Oi Goada Oi Lao Dalana Idia Koua Gaudia Oi Kokia!

EMU motuka be gia ta dekenai oi atoa, bona ensini ia heau noho, to motuka ia heau lasi. Gau ta ia dika, a? Lasi, nadi badana ta be taea ta ena vairanai ia noho. Nadi oi kokia sibona bena motuka do ia heau.

Unai hegeregerena, Iehova ena Witnes taudia ida Baibel idia stadilaia taudia haida be lauma dalanai idia goada lasi, badina koua gaudia haida idia noho. Hegeregere, Iesu ia gwau gau haida, hegeregere “tanobada ena laloa metau idauidau bona kohu ura henia dikadika” karadia, ese hereva momokani “idia koua” diba bona ta ia goada ia lao dalana idia hametaua.​—⁠Mataio 13:⁠22.

Ma haida be idia manadalaia karadia eiava edia manoka gaudia ese idia goada idia lao dalana idia koua. Japan tauna ta ladana Yutaka be Baibel ena sivarai ia ura henia, to ena hekwakwanai badana be laki gadara. Nega momo ia ese unai ia manadalaia namo lasi karana ia hadokoa toho to ia kwalimu lasi. Unai kara dainai ia ese moni bada ia halusia, ruma toi ia haboioa, ena ruma bese taudia ese ia idia matauraia lasi, bona ia sibona ia matauraia diba lasi. Ia hegeregere unai koua gauna ia kokia bona Keristani tauna ai ia lao totona, a?

Eiava hahine ladana Keiko mani oi laloa. Baibel ena heduru dainai ia ese kaivakuku tomadiho henia karana, matabodaga karadia, bona meamea karadia ia rakatania vadaeni. To, Keiko ia gwau: “Lau ia koua gauna badana be kuku ania karana. Nega momo lau ura lau hadokoa toho, to lau hegeregere lasi.”

Reana oi goada oi lao dalana ia koua gauna ta ia noho danu, bona toana be oi kokia diba lasi. Herevana ia be dahaka, to namona be oi diba momokani Dirava ena heduru amo do oi kokia diba.

Iesu ena hahediba taudia ese gorere tauna ta amo demoni idia lulua diba lasi murinai, Iesu ena hereva idia dekenai mani oi laloa. Idia karaia diba lasi gauna be Iesu ese ia karaia murinai, idia ia hamaoroa: “Bema umui emui abidadama ena bada be mastadi uhena sibona bamona, inai ororo bema umui hereva henia, bema umui gwau, ‘Iniseni dekena amo oi lao unuseni,’ be do ia lao. Kara ibounai danu do umui karaia diba.” (Mataio 17:​14-20; Mareko 9:​17-29) Oibe, reana ita laloa hekwakwanai ta be ororo bamona, to siahu ibounai Havaraia Tauna ena matana dekenai ia be maragi momokani bona anina lasi.​—⁠Genese 18:14; Mareko 10:⁠27.

Oi Goada Oi Lao Dalana Idia Koua Gaudia Oi Diba

Koua gaudia oi kokia totona, gau badana be unai koua gaudia oi diba. Edena bamona idia oi diba? Nega haida kongregesen tauna ta, reana elda ta eiava oi ida Baibel ia stadilaia tauna, ese gau ta oi dekenai ia hahedinaraia. Namo lasi unai bamona lalokau sisibana dainai oi badu, to mai manau ida ‘hadibaia hereva oi kamonai henia bona aonega oi davaria’ be namo. (Aonega Herevadia 8:33) Nega ma haida ai, reana Baibel oi stadilaia neganai emu manoka gaudia oi itaia. Oibe, “Dirava ena hereva be ia mauri noho, bona ia be mai ena siahu.” (Heberu 4:12) Baibel bona Baibel idia herevalaia buka bona magasin duahia karana ese emu lalohadai, hemami, bona oi idia veria gaudia dobudia ia hahedinaraia diba. Unai heduru dainai, do oi itaia emu kara be Iehova ena taravatu hereadaedia hegeregerena eiava lasi. Unai kara ese lauma dalanai oi goada oi lao dalana idia koua gaudia ia hahedinaraia.​—⁠Iamesi 1:​23-25.

Hegeregere, reana Baibel stiuden ta ese matabodaga karadia laloa loulou karana ia manadalaia. Reana ia laloa unai be dika lasi, badina ia ese kara dika ta ia karaia lasi. To ia stadi noho lalonai, Iamesi 1:​14, 15 ena hereva ia itaia, ia gwau: “Dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.” Hari ia itaia, bema unai kara ia karaia noho, unai ese ia goada ia lao dalana do ia koua momokani! Unai koua gauna be edena bamona ia kokia diba?​—⁠Mareko 7:​21-23.

Koua Gaudia Kokia Dalana

Reana lo Keristani tauna ta ese unai stiuden tauna ia durua bona idia ese Dirava ena Hereva amo gau ma haida do idia tahua, bona Watch Tower Publications Index idia gaukaralaia diba.a Hegeregere, iena sinado “Thoughts” henunai duahia tauna ese guna idia halasia bona dika idia havaraia diba gaudia laloa loulou karana hadokoa daladia idia hahedinaraia herevadia ia davaria. Unai hereva ese heduru idia henia Baibel siridia idia hahedinaraia, Filipi 4:8 bamona, ia gwau: “Inai bamona karadia sibona do umui laloa: Kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia.” Oibe, matabodaga lalohadai ita kokia bona kara goeva bona ita idia hagoadaia lalohadai ita laloa be namo!

Stiuden tauna ese ena tahua karana lalonai, Baibel ena hakaua herevadia ma haida do ia davaria danu, ia idia durua ena hekwakwanai ia habadaia lasi totona. Hegeregere, Aonega Herevadia 6:27 bona Mataio 5:28 ese sisiba idia henia mahuta hebou urana idia habadaia gaudia ita laloa lasi totona. Salamo torea tauna ia guriguri: “Mani lau do oi durua, lau ese anina lasi gaudia do lau tahua lasi.” (Salamo 119:37) To momokani, unai Baibel siridia ia duahia sibona be hegeregere lasi. Aonega tauna ia gwau, ‘kara maoromaoro taudia idia laloa namonamo.’ (Aonega Herevadia 15:28) Stiuden tauna ese Dirava ena hahegani be dahaka ia laloa namonamo sibona lasi, to edia badina ia laloa danu, unai amo Iehova ena dala edia aonega bona maoromaoro do ia lalo-pararalaia namonamo.

Danu, ia goada ia lao dalana ia koua gauna ia kokia toho tauna ese Iehova ena heduru ia tahua mai ena goada ida be namo. Oibe, Dirava ese ita ia diba namonamo, ia diba ita be goevadae lasi, kahu amo ita ia karaia. (Salamo 103:14) Dirava dekenai ia guriguri loulou bona matabodaga gaudia laloa loulou karana ia dadaraia totona mai ena goada ida ia hekwarahi neganai, anina namona do ia vara​—⁠lalona ena mamina namona bona goevana.​—⁠Heberu 9:⁠14.

Oi Hesiku Lasi

Herevana edena hekwakwanai kokia totona oi hekwarahi, to namona be oi diba reana nega haida do oi moru lou. Unai ia vara neganai, reana do oi badu bona lalohisihisi. To, namona be Galatia 6:9 ena hereva oi laloatao, ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.” Dirava ena hesiai taudia, hegeregere Davida bona Petero, be hemarai ia havaraia dalanai idia moru. To idia hesiku lasi. Mai manau ida sisiba idia abia dae, edia kara idia haidaua, bona edia kara amo idia hamomokania noho, idia be Dirava ena hesiai taudia namodia. (Aonega Herevadia 24:16) Ena be Davida ia kara dika, to Iehova ese ia gwauraia “egu lalokau tauna, egu ura kara ibounai do ia karaia.” (Kara 13:22) Petero danu be ena kerere murinai ia goada lou bona Keristani kongregesen lalonai, ia be goada tauna momokani.

Hari inai negai momo ese unai bamona koua gaudia kokia karana lalonai idia kwalimu. Yutaka, guna ita herevalaia tauna, ese Baibel stadi ia abia dae. Ia gwau: “Egu kara lau haidaua lalonai Iehova ese lau ia durua bona hanamoa dainai, egu hekwakwanai, laki gadara, lau kokia diba. Lau moale bada badina lau itaia Iesu ena hereva ia momokani​—⁠ia gwau abidadama dainai ‘ororo’ danu ita kokia diba.” Gabeai, Yutaka be kongregesen lalonai hesiai tauna ta ai ia lao.

Keiko, kuku anina karana ia rakatania diba lasi hahinena, be edena bamona? Iena stadi ia karaia taihu ese ia hagoadaia kuku ania karana idia herevalaia Awake! magasin idauidau do ia duahia. Danu, Keiko ese ena motuka lalonai 2 Korinto 7:1 ena hereva ia hahedinaraia, dina ta ta Iehova ena matana ai ia goeva noho totona. To, kuku ania karana ia hadokoa diba lasi. Keiko ia gwau: “Lau lalohisihisi bada. Unai dainai, lau sibona lau nanadaia dahaka lau ura momokani​—⁠lau ura Iehova eiava Satani do lau hesiai henia?” Ena lalona ia hadaia ia ura Iehova ia hesiai henia neganai, guriguri amo heduru totona ia noinoi mai momokani ida. Ia gwau: “Lau hoa bada, badina kuku ania karana lau hadokoa haraga diba. Hari lau laloa vadaeni, guna unai bamona lau karaia be namo.”

Oi goada oi lao dalana idia koua gaudia kokia toho lalonai oi kwalimu diba danu. Baibel ena taravatu hegeregerena emu lalohadai, ura, hereva, bona kara oi haidaua neganai, oi sibona oi matauraia bona abidadama henia matamaia. Emu Keristani tadikaka bona taihu, bona emu ruma bese taudia, oi bamoa neganai, goada do idia abia. To mai anina bada gauna be emu hetura karana Iehova Dirava ida do ia goada ia lao. Ia gwauhamata ‘ena bese taudia’ ese Satani ena siahu henuna amo idia heau mauri neganai, ‘edia dala idia koua gaudia ibounai do ia kokia.’ (Isaia 57:14) Bona oi abia dae momokani diba, bema lauma dalanai oi goada oi lao dalana idia koua gaudia oi kokia bona hanaia totona oi hekwarahi, Iehova ese oi do ia hanamoa bada.

[Footnote]

[Picture on page 28]

Iesu ia gwauhamata, abidadama amo ororo bamona koua gaudia ita kokia diba

[Picture on page 30]

Iseda manoka gaudia lauma dalanai ita kokia totona ita hekwarahi neganai, Baibel duahiduahi karana ese ita ia hagoadaia