Oiemu Maoro Oi Ura Gaudia Oi Abia Dae Totona
Reana oiemu maoro oi ura gaudia oi abia dae totona oi moalelaia. Taunimanima kahirakahira ibounai be unai bamona. Tanobada ena taunimanima bilioni 6 bamona ese unai maoro idia gaukaralaia bona lalohadai idauidau momo herea idia abia dae. Dirava ese ia karaia gaudia huanai ita davaria kala, toana, kopina, mamina, bonana, bona regena idauidau hegeregerena, taunimanima idia abia dae gaudia idauidau ese iseda lalona idia veria, ita dekenai ura idia havaraia, bona iseda mauri lalonai moale idia habadaia. Momokani, unai bamona gau idauidau ese iseda mauri idia hamoalea diba.—Salamo 104:24.
TO ITA naria namonamo be namo. Taunimanima idia abia dae gaudia be idauidau sibona lasi to idia haida ese dika idia havaraia diba. Hegeregere, lagani 1900 murinai, taunimanima haida idia abia dae Iuda taudia bona Freemason taudia ese palani idia karaia “Keristani mauri dalana idia hadikaia bona do idia lohiaia hebou tanobadana idia havaraia.” Unai lalohadai ena badina ta be Iuda taudia ia hadikaia pepapepa ladana Protocols of the Learned Elders of Zion. Unai pepapepa ia hahedinaraia unai taudia edia palani be takisi moni idia habadaia, tuari kohu karaia gaukarana idia habadaia, bisinesi orea badadia havaraia karana idia hagoadaia ‘Idau Bese edia kohu be idia hadikaia haraga totona.’ Ma idia samania edukeisen dalana idia hadikaia bena ‘Idau Bese taudia be laloa diba lasi uda sisia bamona ai do idia lao,’ bona tano lalonai trein idia heau daladia idia karaia, unai amo hanua badadia dekenai idia loaloa diba, Iuda elda taudia ese ‘edia dala idia dadaraia taudia idia hadikaia ore haraga totona.’
To momokani, unai be koikoi herevadia—Iuda taudia inai henia karana habadaia totona idia halasia. British Museum dekenai ia gaukara tauna Mark Jones ia gwau, ‘unai koikoi herevadia be Russia amo gabu idauidau dekenai idia lao,’ unuseniai lagani 1903 ai nega ginigunana niuspepa dekenai idia halasia. London ena Times niuspepa dekenai, May 8, 1920 ai idia halasia. Lagani ta ia hanaia murinai, The Times ese ia hahedinaraia unai hereva be koikoi. To unai idia do hahedinaraia lasi neganai, dika ia vara vadaeni. Jones ia gwau, ‘unai bamona koikoi herevadia ita koua be auka.’ Taunimanima ese idia abia dae neganai, poisini bamona inai henia karana bona dika idia havaraia karadia ma haida ese edia lalohadai idia hadikaia—bona nega momo idia havaraia be dika herea, lagani 1900 murinai idia vara gaudia ese idia hahedinaraia hegeregerena.—Aonega Herevadia 6:16-19.
Ita Abia Dae Gaudia Bona Hereva Momokani
Momokani, ena be ta ese koikoi herevadia amo taunimanima edia lalona ia veria lasi, to idia ese gau kereredia idia abia dae diba. Nega haida, gau haida ita lalo-pararalaia kerere. Taunimanima momo idia mase, badina idia laloa idia abia dae gauna be maoro bona idia badinaia, ani? Danu, nega haida gau ta ita abia dae ena badina tamona be ita ura unai gauna ita abia dae. Profesa ta ia gwau, saiens taudia danu be “nega momo sibona edia lalohadai idia ura henia bada.” Idia abia dae gaudia ese edia laloa maoromaoro dalana idia koua. Bena edia mauri ibounai idia gaukaralaia, idia abia dae gaudia kereredia idia hamomokania toho totona.—Ieremia 17:9.
Taunimanima ese idia abia dae tomadiho herevadia—idia lalo-tamona lasi herevadia—be unai bamona danu. (1 Timoteo 4:1; 2 Timoteo 4:3, 4) Tau ta ese Dirava ia abidadama henia mai goada ida. Tau ma ta ia gwau taunimanima ese idia hamomokania diba lasi Dirava abidadama henia be kara maorona. Ta ia gwau mase amo ia roho mauri bona do ia mase diba lasi laumana be ita lalonai ia noho. Ma ta ia abia dae ita mase neganai do ita noho lasi, ita ore momokani. Ita diba, idia lalo-tamona lasi lalohadai iboudiai be momokani lasi. Unai dainai, aonega dalana be do oi hamomokania oi abia dae gaudia be momokani bona oiemu ura dainai sibona oi abia dae gaudia lasi, ani? (Aonega Herevadia 1:5) Edena dala ai unai oi karaia diba? Hereva gabena ese unai gauna ia herevalaia.
[Picture on page 3]
Lagani 1921 ai idia halasia herevana ese “Protocols of the Learned Elders of Zion” ia hakoikoia