Duahia Taudia Edia Henanadai
Isaia karoa 53 lalonai be taunimanima momo idia diba Mesia peroveta herevana. Is 53 Siri 10 ia gwau: “Lauegu Hesiai Tauna ena hisihisi be lauegu ura.” Ena anina be dahaka?
Ita lalo-parara dahaka dainai Isaia 53:10 idia henanadailaia. Keristani taudia momokanidia idia abia dae lasi hebogahisi bona lalokau Diravana ese ta do ia hahisia o hagorerea mai moale ida. Baibel dainai ita diba momokani Dirava be kerere lasi taudia hahisia karana ia moalelaia lasi. (Deuteronomi 32:4; Ieremia 7:30, 31) Lagani handred momo lalodiai, nega haida Iehova ese hisihisi ia koua lasi, to ia koua lasi ena badina idauidau be iena aonega bona lalokau ida idia hegeregere. To ia lalokau henia Natuna Iesu ena hisihisi ia havaraia lasi. Vadaeni, unai siri ena anina be dahaka?
Namona be unai siri ibounai ita duahia, bona inai hereva “ura” ia hedinarai gabu rua ita laloa, ena anina davaria totona. Isaia 53:10 ia gwau: “Lauegu Hesiai Tauna ena hisihisi be lauegu ura, badina iena mase be boubou ta, taunimanima edia kara dika ena gwauatao do idia abia totona. Unai dainai ia ese iena tubuna taudia do ia itaia, bona iena mauri dinadia be do daudau herea. Lau Lohiabada, egu ura ena anina be do ia vara momokani, egu Hesiai Tauna dekena amo.”
Ita diba siri ena dokona kahana ai ia gwauraia “egu ura” be Iehova ese ena Basileia amo do ia hagugurua urana, unai be Baibel ena sinado. Iehova ese unai do ia karaia karana ese ena lohia siahuna do ia hamomokania bona dala do ia kehoa Adamu bona Heva amo ia mai kara dika—iseda kara dika—be abidadama taudia amo do ia kokia. (1 Sivarai 29:11; Salamo 83:18; Kara 4:24; Heberu 2:14, 15; 1 Ioane 3:8) Unai ibounai do idia vara totona, gau badana be Dirava ena Natuna be tanobada dekenai do ia mai bona kara dika ena davana karaia boubouna do ia henia. Ita diba, Iesu ese unai ia karaia neganai, hisihisi ia ania. Baibel ese ita ia hadibaia “ia ese hisihisi ia abia, bona unai hisihisi ese Dirava kamonai henia dalana ia hadibaia.” Unai dainai hisihisi ese gau namona ia havaraia Iesu dekenai.—Heberu 5:7-9.
Iesu ia diba vadaeni, do ia badinaia dala namona be mai ena hisihisi. Iena hereva Ioane 12:23, 24 ai ese unai ia hahedinaraia goevagoeva, unuseniai ia gwau: “Nega ia ginidae vadaeni, Taunimanima ena Natuna ese iena hairaina do ia abia. Momokani, momokani umui lau hamaoroa, bema uiti ena uhena be tano dekenai do ia moru lasi, bema ia mase lasi, ia be sibona do ia noho kava. To bema ia mase, anina momo do ia atoa.” Oibe, Iesu ia diba Dirava badinaia karana do ia dogoatao ela bona ia mase. Unai sivarai ma ia gwau: “ ‘Harihari lauegu kudouna ia hisihisi. Dahaka do lau gwauraia? Do lau gwau, “Egu Tamana e, inai harihari nega dekena amo lau oi hamauria?” Lasi, badina be hari inai nega totona lau mai ginidae vadaeni. Egu Tamana e, oiemu ladana oi hanamoa!’ Vadaeni gado ta guba dekena amo ia mai, ia gwau, ‘Lau hanamoa vadaeni, ma do lau hanamoa lou.’ ”—Ioane 12:27, 28; Mataio 26:38, 39.
Unai hereva ese ita ia durua Isaia 53:10 do ita lalo-pararalaia totona. Iehova ia diba ena Natuna dekenai do ia vara gauna lalonai hisihisi do ia ania danu. To, Iehova ese Iesu dekenai ia vara gauna ia ura badina ia diba dokonai namo bada momokani do ia vara. Unai dala ai Iehova be Mesia hahisia karana eiava ‘ena hisihisi ia ura.’ Iesu danu ese ia karaia diba bona ia karaia vadaeni gauna ia ura henia. Isaia 53:10 ena hereva dokona be momokani, iena amo ‘Iehova ena ura ena anina be ia vara momokani.’