Henanadai Mauana
◼ Bema tadikaka ta bona taihu ta idia ura Kingdom Hall ai edia headava idia karaia, elda taudia ida dahaka gaudia idia herevalaia be namo?
Kingdom Hall ai headava ena program be Baibel ena hakaua herevadia hegeregerena idia karaia neganai, unai ese Iehova ia hanamoa. Momokani, taunimanima momo be Kingdom Hall ai headava idia karaia dalana idia itaia neganai, idia gwau iseda orea ena gaukara dalana be namo herea. Unai dainai, bema tadikaka ta bona taihu ta idia ura Kingdom Hall ai edia headava idia karaia, elda taudia ida gau haida idia herevalaia guna be maoro, unai amo ‘gaukara ibounai idia karaia namonamo, mai dala maorona.’—1 Kor. 14:40.
Bema tadikaka ta bona taihu ta idia ura Kingdom Hall ai edia headava idia karaia, namona be edia noinoi revareva ta idia torea bona unai Kingdom Hall ia gaukaralaia kongrigeisen ta ena hesiai komiti dekenai idia siaia. Unai revareva ai headava dinana bona taim idia torea hedinarai be namo, bona nega bada ia do noho lalonai kongrigeisen ena hesiai komiti dekenai idia siaia. Namona be tau bona hahine idia laloatao, elda taudia be kongrigeisen ena hebou negadia do idia haidaua lasi headava ta karaia totona. Ma danu, namona be do idia ura headava taudia be haheitalai namona, bona Baibel ena hakaua herevadia bona Iehova ena taravatu idia badinaia.
Headava karaia dalana ta ese Dirava ia hanamoa totona, tadikaka bona taihu ese idia ura gaukaralaia gaudia bona taudia be hesiai komiti dekenai idia gwauraia guna be namo, unai amo abia hidi maorona idia karaia diba. Ena be elda taudia be unai tadikaka bona taihu ese idia ura abia hidi gaudia ibounai do idia haidaua toho lasi, to bema idia itaia gau ta be ia maoro lasi, vadaeni unai tadikaka bona taihu idia hadibaia unai gauna idia haidaua be namo. Headava totona, Kingdom Hall dekenai be Kingdom Melodies sibona do idia gaukaralaia. Kingdom Hall dekenai herahera gaudia atoa o sea atoa dalana be hesiai komiti ese do ia hamomokania guna. Namona be Kingdom Hall ai headava taudia edia foto o vidio idia abia taudia ese unai nega idia matauraia danu. Elda taudia ese tadikaka bona taihu dekenai gwaumaoro idia henia diba Kingdom Hall dekenai edia headava karaia dalana idia tohoa totona, to namona be idia abia hidi negana ese kongrigeisen ena hebou negadia ia haidaua lasi. Namona be headava ena inveteisen kadi ta be Kingdom Hall ena notisbod dekenai do idia atoa lasi. To, headava ta be Kingdom Hall ai do idia karaia dainai, elda taudia ese hadibaia hereva kwadogi be Hesiai Hebou ena kahana dekenai kongrigeisen taudia idia hadibaia.
Ena be tadikaka bona taihu ese idia abia hidi taudia (best man bona bridesmaid) idia bapatiso o lasi, to namo lasi Baibel ese ia taravatua kara dikadia idia karaia taudia o helai taudia do idia hahekwakwanaia taudia idia abia hidi. Namona be elda tadikaka ta ese headava ena tok ia karaia. Elda taudia be Dirava ena Hereva idia hadibaia namonamo taudia dainai, idia be hegeregere momokani headava dinana ai Baibel ena hakaua herevadia idia hahedinaraia namonamo totona.—1 Tim. 3:2.
Namona be elda tadikaka ese Kingdom Hall ai do idia karaia headava ena program ibounai ia diba, namo lasi kerere haida idia vara dainai unai ese ena ladana namona idia hadikaia. Unai elda be tadikaka bona taihu do ia nanadaia, idia turana karaia neganai kara namodia idia karaia eiava, bona unai tadikaka bona taihu ese hereva momokani idia gwauraia hedinarai be gau badana. Bema tadikaka o taihu be guna ia headava, namona be pepa o dala haida amo ia hamomokania hari ia be dala maorona ai do ia headava, namo lasi Baibel bona gavamani ena taravatu ia utua. (Mat. 19:9) Unai ena anina be, ia ese elda tauna dekenai ena headava hadokoa pepana ia hahedinaraia be namo.
Bema tadikaka bona taihu be elda taudia ida idia herevahereva bona idia gaukara hebou, ibounai ese headava dinana do idia moalelaia.—Aon. 15:22; Heb. 13:17.