Dahaka Dainai Inai Henia Karana ia Bada ia Lao?

Dahaka dainai tanobada ai inai henia karana be ia bada noho? Unai ita diba totona, inai heheni karana ena anina, dahaka dainai taunimanima ese ma haida idia inai henia, bona edena dala ai gabu ibounai dekenai ia lao dalana ita lalopararalaia be namo.

Inai Heheni Karana be Dahaka?

Inai henia karana be taunimanima ta eiava orea ta ura henia lasi momokani karana. Bona ia be nega daudau lalonai ta lalodika henia karana ena hemami.

TAUNIMANIMA IDIA INAI HEHENI ENA BADINA

Badina momo dainai taunimanima be ma haida idia inai henia matamaia. Idia ese idau hanua taudia idia inai henia, ena be unai taudia be kerere ta idia karaia lasi. Idia inai henidia badina idia laloa unai hanua taudia be taunimanima dikadia, dagedage taudia bona edia kara do idia haidaua diba lasi. Idia gwau idia be anina lasi, hekwakwanai bona dika do idia havaraia taudia. Ma haida idia inai henia taudia be reana guna haida ese idia dagedage henia bona idia hahisia dainai, unai bamona idia karaia.

IA BADA IA LAO DALANA

Ena be tau ta ese ma haida ia hedavari henidia lasi, to ia inai henidia diba. Hegeregere, ta be ena famili o turadia edia lalohadai ia abia dae sibona, bona ma haida ia inai henia kava. Unai amo inai henia karana ia bada haraga bona hanua ibounai ese unai lalohadai idia abia dae.

Inai henia karana ia bada haraga ena badina ita lalopararalaia neganai, do ita diba dahaka dainai taunimanima momo ese ma haida idia inai henia. To, tanobada ai ia vara noho inai henia karana hadokoa totona, namona be inai henia karana ia vara ena badina ita tahua. Unai be Baibel ai ita davaria diba.

BAIBEL ESE INAI HENIA KARANA ENA BADINA IA HAHEDINARAIA

Inai arrow rua edia laulau ese inai heheni karana ia vara dalana idia hahedinaraia. 1. Koikoi Herevadia, hegeregere, orea taudia ese ma haida idia doria, social media, bona nius idia halasia oreadia. 2. Inai gaudia, kastom, hanua, o tomadiho idia diba lasi. 3. Idia gari, idia laloa haida ese edia hanua do idia haidaua, edia kohu do idia dadia, eiava do ia vara gauna idia diba lasi. 4. Inai henia karana ese inai ia havaraia, ma haida lalodika henia kava karana, haida gwauraia dika bona dagedage karana.

INAI HENIA KARANA BE TAUNIMANIMA ESE IDIA HAMATAMAIA LASI. Guba dekenai aneru ta ese Dirava ia gwau-edeede henia bona Satani Diabolo ai ia lao neganai, inai henia karana ia matamaia. Diabolo ia gwau-edeede neganai, “matamana amo ia be ala-ala tauna.” “Ia be koikoi tauna bona koikoi ena tamana” dainai, ma haida inai henia karana bona dagedage karadia ia havaraia noho. (Ioane 8:44; 1 Ioane 3:11, 12) Baibel ia gwau Satani be badu dikadika bona dagedage tauna.—⁠Iobu 2:7; Apokalupo 12:9, 12, 17.

ITA GOEVADAE LASI DAINAI MA HAIDA ITA INAI HENIA. Tau ginigunana Adamu be Satani ena kara dika ia badinaia. Unai dainai, taunimanima ibounai dekenai goevadae lasi maurina mai ena kara dika ia henia hanai. (Roma 5:12) Adamu ena natuna roboana, Kaino be ena tadina Abela ia inai henia bona ia alaia mase. (1 Ioane 3:12) Momokani, taunimanima momo be lalokau bona hebogahisi idia hahedinaraia. To, Adamu amo idia abia kara dika dainai, momo be sibona idia laloa bada, mama karana dainai ma haida idia hahisia, bona idia hekokoroku. Unai bamona kara ese inai henia karana ia havaraia.—⁠2 Timoteo 3:1-5.

IDAU TAUDIA IA URA HENIDIA LASI TAUNA ESE IDIA DO IA INAI HENIA. Tanobada taudia ese inai henia karana idia habadaia, badina ma haida hadikaia karadia idia laloa bona hebogahisi lasi karadia idia karaia. Inai “tanobada ibounai be Dika Tauna ena siahu lalonai ia noho” dainai, haida ese ma haida idia ura henia lasi, idia inai henidia kava, hereva dika henidia, kara auka henidia, bona edia kohu idia hadikaia.—⁠1 Ioane 5:19.

Baibel ese inai henia karana ena badina sibona ia herevalaia lasi, to hamaoromaoroa dalana ia hahedinaraia danu.