Keristani Taudia ese Hesiai Gaukara amo Moale Idia Davaria
“Henia kara ena moale be bada, abia kara ena moale be maragi.”—KARA 20:35.
1. Hari, momo ese edena lalohadai kererena idia abia, bona dahaka dainai ia namo lasi?
LAGANI 2000 ia kahirakahira laganidia ai, “lau guna” herevana idia gwauraia momo. Ta be ia mataganigani bona sibona ena namo ia tahua, to ma haida edia namo ia laloa lasi be “lau guna” lalohadaina. Ita diba lagani 2000 lalonai, unai lau guna lalohadaina do ia ore lasi. Nega momo inai bamona henanadai oi kamonai henia, “Dahaka do lau abia?” eiava, “Unai amo dahaka namo do lau abia?” Unai bamona sibona laloa bada lalohadaina ese moale ia mailaia lasi. Iesu ia gwauraia hakaua herevana be idau, ia gwau: “Henia kara ena moale be bada, abia kara ena moale be maragi.”—Kara 20:35.
2. Edena dala ai ita itaia henia karana ese moale ia havaraia?
2 Henia karana ena moale be abia karana ena moale ia hanaia momokani, a? Oibe. Iehova Dirava mani oi laloa. Ia be “mauri ibounai ena badina.” (Salamo 36:9) Ita moale bona anina namona do ita havaraia totona durua gaudia ibounai ia henia. Momokani, ia be “gau namodia ibounai, bona harihari gaudia namodia momokani ibounai” edia Badina. (Iamesi 1:17) Iehova be “moale Diravana” bona henia karana ia karaia hanaihanai Diravana. (1 Timoteo 1:11, NW ) Ia ese ia havaraia taudia ia lalokau henia bona gau momo ia henia idia dekenai. (Ioane 3:16) Ruma bese ta mani oi laloa danu. Bema oi be tamana o sinana ta, oi diba natuna ta oi naria totona, sibona emu ura gaudia momo oi dadaraia. Bona lagani momo lalodiai, unai natuna ese unai gaudia ia laloa lasi. Idia ibounai ia abia dae sibona. To herevana, emu natuna ena namo oi tahua guna dainai, ia tubu namonamo neganai oi moale bada. Dahaka dainai? Badina be ia oi lalokau henia.
3. Dahaka dainai Iehova bona iseda abidadama tamona taudia ita hesiai henia be moale gauna?
3 Unai hegeregerena, lalokau dainai ia vara henia karana be tomadiho korikorina ena toana ta. Iehova ita lalokau henia bona iseda abidadama tamona taudia ita lalokau henia dainai, idia ita hesiai henia bona idia totona iseda goada ita haorea be moale gauna. (Mataio 22:37-39) Tomadiho karana idia karaia to sibodia edia namo idia tahua taudia ese moale bada do idia davaria lasi. To sibodia edia ura idia tahua guna lasi taudia, henia karana idia laloa bada bona abia karana idia laloa maragi taudia unai, be moale do idia davaria. Unai hereva momokanina ita laloa namonamo totona, Baibel ena hereva haida, iseda tomadiho idia hahedinaraia herevadia haida, gaukaralaia dalana Revareva Helagadia lalonai do ita laloa. Ai be unai bamona hereva toi do ai herevalaia inai hereva bona hereva gabena lalonai.
Iesu Ena Taunimanima Durua Gaukarana
4. Kerisendom lalonai, “taunimanima durua gaukarana” be edena bamona?
4 Greek gado dekenai, mai anina bada tomadiho herevana ta be lei·tour·giʹa, bona New World Translation ese unai hereva ia hahanaia “taunimanima durua gaukarana.” Kerisendom lalonai, lei·tour·giʹa amo idia abia hereva be “liturgy” o tomadiho karadia.a To, Kerisendom ena tomadiho karadia ese taunimanima idia durua momokani lasi.
5, 6. (a) Israela dekenai, edena taunimanima durua gaukarana idia karaia, bona dahaka namo idia davaria? (b) Edena taunimanima durua gaukarana badana ese Israela dekenai idia karaia gaukarana ena gabu ia abia, bona dahaka dainai?
5 Aposetolo Paulo ese Greek herevana lei·tour·giʹa bamona herevana ma ta ia gaukaralaia Israela ena hahelaga taudia ia herevalaia totona. Ia gwau: “Hahelagaia taudia ibounai ese, dina ta ta ibounai helaga karadia [lei·tour·giʹa bamona] idia karaia, bona boubou karadia be dala tamona dekenai idia henia nega momo.” (Heberu 10:11) Israela dekenai, Levi hahelaga taudia ese mai anina bada taunimanima durua gaukarana idia karaia. Dirava ena Taravatu idia hadibaia bona taunimanima edia kara dika koua bouboudia idia henia. (2 Sivarai 15:3; Malaki 2:7) Hahelaga taudia bona Israela taudia ese Iehova ena Taravatu idia badinaia neganai, unai bese be mai badina namona dainai idia moale.—Deuteronomi 16:15.
6 Taravatu henunai, Israela hahelaga taudia dekenai unai taunimanima durua gaukara be hahenamo ta, to Dirava ese abidadama lasi besena Israela ia dadaraia neganai, unai gaukara be anina lasi karana ai ia lao. (Mataio 21:43) Iehova ese unai gaukara do ia hereaia gaukarana ma ta ia palanilaia—Iesu, Hahelaga Tauna Badana, ese do ia karaia taunimanima durua gaukarana. Baibel ese ia herevalaia, ia gwau: “Iesu be ia noho hanaihanai, unai dainai iena hahelagaia gaukara be ia noho nega ibounai, bona ta ese iena gabu do ia abia diba lasi. Unai dainai Iesu be mai ena siahu, iena ladana dainai Dirava dekenai idia mai taudia do ia hamauridia. Badina be inai: Iesu ia noho hanaihanai, bona ia ese inai taudia totona Dirava ia noia noho hanaihanai.”—Heberu 7:24, 25.
7. Dahaka dainai Iesu ena taunimanima durua gaukarana ese namo bada herea ia mailaia?
7 Iesu ese hahelaga gaukarana ia karaia ela bona hanaihanai, ma ta ese ena gabu do ia abia lasi. Unai dainai, ia sibona ese taunimanima do ia hamauria momokani diba. Ia ese unai taunimanima durua gaukara hereadaena be taunimanima idia havaraia dubu ta lalonai lasi, to lagani 29 C.E. ai Iehova ese ia hamatamaia tomadiho dalana matamatana, ena lauma dubuna lalonai, ia karaia. Hari, Iesu be unai dubu ena Helaga Herea gabuna guba dekenai ia gaukara. Ia be “hesiai gaukara [lei·tour·gosʹ] guba ena tomadiho dubu dekenai ia karaia noho, unai be Palai Dubu momokanina, taunimanima ese idia haginia lasi, Lohiabada sibona ese ia haginia.” (Heberu 8:2; 9:11, 12) Ena be Iesu ena dagi be ataiai momokani, to “hesiai gaukara” ia karaia. Iena siahu badana ia gaukaralaia abia karana ia goadalaia totona lasi, to henia karana ia goadalaia totona. Bona unai bamona henia karana ese moale ia mailaia ia dekenai. Unai be “iena vairanai ia noho” moalena ena kahana ta bona unai ese ia hagoadaia ena tanobada maurina ibounai lalonai ia haheauka totona.—Heberu 12:2.
8. Edena dala amo Iesu ena taunimanima durua gaukarana ese Taravatu gwauhamatana ena gabu ia abia?
8 Iesu ena taunimanima durua gaukarana ena kahana ma ta ia noho. Paulo ia gwau: “Iesu ese hahelagaia gaukara ia abia. Bona iena gaukara ese unai hahelagaia taudia gunadia edia gaukara ia hereaia. Badina be Dirava ena taravatu matamatana, . . . ese taravatu gunana ia hereaia. Bona Dirava ena gwauhamata ese taravatu gunana ena gwauhamata danu ia hereaia.” (Heberu 8:6) Mose be gwauhamata haginia dalana ia naria tauna, bona unai gwauhamata be Israela bona Iehova edia hetura karana ena badina. (Esodo 19:4, 5) Iesu ese gwauhamata matamatana haginia dalana ia naria dainai “Dirava ena Israela,” Dirava ena lauma amo ia horoa Keristani taudia, tano idauidau momo amo, edia bese matamatana ia vara diba. (Galatia 6:16; Heberu 8:8, 13; Apokalupo 5:9, 10) Unai be taunimanima durua gaukarana namo hereana! Ita moale bada herea Iesu ita diba, bona unai hesiai tauna amo Iehova do ia abia dae tomadiho karana ita henia diba!—Ioane 14:6.
Keristani Taudia ese Taunimanima Durua Gaukara Idia Karaia Danu
9, 10. Keristani taudia ese edena bamona taunimanima durua gaukaradia idia karaia?
9 Tau ta ese taunimanima durua gaukarana dekenai Iesu ia hereaia lasi. To horoa Keristani taudia ese edia guba ahuna idia abia neganai, edia gabu Iesu badinai do idia abia bona ia ida king bona hahelaga gaukara do idia karaia. (Apokalupo 20:6; 22:1-5) To, tanobada dekenai Keristani taudia ese taunimanima durua gaukarana idia karaia, bona ia amo moale bada idia davaria. Hegeregere, Palestine lalonai hitolo bada ia vara neganai, aposetolo Paulo ese Europe tadikaka idia henia moni ia abia lao Iuda Keristani taudia Iudea dekenai, edia lalo-hekwarahi hamaragia totona. Unai be taunimanima ia durua gaukarana. (Roma 15:27; 2 Korinto 9:12) Hari inai negai, Keristani taudia be mai moale ida unai bamona gaukara idia karaia. Bema edia tadikaka ese dagedage, idia vara kava dika badadia, bona hekwakwanai badadia ma haida idia davaria neganai, maoromaoro heduru idia henia.—Aonega Herevadia 14:21.
10 Paulo ese taunimanima durua gaukarana ma ta ia herevalaia, ia gwau: “Bema egu mauri rarana be do idia habubua, unai emui boubou gauna do lau hahelagaia totona, lau be do lau moale, bona lauegu moale dainai, umui ibounai danu do umui moale.” (Filipi 2:17) Paulo ena hekwarahi Filipi taudia totona be taunimanima durua gaukarana bona mai lalokau ida ia karaia goadagoada. Hari, unai bamona taunimanima durua gaukarana ia vara noho, bona horoa Keristani taudia ese unai idia karaia goadagoada, badina be “hesiai tauna mai ena kamonai, bona mai ena kara maoromaoro” ena gaukara idia karaia bona lauma aniani be nega maorona ai idia henia. (Mataio 24:45-47) Danu, orea ta bamona, idia be ‘hahelaga taudia edia gaukara idia karaia,’ bona edia gaukara be “boubou gaudia bona harihari gaudia helagadia, Dirava do ia abia dae gaudia,” be “Iesu ena ladana” dekenai idia henia bona Dirava ena ‘hoa kara badadia do idia gwauraia hedinarai. Badina be ia ese dibura dekena amo idia ia boiria, vadaeni iena diari namo herea lalonai idia noho.’ (1 Petero 2:5, 9) Paulo bamona, unai bamona hahenamo idia abia dainai idia moale, ena be unai maduna idia hagugurua totona edia goada be “boubou gauna hegeregerena” do idia haorea. Bona edia bamodia, “mamoe idaudia,” be idia danu idia gaukara bona heduru idia henia, Iehova bona ena palani idauidau taunimanima dekenai idia harorolaia totona.b (Ioane 10:16; Mataio 24:14) Unai be taunimanima ia durua gaukara namo hereana!—Salamo 107:21, 22.
Hesiai Gaukara Helagana Karaia
11. Peroveta hahinena Ana ese edena haheitalai namona ia henia Keristani taudia ibounai dekenai?
11 Iseda tomadiho ia gwauraia Greek herevana ma ta be la·treiʹa, bona New World Translation Baibel lalonai idia hahanaia, “hesiai gaukara helagana.” Hesiai gaukara helagana be tomadiho karadia. Hegeregere, idia gwau lagani 84 vabu bona peroveta hahinena, Ana, be “Dubu Helaga ia rakatania lasi, Dirava dekenai ia tomadiho henia [Greek hereva la·treiʹa bamona hereva], ia guriguri noho, bona aniani ania lasi ena taravatu ia badinaia noho.” (Luka 2:36, 37) Ana be Iehova ia tomadiho henia hanaihanai. Ia be haheitalai namona ita ta ta dekenai—matamata bona buruka taudia, bona tatau bona hahine dekenai. Ana ese Iehova ia guriguri henia mai ena ura ida bona dubu lalonai ia tomadiho henia hanaihanai hegeregerena, iseda hesiai gaukara helagana ena kahana ta be guriguri bona hebou lao henia karana.—Roma 12:12; Heberu 10:24, 25.
12. Iseda hesiai gaukara helagana ena kara badana ta be dahaka, bona edena dala ai unai ese taunimanima ia durua?
12 Aposetolo Paulo ese iseda hesiai gaukara helagana ena kahana badana ta ia herevalaia, ia gwau: “Dirava ia diba momokani, iena gaukara lau karaia noho, mai egu lauma ena goada ibounai danu. Inai gaukara be, Dirava ena Natuna ena Sivarai Namona lau harorolaia. Dirava danu ia diba lau be hanaihanai doko lasi umui totona lau guriguri noho.” (Roma 1:9) Oibe, sivarai namona harorolaia ese kamonai taudia do ia durua sibona lasi, to unai be Iehova Dirava tomadiho henia karana ta. Herevana kamonai tauna ita davaria eiava lasi, haroro gaukara be Iehova dekenai ita henia hesiai gaukara helagana. Ita hekwarahi ita lalokau henia guba Tamana ena kara namodia bona ena ura namodia be ma haida dekenai ita hadibaia, bona unai ese moale bada herea ia mailaia ita dekenai.—Salamo 71:23.
Hesiai Gaukara Helagana Edeseniai?
13. Iehova ena lauma dubuna ena lalona kahana ena ariara dekenai hesiai gaukara helagana idia karaia taudia edia helaro be dahaka, bona daika be idia danu idia moale?
13 Horoa Keristani taudia dekenai Paulo ia gwau: “Inai ita abia vadaeni Basileia, be tau ta ese do ia hamarerea diba lasi gauna. Unai dainai . . . namona be Dirava do ita tomadiho henia, mai hemataurai bona mai gari danu. Namona be iena gaukara do ita karaia, iena ura dala hegeregerena.” (Heberu 12:28) Horoa taudia idia diba Basileia do idia abia, unai dainai Atai Herea Diravana idia tomadiho henia noho mai abidadama goadana ida. Idia sibona ese Helaga gabuna ai bona Iehova ena lauma dubuna ena lalona kahana ena ariara dekenai hesiai gaukara helagana idia karaia diba, bona Helaga Herea gabuna guba dekenai, Iesu ida, do idia gaukara negana idia naria mai edia ura bada ida. Edia bamodia, mamoe idaudia taudia, be unai helaro namona dainai idia danu idia moale.—Heberu 6:19, 20; 10:19-22.
14. Iesu ena taunimanima durua gaukarana amo, hutuma bada taudia ese dahaka namo idia abia?
14 To, unai mamoe idaudia be edena gabu ai edia hesiai gaukara idia karaia? Aposetolo Ioane ia itaia hegeregerena, dina gabedia ai hutuma bada do ia noho, bona “idia ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” (Apokalupo 7:14) Unai ena anina be tomadiho tamona horoa taudia hegeregerena, idia ese Iesu ena taunimanima durua gaukarana, taunimanima totona iena mauri goevadaena ia bouboulaia karana unai, idia abidadama henia. Mamoe idaudia ese Iesu ena taunimanima durua gaukarana amo idia abia namo ma ta be, Iehova ena “gwauhamata taravatuna idia kamonai henia.” (Isaia 56:6) Idia be unai gwauhamata matamatana lalonai idia vareai lasi, to idia kamonai henia dalana be ia dainai idia noho taravatudia bona ia haginia daladia idia badinaia. Dirava ena lauma Israela idia bamoa, lauma aniani patana tamona dekenai aniani idia ania hebou bona unai taudia danu idia gaukara, taunimanima vairanai Dirava ena ladana idia hanamoa bona ia do idia hamoalea lauma boubou gaudia idia henia.—Heberu 13:15.
15. Hutuma bada be edeseniai hesiai gaukara helagana idia karaia, bona unai hahenamo dainai idia dekenai dahaka ia vara?
15 Unai dainai hutuma bada be “helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro.” Danu, “idia be Dirava ena helai gabuna badana ena vairanai idia gini noho. Dina bona hanuaboi idia ese Dirava ena hesiai gaukara idia karaia noho, iena dubu helaga lalonai. Helai gabuna badana dekenai ia helai Diravana be idia dekenai ia noho, bona ia ese idia ia naria noho.” (Apokalupo 7:9, 15) Israela dekenai, Iuda tomadiho idia abia dae taudia be Solomona ena dubu ena murimuri kahana ena ariara dekenai Dirava idia tomadiho henia. Unai hegeregerena, hutuma bada ese Iehova idia tomadiho henia iena lauma dubuna ena murimuri kahana ena ariara dekenai. Unai hesiai karana ese idia ia hamoalea bada. (Salamo 122:1) Idia bamona horoa tauna ginigabena ese ena guba ahuna ia abia murinai danu, Iehova ena taunimanima ese edia hesiai gaukara helagana do idia karaia noho.—Apokalupo 21:3.
Ia Abia Dae Lasi Hesiai Gaukara Helagana
16. Hesiai gaukara helagana dekenai edena sisiba ita abia?
16 Idaunegai Israela ena nega lalonai, Iehova ena taravatu idauidau hegeregerena, hesiai gaukara helagana idia karaia. (Esodo 30:9; Levitiko 10:1, 2) Hari inai negai danu, bema ita ura Iehova ese iseda hesiai gaukara helagana ia abia dae, taravatu haida ita badinaia be gau badana. Unai dainai Paulo be Kolose taudia dekenai ia gwau: “Guriguri . . . ai hadokoa lasi. Dirava ai noia, ia ese iena ura dalana umui dekenai do ia hadibaia, bona Lauma Helaga ena diba bona diari umui dekenai do ia henia. Vadaeni Lohiabada ena ura hegeregerena do umui noho, bona nega ibounai umui ese ia do umui hamoalea. Emui mauri ese kara namodia edia anina do idia havaraia, bona Dirava ena diba bona diari ese umui do idia hatubua daekau.” (Kolose 1:9, 10) Dirava tomadiho henia dalana maorona be ita ese ita abia hidi lasi. Diba maoromaoro Baibel dekenai, lauma dalanai lalo-parara ita abia, bona Dirava ena aonega ita abia be gau badadia. Bema unai ita abia lasi, kerere dikadia idia vara diba.
17. (a) Mose ena nega lalonai, edena dala ai hesiai gaukara helagana idia hakererea? (b) Hari inai negai, edena dala ai hesiai gaukara helagana ita hakererea diba?
17 Mose ena nega lalonai, Israela taudia dekenai ia vara gauna mani oi laloa. Ita duahia: “Dirava ese idia ia rakatania, guba ena hisiu do idia tomadiho henia totona.” (Kara 7:42) Unai Israela taudia ese Iehova ena hoa karadia, idia totona ia karaia karadia, idia itaia. To, idia laloa hahenamo ma haida do idia abia diba neganai, dirava ma haida idia tomadiho henia. Dirava idia badinaia lasi, bona badinaia karana be gau badana bema ita ura Dirava ese iseda hesiai gaukara helagana do ia abia dae. (Salamo 18:25) Momokani, hari inai negai taunimanima momo lasi be Iehova idia rakatania hisiu eiava golo boromakau ena natuna tomadiho henia totona, to kaivakuku tomadiho henia karadia ma haida idia noho. Iesu ena sisiba be “kohu” ita hesiai henia lasi, bona Paulo ia gwau kohu momo ura dikadika karana be kaivakuku tomadiho henia karana. (Mataio 6:24; Kolose 3:5) Satani ese sibona ia abia isi, dirava ta bamona. (2 Korinto 4:4) Taunimanima momo ese unai bamona kaivakuku tomadiho henia karadia idia karaia bona idia be tarapu ta. Hegeregere, sibona ia gwau ia be Iesu murinai ia raka, to iena mauri lalonai ia hekwarahi taga tauna ai do ia lao eiava sibona ena goada bona sibona ena lalohadai ia badinaia tauna mani oi laloa. Daika ia hesiai henia momokani? Isaia ena negai idia noho Iuda taudia amo ia idau, a? Idia be Iehova ena ladanai gwauhamata idia karaia, to idia gwau hoa karadia be ia ese ia karaia lasi to miro kaivakukudia ese idia karaia.—Isaia 48:1, 5.
18. Guna bona hari, edena dala ai hesiai gaukara helagana idia karaia kerere?
18 Iesu ena sisiba danu be inai: “Nega do ia mai, umui do ia alaia mase tauna be do ia laloa ia be Dirava ena hesiai gaukara ia karaia.” (Ioane 16:2) Saulo, aposetolo Paulo ai ia lao tauna, be guna “Stefano ena mase ia ura henia” bona “Lohiabada ena diba tahua taudia hagaria bona alaia hereva momo ia gwauraia noho” neganai, ia laloa Dirava ia hesiai henia. (Kara 8:1; 9:1) Hari inai negai, bese idauna hamasea ore karadia idia karaia taudia haida danu idia gwau Dirava idia tomadiho henia. Momo idia gwau Dirava idia tomadiho henia, to dirava ta bamona idia tomadiho henia gaudia be bese abia isi karana, iduhu abia isi karana, kohu, sibodia edia ura, bona gau ma haida.
19. (a) Iseda hesiai gaukara helagana be edena dala ai ita laloa? (b) Edena hesiai gaukara helagana ese ita do ia hamoalea?
19 Iesu ia gwau: “Lohiabada oiemu Dirava do oi tomadiho henia, ia sibona dekenai hesiai gaukara do [oi] karaia.” (Mataio 4:10) Unai neganai Satani dekenai ia hereva, to gau badana be ita ibounai ese ena hereva ita kamonai henia! Guba bona tanobada edia Siahu Ibounai Lohiabada dekenai hesiai gaukara helagana ita henia be ita ia hamoalea bona ita ia hagaria hahenamo ta. Bona iseda tomadiho karana lalonai taunimanima durua gaukarana dekenai dahaka ita gwau diba? Taunimanima durua totona unai bamona gaukara ita karaia neganai, moale bada ia havaraia. (Salamo 41:1, 2; 59:16) To, unai bamona gaukara ese moale do ia havaraia bema mai iseda kudouna ibounai ida ita karaia bona dala maorona ai ita karaia. Daidia edia Dirava tomadiho henia karana ia maoro? Iehova ese daidia edia hesiai gaukara helagana ia abia dae? Unai bamona henanadai ita haerelaia diba bema Baibel herevana ihatoina, iseda tomadiho ia herevalaia herevana unai, ita laloa. Hereva gabena lalonai unai do ita karaia.
[Footnotes]
a Nega momo Kerisendom ena “liturgy” be ena tomadiho heboudia eiava tomadiho karadia haida, hegeregere Roman Katolik Dubu lalonai idia karaia Anibou.
b Kara 13:2 ai ia gwau, Antioka lalonai peroveta taudia bona hadibaia taudia be taunimanima vairanai, ‘Lohiabada dekenai idia tomadiho’ (unuseniai Greek hereva lei·tour·giʹa bamona herevana idia hahanaia). Toana be unai tomadiho ena kahana ta be taunimanima idia haroro henia.
Edena Bamona Do Oi Haere?
• Iesu ese edena bamona taunimanima durua gaukarana badana ia karaia?
• Keristani taudia ese edena bamona taunimanima durua gaukarana idia karaia?
• Keristani taudia edia hesiai gaukara helagana be dahaka, bona edeseniai idia karaia?
• Iseda hesiai gaukara helagana ese Dirava ia hamoalea totona dahaka ita abia be namo?
[Picture on page 10]
Tama sina ese henia karana amo moale idia davaria
[Pictures on page 12, 13]
Keristani taudia ese ma haida idia durua bona sivarai namona idia harorolaia neganai, taunimanima durua gaukarana idia karaia
[Picture on page 14]
Diba maoromaoro bona lalo-parara ita abia be gau badana, badina unai amo do ia hamomokania diba Dirava ese iseda hesiai gaukara helagana ia abia dae