Duahia Taudia Edia Henanadai

Tesalonika Iharuana 3:​14 ai ia gwauraia “makaia” (“NW”) karana be kongregesen ese idia karaia karana ta, o ia be Keristani taudia ta ta sibodia be gwau-edeede taudia amo idia gini siri totona idia karaia karana ia herevalaia, a?

Aposetolo Paulo ese Tesalonika taudia dekenai ia torea herevana ese ia hahedinaraia, kongregesen dekenai unai “makaia” karana lalonai elda taudia be mai edia gaukara. To, Keristani taudia ta ta be elda taudia edia hereva do idia badinaia, lauma dalanai namo ia vara totona. Unai do ita lalo-pararalaia diba bema Paulo ena sisiba herevana ena anina unai nega dekenai ita laloa.

Paulo ese Tesalonika kongregesen haginia totona heduru ia henia, tatau bona hahine ia durudia abidadama taudia ai idia lao totona. (Kara 17:​1-4) Gabeai ia ese Korinto amo ia tore henidia, ia hanamodia bona hagoadadia totona. Paulo ese sisiba namona ia henidia danu. Ia hagoadadia ‘mai manau danu do idia noho, bona sibona edia gaukara do idia karaia bona edia imana gaukara dekena amo sibona edia mauri do idia naria.’ Haida be unai bamona idia karaia lasi, unai dainai Paulo be ma ia gwau: “Aiemai varavara taudia e, umui dekenai ai hereva goada, [kamonai lasi] taudia do umui sisiba henidia, gari taudia do umui hagoadaia, bona manoka taudia do umui durua.” Ia hedinarai goevagoeva, idia huanai “kamonai lasi”a taudia ese sisiba idia abia be namo.​—⁠1 Tesalonika 1:​2-10; 4:11; 5:⁠14.

Hua haida murinai, Paulo ese Tesalonika taudia dekenai ena revareva iharuana ia torea, vaira negana ai Iesu ena noho negana ena hereva ma haida ia herevalaia. Paulo ese hakaua herevadia ma haida danu ia henia idia ese edena bamona kamonai lasi taudia do idia kara henia, badina idia ‘gaukara lasi, to haida edia gau bona edia kara idia herevalaia kava momo.’ Edia kara be idau, Paulo ena gaukara goadagoada haheitalaina amo, bona sibona durua gaudia abia totona do idia gaukara sisibana amo. (2 Tesalonika 3:​7-12) Paulo ia gwau kara haida do idia karaia be namo. Unai kara haida be elda taudia ese kamonai lasi taudia idia hagoadaia bona sisiba henidia murinai, do idia karaia. Paulo ia gwau:

“Aiemai varavara taudia e, . . . umui dekenai ai hereva mai goada danu, inai bamona: Mai lahedo danu idia noho, bona aiemai hereva idia kamonai lasi Keristani taudia, idia dekena amo do umui raka siri. Aiemai varavara taudia e, kara namona karaia totona do umui hesiku lasi. Bema tau ta ese inai revareva, ai torea gauna, ia abia dae lasi neganai, inai tauna be do umui [makaia], vadaeni do umui atoa siri, do ia hemarai totona. Do umui dagedage henia lasi umui tuari henia tauna bamona, to ia be emui tadina bamona do umui sisiba henia sibona.”​—⁠2 Tesalonika 3:​6, 13-15.

Unai dainai, ma kara haida be unai kamonai lasi taudia amo do idia gini siri, idia makaia, idia bamodia lasi, to tadikaka bamona idia sisiba henidia. Dahaka ese kongregesen taudia ia hakaua unai kara haida idia karaia totona? Unai ia hedinarai goevagoeva totona, mani Paulo ese ia herevalaia lasi gaudia toi ita itaia.

1. Ita diba Keristani taudia be goevadae lasi taudia bona idia be mai edia manoka gaudia. To, lalokau be Keristani dalana momokanina ena toana, unai dainai haida edia kerere ita lalo-pararalaia bona ita gwauatao. Hegeregere, reana nega ta Keristani tauna ta ia badu dikadika, Paulo bona Banaba edia huanai ia vara bamona. (Kara 15:​36-40) Eiava hesiku dainai ta be reana lalona hahisia herevadia bona hereva aukadia ia gwauraia. Unai bamona gaudia idia vara neganai, lalokau ita hahedinaraia bona Baibel ena sisiba ita badinaia dainai kerere ita koua diba, bena iseda tadikaka ida do ita noho, hebamo, bona gaukara hebou noho. (Mataio 5:​23-25; 6:14; 7:​1-5; 1 Petero 4:8) Ia hedinarai goevagoeva, unai bamona manoka gaudia be Paulo ese Tesalonika Iharuana lalonai ia herevalaidia lasi.

2. Paulo be ita ese sibona eda ura hegeregerena ita abia hidi gauna ia herevalaia lasi. Hegeregere, reana Keristani tauna be ena dala o lalohadai be namo lasi tauna ta​—⁠moale karadia o tauanina gaudia ia laloa momo tauna​—⁠ia ura lasi bamoa. Eiava tama o sina ta ese ena natuna ena hebamo karana be tama sina edia dagi idia matauraia lasi, mai dagedage ida idia gadara, o Keristani maurina idia laloa bada lasi matamata taudia ida ia koua. Unai be ta ta sibona idia abia hidi gaudia, Aonega Herevadia 13:20 dekenai ita duahia hegeregerena, ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.”​—⁠1 Korinto 15:⁠33 itaia.

3. Ena metau be Paulo ese Korinto taudia ia tore henia neganai ia herevalaia metau gauna hegeregerena lasi. Korinto dekenai ta be kara dika rohorohona ia karaia bona ia helalo-kerehai lasi. Unai helalo-kerehai lasi kara dika taudia be kongregesen murimurinai idia atoa. Tau “dikana” be Satani dekenai idia henia bamona. Unai murinai, Keristani taudia be unai kara dika taudia idia bamoa lasi; aposetolo Ioane ese Keristani taudia ia hamaoroa unai taudia dekenai hanamoa herevana danu do idia gwauraia lasi. (1 Korinto 5:​1-13; 2 Ioane 9-11) To, unai danu be 2 Tesalonika 3:​14 ena sisiba hegeregerena lasi.

Tesalonika Iharuana ese ia herevalaia “kamonai lasi” taudia dekenai ia vara gauna be ita herevalaia gaudia toi amo ia idau. Paulo ia gwau unai taudia be do tadikaka, do idia hagoadadia bona kara henidia tadikaka idia kara henidia hegeregerena. Unai dainai, “kamonai lasi” tadikaka kara henia ena hekwakwanai be Keristani taudia ta ta ese idia abia hidi gauna sibona lasi. Bona ena metau be murimuri ai atoa karana amo kongregesen elda taudia ese do idia hamaoromaoroa gauna bamona lasi, ia be Paulo ese Korinto ai matabodaga karana ia vara dainai ia karaia gauna bamona lasi. Unai “kamonai lasi” taudia be kara dika rohorohodia idia karaia lasi, Korinto dekenai murimuri ai idia atoa tauna ia karaia bamona.

“Kamonai lasi” taudia Tesalonika ai be mai anina bada Keristani daladia amo idia raka siri dainai idia kerere. Idia gaukara lasi, reana ena badina be idia laloa Keriso ena lou mai be kahirakahira o idia lahedo dainai. Ma danu, idia be ma ‘haida edia gau bona edia kara idia herevalaia kava momo,’ unai amo ma haida edia noho idia hadikaia. Toana be kongregesen elda taudia ese idia sisiba henidia loulou vadaeni, Paulo ena sisiba ena revareva ginigunana lalonai bona Dirava ena sisiba ma haida hegeregerena. (Aonega Herevadia 6:​6-11; 10:​4, 5; 12:​11, 24; 24:​30-34) To idia be kongregesen ena ladana ia hadikaia dalana idia do badinaia noho bona unai be Keristani taudia ma haida ia hadikaia diba. Unai dainai Keristani elda tauna Paulo be unai taudia edia ladana ia gwauraia lasi, to edia kamonai lasi karana ia herevalaia bona edia dala kererena ia gwauraia hedinarai.

Ia ese kongregesen ia hadibaia danu, namona be Keristani taudia ta ta ese unai kamonai lasi taudia do idia “makaia.” Unai ena anina be idia ta ta ese do idia itaia namonamo edena taudia edia kara be kongregesen idia hadibaia herevana ia hahedinaraia karana hegeregerena. Paulo ese ia sisiba henidia unai ‘kamonai lasi Keristani taudia amo do idia raka siri.’ To ita gwau lasi unai ena anina be unai bamona tauna idia dadaraia vaitani, badina idia ese edia ‘tadikaka bamona do idia sisiba henia noho.’ Idia be Keristani heboudia dekenai do idia hedavari bona reana haroro gaukara dekenai do idia gaukara hebou noho. Idia ura edia tadikaka ese sisiba do ia badinaia bona ena dala kereredia do ia rakatania.

Edena dala amo idia be unai tauna amo do idia “siri”? Unai be hebamo karana dekenai. (Galatia 2:12 itaia.) Ia idia bamoa lasi bona moale karadia idia karaia hebou lasi neganai, ia dekenai idia hahedinaraia hakaua herevadia idia badinaia taudia ese iena dala idia dadaraia. Ena be ia hemarai lasi bona ena kara ia haidaua lasi, to ia amo idia siri dainai ma haida ese iena dala do idia manadalaia lasi bona ena kara do idia tohotohoa lasi. Danu, namona be unai Keristani taudia ese gau namodia do idia laloa noho. Paulo ese ia sisiba henidia, ia gwau: “Aiemai varavara taudia e, kara namona karaia totona do umui hesiku lasi.”​—⁠2 Tesalonika 3:⁠13.

Ia hedinarai goevagoeva, unai aposetolo tauna ena sisiba be kerere maragina idia karaia tadikakadia ita laloa maragi o hahemaoro henia totona ia henia lasi. To, iena ura badana be ena kara amo ma haida edia lalona ia hahekwarahia bona Keristani dalana maorona ia badinaia lasi tauna ia durua.

Paulo be taravatu momo ia gwauraidia lasi, hegeregere dala aukana ta ia haginia toho lasi. To ia hedinarai goevagoeva, namona be elda taudia ese sisiba idia henia bona unai kamonai lasi tauna idia durua toho guna. Bema idia kwalimu lasi bona unai tauna ese ma haida hahekwarahia dalana kererena ia badinaia noho bona unai ese ma haida do ia hakaua kerere diba, reana idia laloa kongregesen idia hadibaia be namo do idia naria namonamo totona. Idia ese hereva ta do idia hegaegaelaia diba, unai hereva lalonai do idia hahedinaraia dahaka dainai unai bamona kamonai lasi karana idia dadaraia be namo. Idia ese ladana do idia gwauraia lasi, to idia henia herevana ese kongregesen do ia naria, badina hereva badinaia taudia be do idia naria namonamo, unai bamona kamonai lasi karana idia hahedinaraia goevagoeva taudia bamoa karadia do idia hadokoa.

Iseda ura gauna be, gabeai unai kamonai lasi tauna be ena kara dainai do ia hemarai bena ena lalona do ia hadaia ena kara ia haidaua totona. Elda taudia bona ma haida kongregesen lalonai ese ena dala ia haidaua idia itaia neganai, idia ta ta idia laloa diba edia hebamo karana do idia hamatamaia lou.

Vadaeni, hereva kwadogina amo unai ita gwauraia inai bamona: Bema ta be kamonai lasi karana ia hahedinaraia, kongregesen elda taudia ese heduru bona sisiba henia karana do idia gunalaia. Bema ia ese ena kerere ia itaia lasi to haheitalai dikana ia hahedinaraia noho, elda taudia ese Baibel ena lalohadai​—⁠reana ia be abidadama lasi tauna ta ida hetura karana, o dala kererena ma ta​—⁠ia hahedinaraia goevagoeva herevana ta amo kongregesen idia hadibaia. (1 Korinto 7:​39; 2 Korinto 6:​14) Bena idia hadibadia Keristani kongregesen taudia ta ta be sibona edia lalona idia hadaia, idia be do tadikaka to kamonai lasi dalana ta idia hahedinaraia goevagoeva taudia do idia bamoa lasi.

[Footnote]

[Picture on page 31]

Keristani elda taudia ese kamonai lasi taudia idia sisiba henia to idia laloa noho unai taudia be edia abidadama tamona taudia