Oi Abia Dae Gaudia be Dahaka Dainai Oi Abia Dae?
Abia dae karana ena anina be oi abia dae gau ta ia momokani bona gau korikorina. United Nations ena Universal Declaration of Human Rights pepana ia gwau taunimanima ta ta be “mai ena maoro ena ura hegeregerena lalohadai bona tomadiho ia abia hidi, bona ena lalona ena mamina ia badinaia.” Unai dainai, ia be mai ena maoro “ena tomadiho eiava ia abia dae gaudia ia haidaua” bema ia ura unai bamona ia karaia.
TO TA ia ura ena tomadiho eiava ia abia dae gaudia ia haidaua ena badina ta ia noho, a? Momo idia gwau: “Lau ese lalohadai haida lau abia dae vadaeni, bona lau moalelaidia.” Bona haida idia laloa, idia abia dae gaudia kereredia danu ese ta idia hadikaia lasi. Hegeregere, bema ta ia abia dae tanobada be palakapalaka, unai ese ia eiava ma ta ia hadikaia lasi. Haida idia gwau: “Namona be ita abia dae iseda lalohadai be idauidau.” Nega ibounai unai be aonega karana, a? Bema doketa ta ia abia dae noho mase tauanina ia kara henia murinai, maoromaoro hospital dekenai ia noho gorere tauna ta kara henia totona ia lao be maoro, ena gaukara turana be do ia laloa unai be ia abia hidi diba gauna ta sibona, a?
Histori ena sivarai ia hahedinaraia taunimanima ese idia abia dae gaudia kereredia ese tomadiho lalonai dika bada idia havaraia. Mani oi laloa, Middle Ages ai, idia gwauraia Kruseid Helagadia lalonai, tomadiho gunalaia taudia ese “Keristani dalana idia goadalaia taudia idia hagoadaia mai hebogahisi lasi ida dagedage karadia idia karaia totona,” bona unai amo ia vara dika bada herea ia vara. Eiava vanegai tano tamona taudia idia tuari heheni lalonai hari inai negai “Keristani” ipidi huaia taudia oi laloa, “idaunegai tuari taudia bamona edia tuari kaia dekenai helaga taudia edia ladadia idia atoa, bona edia ipidi dekenai Virgin ena laulau idia atoa.” Unai tomadiho goadalaia taudia ibounai idia laloa edia lalohadai be maoro. To ia hedinarai, unai karadia bona tomadiho dainai idia karaia heai bona tuari ma haida lalonai, gau ta ia dika momokani.
Dahaka dainai hari inai negai heiriheiri bona heai idia vara momo? Baibel ia haere Satani Diabolo ese “tanobada taudia ibounai ia koia noho” karana dainai idia vara. (Apokalupo 12:9; 2 Korinto 4:4; 11:3) Madi, aposetolo Paulo ia gwau, tomadiho taudia momo be “mase dala dekenai idia raka” badina Satani ese idia ia koia, bona ia be ‘hoa bona toa karadia amo taunimanima ia hakaua kerere.’ Paulo ia gwau unai bamona taudia ‘idia ura lasi idia ia hamauria diba hereva momokani idia abia dae’ bona unai dainai idia ‘laloa kerere hereva koikoi idia hamomokania totona.’ (2 Tesalonika 2:9-12) Dahaka oi karaia diba hereva koikoi oi abia dae lasi totona? Momokani, oi abia dae gaudia be dahaka dainai oi abia dae?
Maragi Negana amo Idia Hadibaia Dainai Oi Abia Dae, A?
Reana oi maragi negana amo emu ruma bese ese ia abia dae gaudia be oi dekenai idia hadibaia. Nega momo unai be namo. Dirava ia ura tama sina ese edia natudia idia hadibaia. (Deuteronomi 6:4-9; 11:18-21) Hegeregere, tau matamata Timoteo ese ena sinana bona tubuna hahine ia kamonai henidia karana amo namo bada ia abia. (2 Timoteo 1:5; 3:14, 15) Baibel ese ita ia hagoadaia, tama sina idia abia dae gaudia do ita matauraia. (Aonega Herevadia 1:8; Efeso 6:1) To oi ia Havaraia Tauna ia ura oiemu tama sina ese idia abia dae dainai, unai gaudia do oi abia dae danu, a? Momokani, laloa lasi dalanai uru gunadia idia abia dae bona idia karaia gaudia badinaia karana ese dika ia havaraia diba.—Salamo 78:8; Amosa 2:4.
Iesu Keriso ia hereva henia Samaria hahine be ia maragi negana amo idia hadibaia, Samaria taudia edia tomadiho ia abia dae totona. (Ioane 4:20) Unai hahine be mai ena maoro ia ura gaudia do ia abia dae bona Iesu ese unai ia matauraia, to danu, ia hamaoroa: “Dahaka umui tomadiho henia be umui diba lasi.” Momokani, unai hahine ia abia dae tomadiho lalohadai momo idia kerere, bona Iesu ese ia hamaoroa ia abia dae gaudia do ia haidaua be namo, bema ia ura Dirava ia abia dae dalanai—‘lauma bona momokani ida’—ia do ia tomadiho henia. Namo lasi unai hahine bona ia bamona taudia ma haida ese guna idia ura henia bona idia abia dae gaudia dekenai idia tabekau, to namona be “Iesu ena dala idia abia dae.”—Ioane 4:21-24, 39-41; Kara 6:7.
Gabeai Idia Hadibaia Dainai Oi Abia Dae, A?
Gau idauidau idia hadibaia taudia bona unai gaudia dekenai idia be mai siahu taudia momo edia diba ita matauraia be namo. To, histori ena sivarai ia hahedinaraia, idia matauraia bada hadibaia taudia momo edia lalohadai be kerere. Hegeregere, histori torea tauna Bertrand Russell ese Greek aonega tauna Aristotle ia torea saiens bukadia rua ia herevalaia neganai, ia gwau: “Hari inai negai saiens taudia ese idia davaria gaudia dainai, unai buka ruaosi ena hereva ita abia dae diba lasi.” Hari inai negai siahu taudia danu be nega momo gau idauidau idia laloa kerere. Lagani 1895 ai, Britain ena saiens tauna Lord Kelvin be mai momokani ida ia gwau: “Edia metau ese hodahoda ena metau idia hanaia peleini be do idia karaia diba lasi.” Unai dainai, aonega tauna ese hadibaia tauna ta ena hereva dainai sibona, gau ta ia abia dae lasi.—Salamo 146:3.
Tomadiho gaudia idia hadibaia neganai danu, unai bamona ita naria namonamo be namo. Aposetolo Paulo be ena tomadiho hadibaia taudia ese idia hadibaia namonamo bona “sene karadia danu [ia] goadalaia dikadika, tau haida bamona lasi.” To, ena sene taudia idia abia dae gaudia ia goadalaia dainai, hekwakwanai ia davaria. Idia dainai “Dirava ena ekalesia orea [ia] dagedage henia, [ia] hadikaia mai bogahisihisi lasi.” (Galatia 1:13, 14; Ioane 16:2, 3) To gau dikana be, nega daudau lalonai, Paulo be ‘sibona, ikoko matana ai ia moia,’ Iesu Keriso ia abia dae totona ia idia veria gaudia ia koua. Dala idauna ai Iesu ese kara ta ia karaia murinai sibona, Paulo ese ia abia dae gaudia ia haidaua.—Kara 9:1-6; 26:14.
Nius Halasia Oreadia ese Emu Lalona Idia Veria, A?
Reana nius halasia oreadia ese emu lalona idia veria dainai gau haida oi abia dae. Taunimanima momo idia moale nius halasia oreadia be mai edia maoro edia ura hegeregerena gau idauidau idia halasia totona, badina unai amo diba namona do idia abia. To, siahu badadia idauidau ese nius halasia oreadia idia veria diba bona nega momo idia veria. Nega momo idia ese gau ibounai idia hahedinaraia maoro lasi bona unai ese emu laloa dalana ia hakererea diba.
Danu, nega momo nius halasia oreadia idia ura taunimanima momo edia lalona idia veria dainai, taunimanima idia hoalaia gaudia bona idia idau gaudia idia halasia. Lagani haida sibona gunanai taunimanima duahia totona idia halasia diba lasi gaudia be hari inai negai idia halasia momo. Metairametaira, taunimanima ese nega daudau idia badinaia taravatudia be hari idia gwauraia kerere bona idia utua. Taunimanima edia laloa dalana be metairametaira ia dika ia lao. ‘Dika be namo bona namo be dika’ idia abia dae matamaia.—Isaia 5:20; 1 Korinto 6:9, 10.
Oi Abia Dae Gaudia Edia Badina Maorona Oi Davaria
Taunimanima edia lalohadai bona aonega ena latanai gau ta ita haginia be miri latanai gau ta ita haginia bamona. (Mataio 7:26; 1 Korinto 1:19, 20) Unai dainai, dahaka be oi abia dae gaudia edia badina maorona? Dirava ese oi dekenai diba ia henia, oi noholaia tanobadana ena gau idauidau oi tahua bona lauma gaudia dekenai henanadai oi henia totona, unai dainai ita laloa diba ia ese dala ia kehoa danu, oiemu henanadai edia haere maorodia oi abia totona, ani? (1 Ioane 5:20) Oibe, unai ia karaia momokani! To, edena bamona do oi diba tomadiho dalanai dahaka be momokani bona gau korikorina? Ai daradara lasi, to ai gwau diba Dirava ena Hereva, Baibel, sibona stadilaia karana amo.—Ioane 17:17; 2 Timoteo 3:16, 17.
To reana tau ta ia gwau, “to naria sisina, Baibel idia abia dae taudia ese tanobada dekenai heiriheiri bona heai badadia idia havaraia, ani?” Oibe, tomadiho gunalaia taudia, idia gwau Baibel idia badinaia taudia, ese idia lalo-tamona lasi bona daradara idia havaraia lalohadai momo idia havaraia. To, unai ena badina be idia abia dae gaudia be Baibel amo lasi. Aposetolo Petero ese idia ia gwauraia “peroveta koikoi taudia” bona “hadibaia koikoi taudia,” ‘hunia dekenai hereva koikoi idia gwauraia, momo edia abidadama idia hadikaia totona.’ Petero ia gwau edia kara dainai “haida ese hereva momokani ena dala do idia gwauraia dika.” (2 Petero 2:1, 2) To, Petero ia gwau, “peroveta taudia edia hereva be momokani. Umui danu peroveta taudia edia hereva do umui badinaia be namo. Edia hereva be lamepa, dibura gabuna ia hadiaria bamona.”—2 Petero 1:19; Salamo 119:105.
Baibel ese ita ia hagoadaia ita abia dae gaudia be ena hereva amo ita tohoa. (1 Ioane 4:1) Inai magasin idia duahia taudia milioni momo ese idia hamomokania diba, unai idia karaia dainai hari edia mauri be mai ena anina bona namo herea. Unai dainai, namona be oi be Berea taudia namodia bamona. Gau ta oi do abia dae lasi neganai, ‘dina ibounai Buka Helaga oi tahua’ guna. (Kara 17:11) Unai oi karaia totona Iehova ena Witnes taudia ese oi idia durua mai edia moale ida. To momokani, do oi abia dae gaudia be oi ese do oi abia hidi. Aonega dalana be inai, oi abia dae gaudia be taunimanima edia aonega bona ura hegeregerena lasi, to Dirava ese ia halasia Hereva momokani hegeregerena.—1 Tesalonika 2:13; 5:21.
[Pictures on page 6]
Oi ese mai abidadama ida Baibel oi abia dae diba