Iehova Ena Ura Idia Karaia

Harihari Gaudia amo Tomadiho Goevana Idia Durua

ISRAELA taudia ese Iehova ena hahemauri siahuna be edia matana amo idia itaia vadaeni. Hoa dalanai Davara Kakakaka ia parara, bena tano kaukauna amo idia raka hanai bona Aigupito ena tuari taudia amo idia heau mauri karana be idia itaia. Davara ena kahana dekenai idia ginidae neganai, ranu ese edia inai taudia ia hamasedia be idia itaia. Iehova ese unai Israela taudia ia hamauria!​—Esodo 14:21-​31.

To madi, Israela taudia haida be edia Dirava ese idia totona ia karaia gaudia be idia laloa bada lasi. Mose be Sinai Ororona ai ia do noho neganai, idia ese edia golo herahera gaudia be Arona dekenai idia henia bona idia hamaoroa kaivakuku ta do ia karaia, idia tomadiho henia totona. Mose ia giroa lou neganai, ia davaria unai gwau-edeede taudia hutuma be idia aniani, inuinu, mavaru, bona golo boromakau ta idia tomadiho henia! Iehova ena oda dainai, taunimanima 3,000 bamona​—reana unai gwau-edeede karana idia gunalaia taudia​—be idia hamasedia. Unai dina dekenai, Dirava ena taunimanima ese gau badana ta idia dibaia, Iehova sibona idia badinaia be gau badana.​—Esodo 32:​1-6, 19-​29.

Unai kara ia vara bena nega sisina murinai, Mose be Iehova ena hahegani hegeregerena ia hegaegae palai dubuna ia haginia totona, idia huaia loaloa diba tomadiho kalagana unai. Unai kalaga idia haginia diba totona, namona be kohu namodia bona diba bada gaukara taudia ia abia be namo. Edeseni amo do ia abia diba? Bona unai Baibel sivaraina amo dahaka ita dibaia diba?

Kohu Bona Diba be Harihari Gaudia Bamona Idia Henia

Iehova be Mose ena amo Israela taudia ia hagania, ‘Lau Iehova dekenai harihari gauna do umui henia. Iehova ena harihari gaudia idia ura idia henia taudia ibounai ese do idia mailaia.’ Edena bamona harihari gaudia idia henia be namo? Mose ese ia gwauraidia gaudia be golo, siliva, auri laboralabora, dabua, animal edia kopina, au, bona dava bada nadidia.​—Esodo 35:​5-9.

Israela taudia ese kohu namodia momo be unai bamona idia hariharilaia diba. Oi laloatao, Aigupito idia rakatania neganai, idia be golo bona siliva amo idia karaia gaudia momo idia abia bona dabua momo danu. Momokani, “Aigupito taudia edia kohu idia kokia lao.”a (Esodo 12:​35, 36) Guna, Israela taudia ese edia herahera gaudia be mai edia ura ida idia henia tomadiho koikoi totona kaivakuku ta idia karaia. Hari be mai edia ura ida tomadiho momokanina do idia durua, a?

Mani oi laloa, Mose be idia dekenai ia hamaorodia lasi harihari gaudia hida do idia henia be namo, bona edia kerere eiava edia kara dika dainai idia hemarai karana amo idia veria lasi harihari gaudia idia henia totona. To, ia ese “harihari gaudia idia ura idia henia taudia” ia noia sibona. Mose ia ura lasi Dirava ena taunimanima do ia doria. Ia diba momokani idia ta ta be idia henia diba hegeregerena harihari gaudia do idia henia.​—2 Korinto 8:​10-​12 itaia.

To, harihari kohudia sibona amo palai rumana idia haginia be hegeregere lasi. Danu, Iehova ese Israela taudia ia hamaoroa, ia gwau: “Gaukara diba momo taudia, emui huanai idia noho diba bada taudia ese do idia haboua, bona lau Lohiabada ese lau oda hegeregerena, inai gau ibounai do umui karaia.” Oibe, unai palai rumana haginia totona gaukara idia diba momo taudia idia noho be namo. Momokani, “gaukara idauidau”​—au, auri, bona dava bada nadidia​—idia gaukaralaia diba taudia idia noho be namo unai palai rumana do idia haginia totona. Oibe, Iehova ese gaukara idia diba taudia do ia hakaua, bona unai gaukara ibounai idia haorea neganai idia ese ia do idia hanamoa bada be maoro.​—⁠Esodo 35:​10, 30-​35; 36:​1, 2.

Israela taudia ese unai boiboi herevana, edia kohu bona edia diba idia gaukaralaia totona be idia abia dae mai edia ura ida. Baibel ia gwau: “Bona harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona. Idia ese ma Palai Dubu lalonai do idia noho gaudia bona kohu, bona dabua helagadia karaia gaudia idia mailaia. Idia ura harihari gaudia idia henia taudia, tatau bona hahine ese golo gaudia idauidau idia mailaia.”​—Esodo 35:​21, 22.

Ita Dibaia Gauna

Hari inai negai, Dirava ena Basileia ena sivarai namona idia harorolaia gaukarana badana be taunimanima edia ura hegeregerena idia henia harihari gaudia dainai idia hagugurua diba. Nega momo, unai harihari gauna be moni. Nega ma haida, Keristani tadikaka bona taihu be edia diba idia gaukaralaia Kingdom Hall, Assembly Hall, bona brens opesi haginia gaukarana idia durua totona. Bena tanobada hegegemadai Betele rumadia handred momo lalonai gaukara idia karaia, unai gaukara totona taunimanima mai edia diba idauidau idia noho be namo. Namona be edia ura hegeregerena unai gaukara totona idia sibona idia henia taudia ese idia laloatao Iehova be edia gaukara badana ena anina do ia laloaboio lasi!​—⁠Heberu 6:​10.

Unai be momokani Keristani hesiai gaukara idia karaia taudia ta ta dekenai danu. Ita ibounai idia hagoadaia namona be iseda nega ita gaukaralaia namonamo mai eda lalo-goada ida unai haroro gaukara ita karaia diba totona. (Mataio 24:14; Efeso 5:​15-​17) Unai bamona idia karaia taudia haida be ful-taim haroro gaukara idia karaia taudia, eiava painia taudia. To ma haida be edia noho dalana dainai, painia taudia bamona haroro gaukara lalonai nega bada idia gaukaralaia diba lasi. To, idia danu ese Iehova idia hamoalea. Palai dubuna idia haginia lalonai hegeregerena, Iehova be ia gwau lasi ta ta be edena bamona harihari gauna do ia henia be namo. To, ia ura ita ta ta ese ia do ita badinaia mai iseda kudouna, lalona, bona goada ibounai ida. (Mareko 12:30) Bema unai bamona ita karaia noho, ita diba iseda harihari gauna amo tomadiho goevana ita durua dainai, ia ese ita do ia hanamoa bada.​—Heberu 11:⁠6.

[Footnote]