Siahu Idia Abia Taudia Oi Matauraia

“Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.”​—⁠1 PETERO 2:⁠17.

1, 2. Hari inai negai taunimanima ese siahu taudia be edena bamona idia laloa? Dahaka dainai?

SINANA ta be mai ena lalohisihisi ida ia gwau: “Natudia dekenai maoro ibounai idia noho. Tama sina idia matauraia lasi.” Motuka dekenai idia atoa pepana ta ia gwau: “Dagi Taudia Edia Siahu Oi Henanadailaia.” Unai be hari inai negai oi itaia diba karana idia hahedinaraia lalohadai rua sibona. Tanobada ibounai lalonai, taunimanima ese tama sina, tisa taudia, gaukara biagudia, bona gavamani taudia idia matauraia lasi.

² Haida be edia pagana idia hamarerea bona idia gwau, ‘Unai siahu taudia be kara ta idia karaia lasi idia lau matauraia totona.’ Nega haida, unai be ita gorea diba lasi. Ita be kara gageva gavamani taudia, mataganigani gaukara biagudia, idia hegeregere momokani lasi tisa taudia, bona tama sina dikadia edia sivarai momo ita kamonai. Ita moale diba, badina kongregesen ai idia noho siahu taudia dekenai Keristani taudia momo be unai bamona idia laloa lasi.​—⁠Mataio 24:​45-47.

3, 4. Dahaka dainai Keristani taudia ese siahu idia abia taudia idia matauraia?

³ Ita be Keristani taudia dainai, “badina” ia noho gavamani taudia do ita matauraia. Aposetolo Paulo ese Keristani taudia ia hamaoroa “gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” (Roma 13:​1, 2, 5; 1 Petero 2:​13-15) Paulo ese ruma bese lalonai siahu idia abia taudia ita kamonai henia ena badina maorona ia hahedinaraia danu, ia gwau: “Hahine taudia e, emui adavana do umui kamonai henia. Badina inai be maoro Lohiabada ena vairana dekenai. Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.” (Kolose 3:​18, 20) Kongregesen elda taudia ese iseda hemataurai idia abia be namo badina ‘Lauma Helaga ese naria taudia ai idia ia halaoa vadaeni. Dirava ena ekalesia do idia naria.’ (Kara 20:28) Iehova ita matauraia dainai siahu idia abia taudia ita matauraia. To momokani, hanaihanai iseda mauri lalonai Iehova ena siahu matauraia karana ita atoa guna.​—⁠Kara 5:⁠29.

⁴ Iehova ena siahu bada hereana ita laloa noho lalonai, siahu taudia idia matauraia taudia bona idia matauraia lasi taudia haida edia haheitalai mani ita laloa.

Hemataurai Lasi Karana Dainai Iehova Ena Lalo-Namo Idia Haboioa

5. Dahaka hemataurai lasi karana be Mikala ese Davida dekenai ia hahedinaraia, bona unai dainai dahaka ia vara?

⁵ King Davida ena sivarai amo ita itaia Iehova ena lalohadai be dahaka Dirava amo siahu idia abia taudia idia laloa maragi taudia dekenai. Davida ena ura dainai gwauhamata maua helagana be Ierusalema dekenai idia abia lao neganai, iena adavana Mikala ia itaia ‘Davida be Lohiabada hanamoa totona ia mavaru noho, ma ia roho daekau noho mai moale danu. Bona Davida dekenai ia badu, ia ura henia lasi.’ Namona be Mikala ia laloatao Davida be ruma bese ena kwarana sibona lasi to ia be unai tano ena king danu. To, ia ese ena hemami be hahemaraia hevaseha herevadia amo ia gwauraia: “King Davida be hari dina ia sibona ia hanamoa bada, ani? Oi ese hesiai kekeni edia vairana dekenai oiemu dabua oi kokia, oi mavaru, kavakava tauna ia karaia bamona.” Unai dainai Mikala be natuna ta ia havaraia lasi.​—⁠2 Samuela 6:​14-23.

6. Iehova ese Kora ena hemataurai lasi karana Ia horoa tauna dekenai be edena bamona ia laloa?

⁶ Dirava ia haginia tiokratik gunalaia dalana ia matauraia lasi tauna ta be Kora. Ia be Kohata iduhu tauna dainai, palai dubu dekenai Iehova ia hesiai henia be ena hahenamo badana! To, ia be Dirava ese Israela idia gunalaia totona ia horoa taudia Mose bona Arona edia kerere ia tahua. Kora be Israela ena lohia taudia ma haida danu ia hebou bona hemataurai lasi dalanai Mose bona Arona idia hamaoroa: “Umui ruaosi ese mai hekokoroku danu ai umui gunalaia noho! Ai Israela taudia ibounai be Lohiabada ena bese, bona Lohiabada be aiemai huanai ia noho!” Iehova be Kora bona ena durua taudia dekenai dahaka ia laloa? Dirava ia laloa edia kara amo Ia, Iehova, idia hadikaia. Kora bona lohia taudia 250 idia itaia edia durua taudia be tano ese ia hadonoa murinai, Iehova ese lahi amo idia ia hamasea.​—⁠Numera 16:​1-3, 28-35.

7. “Aposetolo taudia namo herea” ese Paulo ena dagi idia gwauraia dika be mai ena badina, a?

⁷ Keristani taudia ginigunadia edia kongregesen lalonai, haida ese tiokratik dalanai siahu idia abia taudia idia gwau-edeede henia. Korinto kongregesen lalonai idia noho “aposetolo taudia namo herea” ese Paulo dekenai hemataurai lasi karana idia hahedinaraia. Iena haroro dalana idia gwauraia dika, idia gwau: “Iena tauanina ita itaia neganai, ia be manoka bona iena hereva be mamina lasi.” (2 Korinto 10:10; 11:⁠5) Herevana Paulo be hereva namonamo tauna eiava lasi, to ia be aposetolo tauna ta dainai idia matauraia be namo. To momokani Paulo ena hereva be mamina lasi, a? Iena haroro herevadia Baibel lalonai ese idia hahedinaraia iena hereva ese kamonai taudia edia lalona ia veria. Paulo be Heroda Agripa Iharuana, ‘Iuda taudia edia hepapahuahu gaudia ia diba namonamo’ tauna, ida nega sisina lalonai idia herevahereva murinai, Heroda Agripa be Paulo ena hereva dainai ia gwau: “Nega kwadogi lalonai lauegu lalona do oi veria bona Keristani tauna ta ai lau oi halaoa”! (Kara 13:​15-43; 17:​22-34; 26:​1-28, NW ) To, Korinto dekenai unai aposetolo taudia namo herea idia gwau iena hereva dekenai mamina be lasi! Iehova ese edia kara be edena bamona ia laloa? Efeso kongregesen ena gunalaia taudia totona ia siaia herevana ta lalonai, Iesu Keriso ese ‘sibodia idia gwauraia aposetolo taudia, to idia be koikoi taudia’ edia lalona veria karana idia dadaraia taudia ia hanamoa.​—⁠Apokalupo 2:⁠2.

Ena be Idia Goevadae Lasi to Oi Matauraia

8. Edena dala ai Davida ia hahedinaraia Iehova ese Saulo dekenai ia henia siahuna ia matauraia?

⁸ Baibel lalonai siahu taudia idia matauraia taudia momo edia sivarai idia noho, edia siahu idia gaukaralaia kerere neganai danu idia matauraia. Davida be unai bamona haheitalai namona ta. King Saulo, Davida ese ena hesiai gaukara ia karaia, be Davida ese ia karaia gaudia dainai ia mama bona dala ia tahua ia hamasea totona. (1 Samuela 18:​8-12; 19:​9-11; 23:26) Ena be Saulo ia alaia daladia idia noho, to Davida ia gwau: “Lau ese Lohiabada ia abia hidi king totona tauna lau hadikaia diba lasi momokani.” (1 Samuela 24:​3-6; 26:​7-13) Davida ia diba Saulo ia kerere, to Iehova dekenai ia rakatania, ia hahemaoro henia totona. (1 Samuela 24:​12, 15; 26:​22-24) Saulo ia gwauraia dika lasi bona ia dekenai ia hereva dika lasi.

9. (a) Saulo ese ia kara dika henia neganai Davida ena mamina be edena bamona? (b) Edena bamona ita diba Davida ena hemataurai Saulo dekenai be ia momokani?

⁹ Davida be idia kara auka henia dainai ia lalo-metau, a? Davida be Iehova dekenai ia taitai: “Dagedage taudia ese lau alaia dalana idia tahua noho.” (Salamo 54:⁠3) Iena kudouna lalonai idia noho gaudia ibounai be Iehova dekenai ia gwauraia: “Egu Dirava e, lau idia hadikaia gwauraia taudia dekena amo lau do oi hamauria. . . . Dagedage taudia be lau hadikaia totona idia haboua noho. To Lohiabada e, inai be lauegu kara dika o lauegu kerere dainai lasi. Lau be mai egu kerere ta lasi, to idia heau mai, bona lau alaia totona idia hegaegae noho. Do oi noga, lau durua totona do oi mai. Lau do oi itaia!” (Salamo 59:​1-4) Nega ta​—⁠ena be siahu tauna ta dekenai kerere ta oi karaia lasi, to oi dekenai hekwakwanai ia henia dainai​—⁠unai bamona mamina oi abia, a? Davida ese Saulo ia matauraia hanaihanai. Saulo ia mase neganai, Davida ia moale lasi, to ia ese lalohisihisi anena ta ia karaia: “Saulo bona Ionatana, mai edia lalokau, bona mai edia sivarai namo. . . . Ugava manu ena haraga be idia hereaia, laiona ena goada be idia hereaia. Israela hahine taudia e, Saulo totona do umui tai.” (2 Samuela 1:​23, 24) Unai be haheitalai namona Iehova ia abia hidi tauna matauraia karana dekenai, badina ena be Saulo ese Davida ia gwauraia dika to ia ese ia matauraia!

10. Edena dala ai Paulo ese siahu ia abia hakaua oreana matauraia karana dekenai haheitalai namona ia hahedinaraia, bona unai dainai dahaka ia vara?

¹⁰ Keristani negana lalonai, Dirava amo siahu idia abia taudia matauraia karana ena haheitalai namodia idia noho danu. Mani Paulo oi laloa. Ia ese aposetolo edia negai ia noho Keristani kongregesen ena hakaua oreana ena lalohadai ia matauraia. Paulo be Ierusalema dekenai ena vadivadi ginigabena ia karaia lalonai, hakaua oreana ese idia sisiba henia taravatu hegeregerena ia sibona do ia hagoevaia, unai amo do ia hahedinaraia Mose ena taravatu ia dadaraia lasi. Paulo ia laloa diba: ‘Guna lau idia hamasea gwauraia neganai unai tadikaka ese lau idia hamaoroa Ierusalema do lau rakatania. To hari idia ura lau be taunimanima vairadiai do lau hahedinaraia Mose ena taravatu lau matauraia. Lau be Galatia taudia lau tore henia vadaeni taravatu do idia badinaia lasi totona. Bema dubu dekenai lau lao, reana haida ese egu kara do idia lalo-pararalaia lasi, do idia laloa lau be unai kopina utua taudia lau durua.’ To, Paulo be unai bamona ia laloa lasi. Unai ese Keristani hakaua herevadia idia hadikaia lasi dainai, ia ese aposetolo taudia edia negai ia noho hakaua oreana ena hereva ia badinaia. Unai amo ia vara haraga gauna be Iuda taudia haida amo Paulo idia hamauria, bona gabeai lagani rua dibura rumana ai ia noho. To dokonai, Dirava ena ura ia vara. Kaisarea dekenai Paulo be dagi bada taudia vairanai ia haroro bona gavamani taudia ese Roma dekenai idia abia lao, Kaisara vairanai ia haroro totona.​—⁠Kara 9:​26-30; 21:​20-26; 23:11; 24:27; Galatia 2:12; 4:​9, 10.

Hemataurai Oi Hahedinaraia, A?

11. Edena dala ai gavamani ena siahu taudia dekenai hemataurai ita hahedinaraia?

¹¹ Oi ese siahu idia abia taudia oi matauraia, a? Keristani taudia idia hagania ‘ibounai ta ta edia davana do idia henia, idia matauraia be namo tauna do idia matauraia.’ Oibe, iseda kamonai karana “gavamani” ena siahu taudia dekenai ena anina be takisi monina ita henia sibona lasi, to iseda kara bona hereva amo unai siahu taudia ita matauraia danu. (Roma 13:​1-7) Bema idia dagedage gavamani ena siahu taudia vairanai ita gini, edena bamona do ita kara? Chiapas State, Mexico dekenai, gabu ta ena siahu taudia ese Iehova ena Witnes taudia edia famili 57 edia animal ubua tanona idia abia, badina unai Keristani taudia be tomadiho ariadia lalonai idia vareai lasi. Unai hekwakwanai hamaoromaoroa totona idia hebou neganai, unai Witnes taudia, edia toana ia goeva bona dabua namona idia karaia, be hanaihanai mai edia kara namo bona hemataurai ida idia hereva. Lagani ta bamona murinai, idia kwalimu. Edia kara namona dainai, itaia taudia haida ese idia matauraidia bona idia danu idia ura Iehova ena Witnes taudia ai idia lao!

12. Dahaka dainai abidadama lasi adavana “matauraia” karana be mai anina bada?

¹² Edena dala ai Dirava ese ruma bese lalonai siahu ia henia taudia oi matauraia diba? Aposetolo Petero be Iesu ese hisihisi ia haheaukalaia karana ia herevalaia murinai, ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.” (1 Petero 3:​1, 2; Efeso 5:​22-24) Unuseniai Petero ia hahedinaraia hahine ese ena adavana ia kamonai henia mai ‘hemataurai bada’ ida be gau badana, ena be tatau haida edia kara ia namo lasi. Hahine ena hemataurai karana ese ena abidadama lasi adavana ena kudouna ia hamarerea diba.

13. Edena dala ai hahine ese edia tatau idia matauraia?

¹³ Unai karoa ena siri ma haida amo Petero ese ita ia durua Sara ena haheitalai ita laloa totona, iena adavana, Aberahamo, be haheitalai namona abidadama karana dekenai. (Roma 4:​16, 17; Galatia 3:​6-9; 1 Petero 3:⁠6) Hahine mai edia abidadama lasi tatau edia hemataurai karana ese hahine mai edia abidadama tatau edia hemataurai karana ia hereaia be namo, a? Edena bamona bema emu tau ida oi lalo-tamona lasi? Iesu ese unai gauna dekenai ita badinaia diba sisiba namona ia henia: “Sedira [siahu ia abia] tauna ta ese oi do ia hamaoroa, ‘Kilomita ta dekenai lauegu kohu do oi huaia,’ vadaeni, kilomita rua do oi huaia.” (Mataio 5:41) Emu tau ena ura oi karaia amo ia oi matauraia, a? Bema toana be unai be ia auka, emu hemami be ia ida oi herevalaia. Oi laloa lasi ia be oiemu hemami ia diba. To emu lalohadai oi gwauraia neganai, mai hemataurai ida oi karaia. Baibel ese ita ia sisiba henia: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.”​—⁠Kolose 4:⁠6.

14. Tama sina matauraia karana ena anina be dahaka?

¹⁴ Umui natudia be edena bamona? Dirava ena Hereva ia gwau: “Memero bona kekeni e, umui emui tamana bona sinana do umui kamonai henia. Kara maorona be unai. ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana.” (Efeso 6:​1-3) Oi itaia emu tama sina kamonai henia karana be ‘tamana bona sinana matauraia’ karana ida ia hegeregere. Greek herevana idia hahanaia “matauraia” ena anina ita gwauraia diba “laloa bada” o “davana bada atoa.” Vadaeni, bema tama sina idia atoa taravatu oi laloa be anina lasi bona mai moale lasi ida oi badinaia kava, unai be tama sina kamonai henia karana maorona lasi. Dirava ia ura oi ese emu tama sina oi laloa bada bona edia hakaua karana oi laloa be dava bada gauna.​—⁠Aonega Herevadia 15:⁠5.

15. Edena dala ai natudia ese hemataurai do idia hahedinaraia noho diba, ena be idia laloa edia tama sina idia kerere?

¹⁵ Bema emu tama sina ese kara ta idia karaia bona unai ese emu hemataurai idia dekenai ia hamaragia be edena bamona? Mani idia laloa dalana hegeregerena ai oi laloa toho. Idia ese ‘oi idia havaraia’ bona oi idia naria, ani? (Aonega Herevadia 23:22) Oi idia lalokau henia karana ese idia ia doria, ani? (Heberu 12:​7-11) Emu tama sina oi hereva henidia mai emu hemataurai ida, mai manau ida emu hemami oi gwauraia. Ena be oi ura lasi dalanai idia haere, to idia dekenai hemataurai lasi dalanai oi hereva lasi be namo. (Aonega Herevadia 24:29) Oi laloatao ena be Saulo be Dirava ena taravatu amo ia raka siri to Davida ese ena hemataurai ia dekenai ia hahedinaraia noho. Iehova oi noia oi do ia durua emu hemami oi biagua totona. Davida ia gwau: “Emui kudouna edia ura gaudia, be ia dekenai do umui hamaoroa, badina Dirava be iseda heau mauri gabuna momokani.”​—⁠Salamo 62:8; Lalohisihisi ena Ane 3:​25-27.

Gunalaia Taudia Oi Matauraia

16. Hadibaia koikoi taudia bona aneru edia kara amo dahaka ita diba?

¹⁶ Kongregesen elda taudia be lauma helaga ese ia abia hidi, to idia do goevadae lasi bona kerere idia karaia. (Salamo 130:3; Hadibaia Tauna 7:20; Kara 20:28; Iamesi 3:⁠2) Unai dainai, kongregesen lalonai haida be elda taudia dekenai idia moale lasi. Dahaka do ita karaia bema ita laloa, eiava toana be, kongregesen lalonai gau ta be dala maorona ai idia karaia lasi? Aposetolo taudia edia nega ai idia noho hadibaia koikoi taudia bona aneru edia idau oi itaia: “[Hadibaia koikoi taudia] idia gari lasi, sibona edia ura idia badinaia, hairai idia abia taudia dekenai idia heudeheude lasi to idia hereva dika, to aneru be idau, ena be edia goada bona siahu ia bada, idia ese hereva dika amo unai taudia idia samania lasi, badina Iehova idia matauraia dainai.” (2 Petero 2:​10-13, NW ) Hadibaia koikoi taudia ese “hairai idia abia taudia”​—⁠Keristani ginigunadia edia kongregesen ai dagi idia abia elda taudia​—⁠idia gwauraia dika, to aneru ese unai hadibaia koikoi taudia, tadikaka huanai heiriheiri idia havaraia taudia, idia hereva dika henia lasi. Aneru, dagi bona hahemaoro maoromaoro dekenai taunimanima idia hereaia, be idia diba dahaka be kongregesen lalonai ia vara. To, “Iehova idia matauraia dainai” ia dekenai hahemaoro karana idia rakatania.​—⁠Heberu 2:​6, 7; Iuda 9.

17. Edena dala ai abidadama be mai anina bada bema oi laloa hekwakwanai ta hamaoromaoroa lalonai elda taudia idia kerere?

¹⁷ Ena be gau ta be dala maorona momokani ai idia karaia lasi, to ita be ia mauri noho Iesu Keriso, Keristani kongregesen ena kwarana, do ita abidadama henia be namo, ani? Ia be ena tanobada ibounai kongregesen lalonai idia vara gaudia ia diba lasi, a? Iena hamaoromaoroa dalana do ita matauraia bona ia ese gau iboudiai ia biagua diba ita abia dae be namo, ani? Momokani, ‘ita be daika, iseda dekena tauna do ita gwauraia kerere?’ (Iamesi 4:12; 1 Korinto 11:3; Kolose 1:18) Guriguri karana amo Iehova dekenai emu lalo-hekwarahi gaudia oi gwauraia be namo, ani?

18, 19. Dahaka oi karaia diba bema oi laloa elda tauna ta ia kerere?

¹⁸ Taunimanima idia goevadae lasi dainai, metau o hekwakwanai idia vara diba. Nega haida elda taudia idia kerere diba, unai dainai haida idia laloa momo. Bema unai neganai ita laloa namonamo lasi to ita karaharaga, gau ta do ita haidaua lasi. Reana unai ese hekwakwanai do ia habadaia sibona. Lauma dalanai lalo-parara idia abia taudia be Iehova idia naria, ia ese iena nega bona dala ai gau iboudiai do ia hamaoromaoroa bona sisiba do ia henia totona.​—⁠2 Timoteo 3:16; Heberu 12:​7-11.

¹⁹ Edena bamona bema gau ta dekenai oi lalo-metau? Namo lasi kongregesen lalonai ma haida danu oi herevalaia, to namona be mai hemataurai ida elda taudia oi hereva henia, ani? Ta oi hadikaia lasi, to oi hahedinaraia edena bamona unai ese emu hemami ia hadikaia. Hanaihanai ‘ta ta dekenai durua do oi henia,’ bona idia dekenai emu lalohadai oi gwauraia neganai hemataurai oi hahedinaraia noho. (1 Petero 3:⁠8) Hahemaraia hevaseha herevana oi gwauraia lasi, to oi abia dae momokani idia be Keristani lo taudia. Mai edia hebogahisi ida idia henia Baibel ena hagoadaia herevadia oi abia dae. Bona bema ia hedinarai ma gau haida idia hamaoromaoroa be namo, oi abia dae Iehova ese elda taudia do ia hakaua dahaka be namo bona maoro idia karaia totona.​—⁠Galatia 6:10; 2 Tesalonika 3:⁠13.

20. Hereva gabena lalonai dahaka do ita herevalaia?

²⁰ To, siahu idia abia taudia laloa bada bona matauraia karana dainai ma gau ta do ita laloa be namo. Siahu idia abia taudia ese idia naria taudia idia matauraia be namo, ani? Mani hereva gabena lalonai unai ita itaia.

Edena Bamona Do Oi Haere?

• Dahaka badina namona dainai siahu idia abia taudia ita matauraia?

• Dirava amo siahu idia abia taudia idia matauraia lasi taudia be Iehova bona Iesu ese edena bamona idia laloa?

• Daidia be haheitalai namona idia hahedinaraia siahu idia abia taudia matauraia karana dekenai?

• Dahaka ita karaia diba bema ita laloa siahu ia abia tauna ta ia kerere?

[Picture on page 12]

Sara ese Aberahamo ia abia siahu ia matauraia bada bona ia moale

[Picture on page 13]

Mikala ese Davida ena ruma bese kwarana bona king siahuna ia matauraia lasi

[Picture on page 15]

“Lau ese Lohiabada ia abia hidi king totona tauna lau hadikaia diba lasi momokani.”

[Picture on page 16]

Emu guriguri amo Iehova dekenai emu lalo-hekwarahi gaudia oi gwauraia be namo, ani?