Hadibaia Hereva Badana Ta

OCTOBER 7, 2000 ai, Watch Tower Bible and Tract Society of Pennsylvania ena lagani ta ta hebouna ena dokonai, hebou ena seamani, Hakaua Oreana tauna John E. Barr, ese hadibaia hereva badana ta ia gwauraia. Unai hadibaia hereva be unai dina tamona ai Theodore Jaracz bona Daniel Sydlik ese idia herevalaia gaudia hegeregerena.​—⁠Inai magasin ena rau 12-​16 bona 28-​31 itaia.

Tadikaka Barr ese hereva mai anina bada ia gwauraia: “ ‘Hesiai tauna mai ena kamonai, bona mai ena kara maoromaoro’ bona ena Hakaua Oreana idia abia gaukara ese gaukara oreadia idauidau edia gaukara ia hereaia. Unai gaukara oreadia idauidau edia taravatu pepadia ese idia hahedinaraia gaukara idauidau be mai edia hetoana. To, iseda Biaguna, Iesu Keriso, ese ena ‘kohu ibounai,’ eiava Basileia gaudia ibounai tanobada dekenai, be kamonai hesiai oreana ese ia naria totona ia henia.”​—⁠Mataio 24:​45-​47.

Tadikaka Barr ese Pennsylvania oreana ia herevalaia neganai, ma ia gwau: “Lagani 1884 ai idia haginia negana amo Watch Tower Bible and Tract Society of Pennsylvania ese hari inai nega lalonai gaukara badana ia karaia. To, ia be gaukara oreana sibona, nega idauidau ‘hesiai tauna mai ena kamonai, bona mai ena kara maoromaoro’ ese iena ura hegeregerena do ia gaukaralaia totona.”

Tadikaka Sydlik bona Jaracz ese edia hereva lalonai idia hahedinaraia, ena be “hesiai tauna mai ena kamonai, bona mai ena kara maoromaoro” ese Lohiabada ena kohu ibounai tanobada dekenai naria gaukarana ia abia, to unai hesiai tauna oreana ese dala ia kehoa, “mamoe idaudia” taudia namodia ese naria gaukara haida do idia karaia. (Ioane 10:16) Danu, Buka Helaga ena hereva ta ia gwau lasi horoa Keristani taudia sibona be Iehova ena Witnes taudia ese idia gaukaralaia gaukara oreadia edia dairekta taudia ai idia lao diba.

Tadikaka Barr ese helai taudia ia hamaoroa, vanegai Iehova ena Witnes taudia edia Hakaua Oreana taudia, United States dekenai “hesiai tauna mai ena kamonai, bona mai ena kara maoromaoro” ese ia gaukaralaia gaukara oreadia edia dairekta bona ofesa taudia, be sibona edia ura dainai unai dairekta oreadia amo idia siri. Edia gabu abia totona mamoe idaudia oreana amo idia abidadama henia diba tadikaka be vouti amo idia abia hidi.

Unai ese namo ia havaraia. Unai amo Hakaua Oreana taudia dekenai nega bada ia noho, lauma aniani idia hegaegaelaia totona bona tanobada ibounai tadikaka oreana be lauma dalanai idia naria namonamo totona.

Dokonai, seamani ese mai edia moale ida idia helai taudia ia hamaoroa: “Ena be gavamani ena taravatu laloa gaukara bona gaukara ma idauidau be naria taudia namodia haida dekenai idia henia, . . . idia ibounai be Hakaua Oreana ese lauma dalanai ia hakaua. . . . Ita ibounai ita guriguri, Iehova ena ladana badana hanamoa bona hahelagaia totona mai lalo-tamona ida iena ura ita karaia noho lalonai ia ese ita do ia hanamoa.”