Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaidia diba:

• Dahaka dainai hari danu Iobu karoa 38 dekenai idia noho henanadai ita laloa be namo?

Dirava ese ia gwauraia hoa karadia momo be hari inai nega ena saiens taudia danu ese idia lalo-pararalaia namonamo diba lasi. Idia diba lasi edena bamona gravity ese tanobada be ena heau dalana maorona ai ia dogoatao, diari be dahaka, dahaka dainai sinoufleik ta ta edia toana be idauidau, edena bamona medu ia vara, bona edena bamona kevaru be mai ena siahu.​​—⁠4/15, rau 4-​11.

• Dahaka haheitalai Baibel lalonai ese ita idia durua diba hemami dikadia ita haheaukalaia totona?

Asapa, Baruku, bona Naomi ese lalo-manoka eiava hemami dikadia ma haida idia davaria, bona Baibel ese unai bamona negadia be mai kwalimu ida idia haheaukalaia ena sivarai ia gwauraia ese ita ia durua diba.​​—⁠4/15, rau 22-4.

• Keristani vabu durudia dala namodia haida be dahaka?

Turadia ese mai hebogahisi ida idia gwauraia goevagoeva diba, heduru idia ura idia henia. Reana ruma bese taudia eiava ma haida ese moni eiava tauanina dalanai heduru idia henia diba, bema vabu ta ia dabu momokani. Keristani tadikaka danu ese tura henidia karana amo bona lauma dalanai heduru idia henia bona idia hagoadaia karana amo heduru idia henia diba.​​—⁠5/1, rau 5-7.

• Dahaka dainai 1 Korinto 7:39 ena sisiba hegeregerena ‘Keristani tauna sibona oi adavaia’ be mai anina bada?

Nega momo abidadama lasi taudia adavaia karana ese dika bada ia havaraia. Danu, inai Dirava ena sisiba ita badinaia be Iehova badinaia karana. Dirava ena hereva hegeregerena ita kara neganai, iseda kudouna ese ita ia gwauraia dika lasi. (1 Ioane 3:​21, 22)​​—⁠5/15, rau 20-1.

• Iehova sibona ese iseda kara dika ia gwauatao diba dainai, badina be dahaka Keristani taudia ese kongregesen ena elda taudia dekenai edia kara dika badadia idia gwauraia hedinarai?

Momokani, kara dika badana ia karaia Keristani tauna ese Iehova ia tahua be namo, ia ese ena dika ia gwauatao totona. (2 Samuela 12:13) Peroveta tauna Natana ese Davida dekenai heduru ia henia hegeregerena, kongregesen lalonai lauma dalanai idia goada elda taudia ese kara dika dainai idia lalohisihisi taudia idia durua diba. Elda taudia dekenai ita lao be Iamesi 5:​14, 15 ena hakaua herevana hegeregerena.​​—⁠6/1, rau 31.

• Dahaka ese ia hamomokania ita ese idia dabu tama sina lasi maragidia bona vabu ita naridia be namo?

Sivarai gunadia ese idia hahedinaraia idaunegai Heberu taudia bona Keristani taudia ginigunadia huanai, unai bamona naria karana be tomadiho momokani ena kara ta. (Esodo 22:​22, 23; Galatia 2:​9, 10; Iamesi 1:27) Aposetolo Paulo ese Buka Helaga lalonai Keristani taudia ese idia dabu vabu taudia naria dalana ia hahedinaraia goevagoeva danu. (1 Timoteo 5:​3-16)​​—⁠6/15, rau 9-​11.

• Mauri mai anina bona moale abia dalana be dahaka?

Namona be iseda guba Tamana, Iehova, ida hetura karana namona ita abia bona ita dogoatao noho. Unai ita karaia totona, heduru gauna badana be Baibel ita stadilaia.​​—⁠7/1, rau 4-5.

• Taunimanima ta ta be mai edia mase diba lasi laumana bona mase murinai ia mauri noho, a?

Ena be taunimanima haida idia abia dae lauma​—⁠to souli lasi​—⁠ia mase diba lasi, to unai lalohadai be Baibel ese ia durua lasi. Ia hahedinaraia taunimanima ta ia mase neganai, kahu dekenai ia giroa bona unai nega ai ia noho lasi. To Dirava ia hegeregere unai tauna do ia hamauria lou, unai dainai, toreisi lou karana amo, unai tau do ia mauri lou eiava lasi be Dirava ena ura hegeregerena. (Hadibaia Tauna 12:⁠7)​​—⁠7/15, rau 3-6.

• Dura ena tano palaka dekenai Heberu memerodia toi idia tohoa neganai, Daniela be edeseniai?

Baibel ese unai ia gwauraia lasi. Reana Daniela ena dagi dainai unuseniai ia lao lasi be hegeregere, eiava reana ena gaukara dainai gabu ta dekenai ia noho. To ita diba momokani ia ese Iehova ia kamonai henia hanaihanai.​​—⁠8/1, rau 31.