Dahaka Dainai Baibel Oi Stadilaia be Namo?

BILL be matamata, tauanina goada tauna, mai ena diba, bona moni dalanai ia be hegeregere. To, ia moale lasi. Ena mauri be anina lasi, bona unai ia lalo-hekwarahilaia bada. Mauri ena anina ia davaria totona, tomadiho idauidau ia tahua, to ia tahua gauna ia davaria lasi. Lagani 1991 ai Iehova ena Witnes tauna ta ia davaria bona Baibel ena lalohadai mauri ena anina dekenai ia herevalaia bukana ta ia dekenai ia rakatania. Baibel stadi dalana idia karaia, unai amo Bill ese unai hereva bona ma hereva haida do ia laloa namonamo diba.

Bill ia gwau: “Emai stadi ginigunana ai karaia, bona Baibel ai duahia momo dainai, lau diba inai be lau tahua noho gauna. Baibel lalonai idia noho haere ese moale bada idia havaraia. Unai stadi murinai, motuka amo lau daekau ororo ataiai dekenai, egu motuka amo lau diho, bona moale dainai lau boiboi bada herea. Lau moale bada badina egu henanadai edia haere lau dibaia noho.”

Momokani, Baibel ena hereva momokani idia davaria taudia ibounai be moale dainai unai bamona idia boiboi lasi. To, momo dekenai mauri ena mai anina bada henanadai edia haere davaria karana be moale gauna badana ta. Edia mamina be Iesu ena parabole lalonai tano dekenai kohu namona ta ia davaria tauna ena hemami bamona. Iesu ia gwau: “Mai moale danu iena gau ibounai ia hoia lao, vadaeni unai tano ia hoia.”​—⁠Mataio 13:⁠44.

Mauri mai Anina Abia Dalana

Bill ese inai henanadai badana ta ia laloa, Mauri ena anina be dahaka? Aonega taudia, tomadiho stadilaia taudia, bona saiens taudia be unai henanadai dainai lagani tausen momo lalonai idia hekwarahi bada. Taunimanima ese buka momo idia torea unai henanadai ena haere idia henia toho totona. Edia hekwarahi be anina ia havaraia lasi, bona momo idia gwau unai henanadai dekenai haere be lasi. To, haere ia noho. Ena be ia dobu, to ia auka lasi. Baibel lalonai idia hahedinaraia. Mauri mai anina bona mai moalena davaria dalana be inai: Iseda Havaraia Tauna bona guba Tamana, Iehova, ida hetura karana namona ita abia. Edena dala amo unai ita karaia diba?

Dirava kahirakahira dekenai idia lao taudia ese kara rua, toana be idia hakoikoia heheni karadia, idia karaia be namo. Ia dekenai idia lao taudia be ia idia gari henia bona idia lalokau henia. Mani unai hereva idia hamomokania siridia rua ita laloa. Idaunegai, aonega King Solomona ese taunimanima edia mauri ia stadilaia namonamo bona Baibel bukana Hadibaia Tauna dekenai, ia davaria gaudia ia torea. Ia davaria gaudia ia laloa neganai, ia gwau: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona.” (Hadibaia Tauna 12:13) Lagani handred momo murinai, Iesu idia nanadaia Mose ena Taravatu dekenai edena hahegani be bada neganai, ia gwau: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” (Mataio 22:37) Oi laloa Dirava ita gari henia bona ita lalokau henia be gau idauna, a? Namona be gari bona lalokau edia anina bada bona Dirava ida hetura karana namona ia vara totona idia gaukara hebou dalana ita tahua.

Dirava Gari Henia Karana Ena Anina

Mai hemataurai ida Dirava ita gari henia be mai anina bada, bema ita ura dala maorona ai Dirava ita tomadiho henia. Baibel ia gwau: “Lohiabada gari henia kara be aonega hamatamaia ena dala.” (Salamo 111:10) Aposetolo Paulo ia gwau: “Namona be Dirava do ita tomadiho henia, mai hemataurai bona mai gari danu. Namona be iena gaukara do ita karaia, iena ura dala hegeregerena.” (Heberu 12:28) Unai hegeregerena, aposetolo Ioane ese matahanai lalonai ia itaia aneru ta, guba ena ataiai ia roho lao, be sivarai namona ia harorolaia matamaia neganai, ia gwau: “Dirava do umui gari henia, ia do umui hanamoa bada.”​—⁠Apokalupo 14:​6, 7.

Inai Dirava gari henia karana, mauri lalonai anina davaria totona mai anina bada karana, be gari dikadika karana lasi. Bema ia dagedage raskol tauna dikana ta ese ita ia hagaria neganai, reana ita gari dikadika. To Dirava gari henia karana ena anina be Havaraia Tauna matauraia bada karana. Danu, ia be Dirava ita habadua garina ita gari karana, badina ia be Kota Biaguna Badana bona Siahu Ibounai Diravana, bona ia be mai ena siahu bona goada ia idia kamonai henia lasi taudia ia panisia totona.

Gari Bona Lalokau Idia Gaukara Hebou

To, Iehova ia ura lasi taunimanima ese ia idia hesiai henia badina ia idia gari henia. Iehova be lalokau Diravana. Aposetolo Ioane ena lalona ese ia veria dainai, ia gwau: “Dirava be lalokau.” (1 Ioane 4:⁠8) Iehova Dirava ese mai lalokau ida taunimanima ia kara henidia, bona ia ura taunimanima ese ia idia lalokau henia danu. To, edena dala ai unai bamona lalokau bona Dirava gari henia karana idia gaukara hebou diba? Unai hereva rua idia hakapua tamona. Salamo torea tauna ia gwau: “Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho.”​—⁠Salamo 25:⁠14.

Natuna maragina ese ena aonega bona goada tamana ia matauraia bona gari henia karana mani oi laloa. Danu, tamana ena lalokau ese unai bamona natuna ena lalona ia veria. Natuna ese tamana do ia abidadama henia bona ena hahekau ia tahua, bona ia diba momokani unai hahekau ese namo do ia mailaia. Unai hegeregerena, bema Iehova ita lalokau bona gari henia, ena hakaua dalana do ita badinaia, bona unai ese ita dekenai namo ia mailaia. Mani Iehova ese Israela taudia ia herevalaia dalana oi itaia, ia gwau: “Nega ibounai unai bamona bema idia laloa be namo, bona bema lau dekenai idia matauraia, bona egu Taravatu bema idia kamonai henia, edia noho be do ia namo, bona edia natudia bona tubudia danu edia noho be do namo ela bona hanaihanai.”​—⁠Deuteronomi 5:⁠29.

Momokani, Dirava gari henia karana ese ita ia hakaua lasi igui hesiai gaukara dekenai to ura kwalimu dekenai, bona lalohisihisi dekenai lasi to moale dekenai. Isaia ese Iesu ia perovetalaia, ia gwau: “Ia ese Iehova gari henia karana do ia moalelaia.” (Isaia 11:​3, NW ) Bona salamo torea tauna ia gwau: “Lohiabada dekenai ia gari tauna be namo. Lohiabada ena taravatu ia moalelaia noho tauna danu be namo.”​—⁠Salamo 112:⁠1.

Momokani, bema Iehova ita diba lasi, ia do ita gari henia bona lalokau henia diba lasi. Unai dainai Baibel ita stadilaia be mai anina bada. Unai bamona stadi karana ese ita ia durua Iehova ena kara ita lalo-pararalaia totona, bona do ita itaia momokani ena hakaua dalana ita badinaia be aonega karana. Dirava kahirakahira dekenai ita lao neganai, ita ura ena ura ita karaia bona unai ese ita ia veria ena taravatu ita badinaia totona, badina ita diba idia ese namo do idia mailaia ita dekenai.​—⁠1 Ioane 5:⁠3.

Ta be mauri ena dala maorona dekenai ia raka ia diba be moale gauna. Unai be momokani hereva ena matamanai ai herevalaia tauna Bill dekenai. Vanegai ia gwau: “Lagani  9 gunanai nega ginigunana Baibel lau stadilaia negana amo, Iehova ida egu hetura karana ia bada. Matamanai lau mamia moale badana be lau moalelaia bada mauri dalana ai ia lao. Lau be hanaihanai lalohadai maorona mauri dekenai lau abia. Egu nega be moale karadia tahua karana kavakavana amo ia honu lasi, to mai anina bada gaukaradia lau karaia. Iehova be turana korikorina lau dekenai, bona lau diba ia ese egu namo ia tahua.”

Iehova ita diba ese moale ia mailaia bona edia mauri lalonai unai diba idia gaukaralaia taudia dekenai namo ia mailaia dalana be hereva gabena dekenai do ita herevalaia.

[Blurb on page 5]

Dirava kahirakahira dekenai ita lao ena anina be ia ita gari henia bona ita lalokau henia

[Picture on page 6]

Iesu be Iehova gari henia karana ia moalelaia