Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaidia diba:

• Dahaka dainai Korea dekenai Kerisimasi idia abia dae haraga?

Korea bona tano haida dekenai danu, idia abia dae sivarai gunana ta lalonai kisini ia biagua diravana be December lalonai kwalahu ia daekau gabuna amo ia vareai bona harihari gaudia ia henia. Danu, Tanobada Ibounai Tuarina Iharuana murinai America tuari taudia ese gabu idauidau edia dubu dekenai harihari gaudia bona heduru gaudia idia henia.​​—⁠12/15, rau 4, 5.

• Isaia 21:8 ena hereva ia guguru hegeregerena, hari iseda negai, Dirava ena “gima tauna” oreana be daidia?

Lauma amo ia horoa Keristani taudia be gima tauna oreana bamona idia gaukara bona Baibel ena peroveta herevadia idia hagugurua gaudia tanobada lalonai edia anina be taunimanima dekenai idia gwauraia hedinarai noho. Danu, idia ese Baibel stiuden taudia idia durua, Baibel amo idia mai lasi hahediba herevadia bona karadia edia toana idia diba bona dadaraia totona.​​—⁠1/1, rau 8, 9.

• “Polish Brethren” taudia be daidia?

Idia be lagani 1500 amo ia lao 1600 murinai laganidia lalonai Poland dekenai ia noho tomadiho orea maragina ta, taunimanima idia hagoadaia Baibel do idia badinaia bona unai dainai momo ese idia abia dae dubu ena hahediba herevadia idia dadaraia, hegeregere Toi Tamona, beibi bapatiso karana, bona hel ena lahi herevana. Gabeai, idia dagedage henidia bada bona idia luludia tano idauidau dekenai.​​—⁠1/1, rau 21-3.

• Dahaka dainai futurologist o hisiu edia toana tahua taudia edia hereva lasi to Baibel ena peroveta herevadia ita abidadama henia be namo?

Peroveta hereva idia gwauraia toho taudia edia hereva idia momokani lasi badina Iehova bona Baibel idia dadaraia. Baibel ena peroveta herevadia sibona ese oi idia durua, idia vara gaudia ena anina Iehova ena ura dekenai do oi diba totona, bena oi bona emu ruma bese ese namo hanaihanai do umui abia.​​—⁠1/15, rau 3.

• Dahaka gau haida ese idia hamomokania ita be dina gabedia lalonai ita noho?

Satani be guba amo idia negea diho dainai idia vara gaudia ita itaia. (Apokalupo 12:⁠9) Ita be Apokalupo 17:​9-11 ena peroveta herevana ese ia hahedinaraia “king” ginigabena ena nega lalonai ita noho. Horoa Keristani taudia korikoridia edia namba ia diho ia lao, to toana be hisihisi badana ia matamaia neganai idia haida be tanobada dekenai idia do noho.​​—⁠1/15, rau 12, 13.

• Habakuku ena buka be edena nega ai ia torea, bona dahaka dainai ita laloa bada be namo?

Unai Baibel buka be lagani 628 B.C.E. bamona ai Habakuku ese ia torea. Ia lalonai Iehova ena hahemaoro herevadia idaunegai Iuda bona Babulonia dekenai idia noho. Danu, ia hahedinaraia Iehova ena hahemaoro karana be kahirakahira inai tanobada dikana dekenai do ia vara.​​—⁠2/1, rau 8.

• Sinana ta ena aonega sisibana hahine namodia totona be edena kahana ai Baibel lalonai ita davaria diba?

Aonega Herevadia ena karoa ginigabena, karoa 31, dekenai unai sisiba namo hereana ia noho.​​—⁠2/1, rau 30, 31.

• Dahaka dainai Iehova be ita dekenai “Keriso ena laloa” ia hahedinaraia dainai ita moale bada? (1 Korinto 2:⁠16)

Evanelia bukadia amo, Iehova be ita dekenai Iesu ena lalohadai, hemami, gaukara, bona ia atoa guna gaudia ia hadibaia namonamo. Unai ese ita do ia durua Iesu bamona ita kara totona, bona taunimanima hamauria haroro gaukarana be ia bamona ita goadalaia be namo.​​—⁠2/15, rau 25.

• Hari inai negai Dirava ese guriguri ia haerelaidia, a?

Oibe. Ena be Baibel ia hahedinaraia Dirava ese guriguri iboudiai ia haerelaia lasi, to hari inai negai idia vara ekspiriens ese idia hamomokania haida be hekwakwanai idauidau, hegeregere headava ena hekwakwanai dainai, goada bona heduru totona idia guriguri neganai, nega momo ia haere henidia.​​—⁠3/1, rau 3-7.

• Dahaka ita karaia be namo Dirava amo goada ita abia totona?

Guriguri amo ita noia diba, Baibel amo lauma dalanai goada ita abia, bona Keristani taudia ita bamoa neganai goada ita abia.​​—⁠3/1, rau 15, 16.

• Edena bamona tama sina ese edia natudia idia durua diba Keristani heboudia amo namo idia abia totona?

Edia natudia idia durua diba hebou lalonai idia mahuta lasi, bema dala idia karaia hebou vairanai idia mahuta sisina. Natudia idia hagoadaia diba “hereva” haida idia torea totona, hegeregere idia diba vadaeni herevadia o ladadia idia kamonai neganai edia pepa dekenai maka idia torea diba.​​—⁠3/15, rau 17, 18.

• Iobu ena haheitalai amo ita dibaia gaudia haida be dahaka?

Iobu ese ena turana karana Iehova ida ia atoa guna, taunimanima ma haida ia kara henia mai maoromaoro ida, ena adavana ia badinaia, iena ruma bese ena lauma dalana ia laloa bada, bona hahetoho neganai mai abidadama ida ia haheauka.​​—⁠3/15, rau 25-​7.

• Baibel duahia dalana idauna ta ia noho, hehuni herevadia ita diba totona, a?

Lasi. Haida idia gwau duahia dalana idauna ta ia noho, to unai bamona hereva be buka ma haida dekenai ita gwauraia diba danu. Idia gwauraia Baibel duahia dalana idauna be anina lasi badina Heberu toretoredia edia torea daladia be idauidau.​​—⁠4/1, rau 30, 31.