Oi Lalonai Mase Diba Lasi Laumana ta Ia Noho, A?

APOSETOLO Paulo ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.” (2 Timoteo 3:16) Oibe, Baibel be Dirava momokanina, Iehova, amo ia mai hereva momokani bukana.​​—⁠Salamo 83:⁠18.

Iehova be gau iboudiai, taunimanima danu, ia Havaraia Diravana dainai, ita mase neganai dahaka ia vara ita dekenai be ia diba namonamo. (Heberu 3:4; Apokalupo 4:​11) Iena lauma amo ia havaraia Herevana, Baibel, lalonai gabeai maurina dainai idia vara henanadai edia haere momokanidia bona maorodia ia henia.

Lauma be Dahaka?

Baibel lalonai gado ginigunadia ai idia torea herevadia, nega haida idia hahanaia “lauma,” edia anina badana be “laga.” To unai ese hahodi karana sibona ia hahedinaraia lasi. Baibel torea tauna Iamesi ia gwau: “Tauanina bema mai ena lauma lasi, ia be mase gauna.” (Iamesi 2:26) Unai dainai, lauma be tauanina ia hamauria gauna.

Unai tauanina ia hamauria noho siahuna be baragi lalonai ia vareai laga, eiava hodahoda sibona lasi. Dahaka dainai? Badina be hahodi karana ia doko murinai nega sisina, The World Book Encyclopedia ia gwau “miniti haida” lalonai, tauanina ena sel lalodiai mauri ia do noho. Unai dainai, ia mase bamona tauna ena uduna lalonai hodahoda idia henia karana amo idia hamauria diba. To bema mauri siahuna be tauanina ena sel lalodiai ia ore, ta hamauria karana be anina lasi. Unai neganai laga ese tauanina ena sel ta ia hamauria diba lasi. Unai dainai, lauma be ita itaia diba lasi mauri siahuna, tauanina ena sel ia hamauria gauna. Bona unai mauri siahuna be hahodi karana dainai ia gaukara noho.​​—⁠Iobu 34:​14, 15.

Unai lauma be taunimanima sibona ia hamauria noho, a? Baibel ese ita ia durua lalohadai maorona ita abia totona. Aonega tauna King Solomona ia abia dae taunimanima bona animal “edia hahodi dalana be tamona,” bena ia henanadai: “Daika ia diba taunimanima edia lauma be do ia daekau, to boroma ena lauma be tano dekenai do ia diho?” (Hadibaia Tauna 3:​19-21) Unai dainai animal bona taunimanima ia herevalaia neganai ia gwau idia be mai edia lauma. Edena dala ai unai be momokani?

Unai lauma, eiava mauri siahuna, be masini eiava paua kohu ta lalonai ia heau paua ida ita hahegeregerea diba. Ita itaia diba lasi paua ia haheaua masini ena gaukara hegeregerena, idia gaukaralaia diba gau idauidau ia karaia totona. Hegeregere, aveni ta be siahu ia halasia, kompiuta be hereva ia halasia bona namba ia duahia diba, bona televisen be laulau bona rege ia halasia. To, unai paua be ia haheaua masini ena toana ia abia lasi. Ia be hanaihanai siahu ta sibona. Unai hegeregerena, mauri siahuna danu be ia hamauria noho mauri gaudia edia kara bona toana ia abia lasi. Ia be mai ena kara ta lasi, gau ta ia lalohadailaia diba lasi. Taunimanima bona animal “edia hahodi dalana [“edia lauma,” NW ] be tamona.” (Hadibaia Tauna 3:19) Unai dainai tau ta ia mase neganai, iena lauma be gabu ma ta dekenai ia lao lasi bona lauma tauna ta bamona ia mauri noho lasi.

Vadaeni, mase taudia dekenai dahaka ia vara? Bona tau ta ia mase neganai unai lauma dekenai dahaka ia vara?

“Tano Dekenai Do Oi Giroa Lou”

Tau ginigunana, Adamu, be mai ena ura ida Dirava ena taravatu ia utua neganai, Iehova ese ia hamaoroa ia gwau: “Do oi varahu, bona do oi gaukara auka, tano ena anina abia totona, ia lao bona tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.” (Genese 3:19) Iehova ese kahu amo Adamu ia do karaia lasi neganai ia be edeseni? Oibe, gabu ta dekenai ia noho lasi! Ia mauri lasi. Unai dainai Iehova ia gwau Adamu be ‘tano dekenai do ia giroa lou’ neganai, iena hereva ena anina be Adamu do ia mase bona tano kahuna ai do ia lao. Adamu be lauma gabuna dekenai ia hanaia lao lasi. Ia mase neganai, mauri lasi gauna ai ia lao lou, ia mauri lasi. Iena kerere davana be gabu ma ta dekenai ia hanaia lao lasi to ia mase​​—⁠ena mauri ia ore momokani.​​—⁠Roma 6:⁠23.

To idia mase taudia ma haida be edena bamona? Hadibaia Tauna 9:​5, 10 ese mase taudia dekenai ia vara gauna ia hahedinaraia goevagoeva, ia gwau: “Mase taudia be gau ta idia diba lasi. . . . Mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” Unai dainai, mase ena anina be mauri be lasi. Salamo torea tauna ia gwau ta ia mase neganai, ‘tano ena kahu dekenai ia giroa lou bona unai dina dekenai, ia ura do ia karaia gaudia be idia doko.’​—⁠Salamo 146:⁠4.

Ia hedinarai goevagoeva, mase taudia idia mauri noho lasi. Idia be gau ta idia diba lasi. Oi idia itaia, kamonai henia, eiava hereva henia diba lasi. Oi idia durua eiava hadikaia diba lasi. Idia dekenai oi gari be badina lasi.

Lauma be ‘Dirava Dekenai Ia Giroa Lou’

Baibel ia gwau ta ia mase neganai, “lauma be ita dekenai ia henia Dirava dekenai do [ia] giroa lou.” (Hadibaia Tauna 12:⁠7) Unai ena anina be lauma tauna ta be guba dekenai ia daekau bena Dirava vairanai ia gini, a? Lasi momokani! Baibel ese unai hereva “giroa lou” ia gaukaralaia ena anina be gabu ta amo ma gabu ta dekenai ia lao karana lasi. Hegeregere, Dirava ese kamonai lasi Israela taudia ia hamaoroa ia gwau: “Lau dekenai umui giroa mai neganai, lau ese . . . umui dekenai do lau giroa lou.” (Malaki 3:⁠7) Israela taudia be Iehova dekenai idia ‘giroa lou’ ena anina be dala kererena amo idia giroa, bena Dirava ena kara maoromaoro dalana idia badinaia lou. Bona Iehova be Israela taudia dekenai ia “giroa lou” ena anina be ena taunimanima do ia lalo-namo henidia lou. Unai kara ruaosi dekenai idia be gabu ta amo ma gabu ta dekenai idia lao lasi, to unai “giroa lou” be edia laloa dalana ia herevalaia.

Unai hegeregerena, mase neganai lauma be Dirava dekenai ia “giroa lou” neganai, lauma tauna ta be tanobada amo guba dekenai ia lao lasi. Tau ta dekena amo unai mauri siahuna bema ia ore neganai, Dirava sibona ese do ia henia lou diba. Vadaeni lauma be ‘Dirava dekenai ia giroa lou’ dainai, gabeai unai tau do ia mauri lou eiava lasi be Dirava sibona ena ura hegeregerena.

Baibel ese Iesu Keriso ena mase ia herevalaia dalana mani oi laloa. Evanelia buka torea tauna Luka ia gwau: “Vadaeni Iesu ia boiboi, ia gwau, ‘Egu Tamana e, egu lauma be oiemu imana dekenai lau atoa inai.’ Unai bamona ia hereva, vadaeni ia mase.” (Luka 23:46) Iesu ena lauma be ia amo ia ore neganai, ia be guba dekenai ia daekau matamaia lasi. Dirava ese Iesu ia hatorea isi lou lasi ela bona dina ihatoina bona dina 40 idia ore murinai guba dekenai ia daekau lao. (Kara 1:​3, 9) Unai dainai, Iesu ena mase negana ai, ia ese ena lauma be ena Tamana ena imana dekenai ia rakatania mai ena abidadama ida, bona ia diba momokani Iehova ese ia do ia hamauria lou diba.

Oibe, Dirava sibona ese mase tauna ia hamauria lou diba. (Salamo 104:30) Unai ese helaro namona ia hahedinaraia!

Helaro Korikorina Ta

Baibel ia gwau: “Nega ta do ia mai, [“idia laloatao,” NW ] mase guria gabu dekenai idia noho taudia ibounai ese [Iesu ena] gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) Oibe, Iesu ia gwauhamata, Iehova ese ia laloatao taudia ibounai be do idia toreisi lou, mauri do idia abia lou. Idia huanai be Iehova ena hesiai taudia, kara maoromaoro idia badinaia ela bona idia mase taudia. To idia mase vadaeni taudia milioni momo idia hahedinaraia lasi bema idia ura Dirava ena kara maoromaoro taravatudia do idia badinaia eiava lasi. Idia be Dirava ena taravatu idia diba lasi eiava edia nega ia hegeregere lasi edia mauri dalana idia haidaua totona. Dirava ese unai bamona taudia danu ia lalodia tao bona idia do ia hatorea isi lou, badina be Baibel ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—⁠Kara 24:⁠15.

Hari inai negai, tanobada be inai heheni bona heai, dagedage bona rara bubua karana, tanobada hamiroa karana bona gorere amo ia honu. Bema mase taudia be inai bamona tanobadana ai do idia toreisi lou, unai toreisi lou moalena be do ia ore haraga. To Gau Iboudiai Havaraia Diravana ia gwauhamata, kahirakahira Satani Diabolo ena siahu henunai ia noho tanobadana do ia haorea. (Aonega Herevadia 2:​21, 22; Daniela 2:​44; 1 Ioane 5:​19) Bena kara maoromaoro taudia sibona​​—⁠“tanobada matamata”​​—⁠be do idia noho namo herea momokani.​—⁠2 Petero 3:⁠13.

Unai neganai, “idia noho taudia ta ese do ia gwau lasi, ‘Lau be gorere.’ ” (Isaia 33:24) Mase ena hisihisi danu be do ia ore, badina be Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:⁠4) “Mase guria gabu dekenai idia noho taudia” totona unai helaro namona ia noho!

Iehova ese inai tanobada amo kara dika ia haorea neganai, kara maoromaoro taudia be kara dika taudia ida do ia hadikaia ore lasi. (Salamo 37:​10, 11; 145:20) To ‘hutuma bada herea’ “bese idauidau, iduhu idauidau, kopina idauidau, bona gado idauidau” amo be inai tanobada dikana do ia hadikaia ore ‘hisihisi badana’ amo do idia roho mauri. (Apokalupo 7:​9-14) Unai dainai, taunimanima hutuma do idia noho vadaeni toreisi lou taudia idia hedavari henia totona.

Oi ura dikadika oiemu lalokau taudia oi itaia lou, a? Oi ura tanobada Paradaisona lalonai do oi noho ela bona hanaihanai, a? Vadaeni, namona be Dirava ena ura bona ena palani dekenai diba maoromaoro oi abia. (Ioane 17:⁠3) Iehova ena ura be “taunimanima ibounai ese mauri do idia davaria, bona hereva momokani do idia diba.”​—⁠1 Timoteo 2:​3, 4.

[Picture on page 4]

“Oi be tano dekena amo karaia gauna, bona tano dekenai do oi giroa lou”

[Picture on page 5]

Lauma be paua danu ita hahegeregerea diba

[Picture on page 7]

Toreisi lou ena moale do ia noho ela bona hanaihanai