Collegiant Taudia—Baibel Idia Stadilaia Dainai Idia Idau

Collegiant taudia edia sivarai oi kamonai vadaeni, a?

Unai orea be lagani 1600 murinai Holland dekenai ia noho bona ia be unai negai idia noho dubu badadia amo ia idau. Edena dala ai idia idau, bona idia amo dahaka ita dibaia diba? Unai ita diba totona, namona be unai nega ita tahua sisina.

LAGANI 1587 ai, Jacobus Arminius (eiava, Jacob Harmensen) be Amsterdam ena siti ai ia ginidae. Gaukara ia davaria haraga, badina ena diba be bada. Ena mauri lagani be 21 neganai, Holland ai, Leiden University dekenai ena stadi ia haorea. Unai murinai, lagani 6 lalonai Switzerland dekenai ia noho, bona unuseniai Protestan Refomeisen tauna John Calvin ena dagi ia abia tauna Théodore de Bèze ese tomadiho gaudia ia hadibaia. Unai dainai ita hoa lasi, Amsterdam Protestan taudia ese mai edia moale ida mauri lagani 27 tauna Arminius idia abia hidi, edia pasto ai ia lao totona! To, lagani haida murinai, dubu taudia momo ese edia abia hidi idia lalohisihisilaia. Dahaka dainai?

Predestination Idia Hepapahuahulaia

Arminius be Amsterdam Protestan taudia edia pasto ai ia lao bena nega sisina murinai, predestination (Dirava ese hahemauri eiava panisi do idia abia taudia ta ta ia gwauraia hidi vadaeni) hahediba herevana idia hepapahuahulaia matamaia. Unai hahediba herevana be Calvinist oreana ena hahediba herevana badana, to dubu taudia haida idia laloa, haida dekenai hahemauri bona haida dekenai panisi ia gwauraia hidi Diravana ena kara be auka bona maoro lasi. Arminius be Bèze ena hahediba tauna dainai, Calvinist taudia idia laloa ia ese unai hahediba herevana idia dadaraia taudia edia lalohadai do ia hamaoromaoroa. To, Arminius be unai predestination dadaraia taudia edia kahana ai ia gini, bona Calvinist taudia idia moale lasi. Lagani 1593 ai, unai hepapahuahu ia bada herea dainai, unai siti ena Protestan dubu be kahana rua ai ia parara​—unai hahediba herevana idia abia dae taudia edia kahana bona idia dadaraia taudia, laloa maoromaoro taudia unai, edia kahana.

Lagani haida lalonai, unai gabu tamona dekenai ia vara hepapahuahuna be unai tano lalonai Protestan dubu ia hapararaia gauna badana ai ia lao. Bena November 1618 ai, idia vara gaudia dainai, edia lalona idia hadaia unai hepapahuahu do idia hamaoromaoroa. Calvinist taudia, ami bona taunimanima momo edia heduru ida, unai dadaraia taudia (unai neganai idia gwauraia Remonstrant taudiaa) idia boiria nesenel kaunsolo dekenai, ena ladana be Protestant Synod of Dordrecht. Unai hebou ena dokona kahanai, Remonstrant haroro taudia idia hamaoroa inai gau rua amo ta idia abia hidi: Pepa ta idia sainia diba bona unai amo idia gwauhamata do idia haroro lasi, eiava tano idia rakatania. Idia momo ese tano idia rakatania. Remonstrant haroro taudia idia noho lasi dainai, Calvinist taudia goadadia be edia dubu ai idia haroro matamaia. Kaunsolo ia laloa Calvinist oreana ia kwalimu.

Collegiant Oreana Ia Vara Bona Ia Bada Ia Lao Dalana

Kongregesen ma haida hegeregerena, Leiden kahirakahira ia noho Warmond hanuana ena Remonstrant kongregesen ena pasto tauna ese tano ia rakatania danu. To, ia be kongregesen ma haida hegeregerena lasi, badina kaunsolo ese ia siaia tauna idia abia dae lasi. Danu, lagani 1620 ai, Remonstrant haroro tauna ta, ena be mase ia davaria diba, to ia ura kongregesen ia naria totona Warmond dekenai ia giroa neganai, unai kongregesen taudia haida ese ia danu idia dadaraia. Dubu gunalaia tauna ta ese idia ia durua lasi, to unai kongregesen taudia ese hehuni dalanai tomadiho heboudia idia karaia. Gabeai, unai hebou idia gwauraia college bona unai hebou dekenai idia lao taudia idia gwauraidia Collegiant taudia.

Ena be matamanai Collegiant oreana be tomadiho lalohadai dainai lasi, to edia noho dalana idauna amo ia vara, to gabeai unai dala ia idau. Kongregesen tauna Gijsbert van der Kodde ia gwau dubu ena gunalaia taudia ese edia hebou idia hakaua lasi dainai, idia be dubu badadia amo idia idau bona edia orea be Baibel bona Keristani taudia ginigunadia edia kara ia badinaia namonamo. Ia gwau, dubu gunalaia taudia oreana be aposetolo taudia idia mase murinai idia havaraia, idia ura lasi gaukara idia dibaia taudia ese gaukara ta idia abia diba totona.

Lagani 1621 ai, Van der Kodde bona ia ida idia lalo-tamona kongregesen taudia ma haida be kahirakahira ia noho Rijnsburg hanuana dekenai edia hebou idia karaia matamaia.b Lagani haida murinai, tomadiho idaudia dagedage henia karana ia ore bona lalohadai idauidau abia dae karana ia bada ia lao neganai, tano ena kahana idauidau dekenai taunimanima be Collegiant taudia edia hebou dalana idia diba, bona histori torea tauna Siegfried Zilverberg ia gwau bamona, unai ese “manu idauidau” ia veridia mai. Idia be Remonstrant, Mennonite, Socinian taudia, bona tomadiho idia stadilaia taudia ma haida danu. Haida be biru taudia. Ma haida be ane torea taudia, printa gaukara idia karaia taudia, doketa taudia, bona gaukara idauidau idia diba namonamo taudia. Aonega tauna Spinoza (Benedictus de Spinoza) bona tisa tauna Johann Amos Comenius (eiava, Jan Komenský), bona momo idia diba laulau penia tauna Rembrandt van Rijn ese unai orea idia abia dae. Unai Dirava idia tomadiho henia taudia edia lalohadai idauidau be mai anina Collegiant oreana ena hahediba herevadia dekenai.

Lagani 1640 murinai, unai orea goadana ia bada ia lao haraga. Rotterdam, Amsterdam, Leeuwarden, bona siti ma haida ai college idia vara. Histori ena profesa Andrew C. Fix ia gwau lagani 1650 bona 1700 huanai, “Collegiant oreana . . . be lagani 1600 murinai Holland dekenai ia noho tomadiho oreana badana mai ena siahu bada ai ia lao.”

Collegiant Oreana Ena Hahediba Herevadia

Collegiant oreana lalonai idia ese lalo-parara, lalohadai idauidau abia dae, bona lalohadai idauidau gwauraia karadia idia abia dae dainai, Collegiant taudia ta ta ese edia lalohadai idauidau idia dogoatao diba. To, idia iboudiai be lalohadai haida dekenai idia lalo-tamona. Hegeregere, Collegiant taudia ibounai idia diba sibona edia Baibel stadi idia karaia be gau badana. Collegiant tauna ta be ena toretore ai ia gwau, namona be kongregesen taudia ta ta be “ma haida edia hereva amo lasi, to idia sibona idia tahua karana amo Dirava idia diba” be namo. Bona unai idia karaia. Lagani 1800 murinai, dubu ena histori torea tauna Jacobus C. van Slee ia gwau Collegiant taudia be unai negai idia noho tomadiho oreadia ma haida amo idia idau, badina Baibel idia diba namonamo. Collegiant taudia idia ura henia lasi taudia danu ese edia Baibel gaukaralaia namonamo dalana idia hanamoa.

To, Collegiant taudia ese Baibel idia stadilaia badabada neganai, idia abia dae herevadia be dubu badadia edia hahediba herevadia amo idia idau momokani. Lagani 1600 amo ia lao 1900 murinai idia torea bukadia ese edia hahediba herevadia haida idia hahedinaraia:

Ekalesia Ginigunana. Collegiant tauna bona tomadiho ia stadilaia tauna Adam Boreel be lagani 1644 ai ia gwau, Pavapava Constantine ena nega ai ekalesia be politikol karadia lalonai ia vareai neganai, ia ese ena gwauhamata Keriso ida ia hadikaia bena lauma helaga ese ia hakaua noho lasi. Ma ia gwau, unai dainai, hahediba herevadia koikoidia idia momo idia lao bona idia noho ela bona iena negai.

Refomeisen. Lagani 1500 murinai, Luther, Calvin, bona ma haida ese idia gunalaia Refomeisen ese dubu ia hanamoa momokani lasi. To, Collegiant bona doketa tauna Galenus Abrahamsz (lagani 1622-​1706) ia gwau Refomeisen ese tomadiho dalana ia hadikaia, badina dala ia kehoa, idia heai bona idia badu heheni totona. Hanamoa lou karana korikorina ese taunimanima edia kudouna ia hanamoa, to Refomeisen be unai ia karaia lasi.

Dubu Bona Dubu Gunalaia Taudia Oreana. Dubu badadia ese kara maoromaoro idia badinaia lasi, tanobada ena kara idia abia dae, bona Dirava ena lohia siahuna idia abia isi lasi. Bema ta ese tomadiho ia laloa bada, namona be iena dubu ia rakatania, ia ida ia kara dika hebou garina. Collegiant taudia idia gwau dubu gunalaia tauna ena gaukara be Baibel hegeregerena lasi bona ia ese “lauma dalanai Keristani kongregesen ia hadikaia.”

Basileia Bona Paradaiso. Amsterdam college idia haginia taudia ta, Daniel de Breen (lagani 1594-​1664), ia gwau Keriso ena Basileia be ta ena kudouna dekenai ia noho lauma basileiana lasi. Tisa tauna Jacob Ostens, Rotterdam Collegiant tauna ta, ia gwau “iduhu edia kwarana taudia ese tanobada dekenai do idia guguru gwauhamatadia idia laloa.” Unai hegeregerena, Collegiant taudia ese tanobada be paradaiso ai do ia lao negana idia naria noho.

Toi Tamona. Collegiant taudia badadia haida be Socinian hahediba herevadia ese edia lalona idia veria dainai, Toi Tamona herevana idia dadaraia.c Hegeregere, Daniel Zwicker (lagani 1621-​78) ia gwau bema hahediba herevana ta be iseda lalona ai ita lalo-pararalaia diba lasi, Toi Tamona herevana bamona, ia “vara diba lasi bona ia koikoi.” Lagani 1694 ai, Collegiant tauna Reijnier Rooleeuw ese ia hahanaia Baibel idia halasia. Unai Baibel lalonai, Ioane 1:1 ena dokona herevadia idia gwau: “Bona hereva be dirava ta,” idia gwau lasi: “Bona hereva be Dirava” Baibel momo be idia gwau bamona.d

Pura Ta Ta ai Idia Karaia Heboudia

Ena be Collegiant taudia idia abia dae lalohadaidia be idauidau, to siti idauidau dekenai edia college be dala tamona ai idia heau. Histori torea tauna Van Slee ia gwau Collegiant oreana ia vara negana lalonai, nega momo edia hebou idia hegaegaelaia lasi. Collegiant taudia idia laloa Paulo ia gwau idia “peroveta” be namo dainai, orea ena tatau iboudiai ese hebou taudia idia hereva henia diba. (1 Korinto 14:​1, 3, 26, NW) Unai dainai, edia hebou idia lata bona nega momo idia lao ela bona hanuaboi momokani bona kamonai taudia haida “idia mahuta.”

Gabeai, edia hebou idia hegaegaelaia namonamo. Collegiant taudia be Sunday ai sibona lasi, to pura lalonai danu edia hebou idia karaia. Hereva henia tauna bona kongregesen taudia ese lagani ta ta edia hebou idia hegaegaelaia diba totona, program ta idia printaia bona ia lalonai do idia gaukaralaia Baibel siridia bona hereva do idia henia taudia edia ladadia idia noho. Hebou be ane bona guriguri amo idia hamatamaia murinai, hereva henia tauna ta ese Baibel siri haida edia anina ia hahedinaraia. Ena hereva ia haorea murinai, ia ese tatau ia boiria edia lalohadai ia herevalaia gauna dekenai do idia hahedinaraia totona. Bena hereva henia tauna iharuana ese unai siri idia badinaia daladia ia hahedinaraia. Guriguri bona ane amo hebou idia koua.

Harlingen, Friesland ena provinsi dekenai, idia noho Collegiant taudia ese dala idauna idia gaukaralaia edia hebou be sediual hegeregerena idia heau totona. Ena nega ia hanaia hereva henia tauna ese faini moni sisina do ia henia.

Nesenel Hebouheboudia

Danu, Collegiant taudia idia laloa hebouhebou badadia idia karaia be namo. Unai dainai, lagani 1640 amo, lagani ta ta iboudiai Collegiant taudia be nega rua (siahu negana ena matamana ai bona unai nega lalonai) tano ena kahana iboudiai amo idia mai Rijnsburg dekenai. Histori torea tauna Fix ia gwau, unai hebouhebou ese dala idia kehoa “daudau bona kahirakahira amo idia mai tadikaka edia lalohadai, hemami, abidadama, bona kara idia dibaia totona.”

Idia vadivadi Collegiant taudia haida ese hanua taudia amo daiutu idia rentaia, to ma haida be Groote Huis, eiava Ruma Badana, ai idia noho, ia be Collegiant taudia edia ruma badana mai ena daiutu 30. Unuseniai taunimanima 60 ia lao 70 bamona idia aniani hebou. Aniani murinai, vadivadi taudia be unai ruma ena uma gabu badana ai idia loaloa diba bona ‘Dirava ia havaraia gaudia, herevahereva hebou karana, eiava laloa dobu negana’ idia moalelaia diba.

Ena be Collegiant taudia haida idia laloa bapatiso idia abia be gau badana lasi, to idia momo idia laloa ia be gau badana. Unai dainai, bapatiso be hebouhebou badadia ai idia karaia. Histori torea tauna Van Slee ia gwau nega momo unai kara be Saturday dabai idia karaia. Ane bona guriguri murinai, ranu bapatisona ena badina gwauraia herevana idia kamonai. Bena hereva henia tauna ese idia ura bapatiso idia abia tatau bona hahine badadia ia boiria edia abidadama herevana idia gwauraia, hegeregere “Lau abia dae Iesu Keriso be ia mauri noho Diravana ena Natuna.” Hereva be guriguri amo ia haorea murinai, idia noho taudia ibounai be bapatiso gabuna dekenai idia lao bona idia itaia tatau bona hahine be ranu lalonai idia tui diho, bona ranu be edia pagana dekenai. Bapatiso ia karaia tauna ese abidadama matamata tauna ena kwarana be metairametaira ranu lalonai ia doria diho. Unai idia karaia murinai, iboudiai be edia helai gabudia dekenai idia giroa bona hereva ma ta idia kamonai.

Saturday adorahi 5:00 okaloka ai, Baibel duahiduahi kwadogina, ane, bona guriguri amo hebouhebou idia hamatamaia. Rotterdam, Leiden, Amsterdam, bona North Holland edia college be edia nega edia nega ai hereva henia taudia idia siaia, nega ibounai hereva henia taudia do idia noho totona. Sunday dabai idia ese Lohiabada ena Anibou idia karaia. Hereva ta, guriguri, bona ane murinai, tatau bona gabeai hahine ese paraoa idia ania bona uaina idia inua. Sunday adorahi ai ma hereva haida idia henia, bona Monday dabai idia ibounai idia hebou, hereva dokona kamonai totona. Van Slee ia gwau, kahirakahira unai hebouhebou dekenai idia henia hereva iboudiai ese do idia karaia diba gaudia idia herevalaia, Baibel siri edia kahana maragidia idia herevalaia bada lasi, to idia badinaia daladia idia hahedinaraia.

Rijnsburg hanua taudia idia moale, badina unai hebouhebou be edia hanua dekenai idia karaia. Lagani 1700 murinai tahua karana ia karaia tauna ta ia gwau, vadivadi taudia ese moni sisina bada idia negea aniani bona inuinu gaudia dekenai, unai dainai hanua ena bisinesi idia heau namo. Ma danu, hebouhebou ta ta iboudiai murinai, Collegiant taudia ese moni idia henia Rijnsburg ena ogogami taudia totona. Momokani, lagani 1787 ai unai hebouhebou idia hadokodia neganai, reana unai hanua taudia idia lalohisihisi. Unai murinai Collegiant oreana ia boio. Dahaka dainai?

Unai Orea Ia Boio Ena Badina

Lagani 1700 ia kahirakahira neganai, tomadiho hahediba herevadia lalo-pararalaia karana idia hepapahuahulaia matamaia. Collegiant taudia haida idia laloa taunimanima edia lalo-parara herevadia do idia atoa guna Dirava ia hahedinaraia herevadia be gabeai, to ma haida be unai lalohadai idia abia dae lasi. Dokonai, unai hepapahuahu ese Collegiant oreana ia hapararaia. Unai lalohadai rua idia abia dae taudia badadia idia mase murinai sibona, Collegiant taudia idia lalo-tamona lou. To, histori torea tauna Fix ia gwau unai murinai unai orea be “guna bamona lasi.”

Danu, lagani 1700 murinai Protestan dubudia lalonai lalohadai idauidau idia abia dae matamaia dainai, Collegiant oreana ia maragi ia lao. Collegiant taudia ese idia abia dae herevana, taunimanima edia lalohadai idauidau abia dae herevana, be taunimanima momo ese idia abia dae neganai, “nega ta Collegiant oreana sibona ese ia hahedinaraia diarina be Hadiaria Negana Badana ena kahana ta ai ia lao.” Lagani 1800 ia kahirakahira neganai, Collegiant taudia momo herea be Mennonite oreana bona tomadiho oreadia ma haida lalonai idia vareai.

Collegiant taudia idia laloa lasi edia orea taudia iboudiai idia lalo-tamona be gau badana dainai, edia lalohadai idauidau edia momo be Collegiant taudia edia momo hegeregerena. Idia ese unai idia itaia bona unai dainai idia gwau lasi idia be ‘hereva tamona idia gwauraia, bona idia gaukara hebou mai lalona tamona danu,’ aposetolo Paulo ese Keristani taudia ia hagoadaia bamona. (1 Korinto 1:10) To, Collegiant taudia ese nega ta idia naria noho, unai nega lalonai Keristani hahediba hereva badadia, hegeregere lalo-tamona, be do idia vara momokani.

Bema ita laloatao Collegiant taudia edia nega ai, hereva momokani idia do lalo-pararalaia namonamo lasi, ita gwau diba edia haheitalai amo hari tomadiho momo ese gau momo do idia dibaia diba. (Daniela 12:4 itaia.) Idia gwau Baibel stadilaia karana be gau badana bona unai be aposetolo Paulo ena sisiba hegeregerena, ia gwau: “Hereva ibounai do umui laloa namonamo.” (1 Tesalonika 5:21) Sibona edia Baibel stadi amo Jacobus Arminius bona ma haida idia lalo-parara nega daudau idia abia dae tomadiho herevadia bona karadia be Baibel amo lasi. Unai idia itaia neganai, mai gari lasi ida dubu badadia amo idia raka siri. Bema oi be unai nega ai oi noho, unai bamona do oi karaia danu, a?

[Footnotes]

[Picture on page 24]

Rembrandt van Rijn

[Picture on page 26]

Warmond hanuana, Collegiant oreana ia vara gabuna, bona De Vliet Sinavaina, bapatiso idia karaia gabuna

[Picture Credit Line on page 23]

Background: Courtesy of the American Bible Society Library, New York