‘Satani Ena Dala Umui Kehoa Lasi’

“Satani ena dala do umui kehoa lasi.”​—⁠EFESO 4:⁠27.

1. Dahaka dainai momo idia daradara Diabolo ia noho eiava lasi?

LAGANI handred momo lalonai, taunimanima idia laloa Diabolo be kakakaka, mai ena doana, aena be nanigosi edia aena bamona bona foka ia gaukaralaia kara dika taudia be lahi dekenai ia gabua totona. Baibel be unai lalohadai ia hadibaia lasi. Unai lalohadai kererena dainai, taunimanima milioni momo idia daradara Diabolo be ia noho eiava lasi, bona idia laloa ia be siahu ta sibona.

2. Baibel ese Diabolo be edena bamona ia herevalaia?

² Baibel lalonai haida ese Diabolo idia itaia ena sivarai ia gwauraia bona unai ese ia hamomokania Diabolo be ia noho momokani. Iesu ese guba dekenai Diabolo ia itaia bona tanobada dekenai ia hereva henia danu. (Iobu 1:6; Mataio 4:​4-11) Ena be Baibel ese unai lauma tauna ena ladana korikorina ia hahedinaraia lasi, to ia gwau ia be Diabolo (anina be “Ladana Hadikaia Tauna”), badina ia ese Dirava ena ladana ia hadikaia. Ladana ma ta be Satani (“Gwau-Edeede Tauna”), badina ia ese Iehova ia gwau-edeede henia. Baibel ese Satani Diabolo ia gwauraia “idaunegai gaigaina” badina ia ese gaigai ia gaukaralaia Heva ia koia totona. (Apokalupo 12:9; 1 Timoteo 2:14) Danu, ia gwauraia “Tau Dikana.”​—⁠Ioane 17:15.a

3. Edena henanadai ena haere do ita tahua?

³ Ita be Iehova ena hesiai taudia dainai, ita ura lasi, Dirava momokani tamona ena inai tauna badana​—⁠Satani Diabolo​—⁠ena kara ta ita hahedinaraia. Unai dainai, Paulo ena sisiba do ita badinaia, ia gwau: “Satani ena dala do umui kehoa lasi.” (Efeso 4:27) Vadaeni, namona be Satani ena kara ita dadaraia. Unai kara haida be dahaka?

Dirava Ena Ladana Ia Hadikaika Tauna Badana Tohotohoa Lasi

4. “Tau Dikana” ese edena dala ai Dirava ena ladana ia hadikaia?

⁴ Unai “Tau Dikana” ena ladana idia atoa Diabolo be maoro badina ia ese Dirava ena ladana ia hadikaia. Unai bamona tauna ese mai badu ida koikoi herevadia amo ta ena ladana ia hadikaia. Dirava ese Adamu ia hamaoroa: “Kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:17) Heva danu ia diba, to Diabolo ese gaigai ta amo Heva ia hamaoroa: “Inai be momokani lasi, dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.” (Genese 3:​4, 5) Unai amo Iehova Dirava ena ladana ia hadikaia!

5. Dahaka dainai Diotrepe idia panisia be maoro?

⁵ Dirava ese Israela taudia ia oda henidia: “Tau ta hadikaia totona sivarai koikoi ta do umui gwauraia loaloa lasi.” (Levitiko 19:16) Aposetolo Ioane ena nega ai tau ta ese ma haida edia ladana ia hadikaia. Ioane ese unai tau be inai bamona ia herevalaia: “Revareva kwadogina ekalesia orea dekenai lau torea vadaeni. To Diotrepe, sibona ia gwauraia ia be gunalaia tauna, ia ese lauegu hereva ia kamonai henia lasi. Unai dainai, umui dekenai do lau mai neganai, iena kara do lau laloatao. Ia ese mai hereva dika bona koikoi danu aiemai kara ia maumauraia noho.” (3 Ioane 9, 10) Diotrepe be Ioane ena ladana ia hadikaia dainai, idia panisia be maoro. Keristani tauna korikorina be do ia ura lasi Diotrepe ena kara do ia karaia, badina ia karaia neganai, ia be Dirava ena ladana ia hadikaia tauna badana, Satani ia tohotohoa unai.

6, 7. Dahaka dainai ita ura lasi tau ta ena ladana ita hadikaia?

⁶ Nega momo ma haida ese Iehova ena hesiai taudia edia ladana idia hadikaia bona samania koikoi herevadia idia gwauraia. “Dubu biagudia bona taravatu hadibaia taudia be unuseni idia gini, idia ese Iesu idia samania mai goada danu.” (Luka 23:10) Hahelaga tauna Anania bona ma haida ese Paulo idia samania koikoi. (Kara 24:​1-8) Bona Baibel ia gwau Satani be “Dirava ena vairanai, dina bona hanuaboi, guna ia gini, iseda varavara ia samania.” (Apokalupo 12:10) Ia samania koikoi varavara taudia be hari inai negai tanobada ai idia do noho Keristani horoa taudia.

⁷ Keristani tauna ia ura lasi ma ta ena ladana ia hadikaia eiava ta ia samania koikoi. To, unai ia vara diba bema ia vara gauna ita diba maoromaoro lasi bona tau ta ita gwauraia dika. Mose ena Taravatu henunai, bema ta be mai ena ura ida tau ta ia samania koikoi, unai koikoi tauna be do idia hamasea. (Esodo 20:16; Deuteronomi 19:​15-19) Danu, Iehova ia gwau ia be “uitnesi koikoi tauna” ia inai henia. (Aonega Herevadia 6:​16-19) Oibe, Dirava ena ladana ia hadikaia tauna badana bona samani koikoi tauna ena kara ita dadaraia be namo.

Ala-Ala Tauna Ginigunana Ena Kara Dadaraia

8. Edena dala ai Diabolo be “hamatamaia nega dekena amo ia be alaia tauna”?

⁸ Diabolo be ala-ala tauna. Iesu ia gwau: “Hamatamaia nega dekena amo ia be alaia tauna.” (Ioane 8:44) Satani ese Dirava amo Adamu bona Heva ia abia siri karana ginigunana ia karaia neganai, ia be ala-ala tauna ai ia lao. Satani ese unai tau bona hahine ginigunadia bona edia natudia dekenai mase ia mailaia. (Roma 5:12) Mani inai ita laloa, ala-ala karana be taunimanima ese idia karaia diba karana ta, ia be kara dika ena siahu ta sibona lasi.

9. Ioane Ginigunana 3:15 ena hereva hegeregerena, edena dala ai ala-ala tauna ai ita lao diba?

⁹ Israela besena ese idia abia Taravatu Ten lalonai taravatu ta, ia gwau: “Taunimanima do umui alaia lasi.” (Deuteronomi 5:17) Petero ese Keristani taudia ia hereva henidia, ia gwau: “Namo lasi umui ta ia hisihisi badina tau ta sedira ia alaia dainai.” (1 Petero 4:​15, BHğ) Ita be Iehova ena hesiai taudia dainai, tau ta do ita alaia lasi. To, bema iseda Keristani tadikaka ta ita inai henia bona ita laloa ia mase be namo, Dirava vairanai ita kerere unai. Ioane ia gwau: “Iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” (1 Ioane 3:15) Dirava ese Israela taudia ia oda henidia: “Emui tadikakana do oi badu henia noho lasi, oiemu lalona dekenai.” (Levitiko 19:17) Bema ita bona iseda Keristani tadikaka huanai hekwakwanai ta ia vara, namona be ita hamaoromaoro haraga. Unai amo ala-ala tauna, Satani, ese iseda Keristani lalotamona do ia hadikaia lasi.​—⁠Luka 17:​3, 4.

Koikoi Tauna Badana amo Ita Gini Siri

10, 11. Koikoi tauna badana, Satani ita dadaraia totona, dahaka ita karaia be namo?

¹⁰ Diabolo be koikoi tauna. Iesu ia gwau: “Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.” (Ioane 8:44) Satani be Heva dekenai koikoi herevana ia gwauraia, to Iesu be tanobada dekenai ia mai hereva momokani ia gwauraia totona. (Ioane 18:37) Diabolo ita inai henia bona mai abidadama ida Iesu murinai ita raka totona, namona be koikoi herevadia bona karadia ita karaia lasi. “Hereva momokani sibona” do ita gwauraia. (Sekaraia 8:16; Efeso 4:25) Iehova, “kara momokani ena Dirava” be iena hereva idia hamomokania Witnes taudia sibona ia hanamodia. Iehova ia ura lasi kara dika taudia ese iena hereva do idia gwauraia.​—⁠Salamo 31:5; 50:16; Isaia 43:⁠10.

¹¹ Bema lauma dalanai Dirava ese Satani ena koikoi herevadia amo ita ia ruhaia vadaeni, namona be ita ese “hereva momokani ena dala” ita badinaia noho. (2 Petero 2:2; Ioane 8:32) Badina Keristani hahediba herevadia ibounai ese hereva momokani idia hahedinaraia goevagoeva. (Galatia 2:​5, 14) Hahemauri ita davaria diba dalana tamona be ‘hereva momokani ena dala dekenai ita raka noho’​​—⁠inai dala sibona do ita badinaia, ita gini goada bona “koikoi ibounai edia tamana” ita dadaraia.​—⁠3 Ioane 3, 4, 8.

Aposteit Tauna Badana Dadaraia

12, 13. Aposteit taudia be edena bamona do ita kara henidia?

¹² Diabolo ai ia lao aneruna be guna hereva momokani ia badinaia. To, Iesu ia gwau: “Hereva momokani be ia badinaia lasi, badina iena lalona dekenai hereva momokani be lasi.” (Ioane 8:44) Inai aposteit tauna badana be “kara momokani ena Dirava” ia dagedage henia noho. Keristani taudia ginigunadia haida be “Satani ese iena koikoi dekena amo idia ia abia” bona hereva momokani amo idia raka siri. Unai dainai, Paulo ese Timoteo ia hamaoroa mai manau ida idia do ia sisiba henia, unai amo lauma dalanai do idia goada lou bona Satani ena tarapu amo do idia roho mauri. (2 Timoteo 2:​23-26) Oibe, dala maorona be ita ese hereva momokani do ita dogoatao auka bona aposteit lalohadai ita abia dae lasi.

¹³ Adamu bona Heva ese Diabolo ena hereva idia kamonai henia bona iena koikoi herevadia idia dadaraia lasi dainai, idia be aposteit taudia ginigunadia ai idia lao. Vadaeni, aposteit taudia edia hereva ita kamonai, edia buka ita duahia bona kompiuta dekenai edia hereva ita tahua be namo, a? Bema Dirava bona hereva momokani ita lalokau henia, unai do ita karaia lasi. Iseda ruma dekenai aposteit taudia do ita abia vareai lasi eiava hanamoa hereva do ita gwauraia lasi, badina unai amo ita ese ‘edia kara dika do ita durua.’ (2 Ioane 9-11) Namo lasi ita be Diabolo ena koikoi karadia ita abia dae bena “hereva momokani ena dala” ita dadaraia, bona hadibaia koikoi taudia edia murinai ita raka. Badina idia be hunia dekenai hereva koikoi idia gwauraia, bona sivarai koikoi dekena amo iseda lalona do idia veria toho.​—⁠2 Petero 2:​1-3.

14, 15. Paulo ese Efeso elda taudia bona Timoteo dekenai dahaka sisiba ia henia?

¹⁴ Paulo ese Efeso Keristani elda taudia ia hamaoroa: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua. Badina be lau diba, umui lau rakatania murinai, uda sisia dikadia umui emui huanai dohore idia mai, bona mamoe orea do idia hadikaia. Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.” (Kara 20:​28-30) Nega sisina murinai, aposteit taudia idia hedinarai bona ‘hereva koikoi idia gwauraia.’

¹⁵ Lagani 65 C.E. bamona ai, aposetolo Paulo ese Timoteo ia hagania ‘hereva momokani do ia hadibaia maoromaoro’ totona. Paulo ia gwau: “Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri, badina be unai kara ese taunimanima Dirava dekena amo ia luludia oho. Oibe, hereva unai bamona be toto dikana bamona, ia be ia bada lao noho. Humenaio bona Pileto be unai bamona. Idia ruaosi be hereva momokani idia rakatania vadaeni, idia gwau: Mase dekena amo toreisi lou be ia ore vadaeni. Inai hereva koikoi dekena amo, haida edia abidadama ia manoka vadaeni.” Aposteit karana ia hamatamaia unai! Paulo ma ia gwau: “To Dirava ese ia haginia vadaeni ruma badina ena nadi badana ia gini noho, bona tau ta ese ia hamarerea diba lasi.”​—⁠2 Timoteo 2:​15-19.

16. Ena be aposteit tauna badana ese koikoi karadia ia karaia, to dahaka dainai ita be Dirava bona iena Hereva ita badinaia noho?

¹⁶ Satani ese aposteit karana ia gaukaralaia tomadiho momokani ia hagagevaia totona, to ia kwalimu diba lasi. Lagani 1868 ai, tadikaka Charles Taze Russell ese Kerisendom dubu edia hahediba herevadia ia tahua namonamo murinai, ia davaria Baibel ena hereva be idia hadibaia maoromaoro lasi. Russell bona hereva momokani idia tahua taudia haida ese Pittsburgh, Pennsylvania, U.S.A. ai, Baibel idia stadilaia grup maragina ta idia haginia. Unai nega amo lagani 140 idia hanaia vadaeni, bona Iehova ena hesiai taudia edia diba bona lalokau Dirava bona iena Hereva dekenai ia bada ia lao. Ena be aposteit tauna badana ese koikoi karadia ia karaia, to hesiai tauna mai ena kamonai bona mai ena kara maoromaoro be lauma dalanai idia noga noho dainai, idia ese unai Keristani momokani taudia idia durua Iehova bona iena Hereva idia badinaia noho totona.​—⁠Mataio 24:⁠45.

Namo Lasi Tanobada Ena Lohia Tauna ese Oi Ia Biagua

17-19. Diabolo ena siahu lalonai ia noho tanobadana be dahaka, bona dahaka dainai ita ura henia lasi be namo?

¹⁷ Satani ese ita ia tarapua dalana ma ta be, ita ia veria inai tanobada​—⁠Dirava idia dadaraia taudia​—⁠ita ura henia totona. Iesu ia gwau, Diabolo be “tanobada ena lohia” bena ia gwau: “Ia be lau dekenai mai ena siahu lasi.” (Ioane 14:30) Namo lasi Satani be ita ia biagua! To, ita laloparara, “Satani ese tanobada taudia ibounai ia gunalaia noho.” (1 Ioane 5:19) Unai dainai, Satani ese “tanobada edia basileia ibounai mai edia hairaina” be Iesu dekenai ia henia diba bema Iesu ese Satani ia tomadiho henia​—⁠to, Dirava ena Natuna be maoromaoro unai ia dadaraia. (Mataio 4:​8-10) Satani ese ia lohiaia tanobadana be Keriso ena murinai idia raka taudia ia inai henia. (Ioane 15:​18-21) Unai dainai aposetolo Ioane ia gwau tanobada do ita ura henia lasi!

¹⁸ Ioane ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:​15-17) Inai tanobada be Iehova Dirava ena taravatu ia badinaia lasi bona ena mauri dalana ese ita ia veria diba kara dika do ita karaia totona, unai dainai ita dadaraia be gau badana.

¹⁹ To, edena bamona bema iseda kudouna dekenai inai tanobada ita ura henia? Vadaeni, namona be Dirava ita noia, tanobada bona tauanina ena ura dikadia ita dadaraia totona. (Galatia 5:​16-21) Oibe, do ita hekwarahi bada “tanobada ena kara mirodia dekena amo do ita raka siri” totona, badina “lauma dikadia” be inai tanobada taudia idia lohiaia.​—⁠Iamesi 1:27; Efeso 6:​11, 12; 2 Korinto 4:⁠4.

20. Dahaka dainai ita gwau ita be “tanobada ena lasi”?

²⁰ Iesu ese iena hahediba taudia ia herevalaia neganai, ia gwau: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Horoa Keristani taudia bona idia bapatiso vadaeni mamoe idaudia idia hekwarahi tauanina dalanai bona lauma dalanai idia goeva bona inai tanobada amo idia giri siri totona. (Ioane 15:19; 17:14; Iamesi 4:⁠4) Inai kara dika tanobadana be ita ia inai henia, badina ia amo ita gini siri bona ‘kara maoromaoro ita harorolaia.’ (2 Petero 2:⁠5) Momokani, ita be heudahanai, kaivakuku tomadiho henia, henaohenao, koikoi, kekero, bona haida edia kohu idia dadia taudia edia huanai ita noho. (1 Korinto 5:​9-11; 6:​9-11; Apokalupo 21:⁠8) To, ita be “tanobada ena lauma ita abia lasi” badina kara dika ena siahu ese ita ia biagua lasi.​—⁠1 Korinto 2:⁠12.

Diabolo Ena Dala Umui Kehoa Lasi

21, 22. Paulo ena sisiba Efeso 4:​26, 27 dekenai be edena bamona oi badinaia diba?

²¹ Ita be “tanobada ena lauma” ese ia veria lasi. To, Dirava ena lauma ese ita ia hakaua dainai, lalokau bona tauanina biagua karadia ita hahedinaraia. (Galatia 5:​22, 23) Diabolo ese iseda abidadama ia tohoa neganai, unai kara dainai ita gini goada diba. Diabolo ia ura ita “badu” bona “kara dika” ita karaia, to Dirava ena lauma ese ita ia durua ‘do ita badu lasi bona do ita dagedage lasi’ totona. (Salamo 37:⁠8) Momokani, nega haida badina maorona dainai ita badu, to Paulo ena sisiba be: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea. Satani ena dala do umui kehoa lasi.”​—⁠Efeso 4:​26, 27.

²² Bema ita badu noho neganai, kara dika ita karaia diba. Badu noho karana ese Diabolo ena dala ia kehoa diba kongrigeisen lalonai heiriheiri do ia havaraia totona. Unai dainai, iseda tadikaka huanai hekwakwanai idia vara neganai, dala maorona ai ita hamaoromaoroa haraga be gau badana. (Levitiko 19:​17, 18; Mataio 5:​23, 24; 18:​15, 16) Unai dainai namona be Dirava ena lauma ese ita ia hakaua bona sibona eda kara ita biagua, bona ena be badina maorona dainai ita badu, to namo lasi unai badu be ia bada ia lao bena iseda tadikaka ita inai henia.

23. Hereva gabena ai edena henanadai do ita herevalaia?

²³ Ita be Diabolo ena kara haida ita herevalaia vadaeni, unai gaudia ita dadaraia be namo. To, reana inai hereva idia duahia taudia haida idia laloa: Satani do ita gari henia, a? Dahaka dainai Satani ese Keristani taudia ia dagedage henia? Bona edena dala amo Satani ena tarapu dekenai do ita moru lasi?

[Footnote]

Edena Bamona Do Oi Haere?

• Dahaka dainai tau ta ena ladana ita hadikaia lasi be namo?

• Ioane Ginigunana 3:15 ena hereva hegeregerena, ita ura lasi dahaka ita karaia?

• Aposteit taudia be edena bamona do ita kara henidia, bona dahaka dainai?

• Dahaka dainai tanobada do ita ura henia lasi?

[Picture on page 9]

Diabolo ese iseda Keristani lalotamona ia hadikaka dalana kehoa lasi

[Pictures on page 10]

Dahaka dainai Ioane ese ita ia sisiba henia tanobada do ita lalokau henia lasi totona?