Iehova Idia Hanamoa Headava Aria mai Edia Moale
LAGANI 1985 AI, SOWETO, SOUTH AFRICA DEKENAI, WELSH BONA ELTHEA IDIA HEADAVA. NEGA HAIDA, EDIA NATUNA KEKENI, ZINZI, IDA EDIA HEADAVA ENA LAULAU IDIA ITADIA, BONA UNAI MOALE DINANA IDIA LALOA LOU. ZINZI IA URA UNAI LAULAU AMO HEADAVA ARIA ENA VADIVADI TAUDIA IA HAHEDINARAIA BONA ENA SINANA MAI ENA DABUA HAIRAI ENA LAULAU IA MOALELAIDIA BADA.
SOWETO ena ruma badana ta lalonai idia henia headava herevana amo, unai headava ariana idia hamatamaia. Bena Keristani memero kekeni oreana be kahana hani amo Dirava hanamoa anedia idia abia. Unai murinai, Basileia anedia ena miusiki namodia idia gadaralaia lalonai, vadivadi taudia be aniani namona idia moalelaia. Inuinu kekero muramura idia henia lasi, bona miusiki mai ena regerege bada eiava mavaru be lasi. To, vadivadi taudia be hebamo karana idia moalelaia bona headava matamata taudia idia hanamoa. Unai kara ibounai be hora toi bamona lalonai idia karaia. Keristani elda ta, Raymond, ia gwau: “Nega momo unai headava negana be mai moale ida lau laloa.”
Welsh bona Elthea idia headava neganai, South Africa ena Watch Tower Bible and Tract Society ena Brens opesi dekenai volantia gaukara idia karaia. Unai dainai, idia hegeregere lasi headava aria badana idia karaia totona. Keristani taudia haida be ful-taim hesiai gaukara idia rakatania bona moni gaukara idia abia, headava aria dekenai gau momo idia hoia totona. To, Welsh bona Elthea be headava aria maragina dainai idia lalohisihisi lasi, badina be Dirava ena ful-taim hesiai gaukara idia karaia diba ela bona Zinzi ia vara.
To, bema headava matamata taudia ese edia headava ariana totona miusiki bona mavaru idauidau idia abia hidi be edena bamona? Edena bamona bema uaina bona kekero muramura ma haida idia henia? Edena bamona bema idia hegeregere headava aria badana idia karaia totona bona gau momo idia hoia diba? Edena bamona idia hamomokania diba unai nega be moale negana namona bona ia hegeregere Dirava idia tomadiho henia taudia do idia moalelaia? Namona be unai bamona henanadai edia haere idia laloa namonamo, badina Baibel be ita ia oda henia, ia gwau: “Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.”—1 Korinto 10:31.
Regerege Bada Karadia Dadaraia
Headava ena aria ibounai dekenai moale karadia idia karaia. To idia haida dekenai moale karadia momo herea idia karaia bona regerege bada herea idia havaraia. Witnes lasi taudia momo edia headava aria dekenai, Dirava ena ladana hadikaia karadia idia vara. Hegeregere, kekero muramura idia inua ela bona idia inuinu kekero momokani. Madi, Keristani taudia edia headava aria haida dekenai danu unai ia vara.
Baibel ia gwau, “uaina bona kekero muramura ese, [boiboi momo] idia havaraia.” (Aonega Herevadia 20:1) Unai siri lalonai idia gaukaralaia Heberu herevana ena anina be “regerege bada idia karaia.” Bema kekero muramura dainai tau tamona be regerege bada ia karaia, mani oi laloa dahaka ia vara bema taunimanima hutuma idia helai bona kekero muramura momo idia inua hebou! Oibe, unai bamona aria be karaharaga Baibel ese ia gwauraia “tauanina ena kara,” hegeregere “kekero, lebulebu, bona unai bamona kara ibounai,” ia havaraia diba. Unai bamona kara idia karaia bona idia helalo-kerehai lasi taudia be Dirava ena Basileia henunai mauri hanaihanai do idia abia lasi.—Galatia 5:19-21.
Greek gado herevana idia hahanaia “lebulebu” be idia gaukaralaia dala dekenai ane idia abia, idia mavaru, bona miusiki idia gadaralaia inua kekero matamata taudia idia hahedinaraia totona. Headava aria dekenai, bema kekero muramura idia henia momo, bona bema miusiki ena regerege ia bada bona mavaru dikadia idia karaia, unai aria lalonai lebulebu karadia do idia vara diba. Unai bamona aria lalonai, lauma dalanai idia manoka taudia idia moru haraga, bona tauanina ena kara ma haida, hegeregere “heudahanai, kara mirodia, matabodaga, . . . [bona] hepapahuahu” do idia karaia. Dahaka ita karaia diba, unai bamona tauanina ena kara dikadia ese Keristani headava aria ena moale ia hadikaia lasi totona? Unai henanadai ita haerelaia totona, namona be Baibel ia gwauraia headava aria ta ita laloa.
Iesu Ia Lao Headava Ariana Ta
Iesu bona iena hahediba taudia be Galilea ena hanua Kana dekenai headava aria ta dekenai idia boiria. Idia ese unai boiboi idia abia dae, bona Iesu be unai moale negana ia durua. Uaina ia ore neganai, hoa dalana ai ia ese uaina namo hereana ma ia karaia. Ita daradara lasi, headava aria murinai headava tauna bona ena ruma bese taudia ese ma nega ta ai unai uaina orena be mai edia moale ida idia gaukaralaia hebou.—Ioane 2:3-11.
Iesu ia lao headava ariana amo gau momo ita diba. Ginigunana be, Iesu bona iena hahediba taudia be headava aria dekenai idia lao kava lasi. Baibel ia gwau idia boiridia dainai idia lao. (Ioane 2:1, 2) Unai hegeregerena, Iesu ese haheitalai amo headava aria rua ia kikilaia neganai, ia gwau vadivadi taudia idia noho badina be idia boiridia.—Mataio 22:2-4, 8, 9; Luka 14:8-10.
Tano haida dekenai, herevana headava aria dekenai ta idia boiria eiava lasi, to hanua taudia ibounai idia lao. To, unai kara dainai moni ena hekwakwanai ia vara diba. Reana ogogami headava matamata taudia be abitorehai karana amo aniani bona inuinu gaudia momo do idia hoia, taunimanima momo herea idia mai neganai idia hegeregere totona. Unai dainai, bema Keristani headava matamata taudia be edia lalona idia hadaia headava aria maragina do idia karaia bona vadivadi taudia haida sibona idia boiria, idia boiridia lasi Keristani tadikaka ese unai idia lalo-pararalaia bona idia matauraia be namo. South Africa, Cape Town ai, ia headava tauna ta ia gwau, iena headava dekenai be vadivadi taudia 200 ia boiria. To, 600 idia mai, bona aniani ia ore haraga. Ia boiria lasi taudia haida be basi ai idia guia loaloa taudia, headava purana ai Cape Town idia vadivadi henia. Unai basi lalonai idia loaloa taudia edia hakaua tauna be headava matamata hahine ena varavara ta, bona ia laloa ia be mai ena maoro loaloa taudia ibounai ia hakaua mai, ena be headava hahine eiava tauna ia hadibaia lasi!
Bema idia gwau headava aria ta dekenai taunimanima ibounai idia lao diba, Iesu ena murinai ia raka tauna momokanina ia lao diba, to bema unai bamona idia gwau lasi, do ia lao lasi bona idia boiria vadivadi taudia edia aniani bona inuinu gaudia do ia abia lasi. Namona be idia ura idia lao to idia boiria lasi taudia be sibona dekenai idia nanadaia, ‘Unai headava ariana dekenai lau lao karana ese ia hahedinaraia unai headava matamata taudia lau lalokau henia lasi, ani? Hekwakwanai lau havaraia bona unai aria ena moale do lau hadikaia, ani?’ Namona be idia boiria lasi Keristani tauna mai ena lalo-parara ia lalohisihisi lasi, to mai ena lalokau ida headava matamata taudia dekenai hanamoa revareva ta bona Iehova ena hahenamo ia siaia. Reana ia laloa headava matamata taudia ese edia headava ariana idia moalelaia totona, durua harihari gauna ta ia siaia danu be namo.—Hadibaia Tauna 7:9; Efeso 4:28.
Daika ese Maduna Ia Huaia?
Africa ena gabu haida dekenai, headava ariadia be vaia varavara taudia badadia ese idia hegaegaelaia. Reana headava matamata taudia be unai idia moalelaia, badina moni bada idia negea kava lasi. Reana idia laloa danu bema hekwakwanai ta ia vara, ia be edia maduna lasi. To, headava tau bona hahine be varavara amo heduru idia do abia dae lasi lalonai, namona be idia hamomokania varavara taudia be idia edia ura do idia matauraia.
Ena be Iesu be Dirava ena Natuna, “guba dekena amo ia diho,” to Kana dekenai idia karaia headava aria ia biagua lasi bona ena gaukara momo ia hakaua lasi. (Ioane 6:41) To, Baibel ena sivarai ese ita ia hadibaia, “aria biaguna” idauna ta idia abia hidi. (Ioane 2:8) Unai tau ena maduna be ruma bese kwarana matamata, eiava headava matamata tauna, ena ura ibounai do ia karaia.—Ioane 2:9, 10.
Namona be Keristani varavara taudia ese Dirava amo ruma bese ena kwara dagina ia abia tauna matamatana idia matauraia. (Kolose 3:18-20) Ia sibona ese iena headava aria dekenai do idia vara gaudia ena maduna ia huaia be namo. Bona namona be headava matamata tauna ia laloa namonamo, bona mai dalana neganai, iena adavana matamata, iena tama sina, bona iena ravana taudia edia ura ia matauraia. To, bema varavara taudia be headava matamata taudia edia ura idia matauraia lasi, headava matamata taudia be varavara taudia edia heduru do idia dadaraia bona sibona edia headava aria maragina ena davana do idia karaia. Unai dala amo gau ta lasi be headava matamata taudia edia headava aria do ia hadikaia. Hegeregere, Africa dekenai, Keristani headava aria ta dekenai, Keristani lasi varavara tauna be aria ia biagua neganai, idia mase vadaeni sene taudia hanamoa karana ta ia karaia!
Nega haida headava matamata taudia be headava aria ia do ore lasi neganai, aria idia rakatania. Bema unai bamona idia karaia, headava matamata tauna be maduna ia huaia namonamo tauna ta ia abia hidi, unai aria dekenai Baibel ena taravatu idia badinaia bona hora korikori ai idia hadokoa totona.
Palania Namonamo Bona Laloa Namonamo Karadia
Toana be Iesu ia lao headava ariana dekenai aniani namodia momo idia henia badina Baibel ia gwau ia be aria ta. Bona ita itaia vadaeni, uaina danu be bada herea. Ita daradara lasi, miusiki maorona idia gadaralaia bona mai hemataurai ida idia mavaru, badina unai be Iuda taudia edia moale dalana. Iesu be boio merona ena haheitalai amo unai ia hahedinaraia. Unai sivarai lalonai, kohu momo tamana be ia helalo-kerehai natuna ena giroa lou karana ia moalelaia, unai dainai ia gwau: “Do ita aniani, do ita moale hebou.” Iesu ia gwau, unai moale karana lalonai “gita bona mavaru edia regena” idia kamonai.—Luka 15:23, 25.
To, Baibel ia gwau lasi Kana dekenai idia karaia headava aria lalonai miusiki bona mavaru idia noho. Momokani, Baibel lalonai, headava aria edia sivarai ta lasi be mavaru ia kikilaia. Toana be Baibel negadia ai, Dirava ena abidadama hesiai taudia edia headava aria lalodiai, mavaru karana be nega ta ta sibona ai idia karaia, bona unai be kara badana lasi. Unai amo gau ta ita dibaia, a?
Africa dekenai, Keristani headava aria haida lalodiai saun gaudia mai edia siahu bada idia gaukaralaia. Miusiki ena regerege be bada herea dainai, vadivadi taudia idia herevahereva heheni namonamo diba lasi. Nega haida, aniani ia ore haraga, to mavaru ia ore lasi ela bona idia naria namonamo diba lasi. Unai aria be headava moalelaia totona idia karaia lasi, to mavaru badana idia moalelaia totona. Danu, nega momo miusiki ena regerege bada ese hekwakwanai havaraia taudia ia veria, idia diba lasi bona idia boiria lasi taudia idia vareai kava.
Baibel ia gwauraia headava aria dekenai miusiki bona mavaru ia kikilaia lasi dainai, unai ese headava taudia ia durua Iehova hanamoa headava aria ena palani idia karaia totona, ani? To, Africa ena saut kahana dekenai, vanegai idia karaia headava aria momo idia hegaegaelaia neganai, headava aria lalonai headava matamata taudia ida do idia raka hebou totona idia abia hidi Keristani matamata taudia be hora momo lalodiai mavaru dala aukadia idia dibaia toho. Hua momo lalodiai, idia ese edia nega bada be unai dala dekenai idia haorea. To, Keristani taudia dekenai gau badana be ‘nega namona idia hoia’ “gau namodia,” hegeregere haroro gaukara, sibona edia stadi, bona Keristani hebou lao henia karana totona.—Efeso 5:16, NW; Filipi 1:10.
Iesu ese uaina momo ia karaia dainai, ia hedinarai Kana dekenai idia karaia headava ariana be bada. To, ita diba unai aria be Iuda taudia haida edia headava aria bamona lasi, regerege bada idia havaraia lasi bona idia kekero lasi. (Ioane 2:10) Unai be edena bamona ita diba? Badina Lohiabada Iesu Keriso be unai headava aria lalonai ia noho. Taunimanima iboudiai amo, Iesu be Dirava ena taravatu hebamo dikana dadaraia totona ia badinaia momokani, unai taravatu ia gwau: “Kekero muramura momo idia inua taudia, danu do oi inua hebou lasi.”—Aonega Herevadia 23:20.
Unai dainai, bema headava matamata taudia idia ura edia headava aria dekenai uaina eiava kekero muramura ma haida do idia henia, namona be dala idia hegaegaelaia, maduna idia huaia taudia ese unai kara do idia biagua namonamo. Bona bema idia ura miusiki do idia gadaralaia, namona be miusiki namodia idia abia hidi bona maduna ia huaia namonamo tauna ta ese do ia biagua. Namona be vadivadi taudia idia koua, idia ura henia miusiki idauna do idia gadaralaia lasi eiava miusiki ena regerege do idia habadaia lasi. Bema do idia mavaru, namona be hemataurai bona dala maorona ai idia karaia. Bema murimuri varavara taudia eiava lauma dalanai idia manoka Keristani taudia ese mavaru dikana eiava lebulebu kara idia hahedinaraia, reana headava matamata tauna be unai miusiki do ia haidaua eiava mavaru do ia koua. Bema lasi, unai headava aria lalonai heiriheiri bona hekwakwanai do ia vara.—Roma 14:21.
Hari idia karaia mavaru, miusiki mai ena regerege bada, bona kekero muramura henia kava karana dainai hekwakwanai haida idia vara, unai dainai Keristani headava matamata tatau momo be edia headava aria dekenai unai bamona gaudia idia abia dae lasi. Taunimanima haida be unai kara dainai idia maumauraidia, to Dirava ena ladana helagana idia hadikaia garina idia gari dainai, idia hanamodia be namo. To headava matamata tatau haida be miusiki namona, mavaru ena nega, bona dala maorona ai kekero muramura idia henia totona dala idia hegaegaelaia. Herevana edena bamona idia kara, to headava matamata tauna be ena headava aria dekenai do idia vara gaudia ena maduna ia huaia be namo.
Africa dekenai, lauma dalanai idia do goada lasi taudia haida be Keristani headava aria namodia idia ura henia lasi bona idia gwau ia be tau ta ena mase gabuna dekenai idia lao bamona. To, unai be laloa namonamo karana lasi. Reana tauanina ena ura dikadia hagugurua karana be nega sisina lalonai moale ia havaraia diba, to gabeai unai ese Keristani taudia edia lalona ia hahisia bona Dirava ena ladana ia hadikaia. (Roma 2:24) To, Dirava ena lauma helaga ese moale ia havaraia. (Galatia 5:22) Keristani headava taudia momo be mai edia moale ida edia headava dinana idia laloa lou, badina idia diba ia ese ‘taunimanima ia hadikaia lasi,’ to ia be aria mai ena moale.—2 Korinto 6:3.
Welsh bona Elthea be edia Keristani lasi varavara taudia, edia headava aria dekenai idia lao taudia, edia hereva namodia haida idia do laloa noho. Ta ia gwau: “Hari dinadia ai idia karaia headava aria mai edia regerege bada dainai ai hesiku. Unai headava aria namona dekenai ai lao dainai ai moale.”
Gau badana be, Keristani headava aria mai edia moale bona hemataurai ese headava ia Hamatamaia Tauna, Iehova Dirava, idia hanamoa.
[Box/Picture on page 22]
HEADAVA ARIA KARAIA DALANA ENA LISTA
• Bema murimuri varavara tauna ta oi boiria hereva ta ia henia totona, oi hamomokania vadaeni ia be Keristani lasi karana ta do ia karaia lasi, a?
• Bema miusiki do umui gadaralaia, ane namodia sibona oi abia hidi, a?
• Miusiki be hemataurai dalana dekenai do idia gadaralaia, a?
• Bema do umui mavaru, hemataurai dalana dekenai do umui karaia, a?
• Kekero muramura be dala maorona ai do idia henia, a?
• Maduna idia huaia namonamo taudia be unai do idia biagua, a?
• Headava aria hadokoa totona, nega namona oi gwauraia hidi, a?
• Maduna idia huaia namonamo taudia be unai aria dekenai do idia noho ela bona ia doko, a?