Oi Sibona Emu Ura Oi Dadaraia!

ROLFa be gaukara biaguna ia laloa bada gaukara tauna. Iena Keristen hesiai gaukarana ia habadaia totona ia ura iena gaukara horadia ia hamaragia neganai iena gaukara biaguna ese ia durua. Unai dainai, lagani momo lalodiai Rolf ese pioneer hesiai gaukara ia moalelaia diba. To, dina ta, gaukara gabuna dekenai gau haida idia idau. Rolf ia hamomokania ia be diba momo gaukara tauna dainai idia ura dagi idia henia ia be gau hoihoilaidia gaukarana ia biagua totona. Unai gaukara dagi be mai ena moni bada bona gabeai ena namo be momo. To, unai neganai ia be dina iboudiai do ia gaukara idia gwau.

Rolf be mai ena hahine bona natudia rua ia ubudia totona, ma moni haida ia abia be heduru namona. To, ia ese unai gaukara ia dadaraia bona ma gaukara ta ia tahua, unai gaukara ese do ia durua iena maduna lauma dalana dekenai bona moni dalana dekenai do ia karaia totona. Rolf ena biaguna ia hoa unai kara dekenai. Ia itaia gaukara monina do ia habadaia neganai unai ese iena lalohadai do ia haidaua lasi, unai dainai iena biaguna ia gwau: “Lau itaia oiemu lalohadai ia goada dainai lau haidaua diba lasi.”

Oibe, Rolf be iena lalohadai dekenai ia goada. To ia be mai ena kara ta danu​—sibona ena ura ia dadaraia. Unai bamona kara be bada lasi iseda nega lalonai; taunimanima momo be sibodia edia ura idia tahua guna. To unai kara be mauri dala namona bona mai moale danu ia havaraia. Sibona eda ura dadaraia karana be dahaka? Dahaka ita karaia be namo? Bona edena dala ai unai kara ita karaia noho diba?

Bible Ena Taravatu Ta

Boubou ena anina be mai anina gauna ta ita henia. Abidadama witness tauna ginigunana, Abel, ena nega amo boubou henia be tomadiho korikorina ena karana ta; Abel ese “ena mamoe, vara guna gaudia,” ia bouboulaia Dirava dekenai. (Genese 4:4) Abidadama taudia, hegeregere Noa bona Iakobo, be unai bamona idia karaia danu. (Genese 8:20; 31:54) Mose ena Taravatu henunai danu animal bouboulaia karana be gau badana. (Levitiko 1:​2-4) To, unai Taravatu henunai, tomadiho taudia idia hamaorodia edia namo herea gaudia idia bouboulaidia. Animal dikadia idia henia diba lasi idia bouboulaia totona. (Levitiko 22:​19, 20; Deuteronomi 15:21) Hereva momokani idia dadaraia Israel taudia ese unai Taravatu idia makohia neganai, Dirava ese ia gwau henidia, ia gwau: “Boubou karaia totona aena dika animal oi henia neganai bema oi gwau: ‘Ia dika lasi.’ Mani oiemu lohia tauna dekenai oi abia lao. Do ia moalelaia, a, eiava oi do ia lalo-namo henia, a? . . . Mai moale danu oiemu imana amo do lau moalelaia diba, a?”​—Malaki 1:​8, 13.

Keristen tomadiho dekenai boubou henia karana ena anina idia karaia noho. To, Keriso be boubou davana ibounai ia henia dainai, Dirava be hari ia ura lasi animal bouboudia ia abia. Unai dainai, Keristen taudia be dahaka boubou idia henia be namo? Paulo be Roma 12:1 dekenai ia torea, ia gwau: “Unai dainai, lauegu varavara taudia e, Dirava ena bogahisihisi bada herea dainai umui lau noia, emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.” Unai be kara idauna momokani! Animal edia mase tauanidia do idia bouboulaia lasi, to Keristen taudia be sibodia do idia henia mauri boubou gauna bamona​—edia goada, edia kohu, bona edia diba idia henia. Bona Israel lalonai hegeregerena, Iehova be “aena dika,” eiava mai kudou ibounai idia henia lasi, bouboudia do ia abia dae lasi. Ia ura ia idia tomadiho henia taudia be ia dekenai edia namo herea gaudia idia henia, bona ia ura mai edia kudou ibounai, edia souli ibounai, edia darana ibounai, bona edia goada ibounai ida ia idia hesiai henia.​—Mareko 12:30.

Unai dainai sibona emu ura oi dadaraia totona hebou dekenai oi lao bona Keristen hesiai gaukara oi karaia sibona be hegeregere lasi. Anina be oiemu lalona oi hadaia Dirava ena ura do oi karaia haorea, herevana dahaka davana do oi henia. Anina be oiemu lalohadai ia hegeregere metau bona hekwakwanai oi haheaukalaidia. Iesu ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.” (Mataio 16:24) Keristen tauna be sibona ena ura gaudia eiava kohu, moni bona tauanina hamoalea gaudia ia laloa guna lasi. Iena mauri lalonai Dirava ena Basileia bona Iena kara maoromaoro ia tahua guna. (Mataio 6:33) Bema unai bamona ia karaia be namo, ia hegeregere “iena satauro do ia huaia,” dagedage bona hemarai ia haheaukalaia, eiava ia mase!

Oiemu Ura Dadaraia Karana ese Ia Havaraia Hahenamodia

Unai gaudia ia laloa namonamo neganai, reana ta ia laloa bema sibona ena ura ia dadaraia, namo do ia havaraia eiava lasi. Iehova Dirava idia lalokau henia taudia bona idia ura iena ladana ia hahelagaia taudia dekenai, namo do ia havaraia. (Mataio 22:37) Iesu Keriso ena haheitalai goevadaena oi laloa. Tanobada dekenai ia do mai lasi neganai, ia be guba dekenai dagi bada lauma maurina ia abia. To, iena hahediba taudia ia hamaorodia hegeregerena, ia be ‘sibona ena ura ia karaia lasi, to ia siaia Diravana ena ura sibona ia karaia.’ (Ioane 5:30) Unai dainai mai ena ura danu “iena dagi badana ia negea, bona hesiai tauna momokani ai ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.”​—Filipi 2:​7, 8.

Unai boubou gaudia be anina idia havaraia. Iesu ena lalona ia hegeregere “ena mauri do ia atoa diho, ena turana totona,” unai dainai ia be mauri davana ia henia diba, bona unai amo dala ia kehoa goevadae lasi taudia be mase diba lasi maurina, guba dekenai, eiava mauri hanaihanai tanobada dekenai, do idia abia totona. (Ioane 3:16; 15:13; 1 Ioane 2:2) Iena abidadama ia dogoatao goevagoeva dainai, dala ia kehoa Iehova ena ladana be dala badana dekenai ia hanamoa totona. (Hereva Lada-isidia 27:11) Unai dainai Iesu ese sibona ena ura ia dadaraia dainai Iehova ese ia hanamoa be hoa gauna lasi! “Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hanaia.”​—Filipi 2:9.

Momokani, Iesu be Dirava ese ia havaraia Natuna ginigunana. Taunimanima ese ia dainai gau haida idia dadaraia neganai Dirava ese hahenamo ia henidia, a? Oibe, bona idau negai bona hari inai negai idia vara haheitalai momo amo unai ita itaia. Moab hahinena Ruta ena sivarai Bible lalonai oi laloa. Reana iena Israel adavana ena amo Iehova dekenai diba ia abia. Ia mase murinai, iena lalona ia hadaia be namo. Do ia noho ia vara tanona dekenai, unuseniai idia be Dirava momokani idia tomadiho henia lasi, a? Eiava iena ravana burukana, Naomi, ida do ia lao Gwauhamata Tanona dekenai? Ruta ia ura Naomi ida ia lao, ena be anina be iena hebamo bona iena tama sina ia rakatanidia, bona reana do ia headava lou diba dalana ia reaia. To, Ruta be Iehova dekenai diba ia abia, bona ia ura Iehova ese ia abia hidi besena ida ia tomadiho henia, unai dainai ia be Naomi dekenai ia noho.

Ruta be sibona ena ura ia dadaraia dainai hahenamo ia abia, a? Momokani, ia abia! Gabeai, tano biaguna tauna ta, ladana Boe, ese ia adavaia, bona Ruta be Obeda ia havaraia, unai amo ia be Iesu Keriso ena tubuna hahinena ta ai ia lao.​—Mataio 1:​5, 16.

Unai hegeregerena, hari inai nega lalonai, sibodia edia ura idia dadaraia neganai, Dirava ena hesiai taudia be hahenamo idia abia. Haheitalai be, lagani 1923 lalonai, William R. Brown, taunimanima momo ese idia gwauraia “Bible” Brown, be iena gabu West Indies dekenai ia rakatania haroro gaukara be West Africa dekenai ia gunalaia totona. Ia ida idia lao taudia be iena hahine bona edia natuna kekeni. Gabeai ia lao Nigeria dekenai, unuseniai haroro gaukara ena huahua be ia vara matamaia. Korema America tauna ta, ladana Vincent Samuels, bona ma West India Witness tauna ta, ladana Claude Brown, ida “Bible” Brown be West Africa dekenai idia karaia hamatamaia gaukarana dekenai gaukara bada ia karaia.

Hari inai negai, pablisa 187,000 be Sierra Leone, Liberia, Ghana, bona Nigeria dekenai idia haroro; unai gabudia ai “Bible” Brown bona iena bamodia be haroro gaukara idia hamatamaia. Lagani 1967 ai ia do mase lasi neganai, “Bible” Brown ia gwau: “Moale bada gauna be tatau bona hahine ese Dirava ena Basileia ena sivarai namona idia kamonai henia!” Oibe, sibona ena ura ia dadaraia dainai ia be hahenamo momo ia abia.

Oiemu Ura Dadaraia Daladia

Hari inai negai edena dala ai unai bamona kara ita hahedinaraia diba? Dala ta be wiki ta ta iboudiai ruma ta ruma ta gaukara ita karaia. (Kara 20:20) Unai bamona ita karaia, moni gaukara be wiki ibounai lalonai ita karaia murinai be reana ia auka. Reana ita sibona ita biagua auka bona sediual namona ita karaia. To ena moale be hekwarahi idauidau ia hanaia. Reana hahenamo oi abia badina ta oi durua ia be “revareva ta Keriso dekena amo . . . ink dekenai ia torea lasi, to Mauri Diravana ena Lauma ese ia torea. Nadi latanai ia torea lasi, to taunimanima edia kudouna dekenai ia torea.”​—2 Korinto 3:3.

‘Nega namona idia hoia’ neganai, reana moni gaukara negana amo eiava gadara negana amo idia hoia dainai, haida be edia haroro gaukara idia habadaia. (Efeso 5:16) Momo be edia sediual idia karaia lagani tamona tamona lalonai heduru pioneer gaukara idia karaia totona. Ma haida be nega ibounai heduru pioneer gaukara idia karaia eiava regular pioneer gaukara idia karaia. Boubou karaia karana ma ta be Basileia pablisa momo lasi gabudia dekenai idia lao, unuseniai idia noho totona. Nega momo ena anina be mauri dalana idia haidaua momokani, hekwakwanai idauidau idia haheaukalaia, bese lalohadai daladia idaudia bona kara idaudia dainai edia mauri dalana idia haidaua. To ma haida be mauri idia abia totona iseda gaukara ita habadaia ena hahenamo ita abia neganai, ita henia boubouna amo namo ita abia.

Canada dekenai ia vara tauna John Cutforth ese unai ia davaria iena mauri lalonai. Watchtower Bible School of Gilead ena kosi murinai, Australia dekenai idia siaia misinari gaukara ia karaia totona. Tadikaka Cutforth ia laloa lou, ia gwau: “Unai be egu gabu amo ia daudau momokani! Lau laloa reana Aramagedono ia do mai lasi neganai lau be mai egu dala Canada dekenai do lau giroa lou egu tama sina bona turadia lau itaia lou totona eiava lasi, a? Do lau diba dalana tamona sibona be lau lao.” Tadikaka Cutforth ia lao, bona ia dadaraia gaudia dainai ia lalohisihisi lasi. Gabeai laganidia lalonai, Papua New Guinea dekenai haroro gaukara ia gunalaia; unuseniai ia gaukara goadagoada noho, bona ia be nega ibounai hesiai gaukara ena lagani namba 50 ia karaia ore vadaeni. Nega ta ia gwau: “Iehova ese ia hakaua dalana be nega ibounai ita badinaia bona ia henia gaukara ibounai ita abia dae neganai, unai be moale bada, lalo-moale, bona lalo-maino ia havaraia, bona turadia momo herea ita abia diba.”

Momokani, tauanina ena goada, moni ena hegeregere, bona ruma bese maduna be reana oiemu dala idia koua diba sisina; haida sibona pioneer bona misinari gaukara idia karaia diba. To, namona be oi ura momokani hebou dekenai bona haroro gaukara dekenai oi gaukara goadagoada, namo lasi koua gaudia maragidia, hegeregere medu eiava keru ese oi idia koua diba. (Heberu 10:​24, 25) Reana Dirava ena Hereva stadilaia totona oiemu nega oi habadaia diba. Ruma bese haida be unai idia karaia televisen raraia negana idia hamaragia neganai, reana wiki ta ta iboudiai lalonai “televisen raraia lasi” hanuaboina ta idia karaia, eiava reana televisen ta idia hoia lasi. Oi sibona oiemu stadi oi karaia totona nega oi atoa neganai, ‘Dirava hanamoa boubouna’ oi henia, hebou bona haroro gaukara dekenai ‘iena ladana harorolaia’ karana amo, be mai anina bada boubou karana.​—Heberu 13:15.

Oi laloatao, haroro gaukara be ena dokona kahana ai ia noho. Nega kahirakahira Dirava be mataganigani bona sibodia edia ura idia karaia momo taudia dekenai iena hahemaoro hereva do ia karaia. (Sefania 2:3) Dirava be ita dekenai ia moale noho totona, ita sibona dekenai ita hebogahisi momo lasi. Namona be iseda ‘tauanina ita henia Dirava dekenai. Boubou gauna bamona do ita henia, mai mauri bona mai helaga danu, Dirava be ita dekenai ia moale totona.’ (Roma 12:1) Unai bamona lalohadai ese moale bada bona lalona ena maino do ia havaraia. Ia be ita do ia durua iseda hesiai gaukara dekenai moale ita habadaia totona. Bona ia be Iehova Dirava ena kudou do ia hamoalea!​—Hereva Lada-isidia 27:11.

Unai dainai oi sibona oiemu ura dadaraia karana oi karaia noho! Namo lasi ma haida durudia totona bona Basileia gaukara durua totona oi hesiku. Paulo be ita ia hagoadaia, ia gwau: “Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.”​—Heberu 13:16.

[Footnotes]

[Picture on page 26]

Sibona emu stadi bona oi haroro negana oi atoa totona, reana oiemu ura oi dadaraia, to namo do oi davaria

[Picture on page 28]

W. R. Brown bona John Cutforth be sibodia edia ura idia dadaraia dainai hahenamo momo idia davaria