu.

[Footnote]

[Picture on page 26]

Mauri gaudia edia hairai ese egu kudouna idia hamarerea dainai, egu lalona lau hadaia Diravado lau abidadama henia (Idibana kahanai) Betele dekenai hari