Emu Mauri Dalana amo Emu Abidadama Oi Hamomokania
“Bema abidadama sibona ia noho, to kara be lasi, unai abidadama be anina lasi.”—IAMESI 2:17.
1. Dahaka dainai Keristani taudia ginigunadia ese edia abidadama sibona lasi, to edia kara danu idia laloa?
KERISTANI taudia ginigunadia be edia kara amo edia abidadama idia hamomokania. Hahediba tauna Iamesi ese Keristani taudia ibounai ia hagoadaia: “Dirava ena hereva do umui kamonai kava lasi, to umui badinaia danu.” Ma ia gwau: “Tauanina bema mai ena lauma lasi, ia be mase gauna, ani? Vadaeni unai bamona danu, abidadama mai ena kara namodia lasi, be mase gauna.” (Iamesi 1:22; 2:26) Iamesi ese unai hereva ia torea bena lagani 35 murinai, Keristani taudia momo be edia kara namodia amo edia abidadama idia hamomokania. To madi, haida be unai bamona idia karaia lasi. Iesu ese Semurana kongrigeisen taudia ia hanamoa; to Sadi kongrigeisen taudia momo dekenai, ia gwau: “Oiemu kara lau diba. Umui idia herevalaia, idia gwau, ‘Inai ekalesia orea ia mauri noho.’ To lasi, lau diba oi mase vadaeni.”—Apokalupo 2:8-11; 3:1.
2. Keristani taudia ese sibodia dekenai dahaka henanadai idia henia be namo?
2 Unai dainai, Iesu ese Sadi kongrigeisen—bona gabeai iena hereva do idia duahia taudia ibounai—ia hagoadaia, Keristani hereva momokani do idia ura henia, guna bamona, bona Dirava idia tura henia. (Apokalupo 3:2, 3) Namona be ita ta ta sibona ita nanadaia: ‘Egu kara be edena bamona? Egu kara ese ia hahedinaraia lau karaia gaudia ibounai lalonai, haroro gaukara bona kongrigeisen heboudia dekenai danu, egu abidadama lau hamomokania, a?’ (Luka 16:10) Mauri lalonai idia vara gaudia idauidau ita herevalaia diba, to hari, Keristani taudia idia headava murinai idia karaia ariadia dekenai abidadama ita hahedinaraia dalana, do ita kikilaia.
Aria Maragidia
3. Aria moalelaia hebou karana dekenai, Baibel ena hereva be dahaka?
3 Keristani taudia ese aria maragina ta dekenai ita idia boiria neganai, ita moale. Iehova be “moale Diravana” dainai, Ia ura iena hesiai taudia idia moale. (1 Timoteo 1:11, NW ) Iehova be Solomona amo inai hereva ia gwauraia: “Lau laloa tau ese iena mauri do ia moalelaia be namo, badina ia be mai ena gau namona ta lasi, to aniani, inuinu, bona moale sibona. Iena hekwarahi ia karaia neganai, bema inai moale be ia dekenai ia noho, unai tau ena noho be namo.” (Hadibaia Tauna 3:1, 4, 13; 8:15) Ruma bese taudia idia aniani hebou, eiava tadikaka bona taihu be aria maragina ta idia karaia neganai, unai bamona idia moale hebou diba.—Iobu 1:4, 5, 18; Luka 10:38-42; 14:12-14.
4. Aria ia karaia tauna ese dahaka ia laloa be namo?
4 Bema aria ta karaia totona palani oi karaia bona unai aria do oi naria, ena be tadikaka bona taihu haida sibona do oi boiria umui aniani eiava umui herevahereva totona, to namona be emu palani oi laloa namonamo. (Roma 12:13) Oi ura ‘Dirava amo ia mai aonega’ oi gaukaralaia ‘gau ibounai oi karaia namonamo.’ (1 Korinto 14:40; Iamesi 3:17) Aposetolo Paulo ia gwau: ‘Umui aniani o umui inuinu, o dahaka dahaka umui karaia neganai, gau ibounai do umui karaia Dirava hanamoa totona. Umui emui kara amo ma haida umui hakaua kerere lasi.’ (1 Korinto 10:31, 32) Dahaka gaudia haida ita karaia diba? Bema unai oi lalohadailaia guna, oi bona oi boiria taudia be emui kara amo emui abidadama do umui hahedinaraia.—Roma 12:2.
Edena Bamona Aria?
5. Dahaka dainai aria biaguna ese kekero muramura bona miusiki do ia laloa namonamo be gau badana?
5 Aria idia naria taudia momo idia daradara, aria ai kekero muramura do idia atoa be namo eiava lasi. Kekero muramura ese aria momo dekenai moale ia havaraia lasi. Gunaguna, Iesu be hoa dalanai paraoa bona gwarume amo hutuma ia ubua. Baibel ia gwau lasi Iesu ese hoa dalanai uaina ia henidia, ena be ita diba ia be mai ena siahu unai bamona ia karaia totona. (Mataio 14:14-21) Bema aria dekenai kekero muramura do oi atoa, namona be hida do oi gaukaralaia oi laloa namonamo, bona kekero muramura idia inua lasi taudia idia inua diba gaudia oi atodia. (1 Timoteo 3:2, 3, 8; 5:23; 1 Petero 4:3) Kekero muramura be ‘gaigai bamona ia koria’ diba, unai dainai ta ita doria lasi ia inuinu totona. (Aonega Herevadia 23:29-32) Miusiki bona ane be edena bamona? Bema emu aria dekenai miusiki do oi gadaralaia, namona be ane ena miusiki bona ena hereva oi laloa namonamo guna, bena do oi gadaralaia anedia oi abia hidi. (Kolose 3:8; Iamesi 1:21) Keristani taudia momo idia gwau, Kingdom Melodies idia gadaralaia eiava Basileia anedia abia hebou karana ese moale ia havaraia. (Efeso 5:19, 20) Bona namona be miusiki ena regena ia bada momokani lasi, unai amo haida edia herevahereva bona dekena taudia edia noho namona danu do oi hadikaia lasi.—Mataio 7:12.
6. Herevahereva karana bona ma gau haida dekenai, aria biaguna ese edena dala ai ena abidadama ia hahedinaraia diba?
6 Aria dekenai Keristani taudia ese gau idauidau idia herevalaia diba, buka haida idia duahia badabada, eiava ekspiriens namodia idia gwauraia. Bema ta ia herevalaia gauna be Keristani taravatudia hegeregerena lasi, aria biaguna ese dala namona ai unai tauna do ia hadibaia be namo. Namona be tau tamona sibona ese herevahereva karana ia biagua lasi. Bema aria biaguna ia itaia unai ia vara, vadaeni aonega dalanai ia hereva diba, unai amo dala ia kehoa ma haida idia herevahereva totona. Hegeregere, matamata taudia dekenai henanadai haida ia henia edia lalohadai idia gwauraia totona, eiava sivarai ta ia kikilaia dainai ma haida edia lalohadai idia gwauraia. Matamata bona buruka taudia ese unai aria do idia moalelaia. Bema oi be aria biaguna bona aonega dalanai gau ibounai oi karaia namonamo, aria dekenai idia noho taudia ese emu “laloa maoromaoro” karana do idia itaia. (Filipo 4:5, NW ) Do idia itaia oi be mai emu abidadama, bona emu mauri ibounai lalonai unai do oi hahedinaraia.
Headava Ariadia
7. Dahaka dainai headava aria palanilaia karana dekenai, laloa namonamo ita gaukaralaia?
7 Keristani taudia idia headava neganai, unai be moale bada negadia. Dirava ena idaunegai hesiai taudia, Iesu bona ena hahediba taudia danu, be headava ena aria dekenai idia lao bona idia moalelaia. (Genese 29:21, 22; Ioane 2:1, 2) To hari, sivarai haida ese idia hahedinaraia, headava aria palanilaia karana be mai ena hekwarahi bada, unai dainai aria biagudia ese unai idia laloa namonamo. Bona unai bamona negadiai, dala ia kehoa Keristani tauna ese ena abidadama ia hahedinaraia totona.
8, 9. Headava momo dekenai, 1 Ioane 2:16, 17 ena hereva be edena bamona ia momokani?
8 Dirava ena hakaua hereva idia diba lasi o laloa bada lasi taudia momo idia gwau, headava aria be aniani bona inuinu momo negana. Europe ena magasin ta lalonai, headava matamata hahine ta ia gwau, ia headava neganai ia be kwini ta bamona. Ia gwau, ‘Ai be hosi foa ese idia veria kariota dekenai ai guia bona emai murinai be hosi 12 ese idia veria kariota idia heau, bona kariota ma ta lalonai be miusiki gadaralaia taudia idia guia. Unai murinai, aniani bona miusiki namo herea ai moalelaia; unai be nega hereadae. Idia vara gaudia ibounai be lau laloa dalana hegeregerena, unai dina ai lau be kwini ta.’
9 Momokani, tano ta ta edia kastom be idauidau, to unai hahine ena hereva be aposetolo Ioane ena hereva ia hamomokania: “Tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.” Oi laloa lo Keristani tau bona hahine idia ura edia headava be king bona kwini edia headava bamona idia karaia be maoro, a? Namona be edia headava ena palani idia karaia neganai, inai sisiba idia laloa, “Dirava ena ura ia karaia noho tauna be do ia noho ela bona hanaihanai.”—1 Ioane 2:16, 17.
10. (a) Dahaka dainai headava aria ena palani ita karaia be gau badana? (b) Bema idia ura haida do idia boiria, dahaka idia laloa be namo?
10 Idia ura headava Keristani taudia ese laloa maoromaoro karana idia hahedinaraia be namo, bona Baibel ese idia ia durua diba. Ena be headava dinana be mai anina bada, to idia diba unai be edia headava maurina ia hamatamaia sibona, bona edia headava be noho hanaihanai gauna. Unai dainai headava ena aria badana idia karaia be anina lasi. To bema idia ura aria idia karaia, vadaeni gau ibounai idia laloa namonamo be namo, hegeregere aria badana eiava maragina do idia karaia, bona moni hida do idia negea. (Luka 14:28) Edia Keristani maurina lalonai, Baibel ena hereva bamona, tau be kwarana. (1 Korinto 11:3; Efeso 5:22, 23) Unai dainai ia headava tauna ena maduna be, headava ena aria dekenai idia vara gaudia ia naria be namo. To momokani, do ia adavaia hahinena ena lalohadai ia abia be namo, hegeregere aria dekenai daidia do idia boiria bona taunimanima hida do idia mai. Reana edia varavara bona turadia haida sibona do idia boiria; unai dainai mai manau ida edia abia hidi idia karaia. Namona be idia diba, ena be Keristani taudia haida idia boiria lasi, to unai taudia be idia laloparara bona do idia badu lasi.—Hadibaia Taudia 7:9.
“Aria Biaguna”
11. Headava dekenai “aria biaguna” ena gaukara be dahaka?
11 Bema tau bona hahine ese headava aria ta idia hegaegaelaia, edena dala ai unai aria be hemataurai dalanai idia karaia diba? Gunaguna Kana ai, Iesu be headava ariana ta dekenai ia lao neganai, “aria ena biaguna” ta ia noho, reana ia be lo Keristani tauna ta. Bona lagani momo lalonai Iehova ena Witnes taudia ese unai dala idia badinaia, headava ariadia dekenai aria biaguna ta idia abia hidi. (Ioane 2:9, 10) Unai hegeregerena, namona be headava tauna ese lo Keristani tadikakana ta ia abia hidi aria ia naria totona. Aria biaguna be headava tauna ena lalohadai ia kamonai guna, unai amo do ia diba aria vairanai bona aria lalonai dahaka gaukara idauidau do ia karaia.
12. Do ia headava tauna ese kekero muramura gaukaralaia karana, be edena bamona ia laloa be namo?
12 Paragraf 5 ena hereva bamona, haida idia ura lasi edia headava aria dekenai kekero muramura idia gaukaralaia, badina unai ese aria ena moale ia hadikaia diba. (Roma 13:13; 1 Korinto 5:11) To bema kekero muramura do idia gaukaralaia, namona be headava tauna ia itaia kekero muramura momo idia atoa lasi. Kana ai, Iesu ese ia lao henia headava ariana dekenai uaina idia noho, bona Iesu ese uaina namo hereana ia henia danu. Unai neganai, aria biaguna ia gwau: “Taunimanima ibounai ese uaina namo herea idia atoa diho guna, vadaeni vadivadi taudia ese momo idia inua murinai, be uaina sisina ia namo idia atoa diho. To oi be uaina namo herea oi dogoatao vadaeni, ia mai bona harihari!” (Ioane 2:10) Iesu ia ura lasi ma haida idia kekero, badina ia be unai bamona kara ia abia dae lasi. (Luka 12:45, 46) Aria biaguna be Iesu ia henia uaina ia hanamoa neganai, reana ia hahedinaraia aria gunadia momo dekenai vadivadi taudia idia kekero. (Kara 2:15; 1 Tesalonika 5:7) Unai dainai, headava tauna bona aria naria Keristani tauna idia itaia, aria dekenai idia noho taudia ese inai Baibel ena hakaua herevana idia badinaia be namo: “Inuinu dekena amo do umui kekero lasi, inai be emui mauri do ia hadikaia.”—Efeso 5:18; Aonega Herevadia 20:1; Hosea 4:11.
13. Bema headava tau bona hahine idia ura edia headava aria ai miusiki idia gadaralaia, dahaka idia laloa be namo, bona dahaka dainai?
13 Bema aria haida dekenai miusiki do idia gadaralaia, namona be miusiki ena volium idia naria namonamo, unai amo ma haida edia herevahereva bona kamonai karana idia hadikaia lasi. Keristani elda tauna ta ia gwau: “Dina ia diho lalonai, herevahereva ena regena ia bada ia lao eiava taunimanima idia mavaru matamaia neganai, nega haida miusiki ena volium idia habadaia. Matamana ai miusiki ena volium ia maragi, to gabeai ia bada ia lao bena herevahereva ia hadikaia diba. Headava ariana be nega namona Keristani taudia ese edia hebamo karana idia moalelaia totona. To madi, bema miusiki ia bada, unai bamona hebamo karana do idia moalelaia lasi!” Bema aria dekenai miusiki gadaralaia taudia haida idia boiria, headava tauna bona aria biaguna edia maduna be miusiki bona ena volium idia biagua be namo. Paulo ia gwau: “Emui kara ibounai bona emui hereva ibounai, gau ibounai, be Lohiabada Iesu ena ladana dekenai do umui karaia.” (Kolose 3:17) Aria totona idia boiria taudia be edia ruma dekenai idia giroa lou neganai, aria ai idia gadaralaia miusiki be edena bamona do idia laloa? Do idia gwau headava tauna bona hahinena ese gau ibounai be Iesu ena ladanai idia karaia, a? Unai bamona lalohadai idia abia be namo.
14. Keristani taudia ese edia headava idia laloa neganai, dahaka be mai moale ida idia laloatao be namo?
14 Oibe, bema tau bona hahine ese edia headava totona gau ibounai idia karaia namonamo, unai headava dinana be mai moale ida do idia laloatao. Lagani 30 lalonai idia headava taudia, Adam bona Edyta, ese headava ta idia herevalaia neganai, idia gwau: “Keristani hebamo namona oi mamia diba. Iehova hanamoa anedia bona moale karadia namodia ma haida idia karaia danu. Mavaru bona miusiki be gau badadia lasi. Unai aria be namo herea bona ai ia hagoadaia, bona gau ibounai be Baibel ena hakaua hereva hegeregerena idia karaia.” Oibe, headava tau bona hahine ese edia kara amo edia abidadama idia hamomokania diba.
Harihari Gaudia
15. Harihari gaudia henia karana dekenai, edena Baibel ena sisiba ita laloa be namo?
15 Tano momo dekenai, varavara bona turadia ese idia headava taudia dekenai harihari gaudia idia henia. Bema oi ura harihari gaudia oi henia, dahaka oi laloatao be namo? Mani aposetolo Ioane ena hereva ita laloa lou. Ioane ia gwau, hekokoroku karana be do ia ore tanobadana ena kara, ia be Keristani taudia edia kara lasi. (1 Ioane 2:16, 17) Ioane ena hereva dainai, headava tau bona hahine ese harihari gaudia idia henia taudia ibounai edia ladadia idia gwauraia be namo, a? Makedonia bona Akaia dekenai idia noho Keristani taudia ese Ierusalema tadikakadia dekenai heduru idia henia, to Baibel ese harihari gaudia idia henia taudia edia ladadia ia gwauraia lasi. (Roma 15:26) Harihari gaudia idia henia Keristani taudia momo idia ura lasi edia ladadia idia gwauraia, badina idia ura lasi ma haida ese idia do idia laloa bada. Unai dainai, Iesu ena sisiba Mataio 6:1-4 dekenai ita laloa be namo.
16. Headava tau bona hahine ese dahaka idia karaia lasi, unai amo ma haida edia hemami do idia hadikaia lasi?
16 Bema harihari gaudia idia henia taudia edia ladadia idia gwauraia, unai ese “hekokoroku” ia havaraia, badina haida edia harihari gaudia be namo herea bona dava bada gaudia. Unai dainai, aonega Keristani headava taudia, ese harihari gaudia idia henia taudia edia ladadia be taunimanima vairanai idia gwauraia lasi. Badina unai kara ese harihari gaudia idia henia lasi taudia ma haida ia hahemaraia diba. (Galatia 5:26; 6:10) To headava taudia idia ura diba, harihari gaudia be daidia ese idia henia, unai be kerere lasi. Harihari gauna ena kadi amo unai tauna ena ladana idia itaia diba, to namo lasi ena ladana be ma haida vairanai idia gwauraia. Harihari gaudia ita hoia, henia, bona ita abia neganai, namona be eda kara amo eda abidadama ita hahedinaraia.a
17. Keristani taudia edia tahua gauna be dahaka?
17 Iseda abidadama ita hamomokania totona, kara maoromaoro taravatudia ita badinaia, Keristani heboudia dekenai ita lao, bona haroro gaukara ita karaia. To unai gaudia sibona be hegeregere lasi, namona be iseda mauri ena kahana ibounai lalonai iseda abidadama ita hahedinaraia. Oibe, iseda “kara ibounai”—ataiai ita herevalaia daladia—dekenai danu kara maoromaoro ita hahedinaraia.—Apokalupo 3:2.
18. Headava bona aria ma haida dekenai ita lao neganai, edena bamona Ioane 13:17 ena hereva ita badinaia diba?
18 Iesu ese iena kamonai aposetolo taudia edia aena ia huria murinai, ia gwau: “Inai bema umui diba, bona bema umui karaia, be do umui namo.” (Ioane 13:4-17) Hari ita noho gabunai, reana ita idia vadivadi henia taudia edia aena ita huria lasi. Inai stadi lalonai ita herevalaia bamona, iseda mauri ena kahana idauidau lalonai—Keristani headava bona aria dekenai danu—lalokau bona hebogahisi karadia amo iseda abidadama ita hahedinaraia. Herevana do ita headava eiava headava ta dekenai ita lao, eiava Keristani taudia edia moale hebouna ta dekenai ita lao, gau badana be iseda kara amo iseda abidadama ita hahedinaraia.
[Footnote]
a Headava dinadia bona ariadia edia hereva ma haida be October 15 Watchtower rau 28 dekenai ita davaria diba, ena ladana be: “Increase the Joy and Dignity of Your Wedding Day.”
Edena Bamona Do Oi Haere?
Edena dala ai emu abidadama oi hahedinaraia diba
• moale hebouna ta oi palanilaia neganai?
• headava aria ta oi palanilaia neganai?
• harihari gaudia oi henia eiava abia neganai?
[Picture on page 18]
Ena be aria ta dekenai taunimanima haida sibona ita boiria, namona be “Dirava amo ia mai aonega” ita hahedinaraia