Iesu Korikorina

IESU be ena aposetolo taudia amo taunimanima ese ia idia laloa dalana ia dibaia murinai, ia nanadaidia ia gwau: “To umui be dahaka umui gwau, lau be daika?” Mataio ena Evanelia bukana ese aposetolo Petero ena haere ia hahedinaraia, ia gwau: “Oi be Keriso, Mauri Diravana ena Natuna.” (Mataio 16:​15, 16) Haida edia lalohadai danu be unai bamona. Gabeai aposetolo ta ai ia lao tauna, Natanaela, be Iesu dekenai ia gwau: “Rabi e, oi be Dirava ena Natuna, oi be Israela ena King.” (Ioane 1:49) Iesu be sibona ena dagi ena anina badana ia herevalaia ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:⁠6) Nega idauidau ai, sibona ia gwauraia “Dirava ena Natuna.” (Ioane 5:​24, 25; 11:⁠4) Bona ia gwauraia herevana ia hamomokanina totona, hoa karadia ia karaia, mase taudia ia hamauria lou danu.

Daradara be mai Ena Badina Namona, A?

To Iesu ena sivarai Evanelia Bukadia lalonai ita hamomokanina diba, a? Iesu korikorina idia herevalaia, a? University of Manchester, England dekenai, Baibel ena kerere ia tahua bona anina ia gwauraia hedinarai profesa, Frederick F. Bruce, hari ia mase vadaeni, ia gwau: “Gunaguna toretoredia ena kahana ibounai be histori amo do ita hamomokania lasi, herevana ia be Baibel gauna eiava lasi. Mai badina dainai toretore tauna ta ena hereva ita hamomokania be ia hegeregere; bema unai ia vara, toana be ia hamomokania ia torea gauna ena kahana maragidia ta ta be momokani. . . . Keristani taudia ese Taravatu Matamatana idia abia dae ia be buka ‘helagana’ dainai histori dalana ai ita hamomokania lasi be badina maorona lasi.”

North Dakota, U.S.A. dekenai, Jamestown College ena tomadiho hadibaia profesa, James R. Edwards ese Iesu ena sivarai Evanelia Bukadia lalonai idia daradaralaia herevadia ia tahua namonamo murinai, ia gwau: “Mai lalo-goada ida ai gwau diba Evanelia Bukadia lalonai Iesu ena sivarai momokanina ia hahedinaraia gaudia idauidau bona mai anina bada gaudia idia noho. . . . Evanelia Bukadia ese Iesu be unai dala ai idia gwauraia hedinarai badina Iesu be unai bamona. Evanelia Bukadia be Iesu ena murinai idia raka taudia ese ia dainai idia diba gaudia idia hahedinaraia maoromaoro, anina be Dirava ese ia siaia bona siahu ia abia Dirava ena Natuna bona Hesiai Tauna ai ia lao totona.”a

Iesu Idia Tahua

To ma buka idaudia ese Iesu Keriso be edena bamona idia herevalaia? Edena bamona idia tahua namonamo? Tacitus, Suetonius, Josephus, Pliny the Younger, bona sivarai torea taudia ma haida edia toretore ai Iesu idia herevalaia momo. The New Encyclopædia Britannica bukana (1995) ese ia gwauraidia ia gwau: “Unai sivarai idauidau ese idia hahedinaraia guna negana Keristani ena tomadiho idia inai henia taudia danu ese Iesu ia noho momokani sivaraina be idia daradaralaia lasi, to nega ginigunana bona badina kereredia dainai haida ese lagani 1800 ia kahirakahira neganai, lagani 1800 ia lao 1900 lalonai, bona lagani 1900 murinai idia hepapahuahulaia.”

Madi, hari nega ena diba bada taudia, ese Iesu “korikorina” eiava “ia noho momokani tauna” idia tahua karana lalonai, toana be anina lasi lalohadai, anina lasi daradara herevadia, bona badina lasi herevadia amo Iesu korikorina idia hunia. Dala ta ai, idia be gori sivaraidia amo Evanelia Bukadia idia torea taudia idia gwauraia koikoi dainai idia kerere. Haida be idia ura taunimanima momo ese do idia itaia bona do idia gwauraidia lalohadai matamatana ta idia havaraia taudia, unai dainai Iesu idia hamomokania herevadia idia tahua maoromaoro lasi. Unai idia karaia lalonai, idia ese “Iesu” ta idia karaia, ia be diba bada taudia ese idia laloa kava gauna sibona.

Iesu korikorina idia ura tahua taudia ese Baibel ai ia do idia davaria diba. Emory University ena Candler School of Theology dekenai, Taravatu Matamatana bona Keristani ena matamana hadibaia profesa, Luke Johnson, ia gwau Iesu ena sivarai dainai idia tahua gaudia momo be Baibel ena tahua gauna badana ida ia hegeregere lasi. Ia gwau reana Iesu ena noho dalana, ena lalohadai politikol dalanai, ena mai dalana, bona ena bese ena toana bona unai nega ita tahua neganai ita hoa diba. To, ma ia gwau, diba bada taudia ese ia noho momokani tauna Iesu idia gwauraia dalana “be Baibel ena tahua gauna badana lasi,” bona Baibel ese “ia herevalaia momo gauna be Iesu ena kara,” ia gwauraia sivaraina, bona ia be Mauri Hoia Lou Tauna. Vadaeni, Iesu ena kara korikorina bona ia gwauraia sivaraina be dahaka?

Iesu Korikorina

Evanelia Bukadia​​—⁠Baibel lalonai Iesu ena mauri ena sivarai bukadia hani unai​​—⁠ese ta ena hemami ia laloa bada tauna ia hahedinaraia. Hebogahisi ese Iesu ia doria gorere taudia, matakepulu taudia, bona hisihisi idauidau idia davaria taudia ia durua totona. (Mataio 9:36; 14:14; 20:34) Iesu be ena turana Lasaro ena mase bona Lasaro ena taihuna edia lalohisihisi karana ese ena lalona idia hamarerea dainai ‘ia hebogahisi bona ia tai.’ (Ioane 11:​32-36) Momokani, Evanelia Bukadia ese Iesu ena hemami idauidau idia hahedinaraia​​—⁠lepera gorere tauna ta ia hebogahisi henia, ena hahediba taudia edia gaukara namona dainai ia moale, taravatu tahua taudia edia hebogahisi lasi karana dekenai ia badu, bona Ierusalema taudia ese Mesia ia dadaraia dainai ia lalohisihisi karana.

Iesu be hoa karana ta ia karaia neganai, nega momo ia hanamoa tauna ena kara ia laloa bada, bona do ia gwau: “Oiemu abidadama ese ia hanamoa vadaeni oi.” (Mataio 9:22) Ia ese Natanaela ia hanamoa, ia gwau: “Israela tauna korikori be inai, ia be koikoi diba lasi momokani tauna!” (Ioane 1:47) Hahine ta be ena tanikiu hahedinaraia totona harihari gauna ta ia henia bona haida idia laloa unai be moni bada negea kava karana neganai, Iesu be unai hahine ia durua bona ia gwau ena harihari bada karana be taunimanima ese do idia laloatao. (Mataio 26:​6-13) Iesu be sibona ia hamomokania ia be turana korikorina bona ia murinai idia raka taudia ia ura henidia, “ia lalokau henidia, ia lao bona dokona.”​​—⁠Ioane 13:1; 15:​11-15.

Evanelia Bukadia ese idia hahedinaraia danu Iesu be ia hereva henidia taudia ibounai edia lalohadai bona ura gaudia ia diba haraga. Ranu gurina ta dekenai hahine ta, bona uma gabu dekenai tomadiho gunalaia tauna ta, eiava gohu badinai haoda tauna ia hereva henia neganai, edia kudouna ia hamarerea. Iesu be ena hamatamaia hereva ia gwauraia murinai, unai taudia momo be edia lalona dekenai ia noho gaudia idia gwauraia hedinarai ia dekenai. Ia ese edia lalona ia veria momokani. Ena be iena nega ai idia noho taudia idia ura lasi mai edia siahu taudia idia bamoa, to taunimanima hutuma be Iesu badinai idia gini kahirakahira. Idia be idia ura Iesu kahirakahira ai idia noho; idia bamoa neganai idia gari lasi. Natudia danu be idia gari lasi, bona natuna ta be haheitalai totona ia gaukaralaia neganai, ena hahediba taudia edia vairanai ia haginia sibona lasi to “rosia” danu. (Mareko 9:36; 10:​13-16) Momokani, Evanelia Bukadia ese idia hahedinaraia Iesu be unai bamona lalona veria siahuna tauna, unai dainai taunimanima be ena hereva namodia idia kamonai totona dina toi ia danu idia noho.​​—⁠Mataio 15:⁠32.

Iesu be goevadae tauna, to ma haida ia maumauraia lasi eiava ia hekokoroku lasi bona edia huanai ia noho bona ia haroro henidia goevadae lasi taudia mai edia kara dika ia biagudia auka lasi. (Mataio 9:​10-13; 21:​31, 32; Luka 7:​36-48; 15:​1-32; 18:​9-14) Iesu be ma haida ia hahekwarahia lasi. Taunimanima edia maduna ia hametaua lasi. To, ia gwau: “Gaukara metau taudia ibounai, lau dekenai umui mai, lau ese laga-ani do lau henia umui dekenai.” Iena hahediba taudia ese idia davaria ia be “dagedage lasi bona manau tauna”; iena huaia auna be ia metau lasi, bona huaia neganai danu be hekwarahi lasi.​​—⁠Mataio 11:​28-30.

Iesu ena kara ena sivarai Evanelia Bukadia lalonai be hereva momokani ia hahedinaraia maoromaoro. Taunimanima idaudia hani ese tau hereadaena ta ena sivarai be idia sibona idia laloa bena toretore daladia idaudia hani amo iena sivarai tamona idia gwauraia toho be auka herea. Bema tau ta be nega ta ia mauri noho lasi, toretore taudia idaudia hani ese unai tau ena kara idia gwauraia be auka momokani bona edia toretore lalonai iena sivarai idia hegeregere be auka herea.

Histori torea tauna, Michael Grant ese lalona veria henanadai ta ia henia, ia gwau: “Edena dala ai Evanelia Bukadia iboudiai lalodiai matamata tauna ta mai hairaina, be hahine idauidau, ladana dika hahinedia danu, edia huanai ia loaloa diba mai ena lalo-maoromaoro ida, mai ena kara maoromaoro ida, eiava edia kara ia hoalaia lasi?” Haere maorona tamona be inai, unai tau be momokani guna ia noho bona ena kara Baibel ese ia gwauraia hegeregerena.

Iesu Korikorina Bona Oiemu Vaira Negana

Iesu ena tanobada maurina ena sivarai momokanina idia torea neganai, Baibel ese ia hahedinaraia ia be guba dekenai ia mauri guna, ia be Dirava ena Natuna, “vara guna natuna.” (Kolose 1:15) Lagani 2,000 gunanai, Dirava be ena guba Natuna ena mauri be rami-hebou Iuda kekenina ena bogana dekenai ia atoa, taunimanima bamona do ia vara totona. (Mataio 1:18) Tanobada dekenai hesiai gaukara ia karaia neganai, Iesu ese Dirava ena Basileia ia harorolaia, ia gwau ia be lalo-hekwarahi taudia edia helaro tamona, bona ena hahediba taudia ia hadibaia unai haroro gaukara do idia karaia noho totona.​​—⁠Mataio 4:​17; 10:​5-7; 28:​19, 20.

Nisan 14 (April 1 bamona), 33 C.E. ai, Iesu idia dogoatao, kota dekenai idia abia lao, hahemaoro herevana idia gwauraia, bona gwau-edeede taravatuna amo idia samania koikoi bena idia hamasea. (Mataio 26:​18-​20, 48–Mataio 27:50) Iesu ena mase be mauri davana bamona, ia ese abidadama taudia kara dika amo ia ruhaia bona unai amo dala ia kehoa ia dekenai idia abidadama henia taudia ibounai be mauri hanaihanai do idia abia totona. (Roma 3:​23, 24; 1 Ioane 2:⁠2) Nisan 16 ai, Dirava ese mase amo Iesu ia hatorea isi, bona nega sisina murinai guba dekenai ia daekau lou. (Mareko 16:​1-8; Luka 24:​50-53; Kara 1:​6-9) Iehova ese ia abia hidi King dagina ai, ia toreisi lou tauna Iesu ena siahu ia hegeregere Dirava ena ura ginigunana taunimanima totona do ia hagugurua. (Isaia 9:​6, 7; Luka 1:​32, 33) Oibe, Baibel ese ia hahedinaraia Dirava ena ura hagugurua gaukarana lalonai Iesu be gaukara badana ia abia.

Aposetolo taudia edia negai, taunimanima momo be idia abia dae Iesu be​​—⁠gwauhamata Mesiana, eiava Keriso, tanobada dekenai ia mai Iehova ena lohia siahuna ena maoro ia hamomokanina bona taunimanima davalaidia totona do ia mase totona. (Mataio 20:28; Luka 2:​25-32; Ioane 17:​25, 26; 18:37) Dagedage bada negadia lalonai, taunimanima be Iesu ena hahediba taudia ai do idia lao lasi bema idia diba lasi ia be daika. Idia be mai lalo-goada bona ura goadana ida Iesu ese idia dekenai ia henia gaukarana, “bese ibounai be diba tahua taudia” ai do idia halaoa gaukarana, idia abia.​​—⁠Mataio 28:⁠19.

Hari inai negai, diba idia abia Keristani taudia momokanidia milioni momo idia diba momokani Iesu ena sivarai be gori lasi. Idia abia dae ia be Dirava ese guba ai ia haginia Basileiana ena King, kahirakahira tanobada bona ena gau ibounai do ia biagua. Unai Dirava ese ia haginia gavamani be ita dekenai sivarai namona badina ia be tanobada ena hekwakwanai do ia haorea. Keristani taudia momokanidia be haida dekenai “Basileia ena Sivarai Namona” idia harorolaia amo idia hahedinaraia idia be Iehova ese ia abia hidi King idia durua.​​—⁠Mataio 24:⁠14.

Mauri Diravana ena Natuna, Keriso, ese ia gunalaia Basileia gaukaradia idia durua taudia be hahenamo do idia moalelaia ela bona hanaihanai. Unai hahenamo oi abidia diba danu! Inai magasin idia hariharilaia taudia be mai moale ida oi do idia durua Iesu korikorina oi diba totona.

[Footnote]

[Box/Picture on page 6]

Haida ese Idia Gwauraia Herevadia

“Lau laloa Nasareta tauna Iesu be tanobada dekenai idia noho hahediba taudia goadadia huanai ia be hahediba tauna goadana ta. . . . Hindu taudia do lau hamaoroa emui mauri be ia do namo vaitani lasi ela bona mai hemataurai ida Iesu ena hahediba herevadia umui stadilaia.”—Mohandas K. Gandhi, The Message of Jesus Christ.

“Tau momokanina ta, ia namo momokani, ia idau lasi, ia goevadae, ia be taunimanima to taunimanima ibounai ia hereaia, be tau koikoina lasi eiava gori tauna idia gwauraia diba lasi. . . . Iesu ia hanaia tauna sibona be ena lalohadai ai Iesu ta ia karaia diba.”—Philip Schaff, History of the Christian Church.

“Uru tamona lalonai sikuli bada lasi taudia haida be sibodia edia lalohadai amo tau hereadaena mai ena siahu bada, taunimanima momo ese idia ura henia bada tauna unai, bona mauri dalana hereadaena, bona bese tamona bamona noho hebou karana be idia sivarailaia diba, unai be hoa gauna momokani, Evanelia Buka haniosi lalodiai idia torea hoa karadia do ia hereaia vaitani gauna unai.”—Will Durant, Caesar and Christ.

“Haida sibodia edia lalohadai amo idaunegai hoihoi dalana ta hegeregerena guna ia mauri lasi tauna ta idia laloa, bena iena amo tanobada ibounai lalonai tomadiho orea ta ia vara ena sivarai ita abia dae be auka, badina unai nega ai taunimanima korikori momo idia hekwarahi tomadiho ta idia havaraia totona to idia kwalimu lasi.”—Gregg Easterbrook, Beside Still Waters.

‘Lau be histori buka torea tauna dainai lau diba momokani Evanelia Bukadia be gori lasi. Idia be gori toretore dalana bamona lasi. Iesu ena mauri sivaraidia momo ita diba lasi, bona gori idia havaraia taudia be unai bamona idia karaia lasi.’—C. S. Lewis, God in the Dock.

[Pictures on page 7]

Evanelia Bukadia ese Iesu ena hemami idauidau idia hahedinaraia