Dahaka Dainai Iesu Keriso Oi Abia Dae?

“HEREVANA taunimanima momo be Keristani taudia lasi, to idia abia dae Ia be hadibaia tauna namona mai ena aonega. Momokani Ia be siahu bada herea tauna ta.” (The World Book Encyclopedia) “Ia” be daika? Ia be Iesu Keriso, Keristani dalana ia hamatamaia tauna.

Ena be ensaiklopidia be unai bamona ia hereva, to taunimanima milioni momo Orient bona gabu ma haida dekenai be Iesu Keriso idia diba lasi, reana ladana sibona be haisikuli ena stadi bukadia amo idia laloatao. Kerisendom ena dubu lalodiai danu, tomadiho stadilaia taudia bona dubu gunalaia taudia haida idia gwau ita be Iesu ita diba lasi momokani bona idia ese Baibel ena buka hani (Evanelia bukadia) lalodiai iena mauri sivaraidia idia daradaralaia.

Evanelia bukadia idia torea taudia sibona ese Iesu ena mauri sivaraina idia torea, a? Lasi vaitani! Momo ese idia dibaia histori torea tauna Will Durant ese Evanelia bukadia ia stadilaia murinai, ia gwau: “Bema uru tamona lalonai sikuli bada lasi taudia haida be sibodia edia lalohadai amo tau hereadaena mai ena siahu bada, taunimanima momo ese idia ura henia bada tauna unai, bona mauri dalana hereadaena, bona bese tamona bamona noho hebou karana be idia sivarailaia diba, unai be hoa gauna momokani, Evanelia Buka Haniosi lalodiai idia torea hoa karadia do ia hereaia vaitani gauna unai. Baibel be lagani 200 lalodiai haida ese idia hakoikoia gwauraia noho ema bona hari, to unai be herevana, taunimanima ese Keriso ena mauri oromana, ena kara, bona ena hahediba herevadia edia sivarai idia do lalo-pararalaia goevagoeva diba bona unai be mai edia anina bada West kahana taudia edia idau negai sivaraina lalonai.”

To, ma haida idia laloa idia dekenai Iesu Keriso be anina lasi edia mauri lalonai badina be sibona idia gwauraia Iesu ena hahediba taudia edia kara dainai. Japan dekenai haida idia gwau: ‘Idia ese Nagasaki dekenai atom bomu ta idia negea. Bona Japan ena siti momo amo Nagasaki be Keristani taudia momo idia noho gabuna.’ Bema tau ta ese doketa ena sisiba ia badinaia lasi bena ia gorere, do ita gwau unai be doketa tauna ena kerere, a? Nega daudau lalonai, sibodia idia gwauraia Keristani taudia ese Iesu ena heduru, taunimanima edia hisihisi haorea totona, be idia dadaraia. To, Iesu be tanobada taudia ibounai ese dina ta ta dekenai idia davaria hekwakwanaidia bona edia hisihisi hanamoa gauna ia henia. Unai dainai, ai ura hereva gabena oi duahia bona do oi itaia ia be edena bamona tauna.