Gini Goada Bona Dirava Ena Ura Diba Namonamo

Hebouhebou​—⁠Iseda Tadikaka Oreana Idia Hagoadaia Moale Negadia

IENA mauri lagani 50 Joseph F. Rutherford be ia gorere badina maoro lasi dalana ai idia samania bona lagani tamona bamona dibura ai ia noho, to mai moale ida kohu ia huaia. Mai ena goada danu sutkeisi ia abia bona Keristani tadikaka ia durudia edia daiutu idia lao totona. Guna ia ida dibura dekenai idia noho tadikakadia rua​​—⁠idia danu be Bible Student taudia​​—⁠be idia naria hutuma taudia edia mahuta gabudia idia gwauraia. Idia gaukara noho ela bona hanuaboi momokani. Idia ibounai idia moale bada herea. Unai be dahaka negana?

Unai be lagani 1919, bona Bible Student taudia (hari idia gwauraia Iehova ena Witnes taudia) be nega daudau lalonai idia abia dagedage dikadia amo idia namo idia lao. Edia tadikaka oreana hagoadaia totona, idia ese September 1 amo ia lao 8, 1919 ai, Cedar Point, Ohio, U.S.A. dekenai hebouhebou ta idia abia. Hebouhebou ena dina ginigabena ai, taunimanima 7,000 be Tadikaka Rutherford ena hereva idia moalelaia, ia ese hebou taudia ta ta ia hagoadaia, ia gwau: “Umui be king edia King bona lohia edia Lohia ena gwaukau taudia, taunimanima dekenai . . . iseda Lohiabada ena Basileia hereadaena umui harorolaia.”

Idaunegai Israela taudia edia nega amo, Iehova ena taunimanima ese hebouhebou momo idia karaia. (Esodo 23:​14-17; Luka 2:​41-43) Unai hebou be moale negadia badina idia mai taudia ibounai idia durua, Dirava ena Hereva idia laloa totona. Unai hegeregerena, hari inai negai Iehova ena Witnes taudia edia hebouhebou be lauma dalanai heduru idia henia negadia. Lalo-momokani taudia ese unai moale heboudia idia itaia neganai, idia lalo-parara Witnes taudia be lalo-tamona Keristani tadikaka oreana.

Idia Hekwarahi Idia Lao Henia Totona

Hari inai negai Keristani taudia idia diba edia hebouhebou be lauma aniani bona Dirava ena Hereva dekenai hadibaia herevadia idia abia negadia. Idia laloa dala badana ai unai hebouhebou dainai, ‘idia gini goada bona Dirava ena ura ibounai idia diba namonamo.’ (Kolose 4:12) Unai dainai, Witnes taudia idia ura bada unai hebouhebou idia durua, bona idia hekwarahi idia lao henia totona.

Taunimanima haida be unai hebouhebou dekenai idia noho totona edia abidadama ia goada bona ororo bamona hekwakwanaidia idia hanaia be namo. Hegeregere, Austria dekenai ia noho Witnes burukana ta mani oi laloa. Ena be suga gorerena ia abia bona dina ta ta ibounai muramura idia kodoa vareai be namo, to iena tano ai idia karaia distrik hebouhebouna ta ena dina ibounai ia lao henia. India ai, Witnes ruma bese badana ta be idia ogogami dainai, idia laloa hebouhebou ta do idia lao henia diba lasi. To, edia ruma bese amo ta ese heduru ia davaria. Ia gwau: “Lau ura lasi unai nega ai reaia dainai, egu taia golo herahera gaudia lau hoihoilaia, emai lao davana ai karaia totona. Unai boubou gauna ese anina namona ia havaraia, badina hebamo bona ekspiriens namodia ese emai abidadama ia hagoadaia.”

Papua New Guinea ai, idia do bapatiso lasi kamonai taudia haida be edia lalona idia hadaia siti dekenai distrik hebouhebou ta dekenai do idia lao. Edia hanua ai, motuka biaguna ta idia nanadaia, moni hida idia henia bena hebouhebou ai idia do ia abia lao. Motuka ena davana ia bada sisina dainai, dala idia karaia unai tau ena ruma ena kisini idia hanamoa totona. Unai dainai idia be distrik hebouhebou dekenai idia lao diba bona program ibounai amo namo bada idia abia.

Hebouhebou dekenai idia ura idia lao Iehova ena Witnes taudia dekenai, dala ena daudau be hekwakwanai badana lasi. Lagani 1978 ai, hebouhebou ta be Lille, France, dekenai idia karaia neganai, tau matamata ta be Poland amo dina 6 lalonai basikele amo dala ena daudau kilomita 1,200 ia heau lao. Lagani 1997 ena siahu negana ai, Witnes taudia rua be Mongolia amo dala ena daudau kilomita 1,200 idia raka hanai Irkutsk, Russia, dekenai Keristani hebouna ta idia lao totona.

Tadikaka Oreana Korikorina Edia Kara

Lalo-maoromaoro taudia ese Witnes taudia edia hebouhebou dekenai idia itaia diba, Witnes taudia be lalo-tamona tadikaka oreana. Momo idia hoa, badina hebou taudia be ta ena toana idia laloa lasi bona ena be nega ginigunana idia hedavari to hebogahisi mamina ia noho.

Vanegai Australia ena intenesenel hebouhebouna ta dekenai, loaloa taudia hakaua tauna ta be pura ta lalonai hebouhebou dainai idia vadivadi taudia ia abia loaloa, to ia ura idia ida ia noho sisina daudau badina edia hebamo ia moalelaia. Ia ese edia lalokau bona lalo-tamona ia hoalaia, badina ena be idia momo be hanua idauidau taudia to idia hebamo namonamo. Ia rakatanidia gwauraia neganai idia ia hereva henia. Idia ia gwauraia “tadikaka bona taihu,” bona ia tanikiu henia matamaia, to ena hereva ia hagugurua diba lasi, badina ena lalona ia manoka bona ia tai.

Lagani 1997 ai, Sri Lanka ena steidiam badana ta lalonai nega ginigunana gado toi distrik hebouhebouna idia karaia. Unai program ibounai be nega tamona ai English gado, Sinhalese gado, bona Tamil gado dekenai idia herevalaia. Tanobada dekenai idau bese inai henia karana ia bada dainai, taunimanima ese unai gado toi taudia idia noho hebou karana idia hoalaia. Pulisi tauna ta ese tadikaka ta ia nanadaia, ia gwau: “Daidia ese inai hebouhebou idia biagua​​—⁠Sinhalese gado taudia, Tamil gado taudia, o English gado taudia?” Tadikaka ia gwau: “Unai grup ta lasi ese hebouhebou ia biagua. To, ai ibounai ai gaukara hebou.” Pulisi tauna ia hoa bada. Guriguri ginigabena gwauraia totona gado toi taudia ibounai idia gini bona mai lalo-tamona ida “Amen” idia gwauraia bona steidiam lalonai unai ena rege ia daekau murinai, hebou taudia ibounai be idia moale dainai edia imana idia patapataia. Helai taudia ibounai edia matana dekenai be matana ranu ia noho. Oibe, hebouhebou be momokani iseda tadikaka oreana idia hagoadaia moale negadia.​—⁠Salamo 133:⁠1.a

[Footnote]