Kwalimu Ena Ki be Dahaka?

IDIA ura dikadika gau matamatana idia karaia tatau matamatadia rua be idia hegaegae namonamo noho ena toana ia idau masini ta do idia tohoa totona. Karaharaga, lai goadana ese unai masini manokana ia abia isi atai dekenai bena mai regerege danu ia diho bona ia makohi. Mai lalo-hisihisi danu unai tatau idia gini bona hereva ta idia gwauraia lasi. Mai hekwarahi ida idia karaia namonamo gauna be hari ia gageva au bona auri senuna sibona.

Unai October dinana, lagani 1900 ai, ia vara gauna be Orville bona Wilbur Wright ese ia roho diba metau masinina idia karaia toho lalonai ia vara lalo-hisihisi gauna ginigunana lasi. Idia ese lagani haida lalonai moni bada herea idia haorea vadaeni unai gauna idia karaia toho totona.

To dokonai, idia hekwarahi noho dainai anina idia havaraia. December 17, 1903 ai, Kitty Hawk, North Carolina, U.S.A. dekenai, unai Wright memerodia ese mota amo ia heau masini ginigunana be sekeni 12 lalonai idia harohoa​​—⁠ena daudau be hari peleini edia heau bamona lasi, to unai be hegeregere tanobada ena mauri ia haidaua momokani totona!

Gaukara momo lalonai taunimanima idia kwalimu badina idia hesiku lasi to idia haheauka noho. Herevana gado matamatana ta dibaia, gaukara ta dibaia, eiava hetura karana ta hamatamaia karadia ita laloa, to mai anina bada gaudia momo be hekwarahi noho dalanai sibona ita abia diba. Toretore tauna Charles Templeton ia gwau: “Nega 10 amo nega 9 ai, kwalimu dalana tamona be: gaukara goada.” Niuspepa torea tauna Leonard Pitts, Jr. ia gwau: “Ita ese taunimanima edia diba ita herevalaia, laki gaudia ita abia dae, to nega momo, mai anina bada gaudia ita laloa lasi. Gaukara goada bona gaukara ia kwalimu lasi negadia momo. Ginidae haraga bona gaukara daudau karadia.”

Unai ese idaunegai Baibel ia gwauraia gauna ia hamomokania, ia gwau: “Bema oi gaukara [goadagoada] neganai, siahu bona goada do oi davaria.” (Aonega Herevadia 12:24) Gaukara goadagoada ena anina be eda gaukara ai ita hesiku lasi. Unai be mai anina bada bema ita ura ita karaia gauna ita haorea. Hesiku lasi karana ena anina be dahaka? Edena bamona ita tahua gaudia ita tahua neganai ita hesiku lasi diba, bona dahaka dekenai ita hesiku lasi be namo? Inai henanadai be hereva gabena ese do ia haerelaia.

[Picture Credit Line on page 3]

U.S. National Archives photo