‘Lokua Toretoredia Oi Mailaia’

ATAIAI idia noho herevadia amo, aposetolo Paulo be ia ida ia gaukara hebou misinari tauna, Timoteo ia hamaoroa toretore gaudia haida ia mailaia totona. Paulo be edena lokua toretore bona animal kopina amo idia karaia toretore gaudia ia herevalaia? Dahaka dainai unai hereva ia gwauraia? Bona iena noinoi amo dahaka ita dibaia?

Lagani 50 C.E. ai, aposetolo Paulo ese unai hereva ia torea neganai, Heberu Toretoredia ena buka 39 be buka 22 eiava 24 dekenai idia hapararaia vadaeni. Bona idia momo be lokua toretoredia. Profesa ta, Alan Millard ia gwau, ena be unai lokua toretore be dava bada gaudia, to “taga taudia . . . momo ese idia hoidia.” Bona ma haida dekenai lokua toretore ta ia noho. Hegeregere, Etiopia tauna ena kariota lalonai lokua toretore ta ia dainai, “peroveta tauna Isaia ena buka [lokua toretore] ia duahia badabada.” “Ia be Etiopia ena kwini henunai ia gaukara bona kwini ena dava bada kohudia ia naria.” Toana be ia be taga tauna dainai, ia dekenai Toretore Helagadia ena kahana momo idia noho.​—⁠Kara 8:​27, 28.

Paulo ese Timoteo dekenai ia torea revareva lalonai, ia noinoi: “Oi mai neganai, Troa dekenai Kapo ida lau rakatania keru dabua oi mailaia. Bona lokua toretore, bona animal kopina amo idia karaia toretore gaudia danu oi mailaia.” (2 Tim. 4:13) Unai ese ia hahedinaraia, Paulo dekenai buka haida idia noho. Ena be Paulo be mai ena buka momo, to ia dekenai Dirava ena hereva be mai anina bada. Baibel ena diba bada tauna ese unai siri ai inai hereva, “animal kopina amo idia karaia gaudia” ia herevalaia neganai, ia gwau: “Taravatu Gunana ena buka momo be animal kopina amo idia karaia gaudia dekenai idia torea bona edia davana be bada, to siriho amo idia karaia gaudia edia davana be bada lasi.” Paulo ia matamata neganai, ‘Gamaliela ese ia hadibaia.’ Gamaliela be Mose ena Taravatu ia hadibaia bona taunimanima ese idia abia isi. Ia hahedinaraia, Paulo ese Dirava ena Hereva, lokua toretoredia unai, edia kopi ta ta be ia dekenai ia noho.​—⁠Kara 5:34; 22:⁠3.

Keristani Taudia ese Lokua Toretoredia Idia Gaukaralaia

Lokua Toretore Helagadia idia dogoatao taudia be idia moale bada. Unai negai idia noho Keristani taudia ese Dirava ena Hereva be edena bamona idia kamonai bona duahia? Guna Paulo ese Timoteo dekenai ia torea revarevana amo haere ita davaria diba. Ia gwau: “Namona be oi gaukara goada taunimanima vairanai oi duahiduahi noho.” (1 Tim. 4:13) Guna Keristani kongrigeisen lalonai, taunimanima vairanai duahiduahi karana be hebou ena kahana ta, bona unai be Dirava ena taunimanima ese idia manadalaia karana, Mose ena nega amo ia matamaia.​—⁠Kara 13:15; 15:21; 2 Kor. 3:⁠15.

Timoteo be elda ta dainai, ia “gaukara goada” ia duahiduahi badabada totona, unai amo lokua Toretore Helagadia idia dogoatao lasi taudia ia durudia. Momokani, idia hebou neganai Dirava ena Hereva idia duahia badabada, unai amo ibounai idia kamonai namonamo, bona tama sina bona natudia ese hebou gabunai idia kamonai gaudia be ruma dekenai idia herevalaia hebou.

Isaia ena lokua toretoredia, Mase Davara dekenai idia davaria gauna, ena lata be mita 7.3 bamona. Lokua toretore ena kahana ta ta dekenai au (rod) idia atodia bona ia be mai ena kava (cover), bona ia metau. Reana Keristani taudia momo be haroro totona, lokua toretoredia ibounai idia abia lao lasi. Ena be Paulo be mai ena lokua Toretore Helagadia, to ena laolao gabudiai unai lokua toretore ibounai ia abia lao lasi. Unai ese ia hahedinaraia, ena lokua toretore haida be Troa dekenai ena turana Kapo ida ia rakatania.

Paulo Ena Haheitalai amo Dahaka Ita Dibaia?

Paulo be Timoteo dekenai ena noinoi herevana ia do siaia lasi neganai, ia be nega iharuana Roma ai idia hadiburaia, ia gwau: “Tuari namona lau tuarilaia vadaeni, heau helulu lau haorea vadaeni, . . . hari nega amo lau totona kara maoromaoro ena korona ia noho hegaegae.” (2 Tim. 4:​7, 8) Lagani 65 C.E. ai, Nero ia dagedage negana ai, Paulo ese unai hereva ia torea. Unai negai, ia be dibura ruma lalonai dagedage bada ia davaria bona ia diba kahirakahira ia do idia hamasea. (2 Tim. 1:16; 4:⁠6) Unai dainai, Paulo ia ura dikadika lokua toretoredia ia abia. Ena be Paulo ia diba ena heau helulu ia haorea vadaeni, to ia ura dikadika Dirava ena Hereva stadilaia karana amo sibona ia hagoadaia.

Timoteo be Efeso hanua dekenai ia noho neganai, Paulo ena revareva ia davaria. (1 Tim. 1:⁠3) Efeso amo Troa ia hanaia bona Roma dekenai ia lao ena daudau be kilomita 1,600 bamona. Unai revareva tamona lalonai, Paulo ese Timoteo ia hamaoroa: “Keru negana ia do ginidae lasi neganai, oi mai haraga.” (2 Tim. 4:21) Timoteo be Roma dekenai ia lao totona bouti ta ia abia, bona Paulo ia gwauraia negana ai ia ginidae eiava lasi be Baibel ese ia gwauraia lasi.

Paulo ese “lokua toretore, bona animal kopina amo idia karaia toretore gaudia” ia noia karana amo dahaka ita dibaia? Paulo be hisihisi bada ia abia negana lalonai, ia ese Dirava ena Hereva ia ura henia dikadika. Unai dainai ena hetura karana Iehova ida ia goada, bona ena hesiai gaukara ia hadokoa lasi bona ma haida ia hagoadaia.

Hari inai negai, ita moale badina ita ta ta be mai eda Baibel! Bona ita haida dekenai Baibel ena kopi haida idia noho danu. Paulo bamona, Baibel lalonai idia noho dobu gaudia ita lalopararalaia totona, iseda ura unai gaudia dekenai ita habadaia be namo. Paulo ese Dirava ena lauma amo ia torea revareva 14 amo, Timoteo iharuana be ena revareva ginigabena. Iena noinoi hereva ginigabena be unai buka ena dokona kahanai ia noho. Momokani, Paulo be Timoteo ia noia ia dekenai ‘lokua toretore, bona animal kopina amo idia karaia toretore gaudia’ do ia mailaia. Unai be ena noinoi hereva dokona.

Paulo ia karaia bamona, oi ura dikadika abidadama ena heau helulu oi haorea momokani, a? Oi ura Iehova oi hesiai henia noho bona haroro gaukara oi karaia Lohiabada ena ura hegeregerena, a? Vadaeni, Paulo ese Keristani taudia dekenai ia henia hagoadaia herevana oi badinaia be namo, ani? Mai emu ura ida Baibel​—⁠hari taunimanima momo dekenai ia noho bukana unai​—⁠oi stadilaia hanaihanai, unai amo “oi sibona bona emu hadibaia hereva dekenai oi naria namonamo.”​—⁠1 Tim. 4:⁠16.

[Map/Pictures on page 18]

(For fully formatted text, see publication)

Efeso

Troa

Roma