“Ladana Maragi Momokani Tauna” be “Bese Badana” ai Ia Lao
“Ladana maragi momokani tauna mai ena famili, be bese badana mai goadana danu do idia lao.”—ISAIA 60:22.
1, 2. (a) Hari inai negai dibura ese tanobada ia koua ena badina be dahaka? (b) Edena dala ai Iehova ena diari ese ena taunimanima ia hadiaria?
“BESE idauidau be dibura ese do ia koudia, to Lohiabada ena diari ese Ierusalema do ia hadiaria, bona Lohiabada ena hairaina, be Ierusalema dekenai do ia hedinarai.” (Isaia 60:2) Unai hereva ese lagani 1919 amo ema bona hari idia vara gaudia ia hahedinaraia goevagoeva. Kerisendom ese King Iesu Keriso, “tanobada ena diari,” ena noho negana ena toana ia dadaraia. (Ioane 8:12; Mataio 24:3) Satani, “tanobada ena dibura lohiadia” edia lohia badana, “ena badu dikadika” dainai, taunimanima edia sivarai lalonai lagani 1900 murina negana be kara dika bona hadikaia kara badadia edia nega. (Apokalupo 12:12; Efeso 6:12) Taunimanima be lauma dalanai dibura lalonai idia noho.
2 To, diari be hari ia do hedinarai noho. Iehova ena diari ese ena hesiai taudia, horoa orena taudia, ia hadiaria, idia be iena guba “hahine” ena gaukara tanobada dekenai idia karaia taudia. (Isaia 60:1, NW ) Lagani 1919 ai Babulonia ena igui idia rakatania murinai, Dirava ena hairai idia hahedinaraia bona ‘taunimanima vairanai edia diari idia hahedinaraia.’ (Mataio 5:16) Unai taudia ese lagani 1919 bona lagani 1931 huanai, Babulonia ena lalohadai oredia idia dadaraia dainai Basileia ena diari ia hedinarai badabada. Edia namba be ia bada daekau bona tausen momo ia abia badina Iehova ese ena gwauhamata ia hagugurua, ia gwau: “To umui Israela taudia, do mauri noho taudia be do lau haboua. Lau ese umui do lau haboua, mamoe naria tauna ese iena mamoe edia magu lalonai ia haboudia lou bamona. Bona Israela ena tano be taunimanima dekenai do ia honu lou, tano ta mai ena mamoe momo bamona.” (Mika 2:12) Lagani 1931 ai, inai ladana Iehova ena Witnes taudia idia abia dae neganai, Iehova ena hairai iena taunimanima latanai be ia hedinarai goevagoeva.—Isaia 43:10, 12.
3. Edena dala ai ia hedinarai Iehova ena diari ese horoa taudia sibona ia hadiaria lasi?
3 Iehova ena diari ese “orea maragi” taudia oredia sibona ia hadiaria, a? (Luka 12:32) Lasi. The Watch Tower, September 1, 1931 gauna, ese orea ma ta ia hahedinaraia. Esekiela 9:1-11 ena anina ia gwauraia hedinarai namonamo bona ia hahedinaraia unai siri lalodiai tau mai ena toretore gauna be horoa orena taudia ia laulaulaia. Unai “tau” ese daidia edia baguna ai maka ia atoa? “Mamoe idaudia” taudia edia, tanobada paradaisona ai mauri hanaihanai helarona idia abia taudia unai. (Ioane 10:16; Salamo 37:29) Lagani 1935 ai, idia lalo-parara unai “mamoe idaudia” oreana be aposetolo Ioane ese matahanai lalonai ia itaia “hutuma bada herea, . . . bese idauidau” (NW ) amo. (Apokalupo 7:9-14) Lagani 1935 amo ema bona hari, unai hutuma bada herea haboua gaukarana idia laloa bada.
4. Isaia 60:3 ese ia herevalaia “king taudia” bona “bese idauidau” taudia be daidia?
4 Unai haboua gaukarana be Isaia ena peroveta herevana ese ia gwauraia, ia gwau: “Bese idauidau ese, oiemu diari dekenai do idia mai, bona king taudia do idia mai, idia ese oiemu dina matamata ena daba rere do idia itaia gwauraia.” (Isaia 60:3) Unai siri ese ia gwauraia “king taudia” be daidia? Idia be tanobada ai idia do noho 144,000 taudia, idia be Iesu Keriso ida Basileia do idia abia bona haroro gaukarana idia gunalaia taudia. (Roma 8:17; Apokalupo 12:17; 14:1) Hari inai negai, unai horoa orena taudia edia namba be “bese idauidau” taudia edia namba ese ia hanaia momokani, idia be tanobada helarona idia abia bona Iehova ese idia do ia hadibaia totona ia dekenai idia lao bona ma haida idia boiria unai bamona do idia karaia totona.—Isaia 2:3.
Iehova Ena Lalo-Goada Hesiai Taudia
5. (a) Dahaka ese ia hahedinaraia Iehova ena taunimanima idia manoka lasi? (b) Lagani 1999 lalonai edena tano dekenai pablisa taudia edia namba ia bada ia lao? (Rau 17-20 dekenai ia noho mauana itaia.)
5 Iehova ena Witnes taudia hari inai negai ese lalo-goada idia hahedinaraia goevagoeva! Bona ena be hekwakwanai momo idia davaria, to lagani 2000 ia mai kahirakahira lalonai idia manoka lasi. Idia ese Iesu ena hahegani idia do laloa bada, ia gwau: “Bese ibounai be diba tahua taudia do umui halaoa.” (Mataio 28:19, 20) Lagani 1900 murina negana ena hesiai lagani ginigabena lalonai idia haroro goadagoada pablisa taudia edia namba be ia bada daekau ela bona 5,912,492. Idia ese hora 1,144,566,849 idia gaukaralaia ma haida dekenai Dirava bona ena palani idia herevalaia totona. Idia ese nega 420,047,796 kamonai taudia idia lou henia bona davana lasi Baibel stadi 4,433,884 idia karaia. Unai be mai lalo-goada ida idia karaia hesiai gaukara ena sivarai namona!
6. Painia taudia totona dahaka gau matamatana idia atoa, bona unai dainai dahaka ia vara?
6 January gunana ai, Hakaua Oreana be painia taudia ese do idia hagugurua hora matamatadia ia atoa. Momo be unai dainai regula eiava heduru painia gaukara idia hamatamaia. Hegeregere, lagani 1999 ena hua ginigunadia hani lalonai, Netherlands ena brens opesi ese idia abia regula painia aplikesen pepadia edia namba ese lagani gunana ai unai nega tamona lalonai idia abia aplikesen edia namba be nega hani ia hanaia. Ghana brens ena ripoti ia gwau: “Painia taudia ese do idia hagugurua hora matamatadia idia atoa murinai, emai regula painia edia namba ia bada ia lao noho.” Hesiai lagani 1999 ai, tanobada hegegemadai painia taudia edia namba ia bada daekau ela bona 738,343—unai be “kara namodia” idia goadalaia ena toana namona ta.—Tito 2:14.
7. Edena dala ai Iehova ese ena hesiai taudia edia gaukara goada karana ia hanamoa?
7 Iehova ese unai gaukara goada karana ia hanamoa, a? Oibe. Isaia ena hereva amo ia gwau: “Oiemu matana do oi negea, do oi itaia, oiemu bese taudia be idia haboua noho, oi dekenai idia giroa mai noho! Oiemu natuna memero be daudau dekena amo idia raka mai, bona oiemu natuna kekeni be dagira dekenai idia huaia mai noho.” (Isaia 60:4) Idia haboua vadaeni horoa “memero” bona “kekeni” be mai edia lalo-goada ida Dirava idia hesiai henia noho. Bona hari, tano bona motumotu 234 ai Iesu ena mamoe idaudia idia haboua, Iehova ena horoa “memero” bona “kekeni” ida idia gaukara totona.
“Kara Namodia Ibounai”
8. Iehova ena Witnes taudia ese dahaka “kara namodia” idia karaia?
8 Keristani taudia edia maduna be Basileia ena sivarai namona idia harorolaia bona kamonai taudia idia durua hahediba taudia ai idia lao totona. Bona idia ‘hegeregere momokani kara namodia ibounai do idia karaia.’ (2 Timoteo 3:17) Unai dainai, mai edia lalokau ida edia ruma bese idia naria, heabidae karana idia hahedinaraia, bona gorere taudia idia vadivadi henia. (1 Timoteo 5:8; Heberu 13:16) Bona volantia taudia ese gaukara idauidau idia karaia, hegeregere Kingdom Hall idia haginidia—unai gaukara be edia toana ia hahedinaraia danu. Togo ai, Kingdom Hall ta idia haginia murinai, sene dubuna ta ena gunalaia taudia idia ura diba dahaka dainai Iehova ena Witnes taudia ese edia ruma idia haginia diba to dubu ma haida ese taunimanima dekenai moni idia henia unai gaukara idia karaia totona! Togo ena brens ia gwau Kingdom Hall namodia idia haginia gaukarana ese unai gabu ia hanamoa bada dainai taunimanima idia ura Kingdom Hall do idia haginia gabudia ai ruma idia rentaia eiava haginia.
9. Dika idauidau idia vara negadiai, Iehova ena Witnes taudia ese dahaka idia karaia?
9 Nega haida, dala ma ta ai gaukara namona idia karaia. Hesiai lagani gunana lalonai, tano momo dekenai dika idauidau idia vara kava, bona nega momo heduru henia totona idia mai taudia ginigunadia be Iehova ena Witnes taudia. Hegeregere, Hurrican Mitch ese Honduras ena kahana bada herea ia hadikaia. Karaharaga, brens ese heduru henia komiti haida ia haginia. Honduras bona tano ma momo ai Witnes taudia ese dabua, aniani, muramura, bona gau ma haida idia henia. Regional Building Committee ese edia diba idia gaukaralaia ruma idia haginidia lou totona. Bena nega sisina murinai, dika idia davaria tadikaka idia durudia edia dina ta ta gaukara idia karaia lou totona. Ecuador dekenai, abata badana ese ruma haida ia hadikaia neganai, Iehova ena Witnes taudia ese edia tadikaka idia durudia. Gavamani ena ofesa tauna ta ese edia gaukara namona ia itaia neganai, ia gwau: “Bema inai grup be egu gaukara taudia, hoa karadia lau karaia diba! Umui bamona taudia be tanobada hegegemadai idia noho be namo.” Unai bamona kara namodia ese Iehova Dirava idia hanamoa bona idia hamomokania ita be “Dirava totona ita treinini noho . . . bona inai kara ese ita do ia durua bada herea.”—1 Timoteo 4:8.
“Ori Bamona Idia Heau Noho”
10. Ena be horoa taudia edia namba ia maragi ia lao, to dahaka dainai Iehova ena ladana idia gwauraia goadagoada noho?
10 Iehova ia henanadai: “Inai lagatoi, ori bamona idia heau noho be daika ena? Idia be manu, edia ruma dekenai idia giroa lou bamona. Idia be lagatoi badadia, tano daudau dekena amo idia mai noho gaudia. . . . Dirava ena bese taudia [“natuna memero,” NW ] be edia gabu korikori dekenai idia mailaia lou . . . Idau bese taudia ese, oiemu magu do idia haginia lou, bona edia king taudia ese, oiemu hesiai gaukara do idia karaia.” (Isaia 60:8-10) Iehova ena “diari” dekenai idia mai taudia ginigunadia be iena “memero,” horoa Keristani taudia unai. Murinai idia mai taudia be “idau bese taudia,” hutuma bada herea taudia, edia horoa tadikaka idia badinaia mai kamonai ida, bona idia murinai sivarai namona idia harorolaia. Unai dala ai, ena be horoa taudia edia namba ia maragi ia lao, to tanobada hegegemadai Iehova ena ladana idia gwauraia hedinarai goadagoada noho.
11. (a) Dahaka ia do vara noho bona unai dainai lagani 1999 ai dahaka ia vara? (b) Lagani 1999 ai edena tano ai bapatiso taudia edia namba ia bada? (Rau 17-20 dekenai ia noho mauana itaia.)
11 Unai dainai, ‘edia ruma dekenai idia giroa lou manudia bamona,’ taunimanima milioni momo be Keristani kongregesen lalonai noho gabuna namona idia davaria. Lagani ta ta iboudiai handred tausen momo ese edia namba idia habadaia, bona dala ia kehoa noho ma momo do idia vareai totona. Isaia ia gwau: “Dina bona hanuaboi oiemu magu iduara be idia kehoa noho, vadaeni bese idauidau edia king taudia ese, oi dekenai edia kohu do idia abia vareai.” (Isaia 60:11) Lagani gunana ai, 323,439 idia bapatiso Iehova dekenai edia gwauhamata hahedinaraia totona, bona ia ese magu iduara ia do koua lasi. “Bese ibounai edia kohu namodia,” hutuma bada herea taudia unai, be unai iduara amo idia do vareai mai. (Hagai 2:7) Dibura idia ura rakatania taudia ibounai be idia vareai diba. (Ioane 12:46) Namona be unai bamona taudia ese hanaihanai unai diari do idia laloa bada!
Dagedage Lalonai Idia Gari Lasi
12. Edena dala ai dibura idia ura henia taudia ese diari idia habodoa toho?
12 Dibura idia ura henia taudia ese Iehova ena diari idia ura henia lasi. (Ioane 3:19) Idia haida ese unai diari idia habodoa toho danu. Unai ita hoalaia lasi. Iesu, “diari momokani, taunimanima ibounai hadiaria totona,” be ena bese taudia ese idia kirikirilaia, idia dagedage henia, bona dokonai idia hamasea. (Ioane 1:9) Lagani 1900 amo ema bona hari, Iehova ena Witnes taudia ese Iehova ena diari idia hahedinaraia lalonai, taunimanima ese idia kirikirilaidia, dibura lalonai idia negedia, edia gaukara idia taravatua, bona idia hamasedia danu. Vanegai laganidia lalonai, dagedage taudia ese Dirava ena diari idia hahedinaraia taudia samania hereva koikoidia be niusi lalonai idia halasia. Haida edia ura be taunimanima idia laloa Iehova ena Witnes taudia be dika idia havaraia oreana bona edia gaukara idia koua eiava idia taravatua be namo. Unai bamona dagedage taudia idia kwalimu, a?
13. Niusi halasia taudia amo iseda gaukara herevalaia maoromaoro karana amo dahaka ia vara?
13 Lasi. Nega haida, Iehova ena Witnes taudia ese niusi halasia taudia amo hereva momokani idia hahedinaraia. Unai dainai, Iehova ena ladana be niuspepa bona magasin idauidau bona reidio bona televisen dekenai ia hedinarai goevagoeva. Unai ese haroro gaukara ia durua bada. Hegeregere, Denmark dekenai, nesenel televisen steiseni ese program ladana “Denmark taudia edia abidadama ia manoka ia lao ena badina” ia halasia. Iehova ena Witnes taudia bona ma haida idia henanadai henidia. Gabeai, unai program ia itaia hahine ta ia gwau: “Ia hedinarai goevagoeva daidia be Dirava ena lauma idia abia.” Ia ida stadi idia hamatamaia.
14. Nega daudau lasi murinai, dagedage taudia be dahaka do idia diba bena do idia hemarai?
14 Iehova ena Witnes taudia idia diba inai tanobada dekenai taunimanima momo ese idia do idia dagedage henia. (Ioane 17:14) To, Isaia ena peroveta herevana ese idia ia hagoadaia, ia gwau: “Ierusalema e, oi idia hisihisi henia taudia edia natudia be do idia mai, bona oiemu vairana dekenai do idia tui diho. Guna oi dekenai idia badu taudia ibounai ese, oiemu aena dekenai do idia tomadiho. Idia ese oi, Ierusalema, do idia gwauraia, ‘Lohiabada ena Hanua Badana, Siona, Israela ena Dirava Helagana ena Hanua Badana.’ ” (Isaia 60:14) Nega daudau lasi murinai, dagedage taudia do idia hemarai badina do idia itaia idia be Dirava idia dagedage henia. Daika be unai bamona tuari ai ia kwalimu diba?
15. Edena dala ai Iehova ena Witnes taudia ese ‘bese idauidau edia ratana idia topoa,’ bona unai ena anina edia haroro bona hadibaia gaukarana dekenai be dahaka?
15 Iehova be ma ia gwauhamata, ia gwau: “Oiemu ladana do lau habadaia . . . ela bona hanaihanai.” Bona ia gwau: “Momokani oi ese bese idauidau edia ratana do oi topoa, bona king taudia edia ratana do oi topoa; bona do oi diba momokani lau, Iehova, be emu Hamauria Tauna.” (NW ) (Isaia 60:15, 16) Oibe, Iehova be ena taunimanima edia Hamauria Tauna. Bema ia dekenai idia tabekau, do idia noho “ela bona hanaihanai.” Bona idia ese ‘bese idauidau edia ratana idia topoa,’ anina be gau idauidau idia gaukaralaia tomadiho momokanina durua totona. Hegeregere, taunimanima ese idia karaia kompiuta bona diba siaia daladia matamatadia be aonega dalana ai idia gaukaralaia dainai, Gima Kohorona be gado 121 ai bona Awake! be gado 62 ai nega tamona idia halasia diba. Kompiuta program idauna ta idia havaraia New World Translation Baibel be gado matamatadia dekenai idia hahanaia diba totona, bona ia ese moale bada ia havaraia. Lagani 1999 ai, Croatia gado ai Keristani Greek Revarevadia idia halasia neganai, taunimanima tausen momo be moale dainai idia tai. Tadikaka burukana ta ia gwau: “Nega daudau inai Baibel lau naria noho. Hari maino ai lau mase diba!” New World Translation Baibel, ibounai eiava ena kahana ta, be milioni 100 bamona gado 34 ai idia halasia vadaeni.
Kara Maoromaoro Taravatudia
16, 17. (a) Dahaka dainai Iehova ena kara maoromaoro taravatudia ita badinaia be gau badana, herevana ia be mai ena hekwarahi? (b) Edena haheitalai ese ia hahedinaraia matamata taudia ese tanobada ena miro gaudia idia dadaraia diba?
16 Iesu ia gwau: “Kara dika taudia ibounai ese diari idia ura lasi.” (Ioane 3:20) To, diari lalonai idia noho taudia ese Iehova ena kara maoromaoro taravatudia idia ura henia. Iehova be Isaia amo ia gwau: “Oiemu taunimanima ibounai, be do idia kara maoromaoro.” (Isaia 60:21a) Matabodaga, koikoi, mataganigani, bona hekokoroku bada tanobadana lalonai kara maoromaoro taravatudia badinaia karana be mai ena hekwarahi. Hegeregere, tano haida ai, bisinesi idia heau namonamo dainai karaharaga ta ese kohu sibona ia tahua matamaia diba. To, Paulo be sisiba ia henia, ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia.” (1 Timoteo 6:9) Madi, bema ta ese iena bisinesi karadia lalonai ia vareai momokani dainai mai anina bada gaudia ia dadaraia, hegeregere Keristani hebamo, hesiai gaukara helagana, kara maoromaoro taravatudia, bona iena maduna ruma bese lalonai, unai be dika!
17 Matamata taudia momo dekenai kara maoromaoro taravatudia badinaia karana be auka herea, badina edia bamodia momo ese drag idia ania kava bona matabodaga karadia idia karaia. Suriname dekenai, sikuli ai lagani 14 kekenina ta be toana namo merona ta ese ia boiria idia mahuta hebou totona. Kekeni ese ia dadaraia bona ia hadibaia Baibel ese unai bamona kara headava murimurinai be ia taravatua. Sikuli kekeni ma haida ese ia idia kirikirilaia bona idia doria ena lalona ia haidaua totona, idia gwau iboudiai idia ura unai mero ida idia mahuta hebou. To, unai kekeni ia gini goada. Pura haida murinai, idia davaria unai mero be HIV ia abia bona ia gorere bada. Unai kekeni ese Iehova ena taravatu ‘heudahanai karaia lasi’ totona ia badinaia dainai ia moale bada. (Kara 15:28, 29) Iehova ena Witnes taudia ese edia huanai kara maoromaoro idia badinaia matamata taudia idia laloa bada. Edia abidadama, bona edia tama sina edia abidadama, ese Iehova Dirava ena ladana ia hahairaia—ia hanamoa.—Isaia 60:21b.
Iehova ese Edia Namba Ia Habadaia
18. (a) Iehova ese ena taunimanima dekenai ia karaia kara badana be dahaka? (b) Dahaka ese ia hamomokania Iehova ena bese be do ia bada ia lao, bona diari dekenai idia noho taudia edia hahenamo badadia be dahaka?
18 Oibe, Iehova ese ena taunimanima dekenai ena diari ia hahedinaraia, ia hanamodia, ia hakaudia, bona ia hagoadadia. Lagani 1900 murina negana lalonai, idia itaia Isaia ena hereva ia guguru, ia gwau: “Ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau ese inai kara do lau havaraia haraga.” (Isaia 60:22) Lagani 1919 ai idia be haida sibona, to unai “ladana maragi momokani tauna” be “bese badana mai goadana” ai ia lao. Bona edia namba ia bada daekau karana ia do ore lasi! Lagani gunana ai, taunimanima 14,088,751 be Iesu ena mase ena Memorial hebouna dekenai idia mai. Idia momo be idia haroro goadagoada Witnes taudia lasi. Ita moale idia be unai mai anina bada hebouna dekenai idia mai, bona idia ita hagoadaia unai diari dekenai idia raka lao noho totona. Iehova ese ena taunimanima ia hadiaria badabada noho. Ena orea ena iduara ia do kehoa noho. Unai dainai, namona be ita ibounai ese eda lalona ita hadaia Iehova ena diari lalonai do ita noho. Unai kara dainai hari hahenamo badadia ita abia noho! Bona vaira negana lalonai do ita moale bada diba badina mauri taudia ibounai ese Iehova do idia hanamoa bona ena hairai badana do idia moalelaia!—Apokalupo 5:13, 14.
Anina Oi Gwauraia Diba, A?
• Hari inai dina gabedia lalonai daidia ese Iehova ena hairai idia hahedinaraia?
• Dahaka ese ia hahedinaraia Iehova ena taunimanima idia manoka lasi?
• Iehova ena Witnes taudia ese idia karaia goadagoada kara namodia haida be dahaka?
• Ena be dagedage bada ita davaria to dahaka ita diba momokani?
[Chart on page 17-20]
IEHOVA ENA WITNES TAUDIA EDIA HESIAI LAGANINA 1999 ENA RIPOTI
(See bound volume)
[Pictures on page 15]
Taunimanima be Iehova ena orea lalonai idia do vareai noho
[Picture on page 16]
Iehova ese diari idia ura henia taudia totona iduara ia do kehoa noho dainai ita moale bada