Kongrigeisen Ia Maino bona Goeva Noho

LAGANI ta ta ai, Baibel ena peroveta herevana hegeregerena taunimanima tausen momo be tomadiho goevana totona Iehova ena ruma dekenai idia mai. (Mika 4:1, 2) Ita moale bada “Dirava ena kongrigeisen” dekenai idia ita abia dae! (Kara 20:28) Idia moale badina ita danu Iehova idia hesiai henia bona ena orea lalonai goeva karana bona maino idia moalelaia. Dirava ena lauma helaga bona ena Hereva ai idia noho sisiba herevadia ese ita idia durua maino ai ita noho bona kongrigeisen ia goeva noho totona.​​—Sal. 119:105; Sek. 4:6.

² Baibel ena hakaua herevadia ita badinaia dainai “mauri matamata” ita atoa. (Kol. 3:10) Ita ese heai bona badu ita rakatania. Iehova ena lalohadai hegeregerena ita laloa dainai, inai heiriheiri tanobadana ese ita ia veria diba lasi bona tadikaka oreana lalonai mai lalotamona ida ita gaukara hebou diba.​​—Kara 10:34, 35.

³ To, nega ta ta ai, hekwakwanai do idia vara, unai ese kongrigeisen ena maino bona lalotamona do ia hadikaia. Dahaka ese unai ia havaraia? Nega momo unai ia vara badina be Baibel ena hakaua herevadia ita badinaia lasi. Ura dikadia dainai do ita hekwarahi noho unai ita haheaukalaia totona badina ita ibounai be gaevadae lasi taudia. (1 Ioa. 1:10) Ta ena kerere dainai kongrigeisen lalonai kara mirodia ia abia vareai diba. Iseda hereva o kara dainai ta ita hahisia diba eiava ta ena hereva o kara dainai ita do ia hahekwakwanaia. (Roma 3:23) Unai ia vara neganai, dahaka ita karaia diba ita hamaoromaoroa totona?

⁴ Iehova be mai lalokau ida unai ibounai ia diba. Hekwakwanai idia vara neganai, Iena Hereva ese heduru daladia ia henia diba. Ita idia naria elda taudia ese mai lalokau ida ita idia durua diba. Idia henia Baibel ena hakaua herevadia ita badinaia neganai, iseda hetura karana ma haida bona Iehova ida do ia namo bona ia goada ia lao diba. Bema iseda kerere dainai sisiba o matahakani ita abia, namona be ita abia dae unai be iseda guba Tamana ena lalokau karana.​​—Aon. 3:11, 12; Heb. 12:6.

KERERE MARAGIDIA HAMAOROMAOROA

⁵ Nega haida hepapahuahu o hekwakwanai maragidia be kongrigeisen taudia huanai do idia vara. Iseda tadikaka ita lalokau henia dainai namona be kara haraga ita hamaoromaoroa. (Efe. 4:26; Fili. 2:2-4; Kol. 3:12-14) Do oi davaria, oi bona Keristani tadikaka ta huanai idia vara hekwakwanai umui hamaoromaoroa diba bema aposetolo Petero ena sisiba, “ta ta do umui lalokau henia bada, badina lalokau ese kara dika momo ia gwauatao,” umui badinaia. (1 Pet. 4:8) Baibel ia gwau: “Ita ibounai be nega momo ita kerere.” (Iam. 3:2) Bema ita ese Hakaua Hereva Hereadaena​​—ita ura haida ese ita dekenai idia karaia hegeregerena idia dekenai ita karaia​​—ita badinaia, haida edia kerere maragidia ita gwauatao bona laloa boio diba.​​—Mat. 6:14, 15; 7:12.

⁶ Bema oi diba emu hereva o kara amo ta oi hahisia, namona be kara haraga maino oi karaia. Namona be oi laloatao, emu hetura karana Iehova ida do ia hadikaia danu. Iesu ese ena hahediba taudia ia sisiba henidia, ia gwau: “Bema emu harihari gauna be boubou patana dekenai oi abia lao bona unuseniai oi laloatao emu tadikaka be oi dekenai ia lalohisihisi, namona be emu harihari gauna be boubou patana vairanai oi rakatania bona oi lao. Emu tadikaka ida maino oi karaia guna, bena oi giroa lou bona emu harihari gauna oi bouboulaia.” (Mat.5:23, 24) Reana umui laloparara heheni lasi. Bema unai bamona, namona be unai umui herevalaia hebou. Hereva hebou karana ese daradara do ia koua bona iseda goevadae lasi maurina dainai idia vara hekwakwanai do ita hamaoromaoroa diba.

BAIBEL ENA SISIBA

⁷ Nega haida gunalaia taudia ese ta ena lalohadai hamaoromaoroa totona sisiba do idia henia. Unai idia karaia totona, nega haida ia auka. Aposetolo Paulo be Galatia Keristani taudia dekenai ia gwau: “Tadikaka e, bema tau ta be dala kererena ai ia raka bona ia diba lasi, namona be umui lo Keristani taudia ese unai tauna be mai manau ida umui hamaoromaoroa.”​​—Gal. 6:1.

⁸ Naria taudia ese mamoe idia naria neganai, kongrigeisen do idia gimaia diba bona hekwakwanai badadia do idia vara lasi. Elda taudia ese kongrigeisen idia naria neganai, idia ese Iehova ese Isaia ena amo ia gwauhamatalaia herevana idia ura hagugurua, ia gwau: “Lai bada negana ai idia ta ta be hunia gabuna bamona, medu bada negana ai idia be heau mauri gabuna ta bamona, idia be ranu lasi tanona ai ia aru sinavai bamona, idia be tano kaukauna ai ia noho nadi badana ena ikerukeru bamona.”​​—Isa. 32:2.

IDIA RAKA KERERE TAUDIA MAKAIA

⁹ Aposetolo Paulo ese kongrigeisen idia hakaua kerere diba taudia ia herevalaia. Ia gwau: “Umui dekenai ai gwauraia hadibaia herevadia be inai, tadikaka ta be dala kererena ai ia raka bona ai amo umui dibaia gaudia ia badinaia lasi neganai, do umui bamoa lasi.” Unai hereva ena anina ia gwauraia hedinarai, ia gwau: “To bema ta be inai revareva lalonai ai torea herevana ia badinaia lasi, namona be unai tauna umui makaia bona ia umui bamoa lasi, unai amo do ia hemarai. To ia be emui inai tauna bamona umui laloa lasi, to emui tadikaka bamona do umui sisiba henia noho.”​​—2 Tes. 3:6, 14, 15.

¹⁰ Nega ta ta ai, kara dika badana ta ia karaia tauna be unai kara dainai kongrigeisen amo idia atoa siri diba badina tiokratik dalana ia laloa bada lasi. Unai gaudia haida be hegeregere, ia hesiku bada, lalotamona lasi, o tauanina dalanai ia miro. Ia be “ma haida edia mauri ai idia vara gaudia lalonai [ia] vareai kava.” (2 Tes. 3:11) Eiava reana koikoi dalanai palani ia karaia ma haida edia kohu ia abia o moale karadia dikadia ia karaia. Unai kara dikadia dainai kongrigeisen ia hadikaia diba bona Keristani taudia ma haida ese unai kara dikadia idia tohotohoa diba.

¹¹ Elda taudia ese Baibel ena sisiba amo dala maorona ia badinaia lasi tauna do idia durua guna. To, bema Baibel amo idia durua loulou to inai kara dika ia do karaia noho, reana elda taudia ese kongrigeisen durua totona tok ta do idia henia. Elda taudia be do idia laloa namonamo guna bema kara ta be ia kerere momokani bona tadikaka idia hahekwakwanaia diba, vadaeni gwaumaoro idia henia diba tok ta do idia henia kongrigeisen durua totona. Unai tok lalonai kerere hamaoromaoroa totona Baibel ena sisiba maorodia do idia herevalaia, to kerere tauna ena ladana do idia gwauraia lasi. Unai amo unai hekwakwanai idia diba taudia ese unai kerere idia karaia taudia do idia bamoa lasi, to lauma gaudia karaia totona idia ita bamoa bona ‘tadikaka bamona ita sisiba henia noho’ diba.

¹² Abidadama Keristani taudia edia gini auka karana ese dala maorona ia badinaia lasi tauna do ia durua ena kara dainai do ia hemarai bona ena kara do ia haidaua. Bema unai tauna ia hahedinaraia ena kara ia haidaua vadaeni, namona be idia makaia tauna bamona ita kara henia lasi.

KERERE BADADIA HAIDA HAMAOROMAOROA DALANA

¹³ Mai iseda ura ida kara dika ita gwauatao bona laloaboio, to unai ese ia hahedinaraia lasi kerere ita laloa maragi eiava ita abia dae. Namo lasi ita gwau ita be goevadae lasi taudia dainai kerere ita karaia loulou eiava kerere badadia ita gwauatao sibona bona laloaboio. (Lev. 19:17; Sal. 141:5) Mose ena Taravatu lalonai kara dika badadia haida ese kara dika ma haida idia hereaia, bona hari Keristani kongrigeisen ese unai lalohadai tamona idia badinaia.​​—1 Ioa. 5:16, 17.

¹⁴ Iesu ese Keristani taudia huanai idia vara kerere badadia hamaoromaoroa dalana ia herevalaia goevagoeva. Ia ese unai daladia be inai bamona ia gwauraia: “Bema emu tadikaka be kara dika ta ia karaia, [1] oi lao bona umui ruaosi sibona huanai iena kerere oi hahedinaraia. Bema oi ia kamonai henia, emu tadikaka be dala maorona dekenai oi hakaua lou vadaeni. To bema ia kamonai lasi, [2] taunimanima ta eiava rua oi hakaua lao, unai amo hereva hamomokania taudia rua eiava toi edia hereva amo gau ibounai do idia hamomokania. Bema idia ia kamonai henia lasi, [3] tadikaka oi hadibaia. To bema kongrigeisen tadikaka danu ia kamonai henia lasi, namona be oi dekenai ia be abidadama lasi tauna bamona bona takisi gogoa tauna bamona ai do ia lao.”​​—Mat. 18:15-17.

¹⁵ Iesu ese Mataio 18:23-35 ai ia herevalaia haheitalai ese ia hahedinaraia, Mataio 18:15-17 ai ia gwauraia kara dika be moni dalanai o tano bona kohu dainai idia vara, hegeregere ta ese ena abitorehai ia haloua lasi o koikoi dalanai ta ena moni o kohu ia henaoa. Eiava sivarai koikoi dainai ta ena ladana hadikaia karana.

¹⁶ Bema kongrigeisen ai ta be oi dekenai unai bamona kerere ia karaia, elda taudia oi hadibaia haraga lasi, ia do idia hereva henia totona. Iesu ena sisiba bamona, dala ginigunana be oi dekenai ia kara dika tauna oi hereva henia. Umui ruaosi ese unai gauna umui hamaoromaoroa toho. Bema ia abia dae lasi, nega sisina oi henia bena ma oi hereva henia lou. Namona be oi laloatao, Iesu ia gwau lasi ‘nega tamona oi lao bona ena kerere oi hahedinaraia.’ To bema, ena kerere ia abia dae lasi bona oi gwauatao totona ia noinoi lasi, namona be gabeai oi hereva henia lou. Bema unai nega ai hekwakwanai umui hamaoromaoroa, kerere tauna be do ia moale badina ena kerere be ma haida dekenai oi gwauraia lasi o kongrigeisen lalonai ena ladana oi hadikaia lasi. “Dala maorona dekenai oi hakaua lou vadaeni.”

¹⁷ Bema kerere tauna ese ena kerere ia abia dae, oi gwauatao totona ia noinoi, bona unai kerere hamaoromaoroa daladia ia tahua, unai hekwakwanai hamaoromaoroa daladia ma haida oi tahua lasi be namo. Ena be unai be kerere badana, to unai bamona kerere be umui ruaosi sibona ese umui hamaoromaoroa diba.

¹⁸ Bema “umui ruaosi sibona huanai iena kerere oi hahedinaraia” to ia ura lasi dala maorona ia badinaia, vadaeni Iesu ena hereva do oi badinaia, “taunimanima ta eiava rua oi hakaua lao” bona emu tadikaka oi hereva henia lou. Namona be oi hakaua lao taudia edia ura badana danu be unai kerere tauna do idia durua dala maorona ia badinaia lou totona. Namona be unai kerere idia hamomokania taudia oi abia lao, to bema kerere hamomokania taudia be lasi, taunimanima ta eiava rua oi hakaoa lao diba emu hereva hamomokania totona. Reana unai taudia be mai edia ekspiriens unai bamona hekwakwanai hamaoromaoroa karana dekenai bona do idia diba bema ia vara gauna be kerere momokani eiava lasi. Bema elda taudia oi abia hidi, idia be kongrigeisen ladanai unai do idia karaia lasi, badinai elda oreana ese idia ia siaia lasi.

¹⁹ Bema unai hekwakwanai be oi hamaoromaoroa lasi ena be nega momo oi sibona eiava tadikaka ta o rua ida ia umui hereva henia, to unai kara oi laloaboio diba lasi, namona be kongrigeisen elda taudia dekenai oi herevalaia. Laloatao edia tahua gauna be kongrigeisen do ia maino bona ia goeva. Elda taudia oi itaia murinai, gau ibounai be edia imana ai oi atoa bona Iehova oi abidadama henia. Namo lasi ta ena kara ese oi ia hahekwakwanaia o emu moale Iehova ena hesiai gaukara dekenai ia hadikaia.​​—Sal. 119:165.

²⁰ Mamoe naria taudia ese unai hekwakwanai do idia tahua. Bema idia davaria unai tauna be oi dekenai kara dika badana ia karaia bona ia ura lasi ia helalo-kerehai bona ena kerere ia hamaoromaoroa lasi, murimuri ai idia atoa diba. Unai amo mamoe bona kongrigeisen ena goeva karana idia gimaia.​​—Mat. 18:17.

KARA DIKA BADADIA HAMAOROMAOROA DALANA

²¹ Kara dika badadia haida, hegeregere matabodaga, heudahanai, tatau be tatau ida o hahine be hahine ida idia mahuta hebou, Dirava ena ladana idia hadikaia, aposteit, kaivakuku tomadiho henia karadia, bona unai bamona kara dika ma haida idia karaia taudia, edia kara dika ita gwauatao sibona be hegeregere lasi. (1 Kor. 6:9, 10; Gal. 5:19-21) Tauanina bona lauma dalanai kongrigeisen ena goeva karana ia hadikaia diba dainai, unai bamona kara dika badadia be elda taudia dekenai ita hadibaia bena idia ese do idia tahua. (1 Kor. 5:6; Iam. 5:14, 15) Haida be elda taudia dekenai idia lao badina reana sibodia edia kerere gwauraia hedinarai totona, o ma haida edia kerere idia gwauraia hedinarai totona. (Lev. 5:1; Iam. 5:16) Herevana edena dala ai elda taudia ese bapatiso vadaeni Witnes tauna ta ena kerere idia kamonaia, to elda rua ese unai kerere do idia tahua guna. Bema edia tahua karana lalonai idia davaria ia kerere bona kara dika badana ta ia karaia, elda oreana ese hahemaoro komiti ta do idia karaia bona elda toi ese unai hahemaoro karana do idia karaia.

²² Elda taudia ese mamoe idia naria namonamo, edia lauma dalana ia hadikaia diba gaudia amo idia gimaia totona. Danu idia hekwarahi Dirava ena hereva idia gaukaralaia namonamo unai amo kerere taudia idia hamaoromaoroa bona Dirava ena dala maorodia dekenai idia hakaua lou. (Iuda 21-23) Unai be Paulo ese Timoteo dekenai ia henia hadibaia herevadia hegeregerena, ia gwau: “Keriso Iesu be. .  mauri taudia bona mase taudia do ia kota henia. Ia bona Dirava vairanai oi lau oda henia, . . . mai haheauka ida bona hadibaia dala namona ai idia do oi sisiba henia, oi hereva auka henia, bona oi hagoadaia.” (2 Tim. 4:1, 2) Unai idia karaia totona nega bada do idia haorea, to unai be elda taudia edia gaukara ena kahana ta. Kongrigeisen taudia ese elda taudia edia gaukara idia laloa bada bona idia “matauraia bada.”​​—1 Tim. 5:17.

²³ Ta ia kara dika neganai, elda taudia idia gaukara goada be namo, kerere tauna idia durua ia goada lou totona. Bema ia helalo-kerehai momokani bona ia idia durua diba, edia matahakani be ia sibona eiava kongrigeisen taudia ibounai edia vairanai idia karaia neganai, ia be sisiba do ia abia bona kongrigeisen taudia ese Dirava gari henia karana do idia dibaia. (2 Sam. 12:13; 1 Tim. 5:20) Nega ibounai hahemaoro idia abia taudia dekenai taravatu idia atoa. Unai amo kerere tauna idia durua iena “raka daladia” ia hamaoromaoroa totona. (Heb. 12:13) Gabeai, bema idia itaia ia goada ia lao, taravatu idia kokia diba.

HAHEMAORO KARANA ENA HADIBAIA HEREVA

²⁴ Bema hahemaoro komiti ia laloa kara dika tauna ia helalo-kerehai to bema idia laloa kongrigeisen o ena kominiti taudia be ena kerere do idia diba, o bema idia laloa kongrigeisen ese ia helalo-kerehai tauna dekenai idia naria namonamo be namo, hadibaia herevana ta be Haroro bona Mauri Dalana Hebou lalonai do idia karaia. Inai bamona do idia gwauraia: “Tadikaka (Taihu) [ladana] be sisiba aukana ia abia.”

OREA MURIMURI AI TA ATOA SIRI KARANA

²⁵ Nega haida, kara dika tauna ese ena kara dika do ia rakatania lasi bona ia ura lasi heduru ia abia dae. Reana hahemaoro idia karaia neganai ena kara amo ‘ia hamomokania’ lasi ia helalo-kerehai. (Kara 26:20) Vadaeni, dahaka idia karaia be namo? Unai ia vara neganai, namona be kara dika tauna be kongrigeisen amo do idia atoa siri, unai amo Iehova ena kongrigeisen goevana do ia bamoa lasi. Kara dika tauna ese kongrigeisen taudia do ia hakaua kerere lasi, unai amo kongrigeisen do ia goeva bona ena ladana namona do idia gimaia. (Deu. 21:20, 21; 22:23, 24) Aposetolo Paulo be Korinto kongrigeisen ai ta be hemarai karana ta ia karaia ena sivarai ia kamonai neganai, ia ese elda taudia ia sisiba henia ia gwau, “unai tauna be Satani dekenai do umui henia,” unai amo kongrigeisen taudia do umui gimaia. (1 Kor. 5:5, 11-13) Paulo ese aposetolo edia negai hereva momokani idia dadaraia bona orea amo idia atoa siri taudia edia sivarai ia gwauraia danu.​​—1 Tim. 1:20.

²⁶ Bema kerere tauna be murimuri ai do idia atoa, namona be hahemaoro komiti ese do idia hadibaia, bona Baibel amo unai do idia karaia ena badina do idia hahedinaraia goevagoeva. Hahemaoro komiti ese kerere tauna idia hadibaia neganai, namona be idia hamaoroa bema ia laloa unai hahemaoro karana be ia kerere bona ia ura disisen dainai ia apil, namona be revareva ta amo ena apil ena badina do ia torea. Komiti ese idia hadibaia murinai dina seven do idia henia unai ia karaia totona. Bema apil revarevana idia davaria, elda oreana ese sekit naria tauna do idia hadibaia, bona ia ese idia hegeregere elda taudia do ia abia hidi apil komiti ena gaukara do idia karaia bona unai kerere do idia tahua lou. Idia ese apil revarevana idia abia bona pura ta ia do ore lasi neganai unai hekwakwanai do idia tahua lou. Bema kerere tauna ia apil, murimuri ai atoa karana ena hadibaia herevana be do idia gwauraia lasi. Unai nega lalonai, ia kerere tauna be hebou lalonai do ia haere bona guriguri lasi bona hesiai gaukara ena hahenamo ma haida do ia karaia lasi.

²⁷ Kerere tauna idia hebogahisi henia dainai ena apil karana idia abia dae bona nega idia henia ena lalohadai ia gwauraia hedinarai totona. To, bema kerere tauna be mai ura ida unai apil dekenai ia lao lasi herevana nega hidia ia idia boiria, vadaeni murimuri ai do idia atoa ena hadibaia hereva idia gwauraia diba.

²⁸ Bema kerere tauna ia ura lasi ia apil, hahemaoro komiti ese ia do ia hadibaia dahaka dainai helalo-kerehai be gau badana bona dahaka do ia karaia idia abia vareai lou totona. Unai be heduru namona bona hebogahisi karana badina idia abia dae iena kara do ia haidaua bona do ia hegeregere Iehova ena orea dekenai ia giroa lou totona.​​—2 Kor. 2:6, 7.

MURIMURI AI ATOA ENA HADIBAIA HEREVA

²⁹ Bema helalo-kerehai lasi tauna be kongrigeisen amo do idia atoa siri, hadibaia hereva kwadogina ta do idia gwauraia, idia gwau: “Hari [Ladana] be Iehova ena Witnes [tauna, hahinena, merona, kekenina] lasi.” Unai amo kongrigeisen taudia do idia diba unai tauna idia bamoa lasi be namo.​​—1 Kor. 5:11

OREA AMO RAKA SIRI KARANA

³⁰ Inai hereva “orea amo raka siri karana” ese kongrigeisen ai bapatiso Witnes tauna ta, to Keristani karadia ia dadaraia badina ia ura lasi idia gwauraia Iehova ena Witnes tauna ta ena kara ia hahedinaraia. Eiava ena kara amo ia hahedinaraia ia ura lasi Keristani kongrigeisen ai ia noho, unai bamona karana ta be Baibel ena hahediba herevadia idia badinaia lasi oreana ta dekenai vareai karana bona unai dainai Iehova Dirava ese do ia hahemaoro henia diba.​​—Isa. 2:4; Apok. 19:17-21.

³¹ Aposetolo Ioane be iena nega ai Keristani dalana idia dadaraia taudia ia herevalaia neganai, ia gwau: “Idia be ita huanai, to ita idia rakatania badina idia be ita bamona lasi. Bema idia be ita bamona, idia be ita danu do idia noho.”​​—1 Ioa. 2:19.

³² Iehova vairanai sibona orea amo ia raka siri tauna be ia haroro lasi manoka Keristani tauna danu idia hegeregere lasi. Ta ia manoka badina Dirava ena Hereva ia stadilaia hanaihanai lasi. Eiava ia be mai ena hekwakwanai o dagedage karana ia mamia dainai ena ura Iehova hesiai henia karana dekenai ia haboioa. Elda taudia bona kongrigeisen taudia ma haida ese ia manoka tauna do idia durua ia goada lou totona.​​—Roma 15:1; 1 Tes. 5:14; Heb. 12:12.

³³ To, bema Keristani tauna ta be sibona orea amo ia raka siri, kongrigeisen hadibaia totona hadibaia hereva kwadogina ta do idia gwauraia, do idia gwau: “Hari [Ladana] be Iehova ena Witnes [tauna, hahinena, merona, kekenina] lasi.” Unai bamona tauna be orea murimuri ai idia atoa tauna hegeregerena do umui kara henia.

ABIA-VAREAI-LOU KARANA

³⁴ Murimuri ai idia atoa tauna o kongrigeisen amo ia gini siri tauna idia abi-vareai-lou diba bema ia helalo-kerehai momokani bona nega sisina daudau lalonai ia hahedinaraia ena kara dika ia rakatania vadaeni. Ia hahedinaraia ia ura dikadika Iehova ia tura henia. Reana elda taudia be ia dekenai hua momo, lagani ta, o reana nega daudau do idia henia, unai amo do ia hahedinaraia ia helalo-kerehai momokani. Elda oreana ese murimuri ai idia atoa tauna amo vareai lou totona noinoi revarevana ta idia abia neganai, abia-vareai-lou komiti ese do idia hereva henia. Idia ese iena kara do idia tahua bema ‘ia hamomokania’ ia helalo-kerehai vadaeni bona bema ia hegeregere unai nega ai do idia abia vareai lou o lasi.

³⁵ Bema ia ura vareai lou tauna be kongrigeisen ma ta ai ia noho neganai murimuri ai idia atoa, namona be hari ia lao henia kongrigeisen ena abia-vareai-lou komiti be ia danu do idia herevahereva. Bema abia-vareai-lou komiti idia laloa ia vareai lou diba, idia ese unai tauna ena kongrigeisen gunana ena elda oreana dekenai ia do idia abia vareai lou herevana do idia hamaorodia. Komiti gunana bona matamatana be do idia gaukara hebou be namo idia davaria gaudia amo disisen maorona do idia karaia totona. To, do idia abia vareai ena disisen be abia-vareai-lou komiti gunana ese do idia karaia.

ABIA-VAREAI-LOU ENA HADIBAIA HEREVA

³⁶ Bema abia-vareai-lou komiti idia laloa murimuri ai idia atoa eiava orea amo ia raka siri tauna be ia helalo-kerehai momokani bona idia abia-vareai-lou be namo, do idia abia-vareai-lou ena hadibaia herevana be ena kongrigeisen gunana ai do idia karaia. To bema hari unai tauna be kongrigeisen ma ta ai ia noho, unai hadibaia herevana be unai kongrigeisen ai do idia gwauraia danu. Do idia gwau: “[Ladana] be idia abia-vareai-lou bona hari ia be Iehova ena Witnes ta.”

BAPATISO VADAENI NATUDIA IDIA KERERE NEGANAI

³⁷ Idia bapatiso vadaeni natudia idia kerere neganai elda taudia idia hadibaia be gau badana. Elda taudia ese ia bapatiso vadaeni natuna ta ena kerere idia tahua neganai, iena bapatiso tama sina idia noho danu be namo. Hahemaoro komiti ida idia gaukara hebou be namo, to namo lasi edia natuna ese do ia abia sisiba idia koua. Hahemaoro komiti ese tadikaka bona taihu badadia edia kerere idia hamaoromaoroa hegeregerena, idia ura kerere tauna do idia sisiba henia bona idia durua dala maorona ia badinaia lou totona. To, bema unai natuna ia helalo-kerehai lasi, orea murimuri ai do idia atoa.

BAPATISO LASI PABLISA IA KERERE NEGANAI

³⁸ To dahaka do ia vara bema bapatiso lasi pablisa idia kerere? Idia be bapatiso lasi Witnes taudia dainai, orea murimuri ai do idia atoa lasi. Reana Baibel ena taravatu idia lalopararalaia lasi dainai, mai hebogahisi ida sisiba do idia henia bona idia durua “edia raka daladia” idia hamaoromaoroa totona.​​—Heb. 12:13.

³⁹ Bema elda rua ese bapatiso lasi pablisa idia hereva henia bona idia durua murinai ia helalo-kerehai lasi, kongrigeisen idia hadibaia be namo. Hadibaia hereva kwadogina ta do idia gwauraia, idia gwau: “Hari [Ladana] be bapatiso lasi pablisa lasi.” Kongrigeisen taudia ese unai tauna be murimuri tauna ta bamona do idia kara henia. Ena be unai kerere tauna be orea murimuri ai idia atoa lasi, to namona be Keristani taudia ese ia ida edia hebamo karana idia naria namonamo. (1 Kor. 15:33) Ia amo haroro ripoti ta do idia abia lasi.

⁴⁰ Gabeai, idia kokia bapatiso lasi pablisa be do ia ura pablisa ai ia lao lou. Unai ia vara neganai, elda rua be ia danu do idia herevahereva bona iena tubu karana hereva momokani dekenai do idia tahua. Bema hereva momokani dekenai ia goada, hadibaia hereva kwadogina ta do idia gwauraia, idia gwau: “Hari [Ladana] be bapatiso lasi pablisa ai ia lao lou.”

IEHOVA ESE MAINO BONA TOMADIHO GOEVANA IA HANAMOA

⁴¹ Hari inai negai Dirava ena kongrigeisen idia bamoa taudia be Iehova ese ena taunimanima dekenai ia henia gau namodia momo idia moalelaia diba. Iseda abidadama hagoadaia gaudia be momo herea bona ita dekenai hereva momokani ena ranu goevana be ia aru badabada noho. Danu, Iehova ese ena tiokratik dalana amo ita ia naria namonamo, Keriso ena kwara dagina henunai. (Sal. 23; Isa. 32:1, 2) Ita be Iehova tomadiho henia taudia huanai ita noho dainai, inai tanobada ena dina gabedia ai idia vara hekwakwanai dainai ita gari lasi.

⁴² Kongrigeisen ena maino bona goeva karana ita durua totona, ita ese Basileia ena hereva momokani ena diari ita halasia noho. (Mat. 5:16; Iam. 3:18) Iehova ese ita do ia hanamoa dainai, do ita moale badina momo ese Iehova idia dibaia bona ita ida iena ura do ita karaia noho.