Taunimanima ese Durua Tauna ta Idia Abia be Namo Ena Badina

GUNA hekokoroku bona dagedage karadia ia karaia tauna ta ia gwau: ‘Lau be ladana hadikaia tauna mai egu dagedage.’ Guna unai dagedage bona hereva dika tauna be Iesu Keriso ena murinai idia raka Dirava gari henia taudia ia hahisia bona ia dagedage henia mai ena hebogahisi lasi ida. To, mai ena moale ida ia gwau: “Dirava ese lau ia bogahisihisi henia.” Reana oi hoa, badina oi kamonai unai dagedage tauna dikana be abidadama Keristani tauna aposetolo Paulo ai ia lao.​​—⁠1 Timoteo 1:​12-​16; Kara 9:​1-​19.

Taunimanima ibounai edia kara be Paulo bamona lasi. To, ita ibounai be Dirava ena taravatu ita utua. Dahaka dainai? “Badina be ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:​23) Danu, ita lalo-metau haraga, bena ita laloa ita dika bada dainai ita hegeregere lasi Dirava ena hebogahisi do ita abia. Paulo be ena kara dika ia laloa lalonai, ia gwau: “Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?” Sibona be unai henanadai ena haere ia henia neganai, ia gwau: “Dirava lau tanikiu henia, ia ese lau ia hamauria, Iesu Keriso dekena amo.”​​—⁠Roma 7:​24, 25.

Havaraia Tauna mai ena kara maoromaoro ese kara dika taudia be edena bamona ia kara namo henia diba? (Salamo 5:⁠4) Paulo ena hereva mani oi itaia, ia gwau: “Dirava lau tanikiu henia, ia ese lau ia hamauria, Iesu Keriso dekena amo.” Dirava ese ia hebogahisi henia tauna ma ta ia gwau: “Tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.”​​—⁠1 Ioane 2:​1, 2.

Dahaka dainai Iesu Keriso idia gwauraia “durua tauna, iseda Tamana ena vairanai”? Bona edena bamona Iesu be “iseda kara dika gwauatao dalana”?

Durua Tauna ta Ita Abia be Namo Ena Badina

Iesu be tanobada dekenai ia mai bona “iena mauri do ia atoa diho, taunimanima momo edia [mauri] davana karaia totona.” (Mataio 20:28) Mauri davana karaia ena anina be tau ta eiava gau ta idia hoia lou eiava ruhaia totona davana idia henia. Heberu herevana, idia hahanaia “mauri davana karaia,” ena anina be kara dika ia koua, eiava hamaoromaoroa. (Salamo 78:38) Greek herevana, hegeregere Mataio 20:28 ai ita davaria herevana, ese tuari lalonai idia guia bona dibura dekenai idia atoa taudia eiava hesiai taudia ruhaia totona idia henia davana idia herevalaia neganai idia gaukaralaia. Kota maoromaoro dalanai, gau ta idia henia ena davana be hegeregere gau ma ta idia abia totona.

Tau ginigunana ese Dirava ia gwau-edeede henia dainai, taunimanima be igui hesiai taudia ai idia lao. Genese karoa 3 ese ia hahedinaraia bamona, tau goevadaena​​—⁠Adamu​​—⁠be Iehova Dirava gwau-edeede henia dalana ia abia hidi. Unai amo, ia sibona bona idia do vara lasi natudia be kara dika bona mase ena igui hesiai dekenai ia hoihoilaia. Unai dainai, Adamu ese ia sibona bona iena natuna iboudiai amo harihari gauna, mauri goevadaena, ia haboioa.​​—⁠Roma 5:​12, 18, 19; 7:​14.

Idaunegai Israela dekenai, Dirava be dala ia hegaegaelaia animal bouboulaia karana ese taunimanima edia dika ia hamaoromaoroa eiava ia koua totona. (Levitiko 1:4; 4:​20, 35) Momokani, idia bouboulaia animal edia mauri be kara dika tauna ena gabu ai idia henia. (Levitiko 17:11) Unai dainai, “kara dika ena davana karaia dinana” ena ladana ita gwauraia diba “mauri ena davana karaia dinana” danu.​​—⁠Levitiko 23:​26-​28.

To, taunimanima ese animal idia hereaia dainai, “boromakau tau bona nanigosi edia rara ese kara dika idia kokia [momokani] diba lasi.” (Heberu 10:​1-4) Boubou gauna ta ena davana ese kara dika ia hamaoromaoroa, eiava ia kokia momokani totona, namona be ena davana be Adamu ese ia haboioa gauna hegeregerena. Kota maoromaoro dalanai, tau goevadaena ta (Iesu Keriso) sibona do ia hegeregere ma tau goevadaena ta (Adamu) ese ia haboioa gauna ia abia lou totona. Mauri goevadaena sibona be hegeregere edia tamana ginigunana ese ia hoihoilaia kara dika ena igui hesiai amo Adamu ena natudia hoia davana do ia henia. Inai hereva, ‘mauri ena davana be mauri,’ ese kota maoromaoro ia hagugurua momokani.​—⁠Esodo 21:​23-25, NW.

Adamu ia kara dika bona mase ena ahuna ia abia neganai, idia do vara lasi natudia be ia lalonai idia do noho bona unai dainai ia ida idia mase hebou. Tau goevadaena Iesu, “Adamu dokona,” be mai ena ura ida ruma bese ia havaraia lasi. (1 Korinto 15:45) Ia mase bona ena mauri goevadaena ia bouboulaia neganai, idia do vara lasi natudia be ia lalonai idia noho. Unai dainai, reana ita gwau diba ia lalonai ia noho besena be ia ida idia mase hebou. Iesu be idia mase noho Adamu ena kara dika ruma bese taudia ia abia sibona ena. Sibona ena ruma bese ia havaraia diba to ia havaraia lasi. Iesu ese ena mauri goevadaena ia bouboulaia dainai, Adamu ena amo idia vara taudia ibounai ia hoidia lou, unai dainai idia be Iena ruma bese taudia ai idia lao, bona ia be edia “Hanaihanai Noho Tama” ai ia lao.​​—⁠Isaia 9:​6, 7.

Iesu ena mauri davalaia boubouna ese dala ia kehoa kamonai taudia ese Dirava ena hebogahisi bona mauri hanaihanai idia abia totona. Unai dainai, aposetolo Paulo ia gwau: “Kara dika ena davana be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.” (Roma 6:​23) Iehova ita hanamoa, badina ena lalokau bona hebogahisi dainai mauri davana, ia bona iena Natuna lalokauna dekenai dava bada gauna, ia henia. (Ioane 3:​16) Bona Iesu be guba dekenai ia toreisi lou bona iena mauri ena davana be Dirava dekenai ia henia neganai, ia hamomokania ia be “durua tauna, iseda Tamana ena vairanai.” a (Heberu 9:​11, 12, 24; 1 Petero 3:​18) To, hari Iesu Keriso be edena bamona ia hamomokania ia be iseda durua tauna guba dekenai?

[Footnote]

[Picture on page 4]

Iesu ena mauri goevadaena ese Adamu ena natuna edia mauri davana ia karaia