Mase Davara Lokua Toretoredia Dekenai Hereva Momokanina be Dahaka?

Lagani 50 mai kahana gunanai, Bedouin mamoe naria tauna ese nadi ta be kohua ta lalonai ia negea vareai bona ia vara gauna be haida ese idia gwauraia lagani 1900 murina negana ai akioleji taudia ese idia davaria gauna hereadaena. Bedouin tauna ese ia negea nadi be raro hodu ta ia makohia ena regena ia kamonai. Ia tahua namonamo neganai, ia davaria gauna be gabeai do idia gwauraia Mase Davara Lokua Toretoredia ginigunadia.

UNAI lokua revarevadia be diba bada taudia bona nius halasia oreadia ese idia herevalaia momo bona idia hepapahuahulaia. Taunimanima momo idia daradara bona sivarai kereredia be momo. Taunimanima haida ese sivarai koikoi idia halasia, idia gwau unai lokua toretoredia idia gwauraia herevadia idia hunia, Keristani taudia bona Iuda taudia edia abidadama do idia hamanokaia garina. To, edia anina korikori be dahaka? Lagani 50 mai kahana murinai, idia vara momokani gaudia ita dibaia diba, a?

Mase Davara Lokua Toretoredia be Dahaka?

Mase Davara Lokua Toretoredia be idaunegai Iuda revarevadia, idia momo be Heberu gado ai, haida be Aramia gado dekenai, bona haida sibona be Greek gado dekenai idia torea. Unai lokua toretoredia bona edia kahana maragidia momo be lagani 2,000 mai kahana gunanai idia torea, Iesu ia do vara lasi negana ai idia noho vadaeni. Bedouin taudia amo idia abia lokua toretore ginigunadia huanai be idia dika idia lao revarevadia 7. Kohua ma haida idia tahua namonamo neganai, lokua toretoredia ma haida bona edia kahana maragidia tausen momo idia davaria. Lagani 1947 bona 1956 huanai, Mase Davarana, Qumran kahirakahira dekenai, kohua 11 lalonai lokua toretoredia idia davaria.

Lokua toretoredia bona edia kahana maragidia ibounai idia haria neganai, revareva gaudia ibounai be 800 bamona. Kahana 4 amo kahana ta, o revareva gaudia ibounai 200 mai kahana, be Hebrew Baibel ena hereva amo idia torea hanai gaudia. Revareva ma haida be idaunegai Iuda taudia ese Baibel amo idia abia lasi toretoredia, idia be Apokrifa bona Pseudepigrapha herevadia.a

Diba bada taudia ese idia moalelaia lokua toretoredia haida be guna idia itaia lasi toretoredia. Idia haida be Iuda taudia edia taravatu idia hahedinaraia herevadia, Qumran ai ia noho oreana edia taravatu idauidau, tomadiho herevadia bona guriguri herevadia, bona Baibel ena peroveta herevana bona nega dokona ai idia guguru lalohadaina idia herevalaia herevadia. Baibel idia herevalaia herevadia idaudia idia noho danu, idia be hari inai negai Baibel ena siri ta ta ena anina herevalaia dalana idia haheitalaia idaunegai herevadia ginigunadia.

Daika ese Mase Davara Lokua Toretoredia Ia Torea?

Idaunegai revareva edia lagani tahua daladia idauidau ese ia hahedinaraia lokua toretoredia be reana lagani 300 B.C.E. bona aposetolo taudia edia negai huanai idia torea hanai eiava idia haboua. Diba bada taudia haida idia gwau lagani 70 C.E. ai dubu helagana idia do hadikaia ore lasi neganai, Ierusalema amo idia mai Iuda taudia ese lokua toretoredia be kohua dekenai idia hunia. To, unai lokua toretoredia idia stadilaia diba bada taudia momo ese idia davaria unai lalohadai be lokua toretoredia edia hereva ese ia hamomokania lasi. Lokua toretoredia momo idia hahedinaraia lalohadai bona kastom idauidau be Ierusalema ai idia noho tomadiho gunalaia taudia edia lalohadai hegeregerena lasi. Orea ta idia herevalaia, ena taunimanima idia laloa Dirava ese hahelaga taudia bona dubu ena hesiai gaukarana Ierusalema ai ia dadaraia bona Dirava ia laloa edia orea ena tomadiho, taunimanima idia noho lasi gabuna dekenai, be dubu ena gabuna ia abia. Ierusalema ena dubu gunalaia taudia be unai bamona lokua toretoredia do idia hunia lasi.

Ena be reana Qumran ai torea hanaia oreana ta ia noho, to reana lokua toretoredia momo be edia orea taudia ese gabu ma ta dekenai idia haboua bena unuseni amo idia mailaia. Dala ta ai, Mase Davara Lokua Toretoredia be laiberi badana ta. Laiberi momo bamona, reana idia haboua gaudia be lalohadai idauidau idia gwauraia, idia ibounai be duahiduahi taudia edia lalohadai tomadiho dekenai idia badinaia lasi. To, reana revareva haida edia kopi momo idia noho ena badina be unai orea ena ura gaudia bona idia abia dae herevadia idia gwauraia hedinarai.

Qumran Ena Taunimanima be Essene Taudia, A?

Bema unai lokua toretoredia be Qumran ena laiberi, iena taunimanima be daidia? Lagani 1947 ai, Profesa Eleazar Sukenik be Jerusalem ena Hebrew University totona lokua toretoredia toi ia abia, bona ia be lokua toretoredia be Essene orea taudia edia ia hadibaia tauna ginigunana.

Aposetolo taudia edia negai toretore taudia, hegeregere Josephus, Alexandria tauna Philo, bona Pliny Badana ese unai Iuda oreana, Essene taudia, idia herevalaia. Essene taudia idia hamatamaia dalana idia hepapahuahulaia, to toana be idia hedinarai negana be lagani 200 B.C.E. murinai, Maccabee taudia edia dagedage karana badana murinai ia vara heiriheiri negana ai.b Josephus ese unai nega ia herevalaia neganai, ia hahedinaraia idia noho bona edia lalohadai tomadiho dekenai be Farisea bona Sadukea taudia edia lalohadai amo ia idau. Pliny ia gwau Essene oreana ta edia noho gabuna be Mase Davarana ena badinai, Ieriko bona Ene Gedi edia huanai.

Profesa James VanderKam, Mase Davara Lokua Toretoredia ia diba bada tauna ta, ia gwau “Qumran ai idia noho Essene taudia be Essene ena oreana badana ena kahana ta,” bona Josephus ia gwau idia ibounai be tausen hani bamona. Ena be unai orea ena kara ibounai idia hahedinaraia lasi, to toana be Qumran revarevadia ese idia herevalaia gauna ta be Essene taudia, badina unai nega ai idia diba Iuda oreana ma ta be idia bamona lasi.

Haida idia gwau Keristani tomadiho be Qumran dekenai ia matamaia. To, Qumran oreana ena lalohadai tomadiho dekenai bona Keristani taudia ginigunadia edia lalohadai tomadiho dekenai be idau, bona gau momo amo unai ita itaia diba. Qumran toretoredia idia hahedinaraia Sabati taravatu aukadia idia badinaia bona tomadiho dalanai idia goeva be idia laloa hanaihanai gauna. (Mataio 15:​1-​20; Luka 6:​1-​11) Essene taudia be taunimanima amo idia gini siri, gau iboudiai be siahu ta ena ura hegeregerena idia vara bona souli ia mase diba lasi herevadia idia abia dae, mahuta hebou karaia lasi karana idia laloa bada, idia gwau aneru danu idia tomadiho hebou, bona unai gaudia idia badinaia auka danu. Unai ese ia hahedinaraia edia hahediba herevadia be Iesu bona unai nega ai idia noho Keristani taudia ginigunadia edia hahediba herevadia amo idia idau.​​—⁠Mataio 5:​14-​16; Ioane 11:​23, 24; Kolose 2:​18; 1 Timoteo 4:​1-3.

Koikoi Lasi, Lokua Toretoredia Idia Hunia Lasi

Mase Davara Lokua Toretoredia idia davaria, bena lagani haida murinai, buka idauidau idia halasia, bona unai ese dala ia kehoa tanobada hegegemadai lalonai idia noho diba bada taudia ese idia davaria gaudia idia dibaia matamaia totona. To, kohua ta, idia gwauraia Kohua 4, amo idia abia kahana maragidia tausen tausen ese hekwakwanai ta idia havaraia. East Jerusalem (unai neganai Jordan ena kahana ta) dekenai, Palestine Archaeological Museum ai intenesenel diba bada taudia oreana maragina ta idia haginia, idia sibona ese unai kahadia idia biagudia. Unai orea lalonai, Iuda eiava Israela diba bada tauna ta be lasi.

Unai orea ese taravatu ta idia haginia, tau ta ese lokua toretoredia do ia itaia diba lasi ela bona edia tahua gaukarana ia ore bona idia davaria gaudia idia halasia. Taravatu idia atoa unai diba bada taudia edia orea lalonai hida idia noho totona. Bema unai orea lalonai ta ia mase, diba bada tauna tamona sibona be unai tauna ena gabu do ia abia. To gaukara be bada dainai unai orea idia habadaia be namo, bona nega haida, idaunegai Heberu gado bona Aramia gado idia diba momo taudia idia abia hidi be namo. James VanderKam ia gwau bamona: “Ena be edia diba be momo, to diba bada taudia ibounai 8 idia hegeregere lasi unai kahana maragidia tausen momo stadilaia totona.”

Lagani 1967 ena Dina 6 Tuarina lalonai, East Jerusalem bona ena lokua toretoredia be Israela taudia edia siahu henunai idia atoa, to lokua toretore tahua oreana ena taravatu idia haidaua lasi. Kohua 4 amo idia abia lokua toretoredia edia hereva idia halasia lasi negana idia halataia lagani haida amo ela bona lagani momo herea idia ore neganai, diba bada taudia momo ese idia maumauraia. Lagani 1977 ai, Oxford University ena Profesa Geza Vermes ia gwau diba bada taudia huanai, unai be hari inai negai ia vara dika gauna hereadaena. Haida ese inai sivarai idia halasia, idia gwau Katolik Dubu be mai edia ura bada ida idia koikoi, lokua toretoredia ia gwauraia herevadia idia hunia, Keristani tomadiho ia hadikaia garina.

Lagani 1980 murinai, unai orea idia habadaia bona diba bada taudia edia namba be 20. Bena, lagani 1990 ai, Jerusalem ena Hebrew University tauna, edita badana matamatana Emanuel Tov ena hakaua henunai, unai orea idia habadaia lou bona diba bada taudia edia namba be 50 ia hanaia. Idia badinaia auka sediual ta ia haginia, lokua toretore oredia edia hereva do idia printaia bona halasia totona.

Lagani 1991 ai idia hoa, badina gau haida idia vara matamaia. Ginigunana be, A Preliminary Edition of the Unpublished Dead Sea Scrolls bukana idia halasia. Kompiuta ena heduru bona orea ena konkodens ena kopi ta idia gaukaralaia amo, unai ibounai idia haboua. Bena, Huntington Library, San Marino, California dekenai, idia gwau lokua toretoredia edia laulau ibounai be diba bada taudia ibounai totona do idia halasia. Daudau lasi murinai, A Facsimile Edition of the Dead Sea Scrolls idia halasia dainai, idia do hahedinaraia lasi lokua toretoredia edia laulau itaia haraga dalana ia noho.

Unai dainai idia hanaia laganidia 10 lalonai, Mase Davara Lokua Toretoredia ibounai idia noho taunimanima ese idia itaia totona. Tahua gaukara ia hahedinaraia idia koikoi lasi; lokua toretoredia haida idia hunia lasi. Idia hamomokania vadaeni herevadia, lokua toretoredia amo, idia halasia noho dainai, hari idia ibounai ita stadilaia namonamo matamaia diba. Lokua toretoredia stadilaia karana matamatana ia vara. To, Baibel stiuden taudia dekenai unai tahua gaukara ena anina be dahaka?

[Footnotes]

[Picture on page 3]

Inai be Mase Davarana kahirakahira idia noho kohuadia, idaunegai lokua toretoredia idia davaria gabudia

[Picture Credit Line on page 3]

Scroll fragment: Pages 3, 4, and 6: Courtesy of Israel Antiquities Authority

[Picture Credit Line on page 5]

Courtesy of Shrine of the Book, Israel Museum, Jerusalem