Baibel ese Inai Nega Ena mai Anina Bada Henanadai Edia Haere Ia Henia

BAIBEL be mai anina bada hari inai negai, a? Bema unai henanadai ena haere be, oibe, namona be unai idaunegai ia noho bukana ese ena duahia taudia dekenai hari inai negai idia vara gaudia dekenai heduru herevadia ia henia diba. Baibel ese inai negai ena mai anina bada gaudia dekenai sisiba namona ia henia, a?

Namona be hari inai negai idia vara gaudia rua ita laloa. Unai ita karaia neganai, Baibel ena hereva unai gaudia dekenai do ita tahua.

Dahaka Dainai Dirava ese Hisihisi Ia Koua Lasi?

Hari, tanobada ai idia vara gaudia dainai, momo ese idia gwauraia henanadaina be: Dahaka dainai Dirava ese kerere lasi taudia edia hisihisi ia koua lasi? Taunimanima momo herea be taravatu utua karadia dikadia, kara gageva, bese idauna hamasea ore karadia, sibodia dekenai idia vara dika, bona dika ma haida amo hisihisi idia abia dainai, unai be henanadai badana.

Hegeregere, June 1998 ai Germany ena not kahana dekenai trein ta be nesehanai ta ia bampaia, bona guia taudia 100 mai kahana idia mase. Mase taudia idia sekea bona bero taudia idia durua diba bada medikol gaukara taudia bona lahi habodoa taudia, lagani momo lalonai unai bamona gaukara idia karaia taudia, danu be unai dika dainai idia lalohisihisi bada. Evangelical Church ena bisop ta ia henanadai: “Dirava lalokauna e, Dahaka dainai inai bamona ia vara?” Unai bisop be sibona unai ia haerelaia lasi.

Nega momo ia hedinarai bema kerere lasi taudia be dika ta idia davaria bona ia vara ena badina idia diba lasi, nega haida idia badu. Unai bamona ia vara neganai, Baibel ese heduru ia henia diba, badina Baibel ese dahaka dainai kerere lasi taudia be dika bona hisihisi idia davaria ia hahedinaraia.

Iehova Dirava ese tanobada bona tanobada latanai gaudia ibounai ia havaraia neganai, ia ura lasi taunimanima be dika bona hisihisi do idia davaria. Dahaka dainai unai ita abia dae diba? Badina havaraia gaukarana ia hadokoa murinai, “Dirava ese ia karaia vadaeni gaudia ibounai ia itaia, bona momokani idia be namo herea.” (Genese 1:31) Oi sibona oi nanadaia, ‘Bema lau be gau dikana ta lau itaia, do lau gwau ia be “namo herea,” a?’ Lasi momokani! Unai hegeregerena, Dirava ia gwau gau ibounai be “namo herea” neganai, tanobada latanai dika ta be lasi. Vadaeni, dika be edena negai bona edena bamona ia matamaia?

Iseda tama sina ginigunadia, Adamu bona Heva, ia havaraia bena nega sisina murinai, lauma tauna mai ena siahu bada ese hahine ia hereva henia bona Iehova ena hereva ena momokani bona ia lohia ena maoro ia henanadailaia. (Genese 3:​1-5) Unai lauma tauna, Satani Diabolo, be gabeai ia gwau taunimanima be dika idia davaria neganai Dirava do idia rakatania. (Iobu 2:​1-5) Unai ia vara neganai, Iehova be dahaka ia karaia? Ia ese nega ia henia bena unai amo do ia hedinarai goevagoeva taunimanima be ia idia rakatania neganai, sibodia edia raka dalana idia naria namonamo diba lasi. (Ieremia 10:23) Dirava ese ia havaraia gaudia be ena taravatu bona hakaua herevadia idia badinaia lasi neganai, kara dika ia vara bona unai ese hisihisi ia havaraia. (Hadibaia Tauna 8:⁠9; 1 Ioane 3:4) Ena be unai dika idia vara, to Iehova ia diba taunimanima haida ese ia do idia badinaia goadagoada noho.

Eden lalonai unai gwau-edeede ia vara negana amo ema bona hari, lagani 6,000 bamona idia hanaia vadaeni. Unai be daudau herea, a? Iehova be lagani handred gunanai Satani bona ena durua taudia ia haoredia diba. To, namona be ia naria ela bona ia lohia ena maoro bona taunimanima be ia idia badinaia noho idia hedinarai goevagoeva guna be namo, ani? Hari inai negai, kota idia karaia daladia be unai bamona, daika be maoro bona daika be kerere idia hamomokania totona, lagani momo lalonai tahua gaukara idia karaia, ani?

Iehova bona taunimanima ese idia davaria hepapahuahu herevana​—⁠guba bona tanobada ibounai lohiaia karana bona taunimanima edia Dirava badinaia karana dekenai be mai anina bada​—⁠dainai, Dirava ese nega ia henia be aonega bada karana! Hari ita diba goevagoeva dahaka ia vara bema taunimanima ese Dirava ena taravatu idia dadaraia bona sibodia edia mauri idia biagua. Dika bada herea ia vara. Bona unai dainai hari inai negai kerere lasi taudia momo be hisihisi idia davaria.

To, ita moale badina Dirava ena Hereva ia hahedinaraia dika be do ia noho hanaihanai lasi. Kahirakahira Iehova ese dika bona dika idia havaraia taudia do ia haorea. Aonega Herevadia 2:​22, ia gwau: “To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.” To, Dirava idia abidadama henia taudia be inai bamona nega idia naria noho, “mase bona lalohisihisi, bona taitai, bona hisihisi be do idia ore momokani,” bona unai nega be kahirakahira do ia mai.​—⁠Apokalupo 21:⁠4.

Vadaeni, Baibel ese ia hahedinaraia goevagoeva dahaka dainai kerere lasi taudia be hisihisi idia davaria. Ita ia hamaoroa danu dika bona hisihisi be kahirakahira do idia ore. To, mauri ena nega aukadia ita davaria lalonai, mai anina bada henanadai ma ta ena haere ita abia be namo.

Mauri Ena Anina be Dahaka?

Reana hari inai nega lalonai, guna bamona lasi, taunimanima be mauri ena anina idia ura idia diba. Momo be sibodia idia nanadaia, ‘Dahaka dainai lau mauri noho? Egu mauri lalonai badina namona be edena bamona lau davaria diba?’ Gau idauidau idia vara dainai idia ese unai henanadai idia gwauraia.

Reana dika ta ese tau ta ena mauri ia hadikaia. Hegeregere, lagani 1998 ai, Bavaria, Germany dekenai, ena mauri lagani be 12 kekeni maragina ta be haida ese idia henaoa bona idia hamasea. Lagani ta ia ore murinai, ena sinana ia gwau dina ta ta lalonai mauri ena anina ia tahua​—⁠to ia davaria lasi. Matamata taudia haida be mauri ena anina idia laloa. Idia ese noho namona, bona mauri mai ena anina, bona haida ese idia lalokau henidia ena hemami idia tahua, to kara koikoi bona kara gageva sibona idia davaria. Haida be edia moni gaukara idia laloa bada, to idia davaria siahu, ladana bada, bona kohu ese idia mauri noho ena badina namona ta ia henia lasi.

Herevana, dahaka dainai tau ta ese mauri ena anina ia tahua, to haere maorona ia abia be namo. Baibel ese namo bada ia henia diba unai gauna dekenai danu. Ia hahedinaraia Iehova be mai ena palani Diravana, ia karaia gaudia ibounai be badina namona dainai ia karaia. Oi ai nanadaia, Oi be badina ta lasi to ruma do oi haginia kava, a? Reana lasi, badina ruma haginia gaukarana dekenai moni bada herea do oi negea bona hua haida eiava lagani haida lalonai do oi karaia ore. Ruma oi haginia badina oi eiava ma ta ese do ia noholaia. Iehova be unai bamona ita laloa diba. Ia be mai badina dainai tanobada bona ia latanai idia noho gaudia ia havaraia, ia hekwarahi kava lasi. (Heberu 3:4 itaia.) Ena ura tanobada totona be dahaka?

Isaia ena peroveta herevana ese Iehova ia herevalaia ia gwau “ia sibona be Dirava! Ia ese tanobada ia karaia.” Oibe, ia ese “tanobada ia karaia, goada herea. Ia ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Isaia 45:18) Oibe, Iehova ese tanobada ia karaia negana amo ema bona hari, ena ura be taunimanima ese do idia noholaia. Salamo 115:16 ia gwau: “Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.” Baibel ia hahedinaraia unai, Iehova be tanobada ia karaia kamonai taudia ese do idia noholaia bona idia naria totona.​—⁠Genese 1:​27, 28.

Adamu bona Heva edia gwau-edeede karana dainai Iehova ese ena ura ia haidaua, a? Lasi. Edena bamona unai ita hamomokania diba? Mani inai hereva oi laloa: Eden lalonai gwau-edeede ia vara bena lagani tausen momo murinai, Baibel idia torea. Bema Dirava ese ena ura ia haidaua, dahaka dainai Baibel ese unai ia gwauraia lasi? Ia hedinarai goevagoeva badina ena ura tanobada bona tanobada taudia totona ia haidaua lasi.

To unai sibona lasi, Iehova ena ura be do ia moru diba lasi. Isaia amo, Dirava ese unai ia hamomokania: “Lauegu hereva be sinou bona medu bamona. Guba dekena amo idia diho mai, tanobada idia hapariparia totona. Idia ese uiti bona koni idia hatubua daekau. Ma uhe idia havaraia noho, hadohado totona, bona taunimanima do idia ania totona danu. Inai bamona danu, lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”​—⁠Isaia 55:​10, 11.

Dirava Ia Ura Ita Karaia Gauna

Vadaeni, ia hedinarai goevagoeva, Dirava ena ura inai tanobada totona be kamonai taudia ese do idia noholaia ela bona hanaihanai, bona ita diba momokani unai do ia guguru vaitani. Bema ita ura ita be inai tanobada dekenai do idia noho hanaihanai taudia edia huanai, namona be aonega King Solomona ese ia gwauraia herevana do ita badinaia: “Dirava do oi gari henia, bona iena oda do oi badinaia, badina be taunimanima edia gaukara korikori be unai sibona.”​—⁠Hadibaia Tauna 12:13; Ioane 17:⁠3.

Iehova ena ura hegeregerena ita noho ena anina be Dirava momokanina do ita dibaia bona ena taravatu Buka Helaga lalonai do ita badinaia. Bema hari unai ita karaia, paradaiso tanobadana ai do ita noho hanaihanai helarona ita dogoatao diba, unuseniai Dirava bona ia havaraia gaudia idauidau do ita dibaia namonamo karana be do ia doko lasi. (Luka 23:43) Unai be moale bada ia havaraia helarona!

Mauri ena anina idia tahua taudia momo be Baibel amo unai idia tahua bona hari moale bada idia davaria. Hegeregere, tau matamatana ta ladana Alfred be mauri ena anina namona ta ia davaria lasi. Tomadiho oreadia be tuari lalonai idia vareai karana ese ia habadua, bona politikol karadia lalonai kara koikoi bona kara gageva dainai ia lalohisihisi. Alfred ese North America ena Indian taudia dekenai ia lao mauri ena anina ia tahua totona, to mai ena lalohisihisi danu Europe dekenai ia giroa lao. Ia lalo-metau dainai, drag ia ania kava bona miusiki dikadia ia kamonai momo. To gabeai, Alfred ese hanaihanai Baibel ia stadilaia namonamo bena unai ese ia durua, mauri ena anina korikorina ia lalo-pararalaia bona moale ia davaria totona.

Iseda Dala Ia Hadiaria Lamepa Namona

Vadaeni, Baibel be edena bamona ita gwauraia diba? Ia be mai anina bada hari, a? Oibe, ia be mai anina bada, badina inai negai idia vara gaudia dekenai heduru herevadia ia henia. Baibel ia hahedinaraia dika be Dirava ese ia havaraia lasi bona ita ia durua, badina namona iseda mauri lalonai ita davaria totona. Bona danu, hari inai negai mai anina bada gaudia ma haida dekenai Baibel be mai ena hereva haida. Dirava ena Hereva ese headava, natuna naria dalana, taunimanima noho hebou namonamo karana, bona helaro mase taudia totona ia herevalaia.

Bema oi be Baibel ena hereva oi do tahua namonamo lasi, unai bamona oi karaia be namo. Oi davaria Baibel ena hahekau herevadia mauri dekenai be mai anina bada momokani neganai, reana emu hemami be salamo torea tauna bamona, ia be Iehova Dirava ena hakaua herevadia ia abia dae bona inai ane ia abia: “Lohiabada e, oiemu hereva lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.”​—⁠Salamo 119:105.

[Picture on page 6]

Dirava ese kerere lasi taudia edia hisihisi ia koua lasi ena badina oi diba, a?

[Picture on page 7]

Oi ese mauri mai ena badina oi moalelaia diba