Hakaua Oreana Ena Memba Matamatadia

SATURDAY, October 2, 1999 ai, Watchtower Bible and Tract Society of Pennsylvania ena lagani ena hebou be hoa hadibaia herevana ta amo idia koua. Idia hebou taudia o telefon amo idia kamonai taudia 10, 594 idia moale bada, badina idia kamonai memba matamata hani be Iehova ena Witnes taudia edia Hakaua Oreana lalonai idia vareai . Unai memba matamata ibounai be horoa Keristani taudia, idia be Samuel F. Herd; M. Stephen Lett; Guy H. Pierce bona David H. Splane.

• Samuel Herd be lagani 1958 lalonai, painia gaukara ia hamatamaia, bona 1965 ia lao 1997 ai, sekit bona distrik gaukara ia karaia. Unai murinai, ia bona ena adavana, Gloria, be United States ena Betele famili taudia ai idia lao, unuseniai Tadikaka Herd be Service Dipatmen dekenai ia gaukara. Ia ese danu, Haroro Gaukara Komiti durua gaukarana ia karaia.

• Stephen Lett be December 1966 lalonai painia gaukara ia hamatamaia, bona 1967 ia lao 1971 lalonai, United States ena Betele dekenai ia gaukara. October 1971 lalonai, iena adavana Susan ia adavaia, bona spesel painia gaukara lalonai idia vareai. Lagani 1979 ia lao 1998 lalonai, sekit naria gaukara ia karaia. April 1998 amo ia bona Susan be United States ena Betele famili taudia ai idia lao. Unuseniai ia be Service Dipatmen dekenai ia gaukara bona Hadibaia Komiti ia durua.

• Guy Pierce be ruma bese ia naria guna bena ia bona ena adavana be April 1982 lalonai, painia gaukara idia hamatamaia. Lagani 1986 amo ela bona 1997 sekit naria gaukara ia karaia, bena ia bona ena adavana, Penny, be Brooklyn Betele famili taudia ai idia lao. Tadikaka Pierce be Gaukara Taudia Naria Komiti durua gaukarana ia karaia.

• David Splane be September 1963 lalonai, painia gaukara ia hamatamaia. Ia be Gilead ena klas namba 42 tauna ta, bona Senegal, Africa dekenai, misinari gaukara ia karaia, gabeai Canada dekenai lagani 19 lalonai sekit gaukara ia karaia. Ia bona ena adavana Linda be lagani 1990 ai, United States ena Betele dekenai idia vareai, bona unuseniai Tadikaka Splane be Hesiai Gaukara bona Toretore Dipatmen dekenai ia gaukara. Lagani 1998 amo, ia ese Toretore Komiti durua gaukarana ia karaia.

Hari Hakaua Oreana taudia be unai memba matamata taudia hani bona C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, bona D. Sydlik. Ita ibounai eda guriguri be, Iehova ese hari ia bada Hakaua Oreana do ia hanamoa bona hagoadaia, ia ese tanobada hegegemadai Dirava ena taunimanima edia gaukara ia gunalaia bona lauma dalanai idia ia durua lalonai.