Hakaua Oreana Ena Memba Matamatadia

WEDNESDAY daba, August 24, 2005 ai, United States bona Canada edia Betele taudia be vidio amo hadibaia hereva namo hereana ta idia kamonai. Unai hadibaia hereva lalonai idia gwau, September 1, 2005 ai, tatau rua​—⁠Geoffrey W. Jackson bona Anthony Morris​—⁠be Iehova ena Witnes taudia edia Hakaua Oreana ena memba matamatadia ai idia lao.

Tadikaka Jackson be February 1971 ai, Tasmania, Australia dekenai, painia gaukara ia hamatamaia. Bona June 1974 ai, Jenny ia adavaia. Daudau lasi murinai, idia ruaosi be spesel painia gaukara idia karaia. Lagani 1979 ia lao lagani 2003 ai, South Pacific ena motumotu haida hegeregere Tuvalu, Samoa, bona Fiji dekenai misinari gaukara idia karaia. Tadikaka Jackson bona ena adavana be unai motumotu dekenai idia noho neganai, Baibel bukadia hahanaia gaukarana idia durua bada. Lagani 1992 matamanai, Tadikaka Jackson be Samoa edia Brens opesi ena Komiti ta ai ia lao, bena lagani 1996 ai Fiji ena Brens opesi dekenai danu Komiti gaukara ia karaia. April 2003 ai, Tadikaka Jackson bona ena adavana, Jenny, be United States Betele famili edia memba matamatadia ai idia lao bona Tadikaka Jackson be Translation Services Department dekenai ia gaukara. Daudau lasi murinai, Tadikaka Jackson be Hakaua Oreana ena Hadibaia Komiti ida ia gaukara hebou matamaia.

Tadikaka Morris danu be lagani 1971 ai United States dekenai painia gaukara ia karaia. Bena December 1971 ai, Susan ia adavaia, bona lagani foa bamona idia painia murinai, edia natuna ginigunana, Jesse ia vara. Lagani ta mai kahana murinai, edia natuna iharuana Paul, ia vara. Tadikaka Morris be lagani 1979 ai regula painia gaukara ia karaia lou. Memero ruaosi idia sikuli matamaia neganai, ena adavana Susan, ese ia bamoa lou bona idia ruaosi idia painia hebou. Tadikaka Morris mai ena ruma bese ida be United States ena motumotu, Rhode Island bona North Carolina dekenai idia lao, badina unuseniai haroro taudia be momo lasi. North Carolina dekenai, Tadikaka Morris be sekit naria tauna durua gaukara ia karaia, bona ena natuna memero ruaosi danu be regula painia gaukara lalonai idia vareai. Jesse bona Paul edia mauri lagani be 19 neganai, United States ena brens opesi ese ia boiridia unuseniai idia gaukara totona. Tadikaka Morris be sekit tauna ai ia lao bona sekit gaukara ia karaia matamaia. Bena, lagani 2002 ai, ia bona ena adavana Susan, be United States ena Betele taudia ese idia boiridia, bona August 1 ai edia gaukara matamatana idia hamatamaia. Tadikaka Morris be Patterson ena Hesiai Dipatmen dekenai ia gaukara, bena gabeai, Hakaua Oreana ena Hesiai Komiti ida ia gaukara hebou matamaia.

Unai memba matamatadia rua amo, Hakaua Oreana ena memba haida be: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; bona D. Sydlik. Hakaua Oreana ena memba ibounai be horoa Keristani taudia.