Basileia Haroro Ripoti
Witness Taudia ese Edia Lalohadai Idia Hahedinaraia France Dekenai
FRIDAY, January 29, 1999, ena daba hora ginigunadia amo ela bona Saturday bona Sunday ai, Iehova ena Witness taudia France dekenai ese dala ai bena murinai ruma ta ruma ta ai mai edia ura bada ida pepapepa ladana People of France, You Are Being Deceived! ena kopi milioni 12 idia hariharilaia. Dahaka dainai unai gaukara badana idia karaia?
Paris dekenai, unai Friday daba ai, niuspepa taudia dekenai unai gaukara badana ena badina idia gwauraia. Witness tauna ta ia gwau: “Hari dina ai, ai ura taunimanima dekenai sibona emai kara ai hahedinaraia bona aiemai ladana idia hadikaia herevadia ai koua. Emai kara idia maumauraia herevadia be ai laloa bada lasi, to ai ese hereva koikoidia bona aiemai ladana idia hadikaia herevadia do ai kamonai henidia noho lasi.”
Ena be France lalonai, Keristani tomadiho badana ihatoina be Iehova ena Witness taudia, to edia natudia momo herea be sikuli dekenai idia gwau dika henidia bona hahisidia. Taunimanima badadia dekenai taunimanima ese hagaria herevadia idia gwauraia bona idia ese edia moni gaukara idia haboioa edia tomadiho dainai. Hoa gauna be, tomadiho kontribusen amo idia davaria monina dekenai danu be takisi monina 60 pesen idia gwauraia. Unai gaukara badana ena anina unai dadaraia kava karana dekenai be dahaka?
Unai pepapepa ia gwau: “France lalonai Iehova ena Witness taudia 250,000 bona edia bamodia ese edia Keristani tomadihona, France dekenai lagani 1900 amo ia noho gauna, be lagani 1995 amo taunimanima ese koikoi dalana ai dika idia havaraia tomadiho orea idaudia ida idia gwauraia hebou karana be idia GWAURAIA DIKA. . . . Taunimanima ese idia karaia hahisia loulou karadia be idia GWAURAIA DIKA.” France ai Iehova ena Witness taudia edia ladana hadikaia samania koikoi herevadia bona taunimanima vairanai edia ladana idia hadikaia taudia edia koikoi daladia idia hahedinaraia. Unai pepapepa ena hereva dokona ai ia gwau: “Hari, Europe lalonai Iehova ena Witness taudia milioni rua mai kahana idia noho. Idia ese Baibel ena hereva idia badinaia karana amo edia tano edia Gavamani ena taravatu idia matauraia. France taudia e, unai be gau momokanidia. Idia be momokani dainai, emai maduna be ai gwauraidia hedinarai.”
Idia Abia Dae Haraga
Dina ginigunana ai pepapepa milioni haida idia henia. Paris sibona dekenai, dina tubua ia abia neganai, Witness taudia 7,000 ese pepapepa milioni 1.3 ia hanaia be taunimanima idia henia vadaeni. Witness taudia momo herea ese dala ai pepapepa idia henia be taunimanima ese guna idia itaia lasi. Nius halasia taudia, nesenel bona gabu idauidau edia niuspepa bona televisen ese unai hadibaia herevana idia abia dae namo herea. Niuspepa ladana Le Progrès de Lyon ia gwau: “Unai gaukara . . . ese idia lalo-pararalaia kerere herevana ta ia hahedinaraia. Lagani 10 gunadia lalonai, inai hereva ‘sect’ . . . ese gau dikana, dika ia havaraia gauna, bona ta ia hadikaia gauna ia hahedinaraia matamaia. . . . Iehova ena Witness taudia be taunimanima hadikaia taudia lasi.”
Iehova ena Witness taudia idia diba taudia ese edia maino karana bona idia ese taunimanima edia mauri dalana idia matauraia bada karana idia laloa bada. Unai dainai, dala dekenai momo ese idia hahedinaraia unai gaukara badana ai idia vareai Witness taudia tausen momo idia laloa bada bona idia hagoadaia. Unai pepapepa idia abia dainai taunimanima ese haraga herea telefon, fax, bona revareva amo edia tanikiu herevana idia gwauraia. Mai anina bada gauna be, lalo-momokani taudia dekenai dala ia kehoa, Witness taudia edia sivarai momokani, anina lasi bona koikoi herevadia amo ia idau sivaraina idia kamonai totona, bona edia abidadama idia gwauraia dika taudia ese idia ura henia bada gauna dekenai edia hemami idia hahedinaraia diba totona.