“Dirava Hanamoa mai Moale Ida” Distrik Hebouhebouna
1 Ita idia hamoalea gaudia be hida? Reana ita momo ese lista ta dekenai ita torea lasi. Ena be ita noho tanobadana dekenai daradara bada herea ia noho, to badina momo dainai ita moale diba. February 15, 1995, Gima Kohorona, ese iseda 1995-1996 distrik hebouhebou ena sinado namona, “Dirava Hanamoa mai Moale Ida” ia gwauraia hedinarai.
2 Iehova ita hanamoa badina ita dekenai hereva momokani ia hadibaia. (Isa. 54:13; Ioa. 8:32) Bena mai moale ida, maino bona moale maurina idia tahua taudia dekenai hereva momokani ita harorolaia. (Esek. 9:4; Kara 20:35) Iseda Keristani tadikaka danu ese ita idia hamoalea. Ruma bese bamona lalokauna idia hahedinaraia, bona unai ese lalo-namo bona moale ia havaraia. Unai be iseda moale ena badina haida sibona bona idia dainai Iehova ita hanamoa. Hebouhebou ena hereva bona haheitalai amo do ita itaia Baibel be inai nega dikana ena dokona dinadia ai, ita moale ena badina ma haida ia kikilaia.
3 Dina Toi Hebouhebou: Emu biagua tauna oi noia vadaeni livi oi abia bena hebouhebou ena dina toi dekenai oi lao diba, a? Oi kahirakahira ai ia noho hebouhebou gabuna oi diba vadaeni, a? Iseda Basileia Gaukara, October 1995 gauna dekenai, Papua New Guinea dekenai do idia karaia hebouheboudia 9 edena dina bona edeseniai do idia karaia edia lista bona edena gabu toi dekenai dina rua hebouhebouna do idia karaia oi itaia diba. Reana oiemu kongregesen seketere ese umui ia hamaoroa vadaeni edena gabu be kahirakahira. Hebouhebou ima do idia karaia New Guinea Pidgin gado dekenai, bona toi Hiri Motu dekenai. Port Moresby ena program do idia karaia English, Hiri Motu, New Guinea Pidgin, bona Australia Taia Kudima Taudia edia Gado dekenai.
4 Dina toi hebouheboudia be Friday dabai 9:40 ai do idia hamatamaia. Dina rua bona dina toi hebouheboudia do idia hamatamaia 9:00 Saturday dabai, bona Sunday be 9:30 dabai. Sunday 3:50 adorahi ai program ibounai do ia ore.
5 Do Oi Noho?: Ita idia hagoadaia hebouhebou dinadia ta ita reaia lasi. Dahaka dainai? Iehova ia ura ita noho dainai. Hari hekwakwanai momo ese iseda abidadama bona lauma goadana do idia tohoa. Iuda Keristani taudia be hisihisi bada idia mamia negana lalonai Paulo ese ia sisiba henidia, ia gwau: “Guriguri hebou kara do umui hadokoa lasi, haida ese idia hadokoa bamona.” (Heb. 3:12, 13; 10:25) Filipi taudia be “tanobada taudia mai edia dika bona mai edia kerere bada danu edia huanai” idia noho. To, ‘diari bamona idia hedinarai, hisiu ese tanobada idia hadiaria bamona.’ (Fil. 2:15) Dahaka dainai aposetolo edia nega lalonai idia noho Keristani taudia idia idau? Badina mai kamonai ida lauma helaga ena hakaua idia badinaia bona idia lao hebou bena ‘lalokau dekena amo kara namodia idia karaia.’—Heb. 10:24.
6 Inai tanobada ese ita ia hamanokaia diba, bena tadikaka ida ita hebou bona Iehova ita hanamoa urana ia hadikaia. Ita idia boiria Iehova ena lauma ena hakaua ita badinaia bona hebouhebou ena dina iboudiai ita moalelaia. Iseda ruma bese taudia iboudiai ida do ita lao, a? Iseda lalokau bona abidadama ita hagoadaia loulou be namo. Lagani ta ta ai, Iehova ese ia henia hebouheboudia ese ita idia durua.
7 Dava Bada Gauna Abia Lao Ruma Dekenai: Edena dala ai hebouhebou ena namo bada oi abia diba? Haere be program ena hereva dekenai emu “lalona oi atoa.” Unai be auka. Mai goada matamata taudia do idia davaria hereva dekenai edia lalona idia atoa be auka, to, ita ibounai ita hekwarahi. Bema ita palani namonamo guna, unai ese ita do ia durua. Sibona oi nanadaia, ‘Hebouhebou ena sinado be dahaka?’ Bena lalohadailaia! ‘Dahaka dainai lau lao, bona hebouhebou ena nega lalonai dahaka do lau karaia? Hebou ia ore murinai, moale karadia momo do lau karaia, eiava nega bada do lau atoa lau dibaia gaudia riviulaia totona bona laga-ani namonamo totona?’
8 February 1, 1984, Watchtower ena hereva ta “Do You Meditate or Just Daydream?” ese sisiba namona, hebou ena namo abia totona, ia henia, ia gwau: “Oiemu lalohadai oi biagua be gau bada hereana.” Hereva ia henia tauna ena hamatamaia herevadia reana ita hakala henia namonamo, to gabeai iseda kamonai karana be reana ia manoka ia lao. Unai bamona kara ia koua dalana be dahaka?
9 Guna ita abia vadaeni sisiba be namo dainai do ita gwauraia lou be namo. Bema dala ia noho, hanuaboi ta ta ai namona be oi laga-ani namonamo. Nega haida unai be auka badina oi laolao, bona bema ma tau ta ena ruma dekenai oi noho, reana do oi mahuta haraga lasi o namonamo lasi. Bema oi palanilaia namonamo, emu laga-ani negana do ia hegeregere.
10 Program ena hereva dekenai emu lalona oi atoa noho totona, hereva haida oi torea. Hereva iboudiai oi torea diba lasi. Bema oi tohoa, reana hereva badadia haida do oi reaia. Sisiba namona ta be program ena hereva badadia sibona torea, emu Baibel stiuden o program ia kamonai diba lasi tauna dekenai do oi hahedinaraia totona. Ena be unai bamona tauna ia noho lasi, to bema emu torea be mai badina, hebouhebou murinai reana emu Witness lasi varavara dekenai oi hereva henia diba. Hereva haida torea bona herevalaia karadia amo, unai gaudia do oi laloaboio haraga lasi. Gaukaralaia bena do oi laloatao.
11 Lagani gunadia ai, distrik hebouhebou ena davana abia dalana be tadikaka ese aniani idia hoia karana amo. Ena be hebouhebou momo dekenai aniani do ia noho lasi, to gabu rentaia davana do ia noho, maikrofon gaudia abia bona naria, bona gau idauidau edia davana ia do bada. Edena dala ai unai davadia do ita abia? Mai eda ura ida ita henia monidia amo. Unai be Salamo 96:8 bona 2 Sivarai 31:12 edia hereva hegeregerena.
12 Mai Moale ida Iehova Idia Hanamoa Edia Kara Namo Amo: Guna, hebouhebou dekenai, kahirakahira tadikaka ibounai edia kara be namo herea, to haida be idia raka loaloa bona program ena nega lalonai idia herevahereva noho. Ma haida be daudau gabuna dekenai idia helai bona program idia kamonai henia namonamo lasi. Momokani, ita ta ia ura lasi ma haida idia laloa Iehova ia henia gauna ita laloa bada lasi.
13 Namona be hanaihanai sibona ita nanadaia: ‘Daika dainai bona dahaka totona hebouhebou dekenai lau mai?’ Iseda Dirava lalokau henia karana be iseda hereva, kara, bona lauma gaudia laloa karana amo ita hahedinaraia. (Iam. 3:13; 1 Pet. 2:2, 3, 12) Guna lagani momo taravatu aukadia idia haheaukalaia tadikaka be hebouhebou dekenai idia lao neganai, program idia hakala henia namo herea, hemataurai karana idia hahedinaraia, idia helai namonamo, bona hereva bona haheitalai idia laloa bada.
14 Emu Dabua Bona Toana Dainai, Dahaka Idia Laloa: Samuela ginigunana 16:7 ai, ita ia hamaoroa “taunimanima ese tau ena toana idia itaia, to [Iehova] ese tau ena kudouna ia itaia.” Unai dainai, taunimanima ese iseda toana amo ita do idia kota henia bamona. Taunimanima ese Keristani maurina dibaia totona bona tomadiho totona hebouhebou dekenai idia lao taudia edia dabua bona toana do idia raraia. Bema oi matamata bona sikuli dekenai o moni gaukara dekenai oi bamoa taudia ese tanobada taudia edia sitailo idia badinaia, reana Keristani taravatu badinaia bona dabua namodia atoa karana be oi ia tohoa gauna.
15 Tano idauidau ai edia dabua bona tauanina ena toana be tamona lasi. Keristani taudia idia ura mai manau bona mai hemataurai danu edia dabua idia hahedokilaia. Daika do ia diba dabua idia namo, eiava? Tama sina ese edia natudia edia dabua idia itaia neganai, idia ura lasi idia be murimuri sikuli memero kekeni edia toana hegeregerena. Hakaua hereva namodia idia noho abia hidi namodia ita karaia totona. Namona be Memero Kekeni Edia Henanadai Haere Maorodia bukana, karoa 11 ena hereva “Lauegu Dabua ese Egu Lalohadai Korikori Idia Hahedinaraia, A?” oi duahia lou.
16 Hebouhebou dekenai idia lao tadikaka bona taihu kahirakahira ibounai be hemataurai toana ia hahedinaraia dabuadia idia hahedokilaia. Bema elda taudia idia itaia haida edia dabua be unai bamona momokani lasi, hebou ia do hamatamaia lasi neganai, namona be mai hebogahisi ida sisiba idia henia unai dabua be hegeregere lasi Keristani hebouhebou totona. Mani emu kara, hebouhebou dekenai do idia mai Baibel stadi taudia ida ataiai ai torea gaudia, edena bamona kara bona dabua be namo, umui kikilaia.
17 Kamera Bona Kaset Teipi Gaukaralaia Daladia: Guna ita hereva bamona, bema ta ia ura ena kamera, o kaset teipi masini ia mailaia, namona be inai gaudia ia laloaboio lasi: Bema kamera, vidio kamera, eiava kaset teipi masini oi abia mai, mani emu tadikaka edia namo oi laloaboio lasi. Program ena nega lalonai bema oi loaloa momo o helai gabuna dekena amo oi toreisi, oi kahirakahira idia noho taudia edia kamonai karana do oi hadikaia. Unai gaudia oi gwadaia kau lasi hebouhebou ena maikrofon gaudia dekenai eiava ena paua poin dekenai; danu taunimanima edia raka gabudia oi koua lasi. Bema oi ura program ena laulau, vidio, eiava kaset oi karaia, unai be oiemu abia hidi. Laulau itaia bona kaset teipi kamonai lou karana ese ita idia hamoalea. To unai gaudia ita gaukaralaia neganai, mai aonega bona iseda tadikaka edia namo ita laloa guna dalana ai do ita gaukaralaia bena iboudiai ese program ena namo do idia moalelaia. Emu ruma dekenai oi giroa neganai, nega do ia noho unai gaudia kamonaia o itaia totona, a? Reana hereva haida oi torea be do ia hegeregere.
18 Helai Gabudia: Inai do ita gwauraia lou badina haida idia laloaboio: HELAI GAUDIA OI BIAGUA ENA NAMBA BE EMU FAMILI BONA OI IDA IDIA MAI TAUDIA EDIA NAMBA HEGEREGERENA SIBONA. Society ese ita idia boiria. Volantia taudia ese unai gabu ena davana idia henia. Bema sea ita biagua kava, unai be lalokau bona ma ta ita laloa karana, a?
19 Hebouhebou haida dekenai buruka taudia bona aena idia dika taudia totona gabu haida idia makaia. Mani emu kara idia makaia gabudia dekenai oi helai lasi bema oi be unai bamona tauna ta lasi. Danu, bema unai bamona tauna oi itaia, bona durua tauna be lasi, sea ta oi tahua ia totona.
20 Hebouhebou ai Aniani Naria Dalana: September 1995 Iseda Basileia Gaukara pepapepana lalonai, ita ia hamaoroa, ia gwau: “Gaukara haharagaia dalana be lagani 1995-96 ena distrik hebouhebou ai do idia hamatamaia; dalana ta be aniani do idia hamaragia, eiava hebouhebou haida ai aniani be lasi. Ai ese umui ibounai ai noia, bema mai dalana ta ta ena aniani ena aniani bona ena inuinu gauna ena inuinu gauna do umui mailaia.” Ia hahedinaraia dahaka dainai iseda karaia dalana ita haidaua bona edena dala ai ita ta ta ese iseda aniani bona inuinu gaudia do ita naria diba. Umui sibona lasi to hebouhebou dekenai do idia lao Baibel stiuden taudia ida umui duahia lou. Namona be, bema dala ia noho, idia oi hamaoroa idia lao taudia iboudiai ese sibodia edia aniani bona inuinu gaudia do idia abia mai hebouhebou dekenai.
21 Reana oi abia mai dina tubua totona gaudia haida be inai: ania dala be auka lasi gaudia, edia moni gaukara dekenai idia abia mai gaudia hegeregerena, mai vamu sanwis, au huahua, oi nadua vadaeni raisi o uma aniani. Inuinu gaudia be reana ti, kofi, loliwota, ranu, au huahua ena ranu, oi atoa plastik o flask ta lalonai be namo. Emu sea henunai oi atoa diba eski maragina ia namo. To eski badadia bona inuinu kekero gaudia oi abia mai lasi. Program idia karaia nega lalonai, namona be aniani oi ania lasi. Unai be idia henia noho lauma aniani laloa bada lasi karana.
22 Bema hebou idia biagua tadikaka be hebouhebou gabuna dekenai, o Society ia davaria mahuta gabudia dekenai aniani nadua taravatu haida idia atoa, do ita badinaia. Namona be dina tubua laga-ani ena badina maorona ita laloa namonamo, ia be aniani sisina bona tadikaka ida hebamo heheni negana. Ita, Iehova ena taunimanima, ita diba hebouhebou ena lauma aniani be gau badana bona tauanina gaudia edia anina be maragi dainai, unai lalohadai hegeregerena palani do ita karaia.
23 December 15, 1995 ai, “Dirava Hanamoa mai Moale Ida” Distrik Hebouhebou ginigunana do ia hamatamaia. Dina ta ta ibounai edia hebamo bona lauma gaudia namodia moalelaia totona oi hegaegae vadaeni, a? Ai guriguri Iehova ese emu hekwarahi, emu tadikaka bona taihu ida hebouhebou dekenai oi lao diba totona, do ia hanamoa, bona ita ibounai ese Iehova do ita hanamoa mai moale ida.
[Box on page 6]
Distrik Hebouhebou Ena Hereva Haida
Bapatiso: Bapatiso idia abia gwauraia taudia be Saturday dabai, program ia do hamatamaia lasi neganai, idia makaia gabuna dekenai do idia helai. Nega haida hemarai ia havaraia dabuadia ita itaia, unai be inai nega namona ia hadikaia diba gauna. Idia bapatiso gwauraia taudia ta ta iboudiai ese edia digudigu dabuadia hemataurai toana ia hahedinaraia gaudia bona tauele do idia mailaia. Bapatiso herevana bona hereva ia henia tadikakana ena guriguri murinai, seamani ese hadibaia hereva haida bona ane ena namba do ia henia. Ane ia ore murinai, atendan taudia ese bapatiso gwauraia taudia do idia hakaua lao bapatiso gabuna dekenai. Bapatiso ese unai tau bona Iehova ihuanai ia noho gwauhamatana ia laulaulaia, unai dainai taunimanima rua be idia rosia o imana idia dogoatao lalonai nega tamona ai do idia bapatisoa lasi.
Kadi: Mani emu kara, hebouhebou dekenai oi lao eiava oi rakatania negadia ai, emu kadi oi atoa. Ita loaloa neganai dala ia kehoa witness namona ita henia totona. Kadi bona ena plastik dogoatao gauna oi abia diba kongregesen dekenai, oi abia diba lasi hebouhebou gabuna ai. Laloaboio lasi, emu Advance Medical Directive/Release kadi, mai ena deit maorona, oi dogoatao. Betele taudia bona painia taudia ese edia ID kadi idia abia mai be namo.
Natu: Tama sina taudia e, emui natudia be edeseniai, bona kara namo hadibaia maduna be umui emui. Program ia heau noho lalonai emui natudia be umui kahirakahira idia helai, bona hebouhebou ia do hamatamaia lasi neganai idia umui hakaua lao toileti dekenai. Toileti idia gaukaralaia neganai, imana huria bona mei rumana hadikaia lasi karana umui hadibaia.
Umui Naria Namonamo: Bema ita naria namonamo hekwakwanai do ita davaria lasi. Nega momo taunimanima be edia ruma kahirakahira ai idia noho lasi neganai, raskol taudia ese idia hahisia. Namona be nega ibounai emu kohu oi hunia bona motuka oi lokaia. Hutuma badana idia itaia neganai raskol idia moale badina kohu momo do idia davaria. Unai dainai, aonega karana be idia oi dibagania lasi, helai gauna latanai emu kohu oi rakatania lasi. Keristani taudia sibodia lasi idia mai hebouhebou gabuna dekenai. NEGA IBOUNAI OIEMU NATUDIA BE OI KAHIRAKAHIRA IDIA NOHO.
Mani emu kara, hebouhebou gabuna idia naria murimuri taudia oi rini henia lasi, hebouhebou dekenai dahaka dahaka do ia vara davaria totona. Bema elda taudia idia diba lasi, kongregesen seketere oi noia hebouhebou naria tadikaka idia henia adres oi abia, bona revareva ta idia dekenai oi torea.
Aniani Hamaragia Karana Ena Namo
◼ Program vairanai, lalonai, bona murinai, gaukara be bada lasi dainai, hebamo negana do ia bada
◼ Aniani dipatmen kohudia momo lasi do idia naria
◼ Momo ese program ena hereva iboudiai do idia kamonaia
◼ Volantia taudia momo be dipatmen idaudia ai do idia heduru diba
◼ Nega do ia bada tiokratik gaukara ma haida totona
Inai Bamona Aniani Oi Mailaia Diba Dina Tubua Totona
◼ Aniani haragadia, emu tauanina do idia durua gaudia
◼ Sanwis, nadua vadaeni gaudia, au huahuadia
Hebouhebou Gabuna ai Inai Gau Oi Mailaia Lasi
◼ Kekero muramuradia
◼ Eski badadia