Abia Hidi Namona Oi Karaia Diba Dalana
URA kwalimu be harihari gauna ta Dirava amo. Bema ura kwalimu be lasi, ita be masini bamona, sibona eda kara ita biagua diba lasi. To, ia dainai gau idauidau idia vara. Ura kwalimu dainai iseda mauri lalonai abia hidi idauidau ita karaia.
Momokani, abia hidi momo be anina bada lasi. To gau haida, hegeregere edena gaukara do ita abia hidi eiava do ita headava eiava lasi, ese eda vaira negana idia haidaua diba. Abia hidi ma haida be mai anina taunimanima ma haida dekenai. Tama sina ese idia abia hidi gaudia haida be mai edia siahu edia natudia dekenai. Danu, ita karaia abia hidi momo dainai Dirava vairanai eda kara ena badina do ita hahedinaraia.—Roma 14:12.
Heduru Ita Abia be Namo
Sivarai gunadia idia hahedinaraia nega momo taunimanima ese abia hidi namodia idia karaia lasi. Taunimanima ese idia karaia abia hidi ginigunana ese dika ia havaraia. Heva ese ena lalona ia hadaia Dirava ia taravatua au ena huahua ia ania. Ena mataganigani urana dainai abia hidi ia karaia, unai ese ena adavana ia veria ia danu Dirava ia kamonai henia lasi totona, bona unai dainai taunimanima ese hisihisi bada idia mamia. Nega momo, hakaua herevadia maorodia dainai lasi, to mataganigani uradia dainai, taunimanima ese abia hidi idia karaia. (Genese 3:6-19; Ieremia 17:9) Bona abia hidi badadia ita karaia gwauraia neganai, hanaihanai iseda diba ena hetoana ita laloa.
Unai dainai, ita hoa lasi, taunimanima momo ese abia hidi badadia idia karaia neganai, taunimanima edia siahu idia hanaia taudia edia heduru idia tahua. Baibel ese ia hahedinaraia, tuari lalonai Nebukanesa ese abia hidi ta ia karaia. Ena be ia be king ta, to ia laloa meamea karadia ia karaia bona lauma edia heduru ia tahua be namo. Unai sivarai ia gwau, ‘ia ese peva ena diba haida iena imana dekenai ia abia, tano dekenai ia negedia, iena kaivakuku danu ia nanadaia, bona boromakau ena asena danu ena toana ia tahua.’ (Esekiela 21:21) Unai hegeregerena, hari inai nega ai momo ese vaira nega idia gwauraia taudia bona hisiu edia toana tahua taudia amo bona dala ma haida ai lauma edia heduru idia tahua. To unai heduru daladia be koikoi bona idia hakaudia kerere.—Levitiko 19:31.
Ita tabekau henia momokani Tauna ta ia noho bona idaunegai amo taunimanima ia durua, abia hidi namodia idia karaia totona. Unai tauna be Iehova Dirava. Hegeregere, idaunegai Dirava ese ena bese Israela dekenai Urima bona Tumima ia henidia—unai bese ese hekwakwanai badadia idia davaria negadia ai, unai helaga gaudia idia gaukaralaia. Unai Urima bona Tumima amo Iehova ese edia henanadai ia haerelaia bona Israela ena tatau badadia ia durua bena idia diba idia karaia abia hidi be iena ura hegeregerena.—Esodo 28:30; Levitiko 8:8; Numera 27:21.
Mani haheitalai ma ta ita laloa. Gideona be Israela tuari taudia ia hakaua Midiana taudia idia tuari henia totona idia boiria neganai, namona be ena lalona ia hadaia unai gaukara badana do ia abia dae eiava lasi. Gideona ia ura ia diba momokani Iehova ese ia durua eiava lasi, unai dainai hoa karana ta totona ia noia. Ia guriguri, hanuaboi ai murimuri dekenai ia atoa mamoe ena kopina huina ia paripari to tano ia kaukau be namo. Murina hanuaboina ai ia noinoi, mamoe ena kopina huina ia kaukau bona tano ia paripari be namo. Iehova be mai ena hebogahisi ida Gideona ese ia noia toadia ia hahedinaraia. Unai dainai, Gideona ese abia hidi maorona ia karaia, bona Dirava ena heduru amo Israela ena inai taudia ia halusidia momokani.—Gunalaia Taudia 6:33-40; 7:21, 22.
Hari Inai Negai be Edena Bamona?
Hari inai negai, Iehova ena hesiai taudia be mai anina bada gaudia idia abia hidi gwauraia neganai heduru ia henia. Edena dala ai? Gideona bamona Iehova ita noia toa haida ia hahedinaraia bena ita diba edena dala be maoro, a? Headava tau bona hahine ta idia laloa Basileia harorolaia taudia be momo lasi gabuna dekenai do idia lao be namo eiava. Edia lalona idia hadaia diba totona idia ese tohoa gauna ta idia karaia. Ruma ena davana idia makaia bona idia hoihoilaia toho. Bema unai ruma be idia makaia deit bona davana eiava davana sisina bada amo idia hoia, do idia laloa diba Dirava ia ura do idia lao. To bema ruma be ta ese ia hoia lasi, do idia laloa diba Dirava ia ura lasi idia lao.
Ruma be ta ese ia hoia lasi. Unai be toa ta Iehova ia ura lasi unai tau bona ena adavana be haroro taudia be momo lasi gabuna dekenai do idia lao, a? Momokani, ia be hekokoroku karana bema Iehova ese ena hesiai taudia totona ia karaia eiava ia karaia lasi gaudia ita gwauraia. Ita gwau diba lasi, Iehova ese hari ita dekenai ena ura ia hahedinaraia lasi. (Isaia 59:1) To, ita laloa diba lasi, mai anina bada gauna ta ita abia hidi neganai, Dirava ese unai dala ai iena ura ia hahedinaraia, bona unai abia hidi karana be iena imana dekenai ita rakatania. Oibe, Gideona danu ese ena mauri lalonai ia karaia abia hidi be ia sibona ia karaia, Iehova ese hoa dalanai ena ura ia hahedinaraia lasi!
To, Baibel ia gwau Dirava amo heduru ita abia diba. Iseda nega ia perovetalaia, ia gwau: “Bona bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Mai anina bada gaudia ita abia hidi gwauraia neganai, ita tahua be maoro, bema ita karaia abia hidi be Dirava ena ura hegeregerena bona iena aonega hereadaena ia hahedinaraia. Edena dala ai? Iena Hereva ita tahua bona ‘lamepa bamona ita ia hakaua, bona iseda dala ia hadiaria.’ (Salamo 119:105; Aonega Herevadia 2:1-6) Unai ita karaia totona, namona be Baibel amo diba maoromaoro abia karana ita manadalaia. (Kolose 1:9, 10) Bona gau ta dekenai iseda lalona ita do hadaia lasi neganai, namona be unai gauna idia herevalaia Baibel ena hakaua herevadia ibounai ita tahua namonamo be gau badana. Unai bamona tahua karana ese ita do ia durua ‘gau namodia edia toana ita diba’ totona.—Filipi 1:9, 10.
Namona be guriguri amo Iehova ita hereva henia danu, bona ita diba momokani ita do ia kamonai. Ita abia hidi gwauraia gauna bona ita laloa noho gaudia be iseda lalokau Diravana dekenai ita gwauraia karana dainai iseda hemami ia namo! Bena, mai lalona goadana ida ita noia diba ita do ia hakaua, abia hidi maorona ita karaia totona. Nega momo, lauma helaga ena heduru amo Baibel ena hakaua herevadia do ita laloatao, eiava reana ita do ia durua iseda hekwakwanai ia herevalaia sirina ta ita lalo-pararalaia goevagoeva totona.—Iamesi 1:5, 6.
Iehova ese kongregesen ai lo taudia ia henia, idia dekenai iseda abia hidi gaudia ita herevalaia diba. (Efeso 4:11, 12) To, unai gauna be ma haida ida ita herevalaia neganai, namo lasi ita be taunimanima haida bamona, idia be tau ta amo idia lao ma ta dekenai ela bona idia ura idia kamonai herevana ia gwauraia tauna idia davaria. Bena ena lalohadai idia badinaia. Namona be Rehoboama ena haheitalai ita laloa danu. Mai anina bada gauna ta ia abia hidi gwauraia neganai, ena tama ida idia gaukara tatau badadia ese ia dekenai sisiba namona idia henia. To, edia sisiba ia badinaia lasi, to ia ida idia bada hebou tatau matamata edia sisiba ia tahua. Edia sisiba ia badinaia bona abia hidi dikana ia karaia bona unai kara dainai ena basileia ena kahana badana ia haboioa.—1 King Taudia 12:1-17.
Sisiba oi tahua neganai, namona be mauri idia diba vadaeni bona Baibel idia diba namonamo bona kara maoromaoro taravatudia idia matauraia taudia amo oi tahua. (Aonega Herevadia 1:5; 11:14; 13:20) Bema hegeregere, nega oi atoa hakaua herevadia bona oi tahua herevadia ibounai oi lalohadailaia totona. Iehova ena Hereva hegeregerena idia vara gaudia oi itaia neganai, abia hidi maorona do ia hedinarai namonamo.—Filipi 4:6, 7.
Ita Karaia Abia Hidi
Gau haida ita abia hidi haraga diba. Aposetolo taudia idia hagania edia haroro do idia hadokoa neganai, idia diba Iesu harorolaia karana do idia hadokoa diba lasi, bona maoromaoro Sanhedrin taudia dekenai edia lalohadai idia gwauraia, Dirava idia kamonai henia be namo to taunimanima lasi. (Kara 5:28, 29) Gau ma haida ita abia hidi haraga lasi to ita laloa namonamo guna, badina Baibel ese unai gauna dekenai hakaua herevana ta ia henia lasi. To, nega momo Baibel ena hakaua herevadia ese ita idia durua, abia hidi namona ita karaia totona. Hegeregere, hari inai negai idia noho moale karadia momo be Iesu ena nega dekenai idia noho lasi, to Baibel ena hereva goevagoevadia haida ese Iehova ia moalelaia gaudia bona ia moalelaia lasi gaudia ia hahedinaraia. Unai dainai, dagedage, matabodaga, eiava gwau-edeede karana idia hahedinaraia moale karadia lalonai ia vareai Keristani tauna be abia hidi kererena ia karaia.—Salamo 97:10; Ioane 3:19-21; Galatia 5:19-23; Efeso 5:3-5.
Nega haida, oi abia hidi gaudia rua be maoro. Haroro taudia be momo lasi gabuna dekenai oi lao be namo herea bona unai ese hahenamo momo ia mailaia diba. To bema tau ta ese ena lalona ia hadaia unai bamona do ia karaia lasi, iena kongregesen dekenai gaukara namona ia karaia diba. Nega haida, reana ita karaia gwauraia abia hidi ese dala do ia kehoa, Iehova ita abidadama henia ena bada bona iseda mauri lalonai dahaka be mai anina bada ita hahedinaraia totona. Unai dainai, Iehova ese dala ia kehoa iseda ura kwalimu ita gaukaralaia diba, unai amo iseda ura korikorina ita hahedinaraia diba.
Nega momo, iseda abia hidi be mai anina ma haida dekenai. Hegeregere, Keristani taudia ginigunadia be Taravatu ena hetoana gaudia momo ese idia koudia lasi neganai, idia moale bada. Unai ena anina be, Taravatu henunai idia goeva lasi anianidia idia abia dae eiava idia dadaraia diba. To, unai ura kwalimu do idia gaukaralaia eiava lasi karana dekenai edia lalona idia hadaia neganai, idia hagoadadia ma haida edia lalona ena mamina do idia hadikaia lasi. Ita karaia abia hidi momo dekenai Paulo ena hereva ita badinaia diba, bona ma haida ita “hakaudia kerere lasi.” (1 Korinto 10:32) Ma haida hahekwakwanaia lasi urana ese reana ita karaia abia hidi momo lalonai ita do ia durua. Oibe, dekena tauna lalokau henia be taravatu badana iharuana.—Mataio 22:36, 39.
Ita Karaia Abia Hidi Edia Anina
Iseda lalona ena mamina bona Baibel ena hakaua herevadia hegeregerena gau ta ita abia hidi neganai, dokonai anina namona do ia havaraia. To momokani, reana matamanai dika ia havaraia. Aposetolo taudia ese Sanhedrin taudia idia hamaoroa edia lalona idia hadaia Iesu do idia harorolaia noho neganai, idia dadabadia bena gabeai idia ruhadia. (Kara 5:40) Heberu memero toi—Sataraka, Misaka, bona Abetenigo—ese edia lalona idia hadaia Nebukanesa ena golo kaivakuku dekenai do idia tui diho lasi neganai, edia mauri idia haboioa diba. Idia gini hegaegae idia karaia abia hidi dainai, reana mase do idia davaria. To idia diba Dirava ese do ia lalo-namo henia bona do ia hanamoa.—Daniela 3:16-19.
Iseda lalona ena mamina hegeregerena abia hidi ita karaia murinai bema hekwakwanai ita davaria, namo lasi ita laloa ita karaia abia hidi be kerere. Ita ‘ibounai ese ia vara kava dika ita davaria noho’ dainai, ita karaia abia hidi namona be nega haida anina namona ia havaraia lasi. (Hadibaia Tauna 9:11) Ma danu, nega haida Iehova ese hekwakwanai ia koua lasi, unai amo ita hahedinaraia diba ita abia hidi gauna do ita badinaia momokani eiava lasi. Iakobo be hahenamo ia abia totona hanuaboi ibounai ta ai aneru ta ida ia heatu. (Genese 32:24-26) Ena be kara maorona ita karaia noho, to reana hekwakwanai dainai do ita hekwarahi danu. To, bema ita abia hidi gauna be Dirava ena ura hegeregerena, ita diba momokani ita do ia durua dainai ita haheauka diba bona gabeai ita do ia hanamoa.—2 Korinto 4:7.
Unai dainai, bema mai anina bada gauna oi abia hidi gwauraia, sibona emu aonega dekenai oi tabekau lasi. Oi abia hidi gauna dekenai mai anina Baibel ena hakaua herevadia oi tahua. Iehova dekenai unai gauna oi herevalaia. Bema hegeregere, lo Keristani taudia edia heduru oi tahua. Bena oi gari lasi. Dirava ese ia henia ura kwalimu be dala namona dekenai oi gaukaralaia. Abia hidi namona oi karaia bona Iehova dekenai oi hahedinaraia ia vairanai oi kara maoromaoro.
[Picture on page 28]
Mai anina bada gauna oi do abia hidi lasi neganai, Dirava ena Hereva oi tahua guna
[Picture on page 28, 29]
Oi karaia gwauraia abia hidi be Iehova dekenai oi herevalaia
[Picture on page 30]
Lo Keristani taudia ida emu abia hidi gaudia badadia oi herevalaia diba