Hesiku Lasi Karana Dainai Ita Kwalimu Diba
HARI inai negai, hesiku lasi karana be momo ese idia hahedinaraia lasi karana ta. Momo idia laloa oi kwalimu diba bema oi be gabu maorona ai nega maorona ai oi noho neganai, to hesiku lasi karana idia laloa bada lasi. Daika ia gwau diba idia be kerere? Nius halasia daladia dekenai hoihoi gaudia hahedinaraia herevadia momo ese hehuni dalanai taunimanima idia hadibaia idia ura abia gaudia kahirakahira iboudiai be idia hekwarahi bada lasi bona edia moni idia habadaia sisina sibona dalanai do idia abia diba. Niuspepa ese nega kwadogi lalonai idia kwalimu taudia bona maoromaoro sikuli idia rakatania neganai moni milioni momo idia abia taudia edia sivarai idia gwauraia momo.
Niuspepa torea tauna Leonard Pitts ia gwau: “Lalo-parara karana idia laloa bada herea taudia dekenai toana be ia auka lasi. . . . Toana be ta ia karaia diba bema karaia dalana ena tiriki ia diba, bema ia hegeregere do ia karaia, eiava Dirava amo heduru ia abia.”
Hesiku Lasi Karana Ena Anina be Dahaka?
Oi hesiku lasi ena anina be ‘kara ta, dala ta, eiava gaukara ta oi dogoatao auka bona oi dogoatao noho ena be hekwakwanai idia vara eiava oi moru.’ Anina be oi karaia noho ena be dagedage idia vara, unai gauna amo oi idia kokia diba lasi, bona oi rakatania kava lasi. Baibel ese unai kara ena anina ia gwauraia hedinarai. Hegeregere, Dirava ena Hereva ese ita ia hagoadaia, ia gwau: ‘Basileia umui tahua noho guna,’ ‘do umui pidipidi noho, bena iduara do ia kehoa,’ “guriguri do umui goadalaia,” “hereva namodia do umui dogoatao momokani.”—Mataio 6:33; Luka 11:9; Roma 12:12; 1 Tesalonika 5:21.
Hesiku lasi karana ena kahana badana ta be, ita moru neganai danu ita hekwarahi noho. Aonega Herevadia 24:16 ia gwau: “Kara maoromaoro tauna, be nega momo do ia moru, to ma do ia toreisi.” Ia hesiku lasi tauna be hekwakwanai ia davaria eiava ia kwalimu lasi neganai ia karaia gauna do ia hadokoa kava lasi, to “do ia toreisi,” ‘do ia karaia noho,’ bona do ia tohoa lou.
To, taunimanima momo be do idia davaria hekwakwanai bona kwalimu lasi negadia totona idia hegaegae lasi. Idia ese hesiku lasi karana idia manadalaia lasi dainai, edia gaukara idia hadokoa haraga. Toretore tauna Morley Callaghan ia gwau: “Kwalimu lasi negana be taunimanima momo ese sibona idia hadikaia dalanai idia laloa. Sibona edia hemami idia laloa momo dainai idia lalohisihisi, kerere be taunimanima iboudiai dekenai idia atoa, idia badu dikadika bona . . . idia karaia gauna idia hadokoa.”
Unai be dika momokani. Pitts ia gwau: “Ita laloaboio, hekwakwanai ita hanaia be mai ena badina, bona dagedage ita davaria be mai ena namo haida.” Dahaka namo? Ma ia gwau: “[Ta] ia lalo-parara ia kwalimu lasi dainai do ia mase lasi, eiava ia lusi ela bona hanaihanai lasi. Diba bada ia abia. Ia hegaegae vadaeni.” Baibel ese auka lasi dalanai inai bamona ia gwauraia: “Hekwarahi ibounai ese davana namona idia henia noho.”—Aonega Herevadia 14:23.
Momokani, ita moru murinai ita karaia lou be mai ena hekwarahi. Nega haida ita davaria hekwakwanai edia toana be iseda hekwarahi ibounai be hegeregere lasi. Ita tahua gauna be ia kahirakahira lasi, to ia daudau ia lao ela bona ia be ita itaia namonamo lasi. Reana do ita mamia ita karaia diba lasi, ita hegeregere lasi, bona reana ita lalo-manoka, eiava ita lalo-metau diba. (Aonega Herevadia 24:10) To, Baibel ese ita ia hagoadaia, ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.”—Galatia 6:9.
Dahaka ese Ita Ia Durua Diba Ita Hesiku Lasi Totona?
Ita abia hidi dalana ai ita hesiku lasi totona gau ginigunana be, do ita karaia diba bona davaria diba gaudia ita abia hidi. Aposetolo Paulo ese unai ia lalo-pararalaia namonamo. Ia ese Korinto taudia ia hamaoroa, ia gwau: “Lau heau maoromaoro, mai laloa tamona danu, lauegu heau dokona dekenai do lau ginidae totona. Lau be boksini tauna bamona lau [paisia] goadagoada, do lau uini totona. Hodahoda lau paisia lasi.” Paulo ia diba bema ia ura ena hekwarahi ese anina ia havaraia, ia ese tahua gaudia namodia do ia atoa be namo, heau helulu tauna ese ena lalona ai heau helulu ena dokona do ia davaria ia laloa bamona. Ia ese ia hagoadadia, ia gwau: “Umui diba, ani, heau helulu dekenai idia heau taudia ibounai idia heau noho, to tau tamona sibona ese kwalimu ahuna ia abia.” (1 Korinto 9:24, 26) Edena dala ai unai bamona ita karaia diba?
Aonega Herevadia 14:15 ia gwau: “Laloa kehoa tauna ese, iena raka dalana ia laloa namonamo noho.” Nega ta ta eda mauri lalonai ita karaia gaudia ita laloa lou be aonega karana, ita sibona ita nanadaia edeseni ita lao noho bona gau haida ita haidaua be namo eiava. Do ita ura hagugurua gauna bona ita karaia ena badina ita lalo-pararalaia namonamo be mai anina bada. Do ita karaia gauna be eda lalonai ia hedinarai namonamo neganai, do ita rakatania kava lasi. “Oiemu matana dekena amo, vairana kahana do oi itaia noho,” unai amo “emu kara ibounai be do idia maoro.”—Aonega Herevadia 4:25, 26.
Emu tahua gaudia oi dibaia neganai, gau iharuana be do oi davaria dalana oi tahua. Iesu ia henanadai, ia gwau: “Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa?” (Luka 14:28) Unai hakaua hereva hegeregerena, harana gorere ena doketa tauna ta ia gwau: “Edia mauri lalonai anina idia havaraia taudia dekenai lau itaia gauna ta be, edia mauri lalonai idia vara gaudia ibounai be mai edia badina idia lalo-pararalaia namonamo. Unai bamona taudia idia lalo-parara, bema gau ta idia ura abia, namona be idia karaia be namo gaudia ibounai idia karaia guna.” Bema ita ura do ita abia gauna davaria totona do ita karaia be namo gaudia ibounai ita lalo-pararalaia, unai ese ita ia durua unai gauna do ita laloa noho totona. Danu, unai ese ita do ia durua ita moru neganai ita karaia lou totona. Unai bamona kara be Orville bona Wilbur Wright edia kwalimu ena badina.
Unai dainai, bema ita moru, namona be ita hekwarahi dala maorona ai unai ita laloa bona idia be iseda diba habadaia gauna bamona ita laloa totona. Ia vara gauna oi tahua namonamo, oi tahua edeseni oi kerere, bena oiemu kerere oi hamaoromaoroa eiava oiemu manoka hanamoa gauna oi tahua. Haida oi hereva henia be heduru gauna ta, badina “bema kara ta ena palani oi karaia neganai, sisiba namona do oi abia.” (Aonega Herevadia 20:18) Oi hekwarahi negadia ta ta ai, emu diba bona emu diba gaukaralaia dalana oi habadaia, unai ese oi do ia durua oi kwalimu totona.
Do oi hesiku lasi totona mai anina bada gauna ihatoina be, oi karaia noho. Aposetolo Paulo ese ita ia hagoadaia, ia gwau: “Guna ita abia dae hadibaia hereva ena dala do ita badinaia noho be namo.” (Filipi 3:16) Tisa ta ese inai bamona ia gwauraia: “Oi karaia gauna oi laloa maoromaoro bona nega daudau lalonai oi karaia noho ese anina namona ia havaraia diba.” Unai be momo idia diba Aesop ena gori, matabudi maragi bona hea edia sivarai, ese ia hahedinaraia goevagoeva. Heau helulu ai matabudi maragi ia kwalimu ena be metairametaira ia raka bona hea ia haraga. Dahaka dainai? Badina matabudi maragi ese ia laloa maoromaoro dalana ia badinaia noho. Ia ese ena heau ia hadokoa kava lasi to ia karaia diba sipidi ia abia hidi bena unai hegeregerena ia heau noho ela bona heau helulu ena dokona ai ia ginidae. Ena gaukara ia hegaegaelaia namonamo bona ia karaia noho tauna ena gaukara ese anina do ia havaraia dainai, do ia gaukara noho mai ena ura ida bona ena gaukara do ia hadokoa kava lasi eiava haida ese do idia hamorua lasi. Oibe, “unai bamona do [oi] heau goadagoada” unai amo emu tahua gauna do oi davaria diba.
Mai Anina Bada Tahua Gaudia Oi Abia Hidi
Oibe, bema ita ura iseda hesiku lasi karana ese anina namona ia havaraia, namona be mai anina bada tahua gaudia ita abia hidi. Taunimanima momo be moale idia havaraia lasi gaudia idia tahua. To Baibel ia gwau: “Taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, . . . ia karaia momokani neganai, unai tau be namo.” (Iamesi 1:25) Oibe, Baibel lalonai Dirava ena taravatu ita lalo-pararalaia totona ita stadi be mai anina tahua gauna namona. Dahaka dainai? Badina Dirava ena taravatu be iena dala goevadaena bona maoromaorona ai ia haginia. Ia be Havaraia Tauna dainai, ia diba dahaka be namo ia havaraia taudia totona. Unai dainai bema ita hekwarahi noho Dirava ena hahegani ita dibaia bona iseda mauri lalonai ita badinaia totona, unai bamona hekwarahi noho karana ese momokani ita dekenai moale do ia mailaia. Aonega Herevadia 3:5, 6 dekenai inai gwauhamata herevana ia noho: “Lohiabada do oi abidadama henia, mai emu kudouna ibounai. . . . Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”
Danu, Iesu ia gwau, ia bona Dirava ita dibaia ena anina be “mauri hanaihanai.” (Ioane 17:3) Baibel ena peroveta herevadia ese idia hahedinaraia ita be inai tanobada ena “dina gabedia ai” ita noho. (2 Timoteo 3:1-5, NW; Mataio 24:3-13) Kahirakahira Dirava ena Basileia, iena kara maoromaoro gavamanina, ese tanobada ia noholaia taudia dekenai ena lohia siahuna do ia hahedinaraia. (Daniela 2:44; Mataio 6:10) Unai gavamani ese ita do itaia lasi maino negana, noho namona, bona moale be kamonai taudia ibounai dekenai do ia mailaia. (Salamo 37:10, 11; Apokalupo 21:4) Kara 10:34 ia gwau: “Dirava ese taunimanima edia toana ia laloa lasi.” Oibe, taunimanima iboudiai ia boiria unai hahenamo idia abia totona!
Baibel be idaunegai bukana mai ena aonega bona mai ena anina. Nega ita atoa bona ita hekwarahi ita lalo-pararalaia totona. To Dirava ena heduru amo—bona bema ita hekwarahi noho ena diba ita tahua totona—ita dekenai do ia kehoa diba. (Aonega Herevadia 2:4, 5; Iamesi 1:5) Momokani, ita dibaia gaudia ita badinaia be mai ena hekwarahi. Reana iseda laloa dalana bona iseda kara haida ita haidaua be namo. Reana eda namo idia tahua turadia eiava eda ruma bese taudia ese eda Baibel stadi karana idia koua toho. Unai dainai ita hekwarahi noho be mai anina bada. Aposetolo Paulo ese ita ia hadibaia lou Dirava ese mauri hanaihanai be “kara namo idia karaia noho” taudia dekenai do ia henia. (Roma 2:7) Iehova ena Witnes taudia be mai moale ida oi idia durua unai tahua gauna oi abia totona.
Namona be oi diba, bema Dirava bona ena ura oi dibaia lalonai oi hesiku lasi bona oi dibaia gaudia oi badinaia totona oi hekwarahi noho, do oi kwalimu.—Salamo 1:1-3.
[Picture on page 6]
Bema Dirava bona ena ura oi dibaia lalonai oi hesiku lasi do oi kwalimu
[Picture Credit Line on page 4]
Culver Pictures