Mauri Sivaraina

Auka Lasi Maurina Karaia Iehova Hesiai Henia Totona

CLARA GERBER MOYER ESE IA SIVARAILAIA

Egu lagani be 92 bona raka totona lau hekwarahi, to egu darana ia gaukara namonamo, bona lau laloatao namonamo diba. Lau maragi negana amo Iehova hesiai henia ena hahenamo lau abia dainai Ia dekenai lau moale bada! Auka lasi, bona metau momo lasi maurina lau karaia ese lau ia durua bada unai ahuna namona abia totona.

AUGUST 18, 1907 ai, lau vara Alliance, Ohio, U.S.A. dekenai, natudia ima amo lau vara guna. Egu lagani be 8 neganai, Baibel Stiuden, Iehova ena Witnes taudia be unai negai unai bamona idia gwauraia, ena ful-taim hesiai tauna ta, be baisikele amo emai gabu dekenai ia mai​—⁠ai be boromakau ai naridia rata abia totona. Egu sinana, Laura Gerber, be iduara dekenai ia davaria bona unai tauna ia henanadai bema ia diba dahaka dainai kara dika be ta ese ia koua lasi. Sinagu be guna unai dekenai ia daradara.

Tamagu be boromakau rumana ai, bona Sinagu be ia ida ia hereva murinai, oda ia karaia Studies in the Scriptures ena volium 6 ia abia totona. Unai buka ia duahia mai ura bada ida bona Baibel ena hereva momokani ena diba ia abia dainai unai ese iena lalona idia hamarerea bada. Ia ese Volium Namba 6, The New Creation, ia stadilaia bena ia lalo-parara goevagoeva ranu lalonai ia diho be namo Keristani bapatiso ia abia totona. Baibel Stiuden taudia davaria dalana ia diba lasi dainai, ena be unai hua be March 1916 ena paraka negana to Tamagu ia noia emai boromakau naria gabuna ai ia heau sinavai maragina ta ai ia bapatisoa totona.

Nega sisina murinai Sinagu be niuspepa lalonai hadibaia hereva ta ia itaia, Alliance ena Daughters of Veterans Hall dekenai hereva ta do idia karaia. Unai hereva ena sinado be “The Divine Plan of the Ages.” Maoromaoro gau ta ia karaia, badina Studies in the Scriptures ena Volium Namba 1 ena sinado be unai hereva ena sinado hegeregerena. Hosi ese ia veria mauana mai ena uili ai hegaegaelaia, bona emai ruma bese ibounai be unai dala ai emai hebou ginigunana dekenai ai lao. Unai negana amo tadikaka edia ruma dekenai hebou ai lao henia Sunday bona Wednesday hanuaboi iboudiai. Nega sisina murinai, Keristani kongregesen ena tadikaka ta be Sinagu ia bapatisoa lou. Tamagu be nega momo emai boromakau naria gabuna gaukara ia karaia, to gabeai Baibel stadi ia ura henia, bona lagani haida murinai bapatiso ia abia.

Gaukara Gunalaia Taudia Ai Davaria

June 10, 1917 ai, J. F. Rutherford, unai negai Watch Tower Society ena presiden, ese Alliance ia vadivadi henia hereva ia karaia totona, ena sinado be “Why Do the Nations War?” Egu lagani be 9 bona egu tama sina bona egu tadikaka rua, Willie bona Charles, ida unai hereva lau kamonai henia. Taunimanima handred bona ma haida idia kamonai danu. Tadikaka Rutherford ena hereva murinai, hebou idia lao henia taudia momo be ena hereva ia henia gabuna, Columbia Theater, ena murinai idia gini bona foto idia abia. Pura gabena ai, unai gabu tamona dekenai, A. H. Macmillan be hereva ta ia karaia, ena sinado be “God’s Coming Kingdom.” Unai tadikaka be emai taoni maragina idia vadivadi henia be hahenamo badana ta.

Lau Laloatao Noho Hebouhebou Gunadia

Lau lao henia hebouhebou ginigunana be lagani 1918 ai, Atwater, Ohio dekenai, ia be kilomita haida Alliance amo. Sinagu ese unuseniai Society ena tadikaka ta ia noia, bema egu lagani ia hegeregere bapatiso lau abia totona. Lau laloa Dirava dekenai gwauhamata momokani lau henia iena ura karaia totona, unai dainai unai dina ai bapatiso lau abia apolo uma gabu badana badinai sinavai maragina dekenai. Tadikaka be palai ta idia haginia bena egu dabua lau kokia bona mahuta dabua metauna ta lau atoa bona bapatiso lau abia.

September 1919 ai, egu tama sina bona lau be trein dekenai ai gui, bona Sandusky, Ohio, Lake Erie dekenai, ai lao. Unuseniai, bouti ta dekenai ai gui, bona nega sisina murinai, Cedar Point dekenai ai ginidae, unai gabu dekenai lau laloatao noho hebouhebou ta idia karaia. Bouti amo ai diho neganai, bouti kamokau gabuna dekenai aniani hoia gabuna maragina ta ia noho. Lau be hamburger ta lau abia, unai nega ai unai be dava bada gauna ta lau dekenai. Ena mamina be namo herea! Emai dina 8 hebouhebouna ai idia mai taudia edia namba be 7,000. Saun gaudia be lasi, unai dainai lau kamonai namonamo be namo.

Unai hebouhebou dekenai The Watch Tower ida idia printaia magasin, ladana be The Golden Age (hari idia gwauraia Awake!), idia halasia. Unai hebouhebou lau lao henia totona, lau be sikuli ena pura ginigunana lau reaia, to unai be herevana badina lau davaria gauna be namo herea. Cedar Point be taunimanima momo idia lao henia laga-ani gabuna, bona aniani gabuna ai hebouhebou idia lao henia taudia totona nanadu taudia ese aniani idia hegaegaelaia. To badina ta dainai, nanadu taudia bona aniani kadoa hahinedia be idia straiki, unai dainai aniani nadua idia diba Keristani tadikakadia ese heduru idia henia bona hebouhebou lao henia taudia edia aniani idia hegaegaelaia. Unai murinai lagani momo ai, Iehova ena bese taudia be sibodia edia aniani idia hegaegaelaia hebouhebou maragidia bona badadia dekenai.

Hahenamo ta danu ai abia badina September 1922 ai Cedar Point dekenai ai giroa, unai be dina 9 hebouhebou badana totona bona taunimanima 18,000 bona ma haida idia lao. Unuseniai Tadikaka Rutherford ese ai ia hagoadaia, “haroro, haroro, haroro, Pavapava bona iena Basileia umui harorolaia.” To, lagani haida gunanai, pepapepa bona The Golden Age lau hariharilaidia neganai, egu haroro gaukara lau hamatamaia vadaeni.

Haroro Gaukara Lau Laloa Bada

Emai dekena taudia be boromakau idia naridia, bona lagani 1918 ia matamaia murinai, The Fall of Babylon pepapepana idia dekenai hariharilaia gaukarana lau durua. Paraka dainai, lahi au aveni lalonai manoka nadi badana ai hasiahua, bena hosi ese ia veria mauana mai uili lalonai ai abia loaloa emai aena idia siahu sisina totona. Kouti badadia bona kwara gaudia ai karaia, badina hosi ese ia veria mauana mai uili be mai ena guhi bona mai ena dabua kahana kahana ai, to lalonai siahu havaraia masini be lasi. To unai be moale negadia.

Lagani 1920 ai, The Finished Mystery be dala idauna ai idia halasia, ladana be ZG, bona magasin dalana ai idia printaia.a Egu tama sina bona lau be unai magasin ida Alliance dekenai ai haroro. Unai negai haroro tauna tamona sibona be iduara ta dekenai ia lao, unai dainai mai gari sisina ida taunimanima momo idia helai dehe ta dekenai lau daekau. Lau hereva murinai, hahine ta ia gwau: “Ia be hereva namona ia henia, ani?” bena magasin ia abia. Unai dina ai ZG iboudiai 13 lau hariharilaia, bona unai be nega ginigunana ruma-ta-ruma-ta gaukarana dekenai haroro daudau sisina lau karaia.

Lau be greid 9 lau karaia neganai, Sinagu be nimonia ia abia bona hua tamona mai kahana ia hekure bedi dekenai. Egu tadina kekeni, Hazel, be beibi sibona, unai dainai sikuli lau rakatania emai boromakau naridia gabuna dekenai gaukara lau durua bona natudia naria totona. To, emai ruma bese taudia be Baibel ena hereva momokani ai laloa bada, bona hanaihanai ai lao kongregesen ena hebou iboudiai dekenai.

Lagani 1928 ai, Keriso ena mase ena Memorial dekenai, pepapepa ta ladana “Where Are the Nine?” be hebou taudia ibounai dekenai idia henia. Ia ese Luka 17:​11-19 ia herevalaia, unuseniai Baibel ia gwau hoa karana amo Iesu ese ia hanamoa lepera gorere taudia 10 amo tamona sibona be mai manau ida Iesu ia tanikiu henia. Unai ese egu kudouna ia hamarerea. Lau sibona lau nanadaia, ‘Lau abia gau namodia dainai egu moale hahedinaraia dalana be edena bamona?’

Ruma bese dekenai gau iboudiai idia namo vadaeni bona lau goada bona gau ta ese lau ia koua lasi dainai, egu lalona lau hadaia ruma bese lau rakatania painia gaukara, ful-taim hesiai gaukara be unai bamona idia gwauraia, lau karaia totona. Egu tama sina be lau idia hagoadaia unai lau karaia totona. Unai dainai, egu bamoa, Agnes Aleta, bona lau be haroro gabuna ai abia, bona August 28, 1928 ai, trein ta dekenai ai gui hanuaboi 9:00 ai. Ai ruaosi be mai emai sutkeisi tamona bona baege maragina emai Baibel bukadia abia loaloa totona. Trein steiseni ai, egu tadina kekenidia bona egu tama sina idia taitai, bona ai ruaosi danu. Lau laloa idia do lau itaia lou lasi, badina ai laloa Aramagedono be kahirakahira vadaeni. Daba gabena ai, ai idia henia haroro gabuna Brooksville, Kentucky dekenai, ai ginidae.

Aniani idia hegaegaelaia mahuta rumana ta ai daiutu maragina ta ai rentaia bona spaghetti tini haida ai hoia bona sanwis ai karaia ai sibona totona. Dina ta ta iboudiai dala idauna dekenai ai raka, sibona sibona ai gaukara bona ruma taudia dekenai buka ima ai henidia toho, edia kontribusen $1.98 amo idia abia diba. Sisina sisina unai taoni ibounai ai haroro henia, bona Baibel idia ura henia taudia momo ai davaria.

Hua toi lalodiai, Brooksville bona Augusta lalonai bona kahirakahira idia noho taudia ai vadivadi henia vadaeni. Unai dainai ai lao Maysville, Paris, bona Richmond dekenai ai haroro totona. Lagani toi gabedia ai, Kentucky ena kongregesen lasi gabu momo dekenai ai haroro. Nega momo emai turadia bona ruma bese taudia Ohio amo be motuka amo idia diho mai bona ai danu idia haroro, nega haida pura ta mai kahana lalonai.

Lau Laloatao Noho Hebouhebou Ma Haida

July 24-30, 1931 ai, Columbus, Ohio dekenai, idia karaia hebouhebouna be lau laloatao momokani. Unuseniai Baibel amo idia abia emai ladana matamatana idia gwauraia Iehova ena Witnes taudia. (Isaia 43:​12, NW ) Unai nega ia do abia lasi neganai, taunimanima be emai tomadiho idia henanadai neganai, ai gwau, “International Bible Students.” To unai ladana dainai ai idia diba namonamo lasi, badina ma tomadiho orea idauidau dekenai Baibel stiuden taudia idia noho danu.

Egu bamoa, Agnes, ia headava, bona lau sibona lau noho; unai dainai lau moale bada badina painia turana idia tahua taudia edia hebou gabuna ta idia hadibaia. Unuseniai Bertha bona Elsie Garty bona Bessie Ensminger lau davaria. Idia be mai edia motuka rua bona painia taihu ta idia tahua idia toiosi ida idia gaukara hebou totona. Ena be guna ai hedavari lasi to hebouhebou gabuna ai rakatania hebou.

Siahu negana ai Pennsylvania dekenai ai haroro. Bena paraka negana ia mai noho neganai, ai noinoi bema namo saut kahana gabudia North Carolina, Virginia, bona Maryland dekenai ai haroro diba, badina unuseniai ia siahu sisina. Siahu negana ia matamaia neganai ai giroa not kahana ai. Unai negana ai painia taudia edia kara be unai bamona. Lagani 1934 ai, John Booth bona Rudolph Abbuhl be unai kara idia badinaia, bona idia ese Ralph Moyer bona iena tadina mero Willard idia abia lao Hazard, Kentucky dekenai.

Lau bona Ralph be nega momo ai hedavari vadaeni, bona Washington, D.C. dekenai, May 30–June 3, 1935 ai idia karaia hebouhebou badana ai, emai turana karana ai habadaia. Ralph bona lau be hebou rumana ena dehe dekenai ai helai hebou bena hereva ta idia karaia, “orea badana,” eiava “hutuma bada herea,” (NW ) idia herevalaia. (Apokalupo 7:​9-14) Ela bona unai nega ai, ai laloa hutuma bada herea taudia be guba dekenai do idia lao to edia abidadama ena goada be 144,000 taudia edia abidadama ena goada hegeregerena lasi. (Apokalupo 14:​1-3) Unai dainai lau ura lasi lau be idia ta!

Tadikaka Rutherford ia gwauraia hedinarai hutuma bada herea taudia be tanobada orea taudia bona idia be Aramagedono amo do idia roho mauri abidadama taudia, bona unai idia kamonai neganai momo idia hoa. Bena ia ese hutuma bada herea taudia ibounai ia noia idia gini totona. Lau gini lasi, to Ralph ia gini. Gabeai, unai lau lalo-pararalaia goevagoeva, unai dainai 1935 ai be nega ginigabena Keriso ena mase ena Memorial ai paraoa bona uaina lau abia. To, Sinagu ese ia abidia noho ela bona November 1957 ai ia mase.

Ia Noho Daudau Turana

Ralph bona lau be revareva ai torea heheni noho. Lau be Lake Placid, New York dekenai, lau haroro noho, bona ia be Pennsylvania dekenai ia haroro. Lagani 1936 ai iena motuka amo ia veria diba treila maragina ta ia karaia. Pottstown, Pennsylvania amo ia abia lao Newark, New Jersey dekenai, unuseniai October 16-18 ai idia karaia hebouhebou totona. Hanuaboi ta ai, program murinai, ai painia haida ai lao Ralph ena treila matamatana ai itaia totona. Unai treila lalonai sink maragina badinai ia bona lau ai gini bena lau ia nanadaia, “Treila oi ura henia, a?”

Egu kwarana lau hamarerea egu moale lau hahedinaraia neganai, lau ia henanadai henia, “Oi ura oi noholaia, a?”

Lau haere, “Oibe,” bona kisi manokamanokana ta lau ia henia bona do lau laloaboio diba lasi. Dina haida murinai, headava totona laiseni ai abia. October 19, hebouhebou murinai dinana ai, ai lao Brooklyn dekenai bona Watch Tower Society ena printa faktori ai itaia. Bena haroro gabuna matamatana ai noia. Grant Suiter ese teritori ia naria, bona ia henanadai daika ese unai teritori do ia haroro henia. Ralph ia gwau, “Bema ai headava diba ai ese do ai karaia.”

Tadikaka Suiter ia haere, “Bema adorahi 5:00 ai do umui giroa, dala do ai hegaegaelaia diba.” Unai dainai unai hanuaboi ai Brooklyn Heights dekenai Witnes tadikaka ta ena ruma lalonai ai headava. Kahirakahira aniani gabuna ai emai turadia haida ida ai aniani hebou bena PMV ai abia Ralph ena treila dekenai, Newark New Jersey ai.

Nega sisina murinai, ai lao Heathsville, Virginia dekenai, unai be ai painia hebou gabuna ginigunana. Northumberland County dekenai ai haroro bena ai lao Pennsylvania ena Fulton bona Franklin gabudia dekenai. Lagani 1939 ai, Ralph idia boiria zone gaukara ia karaia totona, unai gaukara dekenai ai be kongregesen momo ai vadivadi henidia loulou. Tennessee gabu dekenai kongregesen momo ai vadivadi henidia. Unai lagani gabena ai emai natuna mero, Allen, ia vara, bona 1941 ai Society ese zone gaukara idia hadokoa. Bena ai idia abia hidi ai lao Marion, Virginia dekenai, spesel painia gaukara karaia totona. Unai negadia ai, spesel painia taudia be hua ta ta iboudiai hora 200 idia halusia haroro gaukara lalonai.

Gau Haida Haidaua

Lagani 1943 ai, lau be dala lasi to spesel painia gaukara lau rakatania. Treila maragina lalonai ai noho, natuna maragina lau naria, aniani lau nadua, ai ibounai emai dabua lau huria, bona hua ta ta iboudiai hora 60 lau haroro, unai sibona dekenai lau hegeregere. To Ralph be spesel painia gaukara ia karaia noho.

Lagani 1945 ai, Alliance, Ohio dekenai, ai giroa lou bona lagani 9 lalodiai ai noholaia treila ai hoihoilaia, bona egu tama sina edia boromakau naria gabuna ena ruma dekenai ai lao. Unuseniai, ruma ena vairai dehena dekenai, emai natuna kekenina, Rebekah, ia vara. Ralph be taoni ai pat-taim gaukara ia abia bona regula painia gaukara ia karaia noho. Lau be boromakau naria gabuna ai lau gaukara bona Ralph lau durua ia painia noho totona. Ena be egu ruma bese taudia be ai dekenai davana lasi tanona bona ruma idia henia toho, to Ralph ia ura lasi. Ia ura lasi metau ia huaia, unai amo Basileia ena gaukara ai habadaia noho diba.

Lagani 1950 ai, Pottstown, Pennsylvania dekenai, ai lao bona ruma ta ai rentaia, hua ta ta ena davana be $25. Unai murinai lagani 30 lalodiai, unai rentaia davana ia daekau lao $75 dekenai sibona. Ai laloa Iehova ese ai ia durua auka lasi maurina ai karaia totona. (Mataio 6:​31-33) Ralph be pura iboudiai dina toi lalonai tatau edia huina pakosia gaukara ia karaia. Pura iboudiai emai natudia ida Baibel stadi ai karaia, kongregesen hebou ai lao henidia, bona Basileia ena sivarai namona ai harorolaia hebou. Ralph be unai gabu kongregesen ena gunalaia tauna. Auka lasi maurina ai karaia dainai, Iehova ena hesiai gaukara dekenai gau momo ai karaia diba.

Egu Lalokau Turana Lau Haboioa

May 17, 1981 ai, Kingdom Hall lalonai ai helai, pablik tok ai kamonai henia noho. Ralph ena mamina be namo lasi, Kingdom Hall ena murina kahanai ia raka lao, bona atendan ia siaia lau dekenai nouti ia henia, ia gwau do ia giroa ruma dekenai. Unai be Ralph ena kara lasi dainai ta lau noia maoromaoro ruma dekenai lau ia taria lao. Unai hora ia ore lasi lalonai Ralph ena tauanina ena kahana ia mase bena ia mase momokani. Unai daba ai Gima Kohorona ia ore neganai, kongregesen idia hadibaia ia mase vadaeni.

Unai hua lalonai Ralph be hora 50 ia haroro vadaeni. Iena ful-taim painia laganidia ese 46 idia hanaia. Taunimanima handred bona ma haida ida Baibel stadi ia karaia bena bapatiso idia abia bona Iehova ena Witnes taudia ai idia lao. Lauma dalana dekenai ai abia hahenamo be idia hanaia laganidia lalonai ai dadaraia gaudia idia hereaia momokani.

Lau Abia Hahenamo Dainai Lau Moale

Vanegai lagani 18 lalodiai, lau be sibona lau noho, hebou lau lao henia, egu goada hegeregerena taunimanima lau haroro henidia, bona Dirava ena Hereva lau stadilaia. Buruka taudia totona idia haginia rumana lalonai lau noho. Egu ruma kohu haida sibona lau dogoatao bona lau ura lasi televisen lau abia. To lauegu mauri ia hegeregere momokani bona lauma dalana ai lau taga bada. Egu tama sina bona egu tadikaka rua idia abidadama ela bona idia mase, bona egu taihu rua be hereva momokani dalana ai idia abidadama noho.

Lau moale badina egu natuna mero, Allen, be Keristani elda gaukara ia karaia noho. Lagani momo lalodiai Kingdom Hall bona Assembly Hall edia saun gaudia ia atoa bona siahu negana hebouheboudia totona saun ia hegaegaelaia. Iena adavana be Dirava abidadama hesiai henia hahinena ta, bona edia natudia memero rua be elda taudia. Egu natuna kekenina, Rebekah Karres, be lagani 35 bona ma haida ai ful-taim hesiai gaukara ia karaia, bona unai negana lalonai lagani hani be Iehova ena Witnes taudia edia tanobada hedikwota, Brooklyn dekenai, ia gaukara. Ia bona ena adavana be vanegai lagani 25 ai United States ena kahana momo ai loaloa gaukara idia karaia.

Iesu ia gwau Basileia be ta ese ia davaria diba hunia ahuna namona bamona. (Mataio 13:44) Lau moale bada badina egu ruma bese be lagani momo gunanai unai ahuna namona idia davaria dainai. Lagani 80 bona ma haida ai Dirava ena gaukara namona lau karaia dainai lau laloa hahenamo bada lau abia​—⁠egu lalohisihisi gauna ta be lasi! Egu mauri bema lau karaia lou, lau karaia dalana hegeregerena ai do lau karaia lou, badina, momokani, ‘Dirava ena hebogahisi mai lalokauna ese inai tanobada ena mauri ia hereaia.’​​—⁠Salamo 63:⁠3.

[Footnote]

[Picture on page 23]

Tadikaka Rutherford ena hereva be lagani 1917 ai, Alliance, Ohio dekenai, ai kamonai

[Picture on page 23]

Ralph ida, ia karaia treila vairanai

[Picture on page 24]

Hari, egu natudia rua ida