Sinana ta Ena Aonega Sisibana
“Lauegu natuna e, oiemu tamana bona sinana, edia hadibaia hereva do oi kamonai henia.”—Aonega Herevadia 1:8.
ISEDA tama sina ese ita idia hagoadaia, durua, bona sisiba henia namonamo diba. Baibel buka Aonega Herevadia ese king matamata ta, Lemuela, ia herevalaia. Iena sinana ese mai anina bada “hereva” ia “hadibaia” ena natuna dekenai. Unai hereva idia noho Aonega Herevadia karoa 31 dekenai, bona unai sinana ena aonega sisibana ese ita ia durua diba danu.—Aonega Herevadia 31:1.
Sisiba Herevana King ta Totona
Lemuela ena sinana be iseda lalona ia veria henanadai amo ena hereva ia hamatamaia: “Egu natuna e, egu bogana dekena amo oi vara merona, egu natuna e, egu guriguri dainai lau abia merona. Oi dekenai dahaka do lau gwau?” Nega toi iena natuna ia hereva henia ese ia hahedinaraia ia ura dikadika ena natuna ese ena hereva ia kamonai henia namonamo. (Aonega Herevadia 31:2) Ia ura lauma dalanai ena natuna ia goada be haheitalai namona hari idia noho Keristani tamadia bona sinadia dekenai.
Iena natuna ena namo ia laloa neganai, sinana ia lalo-hekwarahilaia momo gaudia be pati, lebulebu karadia, uaina, hahine, bona ane abia badabada karadia, ani? Lemuela ena sinana ia hereva maoromaoro, ia gwau: “Oiemu goada be hahine dekenai, sihari henidia totona do oi haorea lasi.” Ia gwau lebulebu karadia ese “king taudia idia hadikaia ore vadaeni.”—Aonega Herevadia 31:3.
Inuinu kekero karana ia laloaboio lasi danu. Ia sisiba henia, ia gwau: “Lemuela e, king ese uaina do idia inua be dika.” Edena dala ai king be aonega bona hahemaoro maoromaoro herevadia ia henia diba bema hanaihanai ia inuinu? Bema ia inuinu hanaihanai, edena bamona do ia hahemaoro maoromaoro bona ‘taravatu do ia laloaboio lasi, bona haida ese idia dagedage henidia vadaeni taudia edia hisihisi do ia laloa bada’?—Aonega Herevadia 31:4-7.
To, bema king ta ese unai kara kerere ia karaia lasi, ‘kota maoromaoro do ia karaia, ogogami bona mai edia gau lasi taudia do ia durua.’—Aonega Herevadia 31:8, 9.
Ena be hari idia noho Keristani matamata taudia be “king” taudia lasi, to Lemuela ena sinana ena aonega sisibana be namo bada herea idia dekenai. Hari inai negai, matamata taudia momo ese inuinu kekero, kuku ania, bona sihari kava karadia idia karaia. Gau badana be Keristani matamata taudia ese edia tama sina idia henia aonega herevadia idia kamonai henia.
Hahine Namona
Natudia memero idia bada neganai, daika do idia adavaia be edia sinadia ese idia lalo-hekwarahilaia. Lemuela ena sinana ese adavana hereadaena ena kara ia kikilaia hari. Ita daradara lasi, tau matamta ese namo do ia davaria bema hahine ta ena lalohadai unai gau badana dekenai ia laloa.
Ao 31 Siri 10 lalonai “hahine namona” be herahera nadi, mai dava bada gauna, ida ia hahegeregerea. Baibel negadia ai idia abia mai hekwarahi ida. Unai hegeregerena, hahine namona davaria be mai ena hekwarahi. Namo lasi tau matamata ia headava haraga, to namona be nega ia atoa ia abia hidi namonamo totona. Bena, unai dava bada bamona hahinena do ia laloa bada.
Hahine namona ia herevalaia neganai, iena sinana ese Lemuela ia hamaoroa: “Iena adavana ese ia dekenai ia abidadama henia noho.” (Ao 31 Siri 11) Ena anina be, namo lasi ia gwau iena hahine be gau ta ia karaia diba lasi bema iena gwaumaoro ia do abia lasi. To momokani, idia headava taudia ese mai anina bada gauna idia do abia hidi lasi neganai do idia herevahereva hebou be namo. Hegeregere, do idia hoia dava bada gauna eiava edia natudia hadibaia dalana do idia herevalaia hebou guna. Unai gaudia herevalaia hebou karana ese idia do ia hatamonaia.
Momokani, hahine namona ena gaukara be bada. Ao 31 Siri 13 ia lao 27 ai, idaunegai bona hari idia noho hahinedia totona sisiba bona hakaua herevadia idia noho, bona unai idia gaukaralaia diba edia ruma bese taudia durua totona. Hegeregere, dabua bona ruma gaudia edia davana idia bada daekau, unai dainai hahine namona ese diba do ia abia gau haida ia sibona ia karaia bona dava namo gaudia ia tahua totona. Unai amo, iena ruma bese taudia ese idia hegeregere toana namona dabuadia do idia abia. (Ao 31 Siri 13, 19, 21, 22) Ruma bese edia aniani ena davana hamaragia totona, uma gabu ia karaia bona sitoa dekenai dava maragi gaudia ia tahua namonamo.—Ao 31 Siri 14, 16.
Iboudiai idia itaia goevagoeva diba, unai hahine “be nega ibounai ia gaukara noho.” Ia gaukara goadagoada, bona iena ruma taudia edia gaukara ia haheaua namonamo. (Ao 31 Siri 27, NW ) Ia be “gaukara auka hahinena.” (Ao 31 Siri 17) Dina ia do daekau lasi neganai ia toreisi bona iena gaukara ia matamaia, bona ia gaukara goadagoada ela bona hanuaboi. Ia be hegeregere, iena gaukara ia hadiaria lamepa ia bodo lasi.—Ao 31 Siri 15, 18, NW.
Gau badana be, hahine namona be lauma gaudia ia laloa bada hahinena. Dirava ia gari henia bona mai hemataurai ida ia tomadiho henia. (Ao 31 Siri 30) Iena tau ia durua edia natudia be unai bamona danu. Ao 31 Siri 26 ia gwau: “Mai aonega danu” ena natudia ia hadibaia, bona “iena hadibaia hereva be maoromaoro, bona mai momokani danu.”
Tau Namona
Hahine namona ia abia totona, namona be Lemuela be tau ena maduna do ia huaia namonamo tauna. Lemuela ena sinana ese ia dekenai tau namona ena kara haida ia gwauraia lou.
Tau namona be ‘hanua ena tau badadia’ ese ena namo idia herevalaia. (Aonega Herevadia 31:23, NW ) Ena anina be ia gaukara diba, ia koikoi lasi, taunimanima ese idia abidadama henia, bona Dirava ia gari henia. (Esodo 18:21; Deuteronomi 16:18-20) Ia be unai bamona dainai, hanua ena ‘geiti dekenai taunimanima be ia idia diba,’ unuseniai hanua ena tau badadia be hanua ena gau idauidau idia karaia. Taunimanima ese ia idia “matauraia” badina ia be Dirava gari henia tauna, ena anina be ia kara auka lasi, bona “hanua” eiava unai gabu ena tau badadia ida do ia gaukara mai lalo-tamona ida.
Reana Lemuela ena sinana ena mauri lalonai ia davaria gaudia dainai, iena natuna ia hamaoroa lou namona be do ia adavaia kekenina ia laloa bada bona unai ia hahedinaraia. Tanobada dekenai idia noho taudia ibounai amo, unai kekeni ia lalokau henia bada. Unai dainai iena gadona ia hahedinaraia hemamina mani oi laloa, taunimanima ibounai vairanai ia gwau: “Hahine momo edia kara be namo, to oi sibona ese idia ibounai oi hereaia noho.”—Aonega Herevadia 31:29.
Ia hedinarai goevagoeva Lemuela ese ena sinana ena aonega sisibana ia laloa bada. Hegeregere, Ao 31 siri 1 (NW ) lalonai ita itaia ia gwau ena sinana ena hereva be iena hereva. Unai dainai iena sisiba ia abia dae bona namo ia abia. Namona be ita danu ese iena “hereva” amo namo ita abia badina iseda mauri lalonai iena hakaua herevadia ita gaukaralaia.
[Pictures on page 31]
Hahine namona be “nega ibounai ia gaukara noho”